Ingabe Uyasijabulela Isifundo Somuntu Siqu?

NOMA iyiphi inceku kaNkulunkulu eqotho ingakujabulela ukunikela ngesikhathi esiningi esifundweni seBhayibheli somuntu siqu. (IHubo 1:1, 2) Nokho, benomuzwa wokuthi basidinga kakhulu isikhathi sabo namandla, abaningi bakuthola kunzima ukuchitha isikhathi namandla esifundweni somuntu siqu ngendlela abangathanda ngayo.

Nokho, ukuze siqhubeke siyizinceku zikaNkulunkulu ezikhuthele, sonke sidinga ukuvuselela injabulo namandla ethu usuku ngalunye ngokuthola izici ezintsha noma ezijule kakhudlwana zeqiniso leZwi likaNkulunkulu. Amaqiniso eBhayibheli akushukumisa ngokujulile eminyakeni eminingi edlule kungenzeka angakushukumisi kangako manje. Ngakho kuhle, futhi kubalulekile, ukuba senze umzamo wenkuthalo futhi singayeki ukuzuza ukuqonda okusha ngeqiniso ukuze sizigcine siphapheme ngokomoya.

Amadoda okholo asendulo ayeziqinisa kanjani ngokomoya ngesifundo somuntu siqu seZwi likaNkulunkulu? Ezinye izinceku zikaJehova zosuku lwanamuhla zisenza kanjani isifundo sazo sijabulise kakhudlwana futhi sibe nenzuzo? Ziye zavuzwa kanjani ngemizamo yazo?

Bavuselela Amandla Abo Ngesifundo Somuntu Siqu

INkosi yakwaJuda uJosiya yaqala umkhankaso wayo ngokumelene nokukhulekelwa kwezithombe ngentshiseko enkulu ngisho nakakhulu ngemva kokufundelwa “incwadi yomthetho kaJehova eyalotshwa ngesandla sikaMose.” Akungabazeki ukuthi yayingaqali ukucabangela lengxenye yeZwi likaNkulunkulu; kodwa ukuzwa isigijimi esivela ngokuqondile embhalweni wakuqala wesandla kwayishukumisela ekulweleni ukukhulekela okumsulwa.—2 IziKronike 34:14-19.

Umprofethi uDaniyeli wayiqonda ‘iminyaka yokupheleliswa kokuchithwa kweJerusalema’ nokuqiniseka kwako hhayi encwadini kaJeremiya kuphela kodwa ‘nasezincwadini.’ Kungenzeka ukuthi zazihlanganisa izincwadi ezinjengoLevitikusi (26:34, 35), Isaya (44:26-28), Hoseya (14:4-7), no-Amose (9:13-15). Lokho lendoda ezinikezele eyakuthola ngokutadisha kwayo izincwadi zeBhayibheli ngenkuthalo kwayiholela ukuba ifune uNkulunkulu ngomkhuleko wentshiseko. Ukunxusa kwayo okuqotho kwaphendulwa ngesinye isambulo nangokuqinisekiswa ngokuphathelene nomuzi waseJerusalema kanye nabantu bakubo.—Daniyeli, isahluko 9.

UJosiya, ‘owenza okulungile emehlweni kaJehova,’ noDaniyeli, ‘owayethandeka’ emehlweni kaNkulunkulu, babengahlukile ngempela kithi namuhla. (2 AmaKhosi 22:2; Daniyeli 9:23) Imizamo yabo siqu yokuzinikela ekuyitadisheni ngentshiseko enkulu imiBhalo eyayitholakala ngalesosikhathi yabaholela ekubeni babe nengokomoya elithuthukile futhi yabasiza ekujabuleleni ubuhlobo obuqine ngokwengeziwe noNkulunkulu. Kungashiwo okufanayo nangezinye izinceku zikaJehova eziningi zasendulo, njengoJefta, umhubi othile wendlu ka-Asafa, uNehemiya, noStefanu. Zonke zanikeza ubufakazi besifundo somuntu siqu esicatshangelwe kahle sengxenye yeBhayibheli eyayitholakala esikhathini sazo.—AbAhluleli 11:14-27; AmaHubo 79, 80; Nehemiya 1:8-10; 8:9-12; 13:29-31; IzEnzo 6:15–7:53.

