Phonsani Konke Ukukhathazeka Kwenu KuJehova
“Zithobeni phansi kwesandla sikaNkulunkulu esinamandla, ukuze aniphakamise ngesikhathi esifaneleyo, niphonse izinkathazo zenu zonke phezu kwakhe, ngokuba uyanikhathalela.”—1 PETRU 5:6, 7.
1. Ukukhathazeka kungasithinta kanjani, futhi lokhu kungafanekiswa kanjani?
UKUKHATHAZEKA kungakuthinta kakhulu ukuphila kwethu. Kungase kufaniswe namaza kagesi ngesinye isikhathi aphazamisa ingoma emnandi ezwakala emsakazweni. Uma amaza omsakazo engaphazanyisiwe, izingoma ezimnandi zingase zijatshulelwe futhi zingabangela ukuthula kwengqondo. Nokho, umsindo ohoshozelayo wamaza kagesi ungaphazamisa ngisho nokuvumelana okumnandi kakhulu kwengoma, usibangele ukucasuka nokukhungatheka. Ukukhathazeka kungaba nethonya elifanayo ekuthuleni kwengqondo yethu. Kungasenza sicindezeleke kakhulu kangangokuba singakwazi ukunaka izindaba ezibalulekile. Ngempela, “ukukhathazeka enhliziyweni yomuntu kuyayithobisa.”—IzAga 12:25.
2. Wathini uJesu Kristu ‘ngezinkathazo zokuphila’?
2 UJesu Kristu wakhuluma ngengozi yokuphazanyiswa ukukhathazeka ngokweqile. Esiprofethweni sakhe esiphathelene nezinsuku zokugcina, wanxusa: “Xwayani ukuba izinhliziyo zenu zingasindwa ngukuminza nokudakwa [nezinkathazo zokuphila, NW], lunizume lolosuku ningazelele, ngokuba luyakufika njengogibe phezu kwabo bonke abahlezi emhlabeni wonke. Ngakho lindani ngesikhathi sonke, nikhuleke ukuba nibe-namandla okuphepha kukho konke lokhu okuyakwenzeka nawokuma phambi kweNdodana yomuntu.” (Luka 21:34-36) Njengoba nje ukudla nokuphuza ngokweqile kungabangela isimo sengqondo esivilaphayo, ngakho ukucindezelwa ‘izinkathazo zokuphila’ kungasibangela ukuba silahlekelwe umbono ofanele ngezinto, kube nemiphumela eyinhlekelele.
Lokho Ukukhathazeka Okuyikho
3. Elithi ‘ukukhathazeka’ liye lachazwa kanjani, futhi yiziphi ezinye zezimbangela zakho?
3 Elithi ‘ukukhathazeka’ lichazwa ngokuthi “ukuyaluza kwengqondo okubuhlungu noma okwethusayo ngokuvamile okubangelwa isenzakalo esibi esisongelayo noma esilindelekile.” Lisho “ukukhathazeka noma ukukhathalela kokwesaba” kanye ‘nomuzwa ongavamile nothena amandla wokwethuka nokwesaba ngokuvamile obonakala ngezimpawu ezingokomzimba (njengokujuluka, ukucindezeleka, nokushaya ngamandla kwenhliziyo), ngokungabaza ngokuphathelene nobuqiniso nesimo sosongo, nangokungabaza ikhono lakho lokukwazi ukubhekana nalo.’ (Webster’s Ninth New Collegiate Dictionary) Ngakho ukukhathazeka kungaba inkinga eyinkimbinkimbi. Phakathi kwezimbangela zakho eziningi kunokugula, ukuguga, ukwesaba ubugebengu, ukulahlekelwa umsebenzi, nokukhathalela inhlalakahle yomkhaya wakho.
4. (a) Yini okuyinto enhle ukuyikhumbula ngabantu nezinkathazo zabo? (b) Uma sibhekene nokukhathazeka, yini engase yenziwe?
4 Ngokusobala, kunamazinga okukhathazeka, njengoba nje kunezimo ezihlukahlukene ezingakubangela. Abantu abasabeli ngendlela efanayo esimweni esithile. Ngakho, kudingeka siqaphele ukuthi ngisho noma into ethile ingasikhathazi, ingase ibe imbangela yokukhathazeka okukhulu kwabanye abakhulekeli bakaJehova esikanye nabo. Yini engase yenziwe uma ukukhathazeka kufinyelela iqophelo lapho singenakukwazi khona ukugxila emaqinisweni avumelanayo najabulisayo eZwi likaNkulunkulu? Kuthiwani uma ukukhathazeka kusihlupha kakhulu kangangokuba size sihluleke ukugxila ezimpikiswaneni zobukhosi bukaJehova nobuqotho bobuKristu? Singase singakwazi ukushintsha izimo zethu. Kunalokho, kudingeka ukuba sibheke amaphuzu angokomBhalo ayosisiza ukuba sibhekane nokukhathazeka okungafanele okubangelwa izinkinga zokuphila ezisindayo.
Usizo Luyatholakala
5. Singenza kanjani ngokuvumelana neHubo 55:22?
5 Lapho amaKristu edinga usizo olungokomoya futhi esindwa izinkathazo, angathola induduzo eZwini likaNkulunkulu. Linikeza isiqondiso esinokwethenjelwa futhi lisinikeza iziqinisekiso eziningi zokuthi asisodwa njengezinceku zikaJehova ezithembekile. Ngokwesibonelo, umhubi uDavide wahlabelela: “Phonsa phezu kukaJehova umthwalo wakho, uzakukuphasa; akayikuvuma naphakade ukuba olungileyo azanyazanyiswe.” (IHubo 55:22) Singenza kanjani ngokuvumelana nalamazwi? Ngokuphonsa zonke izinkathazo, ukwesaba, nokudumazeka kwethu phezu kukaBaba wethu wasezulwini onothando. Lokhu kuyosiza ekusinikezeni umuzwa wokulondeka nokuthula kwenhliziyo.
6. NgokweyabaseFilipi 4:6, 7, yini umthandazo ongasenzela yona?
6 Umthandazo osuka enhliziyweni wasikhathi sonke ubalulekile ukuze siphonse umthwalo, kuhlanganise nakho konke ukukhathazeka kwethu, kuJehova. Lokhu kuyosilethela ukuthula kwangaphakathi, ngoba umphostoli uPawulu wabhala: “Ningakhathazeki ngalutho, kepha kukho konke izicelo zenu mazaziwe nguNkulunkulu ngokukhuleka nokunxusa kanye nokubonga. Ukuthula kukaNkulunkulu okudlula ukuqonda konke kuyakulondoloza izinhliziyo zenu nemicabango yenu kuKristu Jesu.” (Filipi 4:6, 7) “Ukuthula kukaNkulunkulu” okungenakuqhathaniswa kuwukuthula kwengqondo okungavamile okujatshulelwa izinceku zikaJehova ezizinikezele ngisho nasezimweni ezivivinya kakhulu. Kubangelwa ubuhlobo bethu siqu obuseduze noNkulunkulu. Njengoba sithandazela umoya ongcwele futhi siwuvumela ukuba usishukumise, asikhululwa kuzo zonke izinkinga zokuphila, kodwa sijabulela izithelo zomoya zokuthula. (Luka 11:13; Galathiya 5:22, 23) Asinqotshwa ukukhathazeka, ngoba siyazi ukuthi uJehova wenza ukuba bonke abantu bakhe abathembekile ‘bahlale ngokulondeka’ futhi akanakuvumela ukuba kwenzeke okuthile okuyosibangela ukulimala kwaphakade.—IHubo 4:8.
7 .Iyiphi indima engase ifezwe abadala abangamaKristu ekusisizeni ukuba sibhekane nokukhathazeka?
7 Nokho, kuthiwani uma ukukhathazeka kwethu kuphikelela, ngisho noma sizindla ngemiBhalo futhi siphikelela emthandazweni? (Roma 12:12) Abadala abamisiwe ebandleni nabo bayilungiselelo likaJehova lokusisiza ngokomoya. Bangasiduduza futhi basisize ngokusebenzisa iZwi likaNkulunkulu nangokuthandaza nathi nangokusithandazela. (Jakobe 5:13-16) Umphostoli uPetru wanxusa abadala ayekanye nabo ukuba beluse umhlambi kaNkulunkulu ngokuzithandela, ngentshiseko, nangendlela eyisibonelo. (1 Petru 5:1-4) Lamadoda anesithakazelo esiqotho kithi futhi afuna ukuba usizo. Yiqiniso, ukuze sizuze ngokugcwele osizweni oluvela kubadala futhi siphumelele kahle ngokomoya ebandleni, sonke kudingeka sisebenzise iseluleko sikaPetru: “Nina-basha, thobelani amalunga; kepha nonke yembathani ukuthobeka, nithobelane, ngokuba uNkulunkulu umelana nabazidlayo, kepha abathobekileyo ubapha umusa.”—1 Petru 5:5.
8, 9. Iyiphi induduzo engase itholwe kweyoku-1 Petru 5:6-11?
8 UPetru wenezela: “Ngalokho zithobeni phansi kwesandla sikaNkulunkulu esinamandla, ukuze aniphakamise ngesikhathi esifaneleyo, niphonse izinkathazo zenu zonke phezu kwakhe, ngokuba uyanikhathalela. Qondani, nilinde. Isitha senu, uSathane, siyahamba njengebhubesi elibhodlayo sifuna esingamgwinya; melanani naye niqinile ekukholweni, nazi ukuthi zona lezozinhlupheko zehlela abazalwane benu abasezweni. Kepha uNkulunkulu womusa wonke owanibizela enkazimulweni yakhe yaphakade ngoKristu, senihluphekile isikhashana, yena uqobo uyakuniphelelisa, aniqinise, aninike amandla, anisekele. Makube-kuye amandla kuze kube-phakade naphakade. Amen.”—1 Petru 5:6-11.
9 Yeka indlela okududuza ngayo ukuqaphela ukuthi ‘singaphonsa zonke izinkathazo zethu kuNkulunkulu ngoba uyasikhathalela’! Futhi uma okunye kokukhathazeka kwethu kubangelwa imizamo kaDeveli yokuqeda ubuhlobo bethu noJehova ngokusilethela ushushiso nokunye ukuhlupheka, akujabulisi yini ukwazi ukuthi konke kuyogcina kubahambele kahle abagcini bobuqotho? Yebo, ngemva kokuba sesihluphekile isikhashana, uNkulunkulu wawo wonke umusa ongasifanele uyosiphelelisa, asiqinise futhi asinike amandla.
10. Eyoku-1 Petru 5:6, 7 ibhekisela kuziphi izimfanelo ezintathu ezingasiza ekudambiseni ukukhathazeka?
10 Eyoku-1 Petru 5:6, 7 ibhekisela ezimfanelweni ezintathu ezingasisiza ukuba sibhekane nokukhathazeka. Enye “ukuthobeka.” Ivesi 6 liphetha ngenkulumo ethi “ngesikhathi esifaneleyo,” esikisela isidingo sokubekezela. Ivesi 7 libonisa ukuthi singaphonsa konke ukukhathazeka kwethu kuNkulunkulu ngokuqiniseka ‘ngoba uyasikhathalela,’ futhi lawomazwi akhuthaza ukuthembela kuJehova ngokuphelele. Ngakho ake sibone indlela ukuthobeka, ukubekezela, nokuthembela kuNkulunkulu ngokuphelele okungasisiza ngayo ukuba sidambise ukukhathazeka.
Indlela Ukuthobeka Okungasisiza Ngayo
11. Ukuthobeka kungasisiza kanjani ukuba sibhekane nokukhathazeka?
11 Uma sithobekile, siyovuma ukuthi imiqondo kaNkulunkulu iphakeme kakhulu kuneyethu. (Isaya 55:8, 9) Ukuthobeka kusisiza ukuba siqaphele ukulinganiselwa kwekhono lethu lokucabanga uma liqhathaniswa nombono kaJehova ofanele ohlanganisa konke. Ubona izinto esingaziqondi, njengoba kuboniswe endabeni yendoda elungile uJobe. (Jobe 1:7-12; 2:1-6) Ngokuzithoba “phansi kwesandla sikaNkulunkulu esinamandla,” siqaphela isimo sethu esiphansi uma siqhathaniswa nesoMbusi Ophakeme. Ngokulandelayo, lokhu kusisiza ukuba sibhekane nezimo azivumelayo. Izinhliziyo zethu zingase zilangazelele ukukhululeka okusheshayo, kodwa njengoba izimfanelo zikaJehova zilingana ngokuphelele, wazi kahle ukuthi uyosithatha nini isinyathelo futhi kanjani ngenxa yethu. Khona-ke, njengezingane ezincane, ngokuthobeka masincike esandleni sikaJehova esinamandla, siqiniseka ukuthi uyosisiza sibhekane nezinkathazo zethu.—Isaya 41:8-13.
12. Ukukhathazeka ngokulondeka ngokwezinto ezibonakalayo kungathinteka kanjani uma ngokuthobeka sisebenzisa amazwi akumaHeberu 13:5?
12 Ukuthobeka kuhlanganisa ukuzimisela ukusebenzisa iseluleko esivela eZwini likaNkulunkulu, ngokuvamile okunganciphisa ukukhathazeka. Ngokwesibonelo, uma ukukhathazeka kwethu kuye kwabangelwa ukuhileleka ngokujulile eminakweni yezinto ezibonakalayo, kuyoba kuhle ukucabanga ngeseluleko sikaPawulu: “Ukwenza kwenu makungabi-ngokokufisa imali; yaneliswani ngeninakho; ngokuba [uNkulunkulu] ushilo wathi: Angisoze ngakuyeka, angisoze ngakushiya.” (Heberu 13:5) Ngokusebenzisa iseluleko esinjalo ngokuthobeka, abaningi baye bazikhulula ekukhathazekeni okukhulu ngokuphathelene nokulondeka ngokwezinto ezibonakalayo. Nakuba kungenzeka ukuthi isimo sabo esingokwezimali asizange sithuthuke, asibusi imicabango yabo size sibangele ukulimala ngokomoya.
Indima Yokubekezela
13, 14. (a) Ngokuphathelene nokukhuthazela ngokubekezela, isiphi isibonelo indoda enguJobe eyasibeka? (b) Ukulindela ngokubekezela kuJehova kungasenzelani?
13 Inkulumo ethi “ngesikhathi esifaneleyo” ekweyoku-1 Petru 5:6 ibonisa isidingo sokukhuthazela ngokubekezela. Ngezinye izikhathi inkinga iphikelela isikhathi eside, futhi lokho kungase kwandise ukukhathazeka. Kusesimweni esinjalo ikakhulukazi lapho sidinga khona ukushiyela izindaba ezandleni zikaJehova. Umfundi uJakobe wabhala: “Babusisiwe abakhuthazelayo; nizwile ngokukhuthazela kukaJobe, nibonile impetho yeNkosi ukuthi iNkosi inesihe esikhulu nesihawu.” (Jakobe 5:11) UJobe wabhekana nokuwohloka okungokomnotho, walahlekelwa izingane eziyishumi ngokufa, waphathwa isifo esenyanyekayo, futhi walahlwa ngokungafanele abaduduzi bamanga. Okungenani izinga elithile lokukhathazeka liyoba elifanele ngaphansi kwezimo ezinjalo.
14 Nokho, uJobe wayeyisibonelo sokukhuthazela ngokubekezela. Uma sibhekene nokuvivinywa okukhulu kokholo, kungase kudingeke silinde ukuze sithole ukukhululwa, njengoba naye enza. Kodwa uNkulunkulu wathatha isinyathelo ngenxa yakhe, ekugcineni ekhulula uJobe ekuhluphekeni kwakhe futhi emvuza ngokucebile. (Jobe 42:10-17) Ukulindela uJehova ngokubekezela kuthuthukisa ukukhuthazela kwethu futhi kwembula ukujula kokuzinikela kwethu kuye.—Jakobe 1:2-4.
Thembela KuJehova
15. Kungani kufanele sithembele kuJehova ngokuphelele?
15 UPetru wanxusa ayekholwa nabo ukuba ‘baphonse zonke izinkathazo zabo kuNkulunkulu ngokuba uyabakhathalela.’ (1 Petru 5:7) Ngakho singakwazi futhi kufanele sithembele ngokuphelele kuJehova. IzAga 3:5, 6 zithi: “Themba kuJehova ngayo yonke inhliziyo yakho, ungenciki kokwakho ukuqonda. Mazise yena ezindleleni zakho zonke, uyakuqondisa imikhondo yakho.” Ngenxa yokuhlangenwe nakho kwangesikhathi esidlule, abanye abagcwele ukukhathazeka bakuthola kunzima ukuthemba abanye abantu. Kodwa sinazo zonke izizathu zokuthemba uMdali wethu, oyiwo kanye uMthombo noMsekeli wokuphila. Ngisho noma singayithembi indlela esisabela ngayo endabeni ethile, ngaso sonke isikhathi singathembela kuJehova ukuthi uzosikhulula ezinsizini zethu.—IHubo 34:18, 19; 36:9; 56:3, 4.
16. Yini uJesu Kristu ayisho ngokuphathelene nokukhathazeka ngezinto ezingokwenyama?
16 Ukuthembela kuNkulunkulu kuhlanganisa ukulalela iNdodana yakhe, uJesu Kristu, eyafundisa lokho eyakufunda kuYise. (Johane 7:16) UJesu wanxusa abafundi bakhe ukuba ‘bazibekelele ingcebo ezulwini’ ngokukhonza uJehova. Kodwa kuthiwani ngezidingo zezinto ezingokwenyama ezihilela ukudla, izembatho, nendawo yokuhlala? “Ningakhathazeki,” kululeka uJesu. Waveza ukuthi uNkulunkulu uyazondla izinyoni. Uzimbathisa kahle izimbali. Izinceku zikaNkulunkulu ezingabantu azibalulekile yini ngaphezu kwalezizinto? Ngokuqinisekile zibalulekile. Ngakho, uJesu wanxusa: “Kodwa funani kuqala umbuso kaNkulunkulu nokulunga kwakhe, khona konke lokhu kuyakwenezelwa nina.” UJesu wanezela: “Ningakhathazeki ngengomuso, ngokuba ingomuso iyakukhathalela okwayo. Inkathazo yosuku yanele lona.” (Mathewu 6:20, 25-34) Yebo, siyakudinga ukudla, okuphuzwayo, izembatho, nendawo yokuhlala, kodwa uma sithembela kuJehova, asinakukhathazeka ngokungafanele ngalezizinto.
17. Singasifanekisa kanjani isidingo sokufuna uMbuso kuqala?
17 Ukuze sifune uMbuso kuqala, kumelwe sithembele kuNkulunkulu futhi sigcine izinto zethu eziza kuqala endaweni efanele. Inhlambi engenazo izinto zokuphefumula ingase itshuze ngaphansi kwamanzi ifuna uhlobo oluthile lwenhlanzi oluneparele ngaphakathi. Lena indlela yayo yokondla umkhaya wayo. Into eza kuqala ngempela! Kodwa yini ebaluleke kakhulu? Umoya! Kufanele ivele njalo ngaphezu kwamanzi ukuze igcwalise amaphaphu ayo. Umoya uyinto eza kuqala ebaluleke nakakhulu. Ngokufanayo, kungase kudingeke sihileleke ngandlela-thile kulesisimiso sezinto ukuze sithole izidingo zokuphila. Nokho, izinto ezingokomoya kumelwe zize kuqala ngoba khona kanye ukuphila komkhaya wethu kuxhomeke kulezizinto. Ukuze sigweme ukukhathazeka okungafanele ngezidingo zezinto ezingokwenyama, kumelwe sithembele ngokuphelele kuNkulunkulu. Ngaphezu kwalokho, ‘ukuvama njalo emsebenzini weNkosi’ kungasiza ekudambiseni ukukhathazeka ngoba “injabulo kaJehova” iba inqaba yethu.—1 Korinte 15:58; Nehemiya 8:10.
Qhubekani Niphonsa Ukukhathazeka Kwenu KuJehova
18. Ibuphi ubufakazi obukhona bokuthi ukuphonsa konke ukukhathazeka kwethu kuJehova kungasisiza ngempela?
18 Ukuze sihlale sigxilé ezintweni ezingokomoya, kumelwe siqhubeke siphonsa konke ukukhathazeka kwethu kuJehova. Ngaso sonke isikhathi khumbula ukuthi uyazikhathalela ngempela izinceku zakhe. Ngokwesibonelo: Ngenxa yokungathembeki komyeni wakhe kuye, ukukhathazeka komunye wesifazane ongumKristu kwanda kwaze kwafinyelela iqophelo lapho engasakwazi khona ukulala. (Qhathanisa neHubo 119:28.) Nokho, lapho esembhedeni, wayephonsa zonke izinkathazo zakhe kuJehova. Wayethulula inhliziyo yakhe kuNkulunkulu, emtshela ngobuhlungu yena namadodakazi akhe amancane amabili ababebuzwa. Ngemva kokuba ekhalele usizo ngomthandazo ojulile, ngaso sonke isikhathi wayekwazi ukulala, ngoba wayethemba ukuthi uJehova wayezomnakekela yena nezingane zakhe. Lona wesifazane ohlukanise ngokomBhalo manje usemshadweni ojabulisayo nomdala.
19, 20. (a) Iziphi ezinye izindlela esingabhekana ngazo nokukhathazeka? (b) Yini okufanele siqhubeke siyenza ngakho konke ukukhathazeka kwethu?
19 Njengabantu bakaJehova, sinezindlela ezihlukahlukene zokubhekana nokukhathazeka. Ukusebenzisa iZwi likaNkulunkulu kuwusizo ngokukhethekile. Sinokudla okungokomoya okucebile okulungiselelwa uNkulunkulu ‘ngenceku ethembekileyo neqondayo,’ kuhlanganise nezihloko eziwusizo neziqabulayo ezikhishwa ku-Nqabayokulinda ne-Phaphama! (Mathewu 24:45-47) Sinosizo lomoya ongcwele kaNkulunkulu. Umthandazo wasikhathi sonke nojulile usizuzisa kakhulu. Abadala abangamaKristu abamisiwe bakulungele futhi bazimisele ukunikeza usizo nenduduzo engokomoya.
20 Ukuthobeka nokubekezela kwethu kuzuzisa kakhulu ekulwisaneni nokukhathazeka okungase kusihlasele. Ukuthembela ngokuphelele kuJehova kubaluleke ngokukhethekile, ngoba ukholo lwethu luyakheka njengoba sithola usizo nesiqondiso sakhe. Ngokulandelayo, ukuba nokholo kuNkulunkulu kungasisiza ukuba sigweme ukukhathazeka ngokungafanele. (Johane 14:1) Ukholo lusishukumisela ukuba sifune uMbuso kuqala futhi sizigcine simatasa emsebenzini weNkosi ojabulisayo, okungasisiza ukuba sibhekane nokukhathazeka. Umsebenzi onjalo usenza sizizwe silondekile phakathi kwalabo abayohubela uNkulunkulu izindumiso phakade. (IHubo 104:33) Ngakho-ke masiqhubeke siphonsa zonke izinkathazo zethu kuJehova.
Ubungaphendula Kanjani?
◻ Ukukhathazeka kungachazwa kanjani?
◻ Iziphi ezinye izindlela esingabhekana ngazo nokukhathazeka?
◻ Ukuthobeka nokubekezela kungasisiza kanjani ukuba sidambise ukukhathazeka?
◻ Lapho sibhekene nokukhathazeka, kungani kubalulekile ukuthembela kuJehova ngokuphelele?
◻ Kungani kufanele siqhubeke siphonsa zonke izinkathazo zethu kuJehova?
[Isithombe ekhasini 24]
Uyazi yini ukuthi kungani uJesu athi, “Ningakhathazeki”?