Izinceku ZikaNkulunkulu—Abantu Abahlelekile Nabajabulayo
“[Bayajabula, NW] abantu abaNkulunkulu wabo unguJehova.”—IHUBO 144:15.
1, 2. (a) Kungani uJehova enelungelo lokubekela izinceku zakhe izindinganiso? (b) Yiziphi izimfanelo ezimbili zikaJehova okufanele sifune ukuzilingisa ngokukhethekile?
UJEHOVA unguMbusi Wendawo Yonke, uNkulunkulu umninimandla onke, uMdali. (Genesise 1:1; IHubo 100:3) Njengoba enjalo, unelungelo lokubekela izinceku zakhe izindinganiso zokuziphatha, azi ukuthi yini engcono kakhulu ngazo. (IHubo 143:8) Futhi uyiSibonelo sazo esiyiNhloko okudingeka zilingise izimfanelo zaso. “Yibani-ngabalingisa uNkulunkulu njengabantwana abathandekayo,” kubhala umphostoli.—Efesu 5:1.
2 Imfanelo kaNkulunkulu okudingeka siyilingise iphathelene nokuhleleka. ‘Akayena uNkulunkulu wesiyaluyalu.’ (1 Korinte 14:33) Lapho sihlola ngokucophelela lokho uNkulunkulu akudalile, siphoqeleka ukuba siphethe ngokuthi unguMuntu ohleleke ukubedlula bonke endaweni yonke. Nokho, enye imfanelo kaNkulunkulu afuna ukuba izinceku zakhe ziyilingise injabulo yakhe, ngoba ‘unguNkulunkulu ojabulayo.’ (1 Thimothewu 1:11, qhathanisa ne-NW.) Ngakho, ikhono lakhe lokuhlela lenziwe laba sesilinganisweni ngenjabulo. Enye imfanelo ayenziwa ivelele ngokukhinyabezwa kwenye.
3. Amazulu agcwele izinkanyezi alibonisa kanjani ikhono likaNkulunkulu lokuhlela?
3 Konke uJehova aye wakwenza, kusukela kokukhulu kakhulu kuya kokuncane kakhulu kunikeza ubufakazi bokuthi unguNkulunkulu wokuhleleka. Ngokwesibonelo, cabangela indawo yonke ebonakalayo. Iqukethe izigidi zezigidi zezinkanyezi. Kodwa lezizinkanyezi azisakazekanga nje ngobuhliphilili. Isazi sesayensi yomumo nokwakheka kwezinkanyezi uGeorge Greenstein siphawula ukuthi “kunendlela ethile izinkanyezi ezihlelwe ngayo.” Zihlelwe ngamaqoqo abizwa ngokuthi imithala, eminye equkethe izinkulungwane zezigidi zezinkanyezi. Futhi kulinganiselwa ukuthi kunezinkulungwane zezigidi zemithala! Lemithala nayo ihlelekile, eminingana yayo (kusukela kwembalwa kuya ezinkulungwaneni eziningana) ihlanganiswe ndawonye yaba amaqulo emithala. Futhi kucatshangelwa ukuthi lamaqulo emithala ahlelwe aba ngisho nangamaqoqo amakhulu abizwa ngokuthi amaqulokazi.—IHubo 19:1; Isaya 40:25, 26.
4, 5. Nikeza izibonelo zokuhleleka phakathi kwezinto eziphilayo emhlabeni.
4 Ukuhleleka okuhle kakhulu kwendalo kaNkulunkulu kubonakala yonke indawo, hhayi nje kuphela emazulwini abonakalayo, kodwa nasemhlabeni, onezinkulungwane ezingenakubalwa zezinto eziphilayo. Ngokuphathelene nakho konke lokhu, uPaul Davies, uprofesa wesayensi yezinto zemvelo, wabhala ukuthi izingqapheli “zigcwala ukwesaba” ngenxa “yobukhulu nokuhleleka okuyinkimbinkimbi kwezwe elibonakalayo.”—IHubo 104:24.
