Ubani Oyoholela Isintu Ekuthuleni?
INGABE iqiniso lokuthi abantu abanakukuletha ukuthula lisho ukuthi asisoze sakubona ukuthula? Cha. Njengoba nje uSathane, onamandla kunathi, eyisithiyo sokugcina sokuthula emhlabeni, kanjalo ukhona Lowo onamandla ngisho nangaphezu kukaSathane ekugcineni oyoholela isintu ekuthuleni. IBhayibheli, elisitshela ngoSathane, liyasitshela nangaLona. Lithi: “Umbuso uyakuba-semahlombe akhe, negama lakhe liyakuthiwa uMluleki omangalisayo, uNkulunkulu onamandla, uYise ongunaphakade, iNkosi yokuthula.” (Isaya 9:6, 7) Ingubani leNkosi Yokuthula? Ayikho enye ngaphandle kukaJesu Kristu, futhi angakuletha ukuthula ngoba ufaneleka kangcono kakhulu kunathi. Ngaziphi izindlela?
Okungaphezu Kwezimfanelo Zobuntu
Phakathi kokunye, uJesu akafi. Yiqiniso, waphila njengomuntu futhi wafa ukufa okuwumhlatshelo. Kodwa kamuva wavuselwa ekuphileni kwasezulwini okungenakufa, futhi kukulesimo lapho eba khona iNkosi Yokuthula. Kungalesosizathu esinye isiprofetho sithi: “[U]mbuso wakhe awuyikuba-nakuphela.” (Luka 1:32, 33) Ngokungafani nombusi waseMpumalanga uAśoka, uJesu uyophila ngokungapheli ukuze aqiniseke ukuthi umsebenzi wakhe omuhle awonakaliswa abalandeli-zikhundla abaphansi.
Ngaphezu kwalokho, uJesu akanindwanga yisono. Ukubusa kwakhe kusekelwe ekuhlakanipheni kokwesaba uNkulunkulu nasezimisweni eziqondile. Umprofethi uIsaya wabikezela: “U[m]oya kaJehova uyakuhlala phezu kwakhe, umoya wokuhlakanipha nowokuqonda, umoya wamasu nowamandla, umoya wokwazi nowokumesaba uJehova. . . . akayikwahlulela ngokubona kwamehlo akhe, anganqumi ngokuzwa kwezindlebe zakhe. Kepha uyakwahlulela abampofu ngokulunga.” (Isaya 11:2-4) Ngokungafani nabaseYurophu benkathi yangaphambili, uJesu ngeke alondoloze ukuthula ekhaya kuphela ukuze ahlasele kwamanye amazwe. Ngaphansi kwakhe, ukuthula kuyoba sendaweni yonke.
Futhi, uJesu unawo amandla okuletha ukuthula. Isiprofetho sithi: “U[m]oya kaJehova . . . , umoya wamasu nowamandla,” uphezu kwakhe. Lomoya wawusetshenziswa ekudalweni kwendawo yonke kanye nayo yonke imisebenzi yamandla yokulunga ebikwa eBhayibhelini. Ngisho nomphikisi omkhulu, uSathane, akanazo izikhali eziyomelana ngokuphumelelayo namandla omoya kaNkulunkulu.
Izinyathelo Eziyisa Ekuthuleni
UJesu uyosiholela kanjani isintu ekuthuleni? Kungase kukumangaze ukwazi ukuthi useqalile kakade. Encwadini yesiprofetho yesAmbulo, uJesu ubonwa emukela ubukhosi kuNkulunkulu eMbusweni wasezulwini. (IsAmbulo 11:15) Uma sihlolisisa iziprofetho zeBhayibheli bese siziqhathanisa nezenzakalo ezenzeka ekhulwini lethu leminyaka, siyabona ukuthi ukubekwa kukaJesu esihlalweni sobukhosi njengeNkosi kwenzeka ezulwini emuva ngo-1914. (Mathewu 24:3-42) Lokho kwakuyisinyathelo esiyinhloko ekuletheni ukuthula emhlabeni.
Nokho, uma lokho kunjalo, kungani iMpi Yezwe I yagqashuka ngo-1914? Futhi kungani ikhulu lethu leminyaka libone izimpi ezimbi kakhulu kunanoma yiliphi elinye emlandweni? Yingoba isenzo sokuqala seNkosi yasezulwini sasiwukuxosha uSathane unomphela emazulwini nokumlahlela phansi emhlabeni. Waba yini umphumela? Isiprofetho sithi: “Maye kuwe-mhlaba nakuwe-lulwandle, ngokuba uSathane wehlele kini enolaka olukhulu, azi ukuthi unesikhathi esifushane!” (IsAmbulo 12:7-12) Izimpi ezinkulu zekhulu lethu leminyaka zihlangene nentukuthelo kaSathane. Kodwa phawula: intukuthelo kaSathane ‘ingeyesikhathi esifushane.’ Ngokushesha lolusizi luzophela!
Nokho, ngaphambi kokuba luphele, iNkosi Yokuthula yenza amanye amalungiselelo abalulekile okuthula. Okokuqala, isintu kudingeka sazi ngenjongo kaNkulunkulu yokuletha ukuthula ngoKristu. Ngokuvumelana nalokhu, uJesu waprofetha ukuthi esikhathini sethu “lelivangeli lombuso liyakushunyayelwa ezweni lonke, kube-ngubufakazi ezizweni zonke.” (Mathewu 24:14) Ekugcwalisekeni kwalokhu, izindaba ezinhle ziyashunyayelwa namuhla oFakazi BakaJehova kuzo zonke izingxenye zembulunga.
Khona-ke, abanhliziyo-zilungile kufanele bafundiswe ngezindlela zokuthula. IBhayibheli liyathembisa: “Bonke abantwana bakho bayakuba-ngabafundi bakaJehova, nokuthula kwabantwana bakho kuyakuba-kukhulu.” (Isaya 54:13) Izigidi zabanhliziyo-zilungile zithola lemfundo ngisho namanje.
Isinyathelo Esilandelayo
Manje cishe sekuyisikhathi sesinye isinyathelo esiwujuqu enqubweni yokwenza ukuthula. Siyini lesosinyathelo? Yileso abaningi abasazi ngegama kodwa bembalwa abazi injongo yangempela yaso. IBhayibheli lisibiza ngokuthi ‘impi yosuku olukhulu lukaNkulunkulu uMninimandla onke,’ noma iArmagedoni. (IsAmbulo 16:14, 16) Abaningi bacabanga ngeArmagedoni njengempi yenuzi eyobhubhisa impucuko. Ngokuphambene, iyisinyathelo esiqondile esiyothathwa uJesu, iNkosi Yokuthula, sokufeza izinto ezibalulekile ukuze kube khona ukuthula.
Okokuqala, iArmagedoni iyosusa zonke izithiyo zokuthula ezingabantu. Isiprofetho esikumaHubo 37:10 sithi: “Kusengumzuzwana, omubi angabe esabakho; kuyakuthi lapho uhlola indawo yakhe, uyakube engasekho.” Yebo, uJesu uyosusa “omubi”—ababangi bempi, izigebengu, amaphekula, kanye nabo bonke abenqaba ukwamukela iNkosi enkulu Yokuthula—endaweni yasemhlabeni. Ngeke besaba nalo ilungelo lokuqhubeka bephila kuleplanethi.—IsAmbulo 19:19-21.
Okwesibili, ngesikhathi seArmagedoni lesiprofetho sikaDaniyeli siyogcwaliseka: “Ezinsukwini zalawomakhosi uNkulunkulu wasezulwini uyakumisa umbuso ongasoze wachithwa nobukhosi bawo bungayikushiyelwa kwabanye abantu, kepha uyakuchoboza, uqede yonke lemibuso, wona uqobo ume phakade.” (Daniyeli 2:44) Ukuhlukaniswa ngokobuzwe okuye kwaholela ngokuvame kakhulu empini kuyoqedwa. Ekugcineni, kuyoba nohulumeni wezwe ngaphansi kombusi esingamethemba!
