Ukujabula Ebuzalwaneni Boqobo Bomhlaba Wonke

NJENGOBA ILANDISWA NGUWILLIE DAVIS

Ngo-1934 izwe lalikhungethwe uKuwa Okukhulu Kwezomnotho, futhi i-United States yayingene shí ezinkingeni zezomnotho. Ngaphandle kwe-Prospect Relief Station eCleveland, e-Ohio, kwakungongaphansi nongaphezulu phakathi kwephoyisa nelinye iKhomanisi elaziwayo. Iphoyisa ladubula labulala iKhomanisi kanye nesibukeli, okwakungugogo wami, uVinnie Williams.

AMAKHOMANISI azama ukujika lezizehlakalo zokubulala azenze zibonakale njengeziqondene nohlanga oluthile, ngoba ugogo wayensundu kanti iphoyisa lona lalimhlophe. Asakaza amapheshana ayenezihloko ezazinjengesithi “Amaphoyisa AseCleveland Anobandlululo” nesithi “Akuphindiselwe Lokhu Kubulawa.” Amakhomanisi ahlela futhi alungiselela umngcwabo kagogo. Nginaso isithombe sababephethe ibhokisi—bonke babemhlophe futhi bengamalungu alenhlangano. Ngamunye wayephakamise isibhakela ngalendlela okwathi ngokuhamba kwesikhathi yaba uphawu lwe-Black Power.

Ngesikhathi ugogo eshona, indodakazi yakhe yayithwele mina esiswini, futhi ngazalwa ezinyangeni ezine kamuva. Ngakhula ngingakwazi kahle ukukhuluma. Nganginamalimi, ngakho iminyaka yami yokuqala esikoleni yahlanganisa nokwelashelwa ukukhuluma.

Abazali bami bahlukana ngineminyaka emihlanu ubudala, futhi mina nodadewethu sakhuliswa umama. Lapho sengineminyaka eyishumi ubudala, ngaqala ukudiliva izimpahla zasezitolo ngemva kokuphuma kwesikole ukuze ngisize ngezindleko zasekhaya. Eminyakeni emibili kamuva ngaqala ukusebenza ngaphambi kokuya esikoleni nangemva kokuphuma kwaso, kwaba yimi ongenisa imali kakhulu ekhaya. Lapho umama elaliswa esibhedlela futhi edinga ukuhlinzwa okuwuchungechunge, ngasiyeka isikole ngaqala ukusebenza isikhathi esigcwele.

Ukungeniswa Ebuzalwaneni

Ngo-1944 omunye woFakazi BakaJehova washiyela umkamzala incwadi ethi “Iqiniso Liya Ku Nikulula,” futhi nami ngahileleka esifundweni seBhayibheli esaqalwa naye. Ngawo lowonyaka ngaqala ukuya eSikoleni Senkonzo EsingokwaseZulwini eBandleni Lase-Eastside. Umqhubi wesikole u-Albert Cradock, wayenenkinga yokukhuluma njengami, kodwa wayefunde ukuyilawula. Yeka isikhuthazo aba yiso kimi!

Ngokuyinhloko omakhelwane bethu babengabantu base-Italy, abasePoland, abaseHungary, namaJuda, nebandla lalakhiwe abantu abavela kulamaqembu ezinhlanga nezinye. Mina nomkamzala saba abantu baseMelika bokuqala abansundu abahlanganyela nalelibandla labamhlophe bodwa, kodwa oFakazi abazange babonise noluncane ubandlululo lobuhlanga. Eqinisweni, mina babengimema njalo ukuba ngizodla nabo emizini yabo.

Ngo-1956, ngathuthela engxenyeni eseningizimu ye-United States ukuze ngiyokhonza lapho indingeko yezikhonzi inkulu khona. Lapho ngibuyela enyakatho ehlobo langomunye unyaka ukuze ngiye emhlanganweni wesigodi, abazalwane abaningi baseCleveland beza bezongibona futhi babonisa isithakazelo esifudumele emsebenzini wami. Ukukhathalela kwabo kwangifundisa isifundo esisemqoka esiwukuthi: Ngaso sonke isikhathi ‘yilowo nalowo angabheki okwakhe, kepha yilowo abheke nokwabanye.’—Filipi 2:4.