5 Cabangela izibonelo ezimbalwa ‘zokuhleleka okuyinkimbinkimbi’ okutholakala ezintweni eziphilayo. Udokotela ohlinza ubuchopho nemithambo yemizwa uJoseph Evans wathi ngobuchopho bomuntu nomfunkulu: “Isimo esingokoqobo sokuhleleka okukhulu cishe sikwenza ushaqeke.” Isazi sesayensi ephathelene nama-bacterium uH. J. Shaughnessy sathi ngengqamuzana elincane kakhulu eliphilayo: “Ubunkimbinkimbi nokuhleleka okuhle kokuphila kwezinto eziphilayo ezincane kakhulu kwenziwe ngendlela emangalisayo kangangokuba kubonakala kuyingxenye yesimiso esimiswe ngokwaphezulu.” Futhi isazi sesayensi yamangqamuzana ezinto eziphilayo uMichael Denton sathi ngesimiso sofuzo (DNA) esingaphakathi kwengqamuzana: “Siphumelela kakhulu kangangokuba konke ukwaziswa . . . okudingekayo ukuze kuchazwe umklamo wazo zonke izinhlobo zezinto eziphilayo ezake zaba khona kuleplanethi . . . kungamumathwa esipunini esincane futhi kusale indawo yakho konke ukwaziswa okukuzo zonke izincwadi ezake zabhalwa.”—Bheka iHubo 139:16.
6, 7. Yikuphi ukuhleleka okuboniswa phakathi kwezidalwa zomoya, futhi zikubonisa kanjani ukwazisa ngoMenzi wazo?
6 UJehova akahleli nje kuphela indalo yakhe ebonakalayo kodwa futhi uhlela nendalo yakhe yomoya ezulwini. UDaniyeli 7:10 usazisa ukuthi izingelosi ‘eziyizinkulungwane eziyishumi zezinkulungwane eziyishumi zazimi ngaphambi kukaJehova.’ Kwakunezigidi eziyikhulu zezidalwa zomoya ezinamandla, ngasinye sabelwe umsebenzi waso ofanele! Kuvusa uhlevane ukucabanga ngekhono okumelwe ukuba liyadingeka ukuze kuhlelwe amanani amakhulu kangaka. Ngokufanelekile, iBhayibheli lithi: “Bongani uJehova nina-zingelosi zakhe, nina-maqhawe anamandla enenza okwezwi lakhe nilalela ukukhuluma kwezwi lakhe. Bongani uJehova nina-mabandla [ezingelosi] onke akhe, nina-zinceku zakhe enenza intando yakhe.”—IHubo 103:20, 21; IsAmbulo 5:11.
7 Yeka indlela imisebenzi yoMdali ehlelwe futhi ephumelela kahle kakhulu ngayo! Akumangalisi ukuthi izidalwa zomoya ezinamandla endaweni yasezulwini zimemezela ngendlela yokwesaba nokuzithoba: “Ufanele wena-Nkosi yethu noNkulunkulu wethu ukwamukela inkazimulo nodumo namandla, ngokuba nguwena owadala izinto zonke, nangenxa yentando yakho zaba-khona, zadalwa.”—IsAmbulo 4:11.
8. Yiziphi izibonelo ezibonisa ukuthi uJehova uhlela izinceku zakhe emhlabeni?
8 UJehova futhi uhlela izinceku zakhe emhlabeni. Lapho eletha uZamcolo wosuku lukaNowa ngo-2370 B.C.E., uNowa nabanye abayisikhombisa basinda kuZamcolo njengenhlangano ewumkhaya. EkuFudukeni kwango-1513 B.C.E., uJehova wakhipha abantu bakhe ababeyizigidi ezimbalwa ebugqilini baseGibithe futhi wabanikeza isimiso esiningiliziwe semithetho ukuze ahlele izindaba zabo zansuku zonke nokukhulekela. Futhi kamuva, eZweni Lesithembiso, amashumi ezinkulungwane abo ahlelwa ukuze afeze inkonzo ekhethekile ethempelini. (1 IziKronike 23:4, 5) Ekhulwini lokuqala, amabandla amaKristu ahlelwa ngaphansi kokuqondisa kwaphezulu: “Wanika abanye ukuba babe-ngabaphostoli, abanye abaprofethi, abanye abavangeli, abanye abelusi nabafundisi, ukuze abangcwele bapheleliselwe umsebenzi wokukhonza.”—Efesu 4:11, 12.
Izinceku Zosuku Lwanamuhla Nazo Zihlelekile
9, 10. UJehova uye wabahlela kanjani abantu bakhe esikhathini sethu?
9 Ngokufanayo, uJehova uye wahlela izinceku zakhe zosuku lwanamuhla ukuze zenze umsebenzi wakhe wosuku lwethu ngokuphumelelayo—ukushumayela izindaba ezinhle zoMbuso wakhe ngaphambi kokuba alethe isiphelo kulesisimiso sezinto samanje esingamesabi uNkulunkulu. (Mathewu 24:14) Cabangela lokho okuhilelekile kulomsebenzi owenziwa embulungeni yonke nendlela ukuhleleka okuhle okubaluleke ngayo. Izigidi zamadoda, abesifazane, nabantwana ziqeqeshelwa ukufundisa amaqiniso eBhayibheli kwabanye. Ukuze kusekelwe lokhu kuqeqesha, kunyatheliswa intilibathwa yamaBhayibheli nezincwadi zokutadisha iBhayibheli. Phela, umagazini ngamunye we-Nqabayokulinda manje unyatheliswa ngezigidi ezingaphezu kuka-16 ngezilimi ezingu-118, futhi i-Phaphama! inyatheliswa ngezigidi ezingaba ngu-13 ngezilimi ezingu-73. Cishe bonke labomagazini banyatheliswa ngesikhathi esisodwa ukuze zonke izinceku zikaJehova zithole ukwaziswa okufanayo cishe ngesikhathi esifanayo.
10 Ngaphezu kwalokho, amabandla oFakazi BakaJehova angaphezu kuka-73 000 emhlabeni wonke ahlelwe ngendlela yokuba abe nemihlangano njalo ukuze athole isiyalo seBhayibheli. (Heberu 10:24, 25) Kunanezinkulungwane zemibuthano emikhulu—imihlangano yesifunda neyesigodi—unyaka ngamunye. Kunomsebenzi wokwakha amaHholo OMbuso amasha noma ukuwathuthukisa, amaHholo OMhlangano, amakhaya aseBethel, nezindawo zokunyathelisa izincwadi zeBhayibheli owenziwa embulungeni yonke ngezinga elikhulu. Kunezikole zokuqeqeshwa okuthuthukile kwabafundisi beBhayibheli, njenge-Watchtower Bible School of Gilead yezithunywa zevangeli neSikole SeNkonzo Samaphayona, esiqhutshwa emazweni embulungeni yonke.
11. Iyiphi inzuzo yesikhathi esizayo eyolethwa ukufunda ukuhleleka okuhle manje?
11 Yeka ukuthi uJehova ubahlele kahle kanjani abantu bakhe emhlabeni ukuze ‘bafeze inkonzo yabo ngokugcwele,’ besizwa izingelosi zakhe ezikhonzayo! (2 Thimothewu 4:5, qhathanisa ne-NW; Heberu 1:13, 14; IsAmbulo 14:6) Ngokufundisa izinceku zakhe ngezindlela zokuhleleka okuhle manje, kukhona okunye uNkulunkulu akufezayo. Izinceku zakhe zilungiselelwa kahle ukuze kuthi lapho zisinda ekupheleni kwalesisimiso sezinto, zibe sezihlelekile kakade ukuze ziqale ukuphila ezweni elisha. Khona-ke, ngendlela ehlelekile ngaphansi kokuqondisa kukaJehova, ziyoqala ukwakha iPharadesi lembulunga yonke. Futhi ziyobe zikulungele kahle ukufundisa izimfuneko zikaNkulunkulu eziningiliziwe zokuphila ezinkulungwaneni zezigidi zabantu abayovuswa kwabafileyo.—Isaya 11:9; 54:13; IzEnzo 24:15; IsAmbulo 20:12, 13.
Uhlelekile Kodwa Uyajabula
12, 13. Kungani singase sithi uJehova ufuna ukuba abantu bakhe bajabule?
12 Nakuba uJehova eyisisebenzi esimangalisayo nomhleli omuhle kakhulu, akayena umuntu ongenaluzwela, olukhuni, noma ongacabangeli. Kunalokho, unguMuntu onomusa, nojabula kakhulu okhathalela injabulo yethu. “Uyanikhathalela,” kusho eyoku-1 Petru 5:7. Singakubona ukukhathalela kwakhe nesifiso sakhe sokuba izinceku zakhe zijabule kulokho akwenzele isintu. Ngokwesibonelo, lapho uNkulunkulu edala indoda nowesifazane abaphelele, wababeka epharadesi lenjabulo. (Genesise 1:26-31; 2:8, 9) Wabanika konke ababekudinga ukuze abenze bajabule kakhulu. Kodwa balahlekelwa yikho konke ngokuhlubuka. Ngenxa yesono sabo, sazuza njengefa ukungapheleli nokufa.—Roma 3:23; 5:12.
13 Nakuba manje singaphelele, thina bantu sisengayithola injabulo kulokho uNkulunkulu aye wakwenza. Kunezinto eziningi ezisilethela injabulo—izintaba eziphakeme; amachibi, imifula, izilwandle namabhishi amahle; izimbali ezimibalabala nephunga elimnandi nezinye izinhlobonhlobo zohlaza ezingenakubalwa; insada yokudla okunambithekayo; ukushona kwelanga okumangalisayo esingakhathali neze ukukubuka; amazulu agcwele izinkanyezi esikujabulelayo ukuwabuka ebusuku; indalo eyizilwane nezinhlobonhlobo zayo eziningi kanye nezingane zayo ezikhangayo nezindlela zazo zokudlala zobulwane; umculo oshukumisayo; umsebenzi othakazelisayo nowusizo; abangane abahle. Kusobala ukuthi uMuntu owahlela izinto ezinjalo ungumuntu ojabulayo okujabulelayo ukwenza abanye bajabule.
14. Yikuphi ukulinganisela uJehova akufuna kithi lapho simlingisa?
14 Ngakho, uJehova akafuni ukuphumelela okuhlelekile nje kuphela. Ufuna futhi ukuba izinceku zakhe zijabule, njengoba nje naye ejabula. Akafuni ukuba zihlele izinto ngentshiseko eyeqisayo zize zikhinyabeze injabulo yazo. Izinceku zikaNkulunkulu kumelwe zilinganisele amakhono okuhlela nenjabulo, njengoba naye enza, ngoba lapho kunomoya wakhe ongcwele onamandla, kukhona injabulo. Eqinisweni, eyabaseGalathiya 5:22 ibonisa ukuthi isithelo sesibili somoya ongcwele kaNkulunkulu osebenza kubantu bakhe ‘ukujabula.’
Uthando Luveza Injabulo
15. Kungani uthando lubaluleke kangaka enjabulweni yethu?
15 Kuthakazelisa kakhulu ukuqaphela ukuthi iBhayibheli lithi: “UNkulunkulu uluthando.” (1 Johane 4:8, 16) Alisho neze ukuthi: “UNkulunkulu uwukuhleleka.” Uthando luyimfanelo eyinhloko kaNkulunkulu, futhi kumelwe ukuba izinceku zakhe ziyilingise. Yingakho isithelo sokuqala somoya kaNkulunkulu esivezwe kweyabaseGalathiya 5:22 ‘siluthando,’ lulandelwa ‘ukujabula.’ Uthando luveza injabulo. Lapho silingisa uthando lukaJehova ekusebenzelaneni kwethu nabanye, kulandela injabulo, ngenxa yokuthi abantu abanothando bangabantu abajabulayo.
16. UJesu wakubonisa kanjani ukubaluleka kothando?
16 Ukubaluleka kokulingisa uthando lokwesaba uNkulunkulu kwenziwe kwaqhama ezimfundisweni zikaJesu. Wathi: “Ngikhuluma lokhu njengokuba uBaba engifundisile.” (Johane 8:28) Yini ngokukhethekile uJesu ayeyifundisiwe, leyo naye ayifundisa abanye? Kwakuwukuthi imiyalo emibili emikhulu kunayo yonke ukuthanda uNkulunkulu nokuthanda umakhelwane. (Mathewu 22:36-39) UJesu wabeka isibonelo sothando olunjalo. Wathi: “Ngiyamthanda uBaba,” ekubonisa ngokwenza intando kaNkulunkulu kuze kube sekufeni. Futhi wabonisa uthando lwakhe ngabantu ngokubafela. Umphostoli uPawulu watshela amaKristu ase-Efesu: ‘UKristu wanithanda, wazinikela ngenxa yenu.’ (Johane 14:31; Efesu 5:2) Ngakho, uJesu watshela abalandeli bakhe: “Yiló umyalo wami wokuba nithandane, njengalokho nginithandile.”—Johane 15:12, 13.
17. UPawulu wabonisa kanjani ukuthi ukubonisa uthando kwabanye kubalulekile?
17 UPawulu wabonisa indlela loluthando lokwesaba uNkulunkulu olubaluleke ngayo ngokuthi: “Noma ngikhuluma ngezilimi zabantu nezezingelosi‚ kepha ngingenalo uthando‚ ngiyithusi elikhencezayo nensimbi encencethayo. Noma nginokuprofetha‚ ngiqonda izimfihlakalo zonke nokwazi konke, noma nginokukholwa konke ngangokuba ngingagudluza izintaba‚ kepha ngingenalo uthando‚ angiyinto yalutho. Noma ngabela abampofu konke enginakho‚ noma nginikela umzimba wami ukuba ushiswe, kepha ngingenalo uthando‚ akungisizi ngalutho. . . . Kumi ukukholwa‚ nokwethemba‚ nothando‚ lokho kokuthathu; kepha okukhulu kulokho luthando.”—1 Korinte 13:1-3, 13.
18. Yini esingayilindela kuJehova enezela enjabulweni yethu?
18 Lapho silingisa uthando lukaJehova, singaqiniseka ngokusithanda kwakhe, ngisho nalapho senza amaphutha, ngoba ‘unguNkulunkulu ogcwele isihe, onomusa, ophuza ukuthukuthela, novamé ubumnene neqiniso.’ (Eksodusi 34:6) Uma siphenduka ngobuqotho lapho senza amaphutha, uNkulunkulu akasibaleli lokhu kodwa uyasithethelela ngothando. (IHubo 103:1-3) Yebo, “iNkosi inesihe esikhulu nesihawu.” (Jakobe 5:11) Ukwazi lokhu kunikela enjabulweni yethu.
Injabulo Elinganiselwe Manje
19, 20. (a) Kungani injabulo ephelele ingenakwenzeka manje? (b) IBhayibheli libonisa kanjani ukuthi singaba nayo injabulo elinganiselwe kulesisikhathi?
19 Nokho, singakwazi yini ukujabula namuhla, njengoba siphila ezinsukwini zokugcina zalelizwe elingaphansi kukaSathane eligcwele ubugebengu, ubudlova, nokuziphatha okubi, lapho sibhekene khona nokugula nokufa? Yiqiniso, asinakusilindela manje isilinganiso senjabulo eyoba khona ezweni elisha likaNkulunkulu, enjengaleyo ebikezelwa iZwi lakhe: “Bheka ngiyadala izulu elisha nomhlaba omusha; izinto zakuqala aziyikukhunjulwa, zingene enhliziyweni. Kepha jabulani, nethabe kuze kube-phakade ngengikudalayo.”—Isaya 65:17, 18.
20 Lokho izinceku zikaNkulunkulu ezingaba nakho manje injabulo elinganiselwe ngoba ziyayazi intando yakhe futhi zinolwazi oluqondile lwezibusiso ezimangalisayo ezizofika ngokushesha ezweni lakhe elisha eliyipharadesi. (Johane 17:3; IsAmbulo 21:4) Yingakho iBhayibheli lingase lithi: “Jehova-Sebawoti, [uyajabula] umuntu okwethembayo,” “[bayajabula] bonke abamesabayo uJehova, abahamba ngezindlela zakhe,” “[bayajabula] abamnene, ngokuba bayakudla ifa lomhlaba.” (IHubo 84:12; 128:1; Mathewu 5:5, qhathanisa ne-NW.) Ngakho, naphezu kwezimo ezinzima zanamuhla okufanele sibhekane nazo, singaba nenjabulo enkulu. Ngisho nalapho sehlelwa izinto ezimbi, asidabuki njengoba kwenza labo abangamazi uJehova nabangenalo ithemba lokuphila okuphakade.—1 Thesalonika 4:13.
21. Ukuzidela kwezinceku zikaJehova kunikela kanjani enjabulweni yazo?
21 Injabulo futhi iza ezincekwini zikaJehova ngoba zisebenzisa isikhathi, amandla, nengcebo zifundisa amaqiniso eBhayibheli kwabanye, ikakhulukazi abantu “ababubula bekhala ngazo zonke izinengiso” ezenziwa ezweni likaSathane. (Hezekeli 9:4) IBhayibheli lithi: “[Uyajabula] onakekela ohluphekayo; uJehova uyakumsindisa osukwini olubi. UJehova uyakumlondoloza, amphilise; [uyakuthiwa ungojabulayo] emhlabeni.” (IHubo 41:1, 2) Njengoba uJesu asho, “kukhona injabulo eyengeziwe ekupheni kunekhona ekwamukeleni.”—IzEnzo 20:35, NW.
22. (a) Ngokuphathelene nenjabulo, qhathanisa izinceku zikaNkulunkulu nalabo abangamkhonzi. (b) Kungenxa yasiphi isizathu esikhethekile kufanele silindele ukuba abajabulayo?
22 Ngakho nakuba izinceku zikaNkulunkulu zingenakulindela injabulo enkulu kakhulu kulesisikhathi samanje, zingayithola injabulo engajatshulelwa neze yilabo abangamkhonzi uNkulunkulu. UJehova uthi: “Bhekani, izinceku zami ziyakujabula ngokwenama kwenhliziyo, kepha nina niyakuhewula ngokwaphuka komoya, nikhale ngobuhlungu benhliziyo.” (Isaya 65:14) Futhi, labo abakhonza uNkulunkulu banesizathu esikhetheke kakhulu sokujabula manje—banomoya wakhe ongcwele ‘uNkulunkulu awunike labo abamlalelayo.’ (IzEnzo 5:32) Futhi khumbula, lapho umoya kaNkulunkulu ukhona, kunenjabulo.—Galathiya 5:22.
23. Yini esizoyicabangela esifundweni sethu esilandelayo?
23 Enhlanganweni yezinceku zikaNkulunkulu namuhla, ingxenye ebalulekile ifezwa “amadoda amadala,” abadala, abaholayo emabandleni, benikela enjabulweni yabantu bakaJehova. (Thithu 1:5) Laba kufanele bayibheke kanjani imithwalo yabo yemfanelo nobuhlobo babo nabafowabo nodadewabo abangokomoya? Isihloko sethu esilandelayo sizoxoxa ngalokhu.
Ubungaphendula Kanjani?
◻ Indalo ikufakazela kanjani ukuba kukaJehova ohlelekile?
◻ UJehova uye wazihlela kanjani izinceku zakhe esikhathini esidlule nesamanje?
◻ Ikuphi ukulinganisela uJehova akufuna kithi?
◻ Lubaluleke ngani uthando enjabulweni yethu?
◻ Hlobo luni lwenjabulo esingalulindela esikhathini sethu?
[Umthombo Wesithombe ekhasini 10]
Top: Courtesy of ROE/Anglo-Australian Observatory, photograph by David Malin