UKubekezela Kuholela Empumelelweni

NJENGOBA ILANDISWA NGUJOSÉ MAGLOVSKY

Lapho iphoyisa lingibamba ingalo, ngaqalaza ubaba. Nokho, wayesethathiwe kakade eyiswe esiteshini samaphoyisa ngingazi. Uma ngifika lapho, amaphoyisa azithatha zonke izincwadi zethu, kuhlanganise namaBhayibheli ethu, futhi awabeka aba yinqwaba phansi. Ebona lokhu, ubaba wabuza: “Nibeka ngisho namaBhayibheli phansi?” Isikhulu samaphoyisa saxolisa, sase siwacosha amaBhayibheli futhi sawabeka etafuleni.

KWENZEKA kanjani ukuba sigcine sesisesiteshini samaphoyisa? Sasenzeni? Ingabe sasisesikhungweni samaphoyisa aphika ubukhona bukaNkulunkulu, njengoba sasiphucwe ngisho namaBhayibheli? Ukuze siphendule lemibuzo, kuzomelwe siphindele emuva ku-1925, ngisho nangaphambi kokuba ngizalwe.

Ngalowonyaka ubaba, u-Estefano Maglovsky, nomama, uJuliana, bahamba ezweni elaliyiYugoslavia futhi bathuthela eBrazil, bahlala eSão Paulo. Nakuba ubaba ayengumProthestani futhi umama engumKatolika, inkolo yayingesona isici esihlukanisayo phakathi kwabo. Eqinisweni, eminyakeni eyishumi kamuva kwenzeka okuthile okwabahlanganisa ndawonye ngokwenkolo. Umlamu kababa wamlethela incwajana enombala ophelele ngesiHungary ekhuluma ngesimo sabafile. Wayethole lencwajana njengesipho, futhi wacela ubaba ukuba ayifunde futhi amnikeze umbono wakhe ngalokho ekuqukethe, ikakhulukazi engxenyeni ephathelene ‘nesihogo.’ Ubaba wahlala ubusuku bonke efunda lencwajana ephindelela, futhi ngosuku olulandelayo, lapho umlamu wakhe efika ukuze athole umbono wakhe, ngokungathandabuzi ubaba wathi: “Nali iqiniso!”

Iziqalo Ezincane

Njengoba lena kwakuyincwadi yoFakazi BakaJehova, bobabili bahamba bayobafuna ukuze bafunde okwengeziwe ngezinkolelo nezimfundiso zabo. Lapho ekugcineni bebathola, amalungu amaningana omkhaya wakithi aqala ukuba nezingxoxo zeBhayibheli noFakazi. Ngawo lowonyaka, u-1935, kwaqalwa isifundo seBhayibheli sasikhathi sonke ngesiHungary, nesilinganiso sabantu abangu-8 ababebakhona, futhi kusukela ngalesosikhathi siye saba nezifundo zeBhayibheli zasikhathi sonke kithi.

Ngemva kweminyaka emibili yokutadisha iBhayibheli, ubaba wabhapathizwa ngo-1937 futhi waba uFakazi kaJehova oshisekayo, ehlanganyela emsebenzini wokushumayela endlini ngendlu futhi ekhonza njengenceku emisiwe nomqhubi wesifundo. Wasiza ekumisweni kwebandla lokuqala eSão Paulo, engxenyeni eseVila Mariana. Kamuva lelibandla lathuthelwa maphakathi nedolobha futhi laziwa ngokuthi iBandla LaseCentral. Eminyakeni eyishumi kamuva kwamiswa ibandla lesibili, endaweni yaseYpiranga, futhi ubaba wamiswa njengenceku yebandla lapho. Ngo-1954 kwamiswa ibandla lesithathu, engxenyeni eseMoinho Velho, nalapho akhonza khona njengenceku yebandla.

Ngokushesha lapho leliqembu seliqinisiwe, waqala ukusiza iqembu elaliseduze eSão Bernardo do Campo. Ngenxa yesibusiso sikaJehova emizamweni yalamaqembu amancane oFakazi phakathi naleminyaka, ukwanda bekuphawuleka, kangangokuthi ngo-1994 bekunabamemezeli abangaphezu kuka-70 000 emabandleni angu-760 engxenyeni enkulu yeSão Paulo. Ngokudabukisayo, ubaba akazange aphile ukuze abone lokhukwanda. Wafa ngo-1958 eneminyaka engu-57 ubudala.

Ukulwela Ukulandela Isibonelo Sikababa

Isici sikababa esiphawulekayo, njengoba kunjalo nangamanye amaKristu avuthiwe, kwakuwukungenisa kwakhe izihambi. (Bheka eyesi-3 Johane 1, 5-8.) Ngenxa yalokho, saba nelungelo lokuba no-Antonio Andrade nomkakhe nendodana njengezivakashi zakithi, abafika eBrazil bevela e-United States benoMfowethu noDade Yuille ngo-1936. Abanye ababa izivakashi zethu kwakungababethweswe iziqu eWatchtower Bible School of Gilead, uHarry Black noDillard Leathco, ababa izithunywa zevangeli zokuqala ukwabelwa eBrazil ngo-1945. Eziningi ezinye zabalandela. Lababafowethu nodade babewumthombo wesikhuthazo wasikhathi sonke kubo bonke emkhayeni wakithi. Ngenxa yokwazisa ngalokhu futhi ukuze kuzuze umkhaya wami, ngiye ngazama ukulingisa isibonelo sikababa ngokuphathelene nemfanelo yobuKristu yokungenisa izihambi.

Nakuba ngangineminyaka engu-9 kuphela ubudala lapho ubaba efunda iqiniso ngo-1935, njengenkosana, ngaqala ukuhamba naye emisebenzini yakhe engokwasezulwini. Sonke sasiya emihlanganweni kanye naye eHholo LoMbuso elalisendlunkulu yoFakazi eSão Paulo ku-Eça de Queiroz Street, Number 141. Ngenxa yokufundisa nokuqeqesha ubaba anginika khona, ngaba nesifiso esivuthayo sokukhonza uJehova, futhi ngo-1940 ngazinikezela kuJehova, ngikubonakalisa ngokucwiliswa emanzini kulokho manje okuwuMfula iTietê ongcolisiwe, ogeleza maphakathi neSão Paulo.

Ngokushesha ngafunda lokho okwakushiwo ukuba ummemezeli wezindaba ezinhle ophuma njalo, etshala futhi enisela isigijimi seqiniso kwabanye futhi eqhuba nabo izifundo zeBhayibheli zasemakhaya. Manje, njengoba ngibona izinkulungwane zoFakazi BakaJehova abazinikezele eBrazil, nginomuzwa ojulile wenjabulo ngazi ukuthi ngiye ngasetshenziswa nguYe ukuze ngisize iningi lazo ukuba lifinyelele iqiniso noma lijulise ukwazisa kwalo ngalo.

Phakathi kwalabo engabasiza kwakunoJoaquim Melo, engahlangana naye enkonzweni yendlu ngendlu. Ngangikhuluma namanye amadoda amathathu ayelalele kodwