Ingabe OFakazi BakaJehova Bayihlelo?
UJESU KRISTU wamangalelwa ngokuthi uyisidakwa, isiminzi, owephula iSabatha, ufakazi wamanga, umhlambalazi kaNkulunkulu, nesithunywa sikaSathane. Wabuye wamangalelwa ngokuthi uyavukela.—Mathewu 9:34; 11:19; 12:24; 26:65; Johane 8:13; 9:16; 19:12.
Ngemva kokufa nokuvuswa kukaJesu, abafundi bakhe ngokufanayo baba yizisulu zokubekwa amacala angathi sína. Elinye iqembu lamaKristu ekhulu lokuqala lahudulelwa kubaphathi bomuzi ngabantu bememeza: ‘Laba bayaluzisa izwe lonke.’ (IzEnzo 17:6) Kwesinye isenzakalo umphostoli uPawulu nomngane wakhe uSila bayiswa kuziphathimandla futhi bamangalelwa ngokuphazamisa kakhulu umuzi waseFilipi.—IzEnzo 16:20.
Kamuva uPawulu wamangalelwa ngokuba “yishinga evusa ukwambuka phakathi kwabaJuda ezweni lonke” nangokuzama ‘ukungcolisa ithempeli.’ (IzEnzo 24:5, 6) Amadoda avelele angamaJuda eRoma asichaza ngokunembile isimo sabalandeli bakaJesu lapho evuma: “Ngokuba siyazi ngalelihlelo ukuthi liyaphikiswa ezindaweni zonke.”—IzEnzo 28:22.
Ngokusobala, leliqembu elisha elakhiwa uJesu Kristu abanye babelibheka njengeqembu lenkolo elinemibono nemikhuba eyeqisayo eyayishayisana nalokho okwakwemukelwa njengokuziphatha okuvamile komphakathi ngalezozinsuku. Ngokungangabazeki, abaningi namuhla bebeyobheka amaKristu njengehlelo elibhubhisayo. Ngokuvamile ababebamangalela babengamalungu omphakathi avelele nahlonishwayo, futhi kubonakala sengathi lokhu kwakwenza lamacala abe mabi kakhulu. Abaningi babewakholelwa amacala ayethweswa uJesu nabafundi bakhe. Nokho, njengoba kungenzeka uyazi, wonke lamacala ayengamanga! Iqiniso lokuthi abantu bazisho lezizinto alizange lizenze zibe yiqiniso.
Kuthiwani ngesikhathi sanamuhla? Ingabe bekungaba okunembile ukubiza oFakazi BakaJehova njengeqembu lenkolo elinemibono nemikhuba eyeqisayo eshayisana nalokho okumukelwa njengokuziphatha okuvamile komphakathi? Ingabe oFakazi BakaJehova bayihlelo?
Lokho Ubufakazi Obukubonisayo
Isikhulu sikahulumeni sasedolobheni laseSt. Petersburg, eRussia, sachaza: “Sachazelwa ukuthi oFakazi BakaJehova bawuhlobo oluthile lwehlelo eliwumshoshaphansi eliqhutshwa ebumnyameni futhi elinabantu ababulala abantwana bese bezibulala bona.” Nokho, muva nje abantu baseRussia baye bajwayelana kangcono nesimo esingokoqobo soFakazi. Ngemva kokusebenza noFakazi BakaJehova lapho kulungiselelwa umhlangano wezizwe, sona lesisikhulu saphawula: “Manje ngibona abantu abavamile, abamomothekayo, abangcono kunabantu abaningi engibaziyo. Banokuthula nesizotha, futhi bathandana kakhulu.” Sanezela: “Angiqondi ngempela ukuthi kungani abantu bekhuluma amanga angaka ngabo.”
OFakazi BakaJehova abaqhubi imihlangano eyisiko, futhi ukukhulekela kwabo akwenziwa ekusithekeni. Umlobi ongeyena uFakazi uJulia Mitchell Corbett uyaphawula: “Lapho behlangana, ngokuvamile ngaphezu kwesikhathi esisodwa ngesonto, emaHholo OMbuso (izindawo zabo zokuhlangana azibizwa ngokuthi amasonto), basebenzisa isikhathi sabo esiningi befunda iBhayibheli futhi bexoxa ngalo.” Izindawo zabo zokuhlangana ziphawulwa ngokucacile ngophawu. Imihlangano ingeyawo wonke umuntu, futhi umphakathi uyamenywa ukuba ube khona. Nakuba izivakashi zingamenyezelwa zamukelwa ngokukhethekile.
“OFakazi baye bazizuzela idumela elihle lokuba abathembekile, abathobekile, nabakhuthele,” kunezela uCorbett encwadini yakhe ethi Religion in America. Abaningi abangebona oFakazi bakuvuma kalula ukuthi ayikho into engavamile noma eyisimanga ngoFakazi BakaJehova. Ukuziphatha kwabo akushayisani nalokho okwamukelwa njengokuziphatha okuvamile komphakathi. I-New Encyclopædia Britannica ikuveza ngokucacile ukuthi oFakazi “bagcizelela indinganiso ephakeme emikhutsheni yokuziphatha komuntu siqu.”
Umqondisi wezindaba nezinhlelo ezikhethekile zesiteshi sethelevishini e-United States wabhalela oFakazi BakaJehova esabela embikweni obandlulula oFakazi owawenziwe ohlelweni lwezindaba oluthi 60 Minutes ku-TV. Wathi: “Uma abantu abaningi bebephila ngendlela efana neyenkolo yenu, lesisizwe besingenakuba sesimweni esikuso. Ngingomunye wabacosheli bezindaba abaziyo ukuthi inhlangano yenu isekelwe othandweni nasokholweni oluqinile kuMdali. Ngifuna ukuba nazi ukuthi akubona bonke abacosheli beziNdaba abanobandlululo.”
Inkolo Eyaziwa Kahle
Ingabe kulungile ukuthi oFakazi BakaJehova bayiqembu elincane lenkolo elinemibono engavamile? Ngandlela-thile oFakazi BakaJehova bambalwa ngenani uma beqhathaniswa nezinkolo ezithile. Nokho, khumbula lokho uJesu akusho: “Isango lincane nendlela iyingcingo eyisa ekuphileni; bayingcosana abayifumanayo.”—Mathewu 7:13, 14.
Nokho, oFakazi abalona nakancane ihlelo elincane elinemibono engavamile. Entwasahlobo ka-1993, abantu abangaphezu kwezigidi ezingu-11 baba khona eSikhumbuzweni sokufa kukaKristu esigujwa oFakazi. Kodwa okubaluleke kakhulu kunenani labo isimo sabo nokuziphatha okuyisibonelo, okuye kwabangela ukuba batuswe emhlabeni wonke. Ngokungangabazeki lokhu kuye kwaba isici esabangela amazwe amaningi abaqaphele ngokomthetho njengenkolo eyaziwayo, yeqiniso.
Isinqumo samuva esithathwe yi-European Court of Human Rights singesivelele. Sathi oFakazi kufanele babe nenkululeko yokucabanga, kanembeza, nengokwenkolo nokuthi banelungelo lokukhuluma ngokholo lwabo nokufundisa abanye ngalo. Lenhlangano ibingeke inqume ngalendlela ukuba oFakazi BakaJehova bebaziwa ngokusebenzisa izindlela zobuqili ezingamukeleki ukuze bathole amalungu noma ukuba bebesebenzisa izindlela ezinethonya ukuze balawule izingqondo zabalandeli babo.
Abaningi emhlabeni wonke bajwayelene noFakazi BakaJehova. Ezigidini ezingebona oFakazi kodwa ezitadisha iBhayibheli noFakazi noma ezake zatadisha nabo esikhathini esithile, siyabuza, Ingabe kuye kwaba khona noma yimiphi imizamo yokulawula ukucabanga kwenu? Ingabe oFakazi baye basebenzisa izindlela zokulawula imiqondo yenu? Ngokungangabazeki impendulo yenu eqotho iyothi “cha.” Ngokusobala, ukuba kwasetshenziswa lezizindlela, bekuyoba nenani elikhulu lezisulu ukudlula noma iyiphi inkulumo evuna oFakazi BakaJehova.
“Bahileleke Ngokujulile Ekusizeni Abantu”
Ngokuvamile amalungu amahlelo ayazehlukanisa nomkhaya, abangane, ngisho nanomphakathi uwonke. Ingabe kunjalo ngoFakazi BakaJehova? “Angiyena omunye woFakazi BakaJehova,” kubhala umcosheli wezindaba eRepublic yaseCzech. Nokho, wanezela: “Kusobala ukuthi [oFakazi BakaJehova] banamandla amangalisayo okuziphatha. . . . Bayawaqaphela amagunya ohulumeni kodwa bakholelwa ukuthi uMbuso kaNkulunkulu kuphela ongase ukwazi ukuxazulula zonke izinkinga zesintu. Kodwa phawula ukuthi—ababona abashiseka ngokungenangqondo. Bangabantu abahileleke ngokujulile ekusizeni abantu.”
Futhi abahlali emiphakathini yabo bodwa, bezihlukanisa nezihlobo nabanye. OFakazi BakaJehova bayaqaphela ukuthi kuwumthwalo wabo wemfanelo ongokomBhalo ukuthanda nokunakekela imikhaya yabo. Bahlala futhi basebenze nabantu bazo zonke izinhlanga nezinkolo. Lapho kugadla izinhlekelele, bayashesha ukusabela ngamalungiselelo osizo nangolunye usizo lomusa.
Okubaluleke kakhulu, bahileleke esimisweni sokufundisa esingenakuqhathaniswa. Zingaki izinkolo ezinesimiso esihleliwe sokuhambela ngokuqondile bonke abantu abasemphakathini yazo? OFakazi BakaJehova benza lokhu emazweni angaphezu kuka-200 nangezilimi ezingaphezu kuka-200! Ngokusobala, oFakazi BakaJehova “bahileleke ngokujulile ekusizeni abantu.”
Banamathela Ngokuqinile EBhayibhelini
Kuyavunywa, izimfundiso zoFakazi BakaJehova zihlukile kwezinikezwa amasonto. OFakazi BakaJehova bakholelwa ukuthi uJehova unguNkulunkulu umninimandla onke nokuthi uJesu uyiNdodana yakhe, hhayi ingxenye kankulunkulu onguziqu-zintathu. Ukholo lwabo lusekelwe ngokuqinile enkolelweni yokuthi uMbuso kaNkulunkulu kuphela ongakhulula abantu abahluphekayo. Baxwayisa abantu ngokubhujiswa okuseduze kakhulu kwalesisimiso sezinto esonakele. Bashumayela ngesithembiso sikaNkulunkulu sepharadesi lasemhlabeni lesintu esilalelayo. Abasihloniphi isiphambano. Abawugubhi uKhisimusi. Bakholelwa ukuthi umphefumulo uyafa nokuthi asikho isihogo somlilo. Ngeke balidle igazi, noma bamukele ukumpontshelwa igazi. Abahileleki kwezombangazwe futhi abahlanganyeli empini. Ingabe wake wazibuza ukuthi kungani izimfundiso zoFakazi BakaJehova zihluke kangaka?
Iphephandaba laseMassachusetts, i-Daily Hampshire Gazette, lichaza ukuthi “ukuchaza iBhayibheli okungaguquguquki” koFakazi BakaJehova “kwenqabela imisebenzi eminingi abanye abayithatha njengefanelekile . . . , konke lokhu bekwenza ngoba bezama ukulandela isibonelo samaKristu ekhulu lokuqala nezwi leBhayibheli.” I-Encyclopedia of Religion iyavuma ukuthi “konke abakukholelwayo kusekelwe eBhayibhelini. ‘Baqinisekisa ngemibhalo’ (okungukuthi, bavula emibhalweni ukuze basekele) cishe yonke inkulumo ephathelene nokholo, bamukela igunya leBhayibheli ngaphandle kokungabaza, eliwalahla ngokuphelele amasiko.” Incwadi ethi Religion in America ithi: “Leliqembu alikaze lilahlekelwe umbono walo ngokutadisha iBhayibheli, futhi izimfundiso zalo zisekelwa isimiso sezikhombo zemibhalo esicacile.”
Ubani Umholi Wabo?
Kungenxa yakho kanye lokhu kunamathela ezimfundisweni zeBhayibheli okwenza ukuba ukuhlonishwa ngokweqile nokukhonzwa kwabaholi abangabantu okukulamahlelo namuhla kungatholakali koFakazi BakaJehova. Bayawulahla umqondo wokuhlukaniswa kwesigaba sabefundisi nabantu abavamile. I-Encyclopedia of Religion ngokufanele ithi ngoFakazi BakaJehova: “Isigaba sabefundisi neziqu ezihlukanisayo kwenqatshelwe.”
Balandela uJesu Kristu njengoMholi wabo nanjengeNhloko yebandla lobuKristu. UJesu owathi: “Maningabizwa ngokuthi Rabi; ngokuba munye umfundisi wenu, nina nonke ningabazalelwane. Ningabizi-muntu emhlabeni ngokuthi uyihlo; ngokuba munye uyihlo, osezulwini. Futhi ningabizwa ngokuthi abaholi; ngokuba munye umholi wenu, uKristu.”—Mathewu 23:8-12.
Kusobala ukuthi oFakazi BakaJehova abalona nakancane ihlelo njengoba nje noJesu ayengesona nakancane isiminzi nesidakwa. Kuyavunywa, akubona bonke abathonywa imibiko engamanga ngoJesu nabafundi bakhe abawela ogibeni lokumnyundela. Kungenzeka ukuthi abanye babemane betshelwe okungeyikho. Uma unemibuzo ngoFakazi BakaJehova nezinkolelo zabo, kungani ungazimiseli ukubazi kangcono? Iminyango yamaHholo abo oMbuso ivulekele bonke abafuna iqiniso.
Nawe ungazuza ekuhloleni kwabo ngokunakekela ulwazi oluqondile lweBhayibheli futhi ufunde ukukhulekela uNkulunkulu ngokuvumelana namazwi kaJesu: “Isikhathi siyeza, sesikhona namanje, lapho abakhulekayo abaqinisileyo beyakukhuleka kuBaba ngomoya nangeqiniso; ngokuba uBaba ufuna abakhuleka kuye abanjalo.”—Johane 4:23.