Yenza Inkonzo Ibe Isikhuthazo

Izinceku zikaJehova eziningi namuhla esezimkhonze iminyaka eminingi zinesimiso sesifundo seBhayibheli somuntu siqu. Lokhu zikuthole kubalulekile ukuze zihlale ziphapheme futhi zihlangabezane ngokugcwele nemithwalo yazo yemfanelo yobuKristu. Noma kunjalo, eziningi zazo ziyavuma ukuthi akulula ngaso sonke isikhathi ukulinganisela indlela yokusebenzisa isikhathi namandla azo esifundweni nakwezinye izindaba okungamelwe zinganakwa.

Nokho, ukuhlala uphapheme ngokomoya ngesifundo somuntu siqu senkuthalo kubalulekile ekubhekaneni nezidingo zenkonzo yobuKristu kulelizinga eselithuthukile lomsebenzi womhlaba wonke wokushumayela ngoMbuso. Labo abakujabulelayo ukuqonda okusha nokujulile okuseZwini likaNkulunkulu bangahlangabezana nenselele yokuthinta izinhliziyo ezilambile. Lokhu kuyiqiniso noma ngabe umuntu wabelwe lapho kungalindeleka ukuba abambe kakhulu ekudobeni okungokomoya noma abekezele emasimini asesetshenzwe kakhulu lapho ukunganaki kuvame khona.

Zondle Njalo NgeZwi LikaNkulunkulu

Lokho okwenziwa abanye kungakunikeza imibono ngendlela ongasijabulela ngayo kakhudlwana isimiso sesifundo sakho noma indlela wena nomkhaya wakho eningasisebenzisa ngayo ngokunenzuzo kakhudlwana isikhathi sokutadisha. Phakathi kwezinto inceku kaNkulunkulu engeke izidebeselele ukufunda iZwi likaNkulunkulu ngokwalo sikhathi sonke. Abaningi baye bakwenza umgomo ukufunda okungenani izahluko zeBhayibheli ezintathu kuya kwezine isonto ngalinye. Ingabe ufuna ukufunda iBhayibheli uliqede ngonyaka? Khona-ke uzokujabulela ukuchitha isikhathi esengeziwe ulifunda, mhlawumbe ingxenye yehora ngosuku.

Ingabe sewuke walifunda lonke iBhayibheli izikhathi ezingaphezu kwesisodwa? Kungani ungazibekeli umgomo omusha esikhathini esizayo? Ukuze athi ukushintsha, omunye wesifazane ongumKristu wafunda izincwadi zeBhayibheli ngokulandelana kwazo. Wathola imininingwane eminingi ayeyeqile ngaphambili, esekelwe ezikhathini zezenzakalo. Omunye wesifazane ongumKristu uselifunde kahlanu iBhayibheli kusukela ekuqaleni kuya ekugcineni kuleminyaka emihlanu edlule, isikhathi ngasinye eliqala enomgomo ohlukile. Okokuqala, walifunda wayophuna nalo ngale. Ekulifundeni kwakhe kwesibili, wafingqa lokho okuqukethwe isahluko ngasinye wakuloba ngomugqa owodwa noma emibili encwajaneni yamaphuzu. Kusukela onyakeni wesithathu kuqhubeke, waguqukela eBhayibhelini elibhalwe ngamagama amakhulu elinezikhombo, eqala ngokuhlola ngokucophelela izikhombo eziseceleni bese eqaphelisisa imibhalo yaphansi kanye nokwaziswa okungemuva eBhayibhelini. Okwesihlanu, wasebenzisa amabalazwe eBhayibheli ukuze aqonde ngokwengeziwe izici zokwakheka kwamazwe. Uthi: “Kimi, ukufunda iBhayibheli kwakujabulisa njengokudla.”

Abanye abafundi beBhayibheli abashisekayo baye bakuthola kuyinzuzo ukusebenzisa ikhophi yeBhayibheli engeyesifundo somuntu siqu kuphela, bephawula kafushane emaceleni ayo amazwi athakazelisayo, imifanekiso eshukumisa ingqondo, noma amakhasi ezinye izincwadi abangase babhekisele kuzo kamuva. Esinye isikhonzi sesikhathi esigcwele sikuthola kujabulisa ekupheleni kwenyanga ngayinye ukubhala ekhophini yaso yesifundo somuntu siqu amaphuzu amasha esiwathole phakathi nenyanga. “Ukubheka phambili kulamahora ami ayigugu,” sisho, “kungisiza ukuba ngifinyelele ngokushesha eminye imigomo yaleyonyanga.”

Eminye Imibono Ehlakaniphile

Ingabe unomuzwa wokuthi isimiso sakho sigcwele izinto okumelwe uzenze nakanjani nsuku zonke namasonto onke nokuthi udinga amasu athile okusisebenzisa kahle isikhathi sakho esilinganiselwe? Nokho, phatha lokho ozimisele ukukufunda, bese usebenzisa izikhathi zakho ongenzi lutho ngazo. Ekhaya noma lapho uvame ukutadishela khona, ngezinga ongase ukwazi ngalo hlela izincwadi namanye amathuluzi okutadisha ukuze kube lula ukuwafinyelela. Yenza igumbi lakho lokutadishela lithokomale kodwa lingabe selinethezeka kakhulu kangangokuba wozele. Ingabe unesabelo senkulumo? Funda ukwaziswa ngethuba lokuqala olitholayo, bese uvumela imiqondo ifike lapho uphumule noma wenza imisetshenzana eseceleni.

Abanye bangase babambisane nawe ekusisebenziseni kangcono isikhathi ukuze nizuze nonke. Ngokwesibonelo, ungase ucele othile akufundele izingxenye eziqondakala kalula ngesikhathi wena usenza imisetshenzana evamile noma uthelela lowomfundi wakho itiye. Kungaba njani uma bonke ekhaya bevumelana ngokuba nesikhathi esithile okungenamsindo ngaso ukuze babe nesifundo somuntu siqu? “Yini oye wajabulela ukuyifunda muva nje?” Ngezinye izikhathi ungase ukwazi ukuthola ukuthi abangane bakho bafundeni ngokuqala ingxoxo ngalendlela.

Ingabe uzimisele ukufaka imibono emisha esimisweni sakho sokutadisha? Ungamisa umgomo wesikhathi sokutadisha ngendlela abaningi abamisa ngayo umgomo wesikhathi sokukhuluma nabanye ngeBhayibheli. Omunye ummemezeli wesikhathi esigcwele (iphayona) umisa umgomo olinganiselwe wanyanga zonke wamahora okutadisha futhi uyajabula lapho ebona ishadi lakhe lomgomo ligcwala. Abanye banciphisa isikhathi sokubuka ithelevishini bese ngaleyondlela bethola isikhathi sokutadisha. Abaningi bakhetha isihloko esithile abazositadisha isikhathi esithile, njengezithelo zomoya, imvelaphi yezincwadi zeBhayibheli, noma ikhono lokufundisa. Abanye bajabulela ukwenza amashadi ezikhathi zezenzakalo, njengalawo abonisa ukuhlobana okuphakathi kwamakhosi akwa-Israyeli nabaprofethia noma IzEnzo Zabaphostoli nezincwadi zikaPawulu.

Nina basha, niyalufuna yini ukholo oluqine kakhudlwana? Kungani ningakhethi incwadi enizoyitadisha ngokucophelela phakathi namaholide enu esikole alandelayo? Omunye umfundi wasesikoleni esiphakeme obhapathiziwe wakhetha incwadi ethi Ukufuna Kwesintu UNkulunkulu, ekhishwa i-Watch Tower Society. Esahlukweni ngasinye, wayefushanisa lokho akufundile akubhale encwadini yamaphuzu. Kwakuyinselele futhi kwathatha isikhathi eside kunalokho ayekucabangile. Nokho, lapho eseyiqede yonke incwadi, wahlatshwa umxhwele amaqiniso esigijimi seBhayibheli.

Hlala Ulangazelela Ukufunda

Izinceku zikaJehova zosuku lwanamuhla eziningi kakhulu kakade ‘sezivamé njalo emsebenzini weNkosi.’ (1 Korinte 15:58) Ngisho nangesimiso esibukeziwe nangomzamo oqotho, isimiso osilandelayo ngesonto elivamile singase singashintshi kakhulu. Nokho, ukuzimisela kwakho ngokungayeki ukuzuza ukuqonda iqiniso okujule kakhudlwana nokuzigcina uhambisana nezinjongo zikaJehova ezembulekayo kuyowenza umehluko.

Kuyakhuthaza ukuzwa imivuzo yalabo abaye bathuthukisa indlela yabo yokutadisha. Enye indoda engumKristu, iqaphela ukuthi yayisilahlekelwa umbono oqondile mayelana nokufuna ukuqonda okujulile ngeqiniso, yahlela ukuphila kwayo ngendlela yokuba ikwazi ukunikela amahora engeziwe esikhathi sayo esikhululekile esifundweni somuntu siqu. “Kungilethele injabulo ebengingayazi ngaphambili,” isho. “Njengoba ngiya ngiqiniseka ngokulotshwa kweBhayibheli okungokwaphezulu, ngithola ukuthi ngikwazi ukukhuluma nabanye ngentshiseko yangempela ngokholo lwami. Ngizizwa ngondleke kahle, ngiphilile ngokomoya, futhi ngenelisekile ekupheleni kosuku ngalunye.”

Umbonisi ojikelezayo woFakazi BakaJehova, ohambela amabandla amaningi, wachaza ezinye izinzuzo ngalendlela: “Labo abasikhuthalele isifundo somuntu siqu ngokuvamile izinkulumo zabo ziyaphila futhi ziphapheme. Basebenzelana kangcono nabanye, futhi abasheshi baphambukiswe amazwi angemahle avela kwabanye. Uma besenkonzweni yasensimini, bavumelana nezimo futhi baziphaphamele izidingo zabantu abahlangana nabo.”

Lombonisi unezela iphuzu abanye abangase bathande ukulikhumbula lapho becabanga ngesabo isimiso sokutadisha. “Emihlanganweni yezingxoxo ezingokomBhalo, abaningi bathambekele ekuzifundeni njengoba zibhalwe phansi izimpendulo zabo. Bangazuza ngokwengeziwe uma bengazindla ngendlela ukwaziswa okuhlobene ngayo nalokho abakufunde ngaphambili noma ekuphileni kwabo.” Ucabanga ukuthi ungathuthukisa kulesisici?

Umprofethi uDaniyeli, ngemva kweminyaka engaphezu kuka-90 ephila, akazange abe nomuzwa wokuthi useziqonda ngokwanele izindlela zikaJehova. Eminyakeni yakhe yokugcina, wabuza ngokuphathelene nendaba ethile ayengayiqondisisi: “Nkosi yami, ukuphela kwalokho kuyakuba-yini na?” (Daniyeli 12:8) Akungabazeki ukuthi ukuzimisela kwakhe okungaguquki ukufunda okwengeziwe ngeqiniso likaNkulunkulu kwaba yisihluthulelo sobuqotho bakhe obumangalisayo kuyo yonke inkambo yakhe yokuphila eyayinezigameko.—Daniyeli 7:8, 16, 19, 20.

Inceku kaJehova ngayinye inomthwalo wemfanelo ongathi sína ofanayo wokuma iqinile njengomunye woFakazi baKhe. Hlala ulangazelela ukufunda ukuze uzigcine uqinile ngokomoya. Zama ukunezela isici esisodwa noma ezimbili ezintsha esimisweni sakho sokutadisha samasonto onke, sanyanga zonke, noma saminyaka yonke. Bona indlela uNkulunkulu azowubusisa ngayo noma imuphi umzamo omncane owenzayo. Yebo, sijabulele isifundo sakho seBhayibheli nemiphumela esiyilethayo.—IHubo 107:43.

[Umbhalo waphansi]