Inkonzo Yesikhathi Esigcwele Eyandisiwe

Ngemva kokukhonza iminyaka emithathu emsebenzini wokushumayela wesikhathi esigcwele njengephayona, ngo-November 1959, ngamenywa ukuba ngisebenze eBethel yaseBrooklyn, indlunkulu yomhlaba wonke yoFakazi BakaJehova eNew York. Ngabelwa eMnyango Wokuthumela Izincwadi. Umbonisi womnyango wethu uKlaus Jensen, kanye nalowo engangihlala naye endlini, uWilliam Hannan, bobabili ababemhlophe, baba obaba abangokomoya kimi. Ngesikhathi ngifika ngamunye wabo wayesekhonze iminyaka ecishe ibe ngu-40 eBethel.

Ekuqaleni kwawo-1960, kwakunamalungu angaba ngu-600 omkhaya waseBethel, futhi angu-20 ayengamaMelika ansundu. Ngalesosikhathi, i-United States yayisiqalile ukungenwa inhlava yombango wezinhlanga, futhi ubuhlobo bezinhlanga babungebuhle. Noma kunjalo, iBhayibheli lifundisa ukuthi “uNkulunkulu akakhethi,” nathi akufanele sibe njalo. (IzEnzo 10:34, 35) Izingxoxo ezingokomoya esasiba nazo etafuleni laseBethel njalo ekuseni zaqinisa ukuzimisela kwethu ukwamukela umbono kaNkulunkulu ezindabeni ezinjalo.—IHubo 19:7.

Ngesikhathi ngikhonza eBethel yaseBrooklyn ngahlangana noLois Ruffin, iphayona laseRichmond, eVirginia, sase sishada ngo-1964. Sasizimisele ukuqhubeka nenkonzo yesikhathi esigcwele, ngakho ngemva komshado wethu saphindela engxenyeni eseningizimu ye-United States. Saqale sakhonza njengamaphayona akhethekile, kwase kuthi ngo-1965, ngamenyelwa ukuba ngingenele umsebenzi wokujikeleza. Eminyakeni eyishumi eyalandela, sahambela amabandla asemazweni aseKentucky, eTexas, eLouisiana, e-Alabama, eGeorgia, eNorth Carolina, naseMississippi.

Ukuvivinywa Kobuzalwane Bethu

Kwakuyiminyaka yoshintsho olukhulu leyo. Ngaphambi kokuba siye eNingizimu, izinhlanga zazikade zihlukanisiwe. Abansundu babevinjelwe umthetho ukuba bafunde ezikoleni ezifanayo, badle emathilomu afanayo, balale emahhotela afanayo, bathenge ezitolo ezifanayo, noma baphuze ngisho nokuphuza kompompi abafanayo nabamhlophe. Kodwa ngo-1964 iSishaya-mthetho Sase-United States sashaya uMthetho Wamalungelo Abantu owanqabela ubandlululo ezindaweni zomphakathi, kuhlanganise nezinto zokuhamba. Ngakho sasingasekho isisekelo esingokomthetho sokuhlukaniswa kwezinhlanga.

Ngakho-ke umbuzo wawungukuthi, abafowethu nodadewethu basemabandleni abansundu bodwa nawabamhlophe bodwa babezohlangana yini babonisane uthando noma ingabe ukucindezela komphakathi nemizwa ejulile yesikhathi esidlule yayizobabangela ukuba bamelane nokuhlangana? Kwakuyinselele ukulalela umyalo ongokomBhalo othi: “Thandanani ngenhliziyo ngothando lobuzalwane; ekwazisaneni nandulelane.”—Roma 12:10.

Njengoba noma ubani engakhumbula, umbono owawuvamile, ikakhulukazi eNingizimu, wawuwukuthi abansundu baphansi. Lombono wawugxiliswe kakhulu ezingqondweni zabantu cishe yizo zonke izingxenye zomphakathi, kuhlanganise namasonto. Ngakho kwakungelula kwabanye abamhlophe ukuba babheke abansundu njengabalingana nabo. Ngempela, leso kwakuyisikhathi sokuvivinywa kobuzalwane bethu—kokubili abansundu nabamhlophe.

Ngokujabulisayo, sekukonke, kwaba nokusabela okumangalisayo ekuhlanganisweni kwamabandla ethu. Imibono yokungalingani kwezinhlanga eyagxiliswe ngokucophelela emakhulwini amaningi eminyaka ayicimanga ngokushesha. Nokho ngesikhathi amabandla eqala ukuhlanganiswa, abafowethu bakwamukela kahle lokho, abaningi bekujabulela ukuba bakwazi ukuhlangana ndawonye.

Okuthakazelisayo ukuthi ngisho nalabo abangebona oFakazi ngokuvamile babekushayela ihlombe ukuhlanganiswa kwamabandla ethu. Ngokwesibonelo, eLanett, e-Alabama, omakhelwane ababeseduze neHholo LoMbuso babuzwa ukuthi bamelene yini nokuza kwabansundu emihlanganweni. Esinye isalukazi esimhlophe saxhawula umzalwane onsundu, sithi: “Wozani nina lapha endaweni yakithi nizokhulekela uNkulunkulu wenu ngendlela enithanda ngayo!”

Abazalwane Abathembekile ETopiya

Ngo-1974 sajabula ngokuqeqeshwa izinyanga ezinhlanu nengxenye njengezithunywa zevangeli e-Watchtower Bible School of Gilead eNew York City. Sabe sesabelwa ezweni lase-Afrika eTopiya. UHaile Selassie, umbusi, wayesanda kususwa esihlalweni futhi wayedonsa isigwebo esekhaya. Ngenxa yokuthi umsebenzi wethu wokushumayela wawuvinjelwe, sakwazisa ukusondelana okufudumele nabazalwane bethu abangamaKristu.

Sasihlala futhi sikhonza neningi lalabo kamuva ababoshelwa ukunamathela kwabo ekukhulekeleni kweqiniso. Abanye babangane bethu abathandekayo babulawa. U-Adera Teshome, wayengumdala kanye nami kwelinye ibandla enhlokodolobha yase-Topiya, i-Addis Ababa.a Ngemva kweminyaka emithathu esejele, wabulawa. Njengokulindelekile, umkakhe wayedabuke kakhulu. Yeka injabulo okwaba yiyo ukumbona eminyakeni eminingi kamuva echichima injabulo njengoba ekhonza njengephayona!

UWorku Abebe, owayengomunye umzalwane othembekile, wagwetshwa intambo izikhathi ezingu-8.b Kodwa wayengesabi neze! Ngesikhathi ngigcina ukumbona, wangibonisa izindlebe zakhe ezazikade zishaywe onogada basejele ngengemuva lesibhamu. Entela wathi ekuseni, emini nantambama wayedla ingemuva lesibhamu. Nakuba esashona manje, abazalwane basamkhumbula ngothando.

UHailu Yemiru ungomunye umzalwane engimkhumbula ngokumazisa.c Wayebonisa uthando oluyisibonelo ngomkakhe. Umkakhe waboshwa, kodwa ngenxa yokuthi wayekhulelwe futhi esezobeletha maduze nje, uHailu wacela iziphathimandla zasejele ukuba kungene yena ejele esikhundleni somkakhe. Kamuva, lapho engavumi ukuhlehla okholweni lwakhe, wabulawa.—Johane 15:12, 13; Efesu 5:28.

Ngenxa yesimo sezombangazwe esiwohlokayo eTopiya, sathuthela eKenya ngo-1976. Sakhonza emsebenzini wokujikeleza iminyaka engu-7, sihambela abazalwane emazweni amaningi eMpumalanga Afrika—kuhlanganise neKenya, iTopiya, iSudan, iSeychelles, i-Uganda, neTanzania. Ngaya naseBurundi naseRwanda izikhathi eziningana ngingomunye wezithunywa ezaziyokhuluma nezikhulu mayelana nokubhaliswa ngokomthetho komsebenzi wethu kulawomazwe.

Kwakuyinjabulo ukuphindela eTopiya ngo-January 1992 ukuze sibe khona emhlanganweni wokuqala wesigodi owaba khona lapho ngemva kokususwa kokuvinjelwa komsebenzi wethu. Abaningi balabo abangaphezu kuka-7 000 babengazani, ngenxa yokuthi abazalwane ngaphambili babehlangana ngamaqembu amancane. Osukwini ngalunye lwalowomhlangano, abaningi babefika kusasele amahora amabili ngaphambi kokuba kuqale isimiso futhi babehlala kuze kuhlwe kakhulu, bejabulela ubuzalwane bethu bothando.

Ukushisekela Ubuhlanga Kuyanqotshwa

Ukushisekela ubuhlanga bekwandile e-Afrika amakhulu amaningi eminyaka. Ngokwesibonelo, eBurundi naseRwanda, amaqembu ezinhlanga ezinkulu, amaHutu namaTutsi, sekuyisikhathi eside ezondana. Kusukela lamazwe athola uzibuse aphuma ngaphansi kweBelgium ngo-1962, ngezikhathi ezithile amalungu alamaqembu amabili ezinhlanga abelokhu ebulalana ngezinkulungwane. Ngakho-ke yeka injabulo okuyiyo ukubona amalungu alamaqembu ezinhlanga asengoFakazi BakaJehova esebenza ndawonye ngokuthula! Uthando loqobo abonisana lona luye lwakhuthaza nabanye abaningi ukuba balalele amaqiniso eBhayibheli.

Ngokufanayo, eKenya amaqembu ezinhlanga aye aba nokwawo ukungezwani. Yeka umehluko okhona phakathi kobuzalwane bobuKristu babantu bakaJehova eKenya! Ungabona abantu bamaqembu ezinhlanga ezihlukene bekhulekela ngobunye emaHholo OMbuso. Ngiye ngakujabulela ukubona abaningi babo belahla inzondo yobuhlanga futhi bebonisa uthando loqobo kubafowabo nodadewabo bamaqembu ezinye izinhlanga.

Ngiyajabula Ngobuzalwane Bethu

Njengoba ngibheka emuva eminyakeni engaphezu kuka-50 yokuhlanganyela nenhlangano kaNkulunkulu, inhliziyo yami igcwala ukumbonga uJehova neNdodana yakhe, uJesu Kristu. Bekumangalisa ngempela ukubona lokho abaye bakufeza emhlabeni! Cha, izimo bezingahambi ngokushelelayo ngaso sonke isikhathi phakathi kwabantu bakaNkulunkulu, njengoba nanamuhla zingenjalo. Kodwa ngeke phela kulindelwe ukuba izimfundiso zobuhlanga esezinamakhulukhulu eminyaka zikhona ezifundiswa izwe likaSathane zicime ngosuku olulodwa. Empeleni, nathi asikapheleli.—IHubo 51:5.

Njengoba ngiqhathanisa inhlangano kaJehova nezwe, inhliziyo yami iphuphuma injabulo yokwazisa ngobuzalwane bethu boqobo bomhlaba wonke. Ngisabakhumbula ngothando labaya bazalwane eCleveland, ababemhlophe bonke, abangicathulisa eqinisweni. Futhi njengoba ngangibona abafowethu eningizimu ye-United States, abansundu nabamhlophe, behlukana nemizwa yobandlululo esikhundleni sayo befaka uthando lobuzalwane olusuka enhliziyweni, inhliziyo yami yayijabula. Kuthe uma ngiya e-Afrika ngafike ngazibonela mathupha indlela iZwi likaJehova elingayicima ngayo inzondo yezinhlanga, okwangenza ngabazisa ngisho nangokwengeziwe ubuzalwane bethu bomhlaba wonke.

Ngempela, iNkosi uDavide yasendulo yakubeka kahle lapho ithi: “Bheka, kuhle, kumnandi kangaka ukuba abazalwane bahlalisane ndawonye bemunye.”—IHubo 133:1.

[Imibhalo yaphansi]

[Isithombe ekhasini 23]

Umngcwabo kagogo

[Isithombe ekhasini 24]

OFakazi abangamaTutsi namaHutu basebenza ndawonye ngokuthula

[Isithombe ekhasini 25]

Nginomkami, uLois