Ingabe Uyakhumbula?

Ingabe uye wakwazisa ukufunda omagazini bamuva be-Nqabayokulinda? Uma kunjalo, bona ukuthi ungakwazi yini ukuphendula lemibuzo elandelayo:

▫ Kungani amaKristu okuqala engazange alugubhe usuku lokuzalwa kukaJesu?

Ngokwe-World Book Encyclopedia, “amaKristu Okuqala ayengakugubhi ukuzalwa [kukaJesu] ngoba ayebheka ukugujwa kosuku lokuzalwa kwanoma ubani njengesiko lobuqaba.”—12/15, ikhasi 4.

▫ Ingabe imithandazo kufanele iqondiswe kuJesu?

Cha, ngoba imithandazo iwuhlobo oluthile lokukhulekela okumelwe kuqondiswe kuNkulunkulu uMninimandla onke kuphela. Ngokuqondisa yonke imithandazo yethu kuJehova uNkulunkulu, sibonisa ukuthi sisifake ezinhliziyweni isiqondiso sikaJesu sokuthandaza sithi: “Baba wethu osemazulwini.” (Mathewu 6:9)—12/15, ikhasi 25.

▫ Kungani kwakhishwa isahlulelo esihlukile ngesono esingathi sína seNkosi uDavide uma siqhathaniswa nezono zika-Ananiya noSafira? (2 Samuweli 11:2-24; 12:1-14; IzEnzo 5:1-11)

Isono seNkosi uDavide sasingenxa yobuthakathaka obungokwenyama. Lapho ibuzwa ngalokho eyayikwenzile, yaphenduka, futhi uJehova wayithethelela—nakuba kwadingeka ibhekane nemiphumela yesono sayo. U-Ananiya noSafira bona ngokuthi baqamba amanga ngobuzenzisi, bezama ukukhohlisa ibandla lobuKristu kanjalo ‘bekhohlisa umoya ongcwele noNkulunkulu.’ (IzEnzo 5:3, 4) Lokho kwabonakala kuwubufakazi bokuba nenhliziyo embi, ngakho bahlulelwa kanzima kakhulu.—1/1, amakhasi 27, 28.

▫ Yini engasisiza ukuba sikhonze uJehova ngenhliziyo ejabulayo?

Kufanele sihlakulele umbono oqondile nowokwazisa ngezibusiso zethu namalungelo enkonzo esiwanikwe uNkulunkulu, futhi akumelwe silokothe sikhohlwe ukuthi ngokulandela iZwi likaNkulunkulu, siyamjabulisa.—1/15, amakhasi 16, 17.

▫ Yiziphi izinto ezimbili okumelwe sizikhumbule ukuze sinikeze isikhuthazo esiphumelelayo?

Okokuqala, cabanga ngalokho ozokusho, ukuze isikhuthazo sibe esiqondile. Okwesibili, funa ithuba lokuya kumuntu ofanelekela ukunconywa noma odinga ukwakhiwa.—1/15, ikhasi 23.

▫ Kungani ‘isixuku esikhulu sinamagatsha esundu ezandleni zaso’? (IsAmbulo 7:9)

Ukuvayizisa amahlamvu esundu kubonisa ukuthi ngenjabulo “isixuku esikhulu” sihalalisela uMbuso kaJehova neNkosi yakhe egcotshiwe, uJesu Kristu. (Bheka uLevitikusi 23:39, 40.)—2/1, ikhasi 17.

▫ Yiziphi izifundo ezibalulekile ezitholakala encwadini kaJobe?

Incwadi kaJobe isibonisa indlela yokusingatha izinkinga. Inikeza izibonelo ezivelele ngokuqondene nendlela othile obhekene novivinyo okufanele—nokungafanele—alulekwe ngayo. Ngaphezu kwalokho, okuhlangenwe nakho kukaJobe ngokwakhe kungasisiza ukuba sisabele ngendlela elinganiselayo lapho sizithola sihlaselwa izimo ezimbi.—2/15, ikhasi 27.

▫ Zisifundisani izimangaliso zikaJesu?

Izimangaliso zikaJesu zikhazimulisa uNkulunkulu, zibekela amaKristu isibonelo sokukhazimulisa uNkulunkulu. (Roma 15:6) Zikhuthaza ukwenza okuhle, ukubonisa umusa, nokubonisa isihawu.—3/1, ikhasi 8.

▫ Kufeza yiphi injongo ukubukeza kwabadala imibuzo elungiselelwe nabasanda kuzinikezela?

Lokhu kuqinisekisa ukuthi umfundi ngamunye uziqonda ngokugcwele izimfundiso zeBhayibheli eziyisisekelo futhi uyakuqonda okuhilelekile ekubeni uFakazi kaJehova.—3/1, ikhasi 13.

▫ Imithandazo eseBhayibhelini ingasizuzisa kanjani?

Ngokuhlolisisa imithandazo esemiBhalweni, singabona leyo eyenziwa ezimweni ezifana nezethu. Ukuthola, ukufunda, nokuzindla ngemithandazo enjalo kungasisiza ukuba sicebise ukukhulumisana kwethu siqu noJehova.—3/15, amakhasi 3, 4.

▫ Kuyini ukwesaba kokuhlonipha uNkulunkulu?

Ukwesaba kokuhlonipha uNkulunkulu kuwukwesaba uJehova, inhlonipho ejulile ngaye, ehambisana nokwesaba okunempilo ukumdumaza. (IHubo 89:7)—3/15, ikhasi 10.

▫ Kungaziphi izindlela ezintathu iBhayibheli elibonisa ngazo ukuthi siyigugu emehlweni kaNkulunkulu?

IBhayibheli lifundisa ukuthi ngamunye wethu uyigugu emehlweni kaNkulunkulu (Luka 12:6, 7); licacisa lokho uJehova akwazisayo kithi (Malaki 3:16); futhi lilandise lokho uJehova akwenzile ukuze abonise uthando lwakhe ngathi. (Johane 3:16)—4/1, amakhasi 11, 12, 14.

▫ Kungani eyamaHeberu 10:24, 25 ingaphezu nje komyalo wokuthi amaKristu ahlangane ndawonye?

Lamazwi kaPawulu abeka indinganiso ephefumulelwe ngokwaphezulu ngayo yonke imihlangano yobuKristu—empeleni, nganoma isiphi isenzakalo lapho amaKristu ehlangana ndawonye khona.—4/1, ikhasi 16.