IArmagedoni iyofika nini? IBhayibheli alisho. Kodwa izenzakalo zezwe ezigcwalisa isiprofetho zibonisa ukuthi izofika ngokushesha okukhulu. IBhayibheli libikezela ngokucacile isenzakalo esiyokwenzeka ngokushesha ngaphambi kwalokho. Umphostoli uPawulu uthi: “Nxa bethi: Ngukuthula nokuhlala kahle, khona ukubhujiswa kuyabazuma.” (1 Thesalonika 5:3) Khona-ke, ngokushesha ngemva kokubhubhisa okuzumayo okuyogcina sekuyiArmagedoni, isithiyo sokuthula esikhulu kunazo zonke siyosuswa. ‘Isikhathi esifushane’ sikaSathane siyobe sesiphelile, futhi uyobekwa esimweni lapho engasenakukwazi khona ukudala inkathazo lapha emhlabeni. (IsAmbulo 20:1-3) Yeka impumuzo!
Izwe Elinokuthula
Ake ubone ngeso lengqondo isimo ngalesosikhathi. Umhubi waprofetha: “Abathobekileyo bazakulidla ifa lomhlaba, bathokoze ngokuthula okukhulu.” (IHubo 37:11) Laba abathobekileyo bayoqhubeka begcwalisa isiprofetho esihle sikaIsaya: “Bayakukhanda izinkemba zabo zibe-ngamakhuba, nemikhonto yabo ibe-ngocelemba; isizwe asiyikuphakamisela isizwe inkemba, zingabe zisafunda ukulwa.”—Isaya 2:4.
Ekugcineni, ngokokuqala ngqá kusukela e-Edene, bonke abantu abaphilayo bayojabulela isibusiso sikaJehova uNkulunkulu, futhi uyofeza isithembiso sakhe: “Bheka, itabernakele likaNkulunkulu likubantu; uyakuhlala nabo, babe-ngabantu bakhe, yena uNkulunkulu abe-nabo, azesule izinyembezi zonke emehlweni abo; ukufa akusayikuba-khona; nokudabuka, nokukhala, nobuhlungu akusayikuba-khona; ngokuba okokuqala kudlulile.”—IsAmbulo 21:3, 4.
Ithemba Eliqinile
Khona-ke, ubani oyoholela isintu ekuthuleni? UJesu Kristu, iNkosi Yokuthula emisiwe. Ingabe leli ithemba eliwusizo kithi namuhla? Nokho, uma izithembiso zeBhayibheli bezingenakwethenjelwa, bekungeke kube nethemba elingokoqobo lokuthula. Abantu bebeyoqhubeka belwa futhi bebulalana bengenawo umbono wokuphela. Kodwa iBhayibheli linakho ukwethenjelwa, futhi uMbuso kaNkulunkulu ngaphansi kukaKristu uyokuletha ukuthula. Sikukhuthaza ukuba ulalele izindaba ezinhle zoMbuso ezilethwa oFakazi BakaJehova ekhaya lakho futhi uzibonele lokhu ngokwakho. Khona-ke, lapho isikhathi sifika, ungase ube phakathi kwabathobekileyo abayodla ifa lomhlaba bathokoze ngokuthula okukhulu.
Ithemba lokuthula okuxoxwa ngalo kulesihloko livela eBhayibhelini. Namuhla, lapho abaningi bengasakholelwa eBhayibhelini, ungase ungabaze ukuthi lelithemba liwusizo noma cha. OFakazi BakaJehova bakukholelwa ngokuqinile ukuthi liyilo. Bamukela iBhayibheli njengeliyiZwi likaNkulunkulu eliphefumlelwe, ngaleyondlela njengelinokwethenjelwa ngokuphelele. Ngo-1989 bakhipha incwadi enesihloko esithi IBhayibheli—Izwi LikaNkulunkulu Noma Elomuntu? enikeza ubufakazi obuningi baleliqiniso. Okunye kokwaziswa okukuleyoncwadi kuxoxwa ngakho ezihlokweni ezimbili ezilandelayo, esikumema ukuba uzifunde.
Ukwaziswa okwengeziwe ngesithembiso seBhayibheli sokuthula kuyovela esihlokweni esithi “Ukuthula Kwezwe—Kuyosho Ukuthini Ngempela?” esiyokhishwa kuNqabayokulinda ka-April 15, 1990.
[Amazwi acashunwe esihlokweni ekhasini 8]
UJesu kuphela onezimfanelo zokuholela isintu ekuthuleni
[Amazwi acashunwe esihlokweni ekhasini 9]
Namuhla, izindaba ezinhle zoMbuso ziyashunyayelwa kuzo zonke izingxenye zembulunga