Ngokushesha—Izwe Elingenayo Impi!

NGO-DECEMBER 24, 1914, isosha eliselincane laseBrithani okuthiwa uJim Prince ladabula ezweni elingahlalwa muntu ukuze liyokhuluma nesosha laseJalimane elaliqeqeshelwe ukulwa lihamba ngezinyawo. LomJalimane walibuza: “Ngingum-Saxon. Wena ungum-Anglo-Saxon. Silwelani?” Eminyakeni eminingi kamuva, uPrince wavuma: “Namanje angikayazi impendulo yalowombuzo.”

Ngesonto elithile elingavamile ngo-1914, amasosha amabutho aseBrithani nawaseJalimane ahlangana, adlala ibhola likanobhutshuzwayo, futhi aphana izipho zikaKhisimusi. Eqinisweni, lesosivumelwano sesikhashana sokuyeka ukulwa sasingekho emthethweni. Ojenene babengafuni ukuba amabutho abo azi ukuthi “isitha” sasingesona isilwane esisabekayo esinonya esivezwe inkulumo-ze yempi. Kamuva isosha laseBrithani u-Albert Moren lakhumbula: “Uma umthetho wokuyeka ukudubula wawudlulele kwelinye isonto, kwakuyoba nzima kakhulu ukuphinde kuqaliswe impi.”

Lokho kunqanyulwa kobutha okuzenzekelayo kusikisela ukuthi ngisho namasosha amaningi aqeqeshiwe alangazelela ukuthula kunempi. Amasosha amaningi aye azi ngokwesaba okubangelwa impi angasamukela isaga seSipanishi esithi: “Makaye empini ongayazi impi ukuthi iyini.” Ngokungangabazeki, ukuhlolwa kwemibono yabantu bebonke emhlabeni wonke bekuyokwembula ukuthi inani elikhulu kakhulu likhetha ukuthula kunempi. Kodwa lesisifiso sendawo yonke sokuthula singaphumela kanjani ezweni elingenayo impi?

Ngaphambi kokuba kuqedwe impi, kumelwe kushintshe izimo zengqondo. Umthetho-sisekelo we-UN Educational, Scientific, and Cultural Organization uthi: “Njengoba izimpi ziqala ezingqondweni zabantu, isivikelo sokuthula kumelwe sakhiwe ezingqondweni zabantu.” Nokho umphakathi wanamuhla, lapho ukungethembani nenzondo kudlange khona, uyaqhubeka uba nobudlova, awubi nokuthula.

Nakuba kunjalo, uNkulunkulu ngokwakhe wathembisa ukuthi ngolunye usuku ukuthula kuyogxiliswa ezingqondweni zabantu abathambekele ekulungeni. Ngomprofethi wakhe u-Isaya, wathi: “[UNkulunkulu] uyakwahlulela phakathi kwezizwe, anqume phakathi kwabantu abaningi; bayakukhanda izinkemba zabo zibe-ngamakhuba, nemikhonto yabo ibe-ngocelemba; isizwe asiyikuphakamisela isizwe inkemba, zingabe zisafunda ukulwa.”—Isaya 2:4.

Ukuthuthukisa Ukuthula Engqondweni

Ingabe loloshintsho oluphawulekayo ekucabangeni lungenzeka? Ingabe abantu bayoke bakufunde ukulondoloza ukuthula kunokukhazimulisa impi? Cabanga ngesibonelo sikaWolfgang Kusserow. Ngo-1942 amaNazi anquma ikhanda lalomJalimane oneminyaka engu-20 ngoba ‘engenakufunda ukulwa.’ Kungani akhetha ukufa? Enkulumweni elotshiwe, wacaphuna izimiso ezingokomBhalo njengesithi, “Wothanda umakhelwane wakho njengalokhu uzithanda wena” nesithi, “Bonke abaphatha inkemba bayakubhubha ngenkemba.” (Mathewu 22:39; 26:52) Kamuva wabuza ngokungagunci: “Ingabe uMdali wethu wakubhalela izihlahla konke lokhu?”

Izwi likaNkulunkulu, elilotshwe eBhayibhelini, “linamandla” futhi lashukumisa loFakazi kaJehova osemusha ukuba aphishekele ukuthula, kungakhathaliseki ukuthi yini eyenzekayo. (Heberu 4:12; 1 Petru 3:11) Kodwa uWolfgang Kusserow akuyena yedwa owaphishekela ukuthula ngaleyondlela. Encwadini ethi The Nazi Persecution of the Churches 1933-45, uJ. S. Conway ulandisa ngemibhalo egciniwe engokomthetho yamaNazi efakazela ukuthi oFakazi BakaJehova njengeqembu benqaba ukuthatha izikhali. Njengoba uConway ekuveza, lokho kuma kokuba nesibindi kwakusho ukuzisayinela incwadi yesigwebo sokufa.

OFakazi BakaJehova namuhla bayaqhubeka bephishekela ukuthula, kungakhathaliseki ukuthi baluhlanga luni noma basizwe sini. Kungani? Ngoba bafunde eBhayibhelini ukuthi izinceku zikaNkulunkulu zeqiniso kumelwe zikhande izinkemba zazo zibe ngamakhuba. U-Alejandro, insizwa yase-Argentina eyathuthela e-Israel ngo-1987, angaba ubufakazi obuphilayo baleliqiniso.

Iminyaka emithathu u-Alejandro wayehlala epulazini lapho efunda eyunivesithi futhi esebenza emahhotela nasemathilomu ahlukahlukene. Phakathi nalesisikhathi, waqala ukufunda iBhayibheli futhi wayefuna injongo ekuphileni. Ngaphezu kwakho konke, walangazelela ukubona izwe abantu abangajabulela kulo ukuthula nobulungisa. U-Alejandro—ongumJuda—wasebenzelana namaJuda nama-Arabhu kodwa wakhetha ukungathathi hlangothi lwanoma yisiphi salezizizwe.

Ngo-1990 umngane owayetadisha iBhayibheli noFakazi BakaJehova wamemela u-Alejandro emhlanganweni wosuku olulodwa eHaifa. Emangazwe ukuthola amaJuda nama-Arabhu angu-600 ehlangene ngenjabulo kulomhlangano, wacabanga, ‘Lena indlela efanele abantu okumelwe baphile ngayo.’ Phakathi nezinyanga eziyisithupha, naye waba uFakazi futhi manje unikela ngesikhathi sakhe esiningi ekushumayeleni isigijimi seBhayibheli sokuthula.

Indlela UNkulunkulu Ayoletha Ngayo Ukuthula

Njengoba lezizibonelo zithinta inhliziyo, azivamile ezweni lanamuhla. Nakuba isimiso samanje sikhuluma ngokuthula, sibhebhethekisa impi. Ubungathanda yini ukuba emgwaqweni ohlala kuwo kube nezakhamuzi ezichitha amaphesenti aphakathi kwangu-7 nangu-16 omholo wazo zithenga izibhamu futhi zivikela imizi yazo? Eqinisweni, yilokho izizwe ebezilokhu zikwenza ngemali esetshenziswa kwezempi eminyakeni yamuva. Akumangalisi ukuthi isiprofetho sika-Isaya sembula ukuthi isintu sisonke asisoze sazikhanda izinkemba zaso ukuba zibe ngamakhuba kuze kube yilapho uNkulunkulu ‘eqondisa izimo zabantu abaningi.’ Uyokwenza kanjani lokho?

UMbuso kaJehova uNkulunkulu uyindlela eyinhloko yokuqondisa izinto. Umprofethi uDaniyeli wabikezela ukuthi ‘uNkulunkulu wasezulwini wayeyomisa umbuso ongasoze wachithwa.’ LoMbuso, enezela, “uyakuchoboza, uqede yonke lemibuso [ohulumeni basemhlabeni], wona uqobo ume phakade.” (Daniyeli 2:44) Lamazwi embula ukuthi uMbuso kaNkulunkulu uyolawula ngokuphelele kuwo wonke umhlaba. Ngokususa imingcele yobuzwe, loMbuso uyokwenza ukuba izimpikiswano ziphelelwe isikhathi. Ngaphezu kwalokho, njengoba izikhonzi zawo ziyoba “ngabafundi bakaJehova,” ukuthula kwazo “kuyakuba-kukhulu.” (Isaya 54:13) Akumangalisi-ke ukuthi uJesu wasitshela ukuba sithandaze kuNkulunkulu: “Mawufike umbuso wakho”!—Mathewu 6:10.

Ukususa Izithiyo Ezingokwenkolo

UNkulunkulu uyosusa nezithiyo ezingokwenkolo ezivimbela ukuthula. Inkolo yabangela impi eyalwiwa ngezikhali eyathatha isikhathi eside kakhulu emlandweni—iZimpi Zenkolo, noma “Izimpi Ezingcwele,” ezaqaliswa uPapa u-Urban II ngo-1095 C.E.a Ekhulwini lethu leminyaka abefundisi baye bavelela ekugqugquzeleni nasekuzuzeni ukusekelwa kwezimpi okuthandwayo, ngisho nalezo ezingezezwe.

Sibhekisela emasontweni amaKristu okuzisholo phakathi neMpi Yezwe I, isazi-mlando uPaul Johnson sabhala: “Abefundisi abakwazanga, futhi ngezinga elikhulu babengazimisele, ukubeka ukholo lobuKristu ngaphambi kobuzwe. Abaningi bakhetha inkambo elula kakhulu futhi balinganisa ubuKristu nokushisekela izwe. Amasosha angamaKristu awo wonke amahlelo ayenxuswa ukuba abulalane egameni loMsindisi wawo.”

Kuningi okwenziwe yinkolo ekuqaliseni impi kunokuthuthukisa ukuthula. Eqinisweni, iBhayibheli lifanisa inkolo yamanga ‘nesifebe’ esixhaphaza ababusi bezwe. (IsAmbulo 17:1, 2) UNkulunkulu uthi lesisifebe siyisoni esinecala elikhulu ngokuchitha igazi labo bonke ababulawa emhlabeni. (IsAmbulo 18:24) Ngakho, uJehova uNkulunkulu uyosisusa phakade lesisithiyo sokuthula.—IsAmbulo 18:4, 5, 8.

Ngisho nakuba lezozici ezihlukanisayo ezinjengezombangazwe nenkolo yamanga zinganyamalala, ukuthula akusoze kwaba yinto eqinisekile ngaphandle kokususwa komshoshozeli wempi omkhulu kakhulu—uSathane uDeveli. Lowo umsebenzi wokugcina uMbuso kaNkulunkulu oyowenza esimisweni sawo sokuletha ukuthula okuphelele emhlabeni. Incwadi yeBhayibheli yesAmbulo ichaza ukuthi uSathane ‘uyobanjwa’ futhi ‘aboshwe’ bese ‘ephonswa kwalasha’ ukuze “angabe esadukisa izizwe.” Ngemva kwalokho uyobhujiswa ngokuphelele.—IsAmbulo 20:2, 3, 10.

Isithembiso seBhayibheli sokuphela kwempi asilona neze iphupho. Ilungiselelo likaJehova uNkulunkulu lokuthula selimisiwe kakade. UMbuso wakhe usumisiwe emazulwini futhi ulungele ukuthatha ezinye izinyathelo ukuze uqinisekise ukuthula kwembulunga yonke. Okwamanje, izigidi zoFakazi BakaJehova, ezisekela lohulumeni wasezulwini, ziye zafunda ukuphila ngokuthula.

Khona-ke, kuyacaca ukuthi sinezizathu ezizwakalayo zokukholelwa ukuthi izimpi zingagwenywa. Okungcono nakakhulu, singabheka futhi osukwini oluseduze kakhulu uJehova ayophelisa ngalo impi phakade. (IHubo 46:9) Uyoqikelela ukuthi ngokushesha kuba nezwe elingenayo impi.

[Umbhalo waphansi]

[Isithombe ekhasini 7]

Ungaphila ezweni elisha elingenayo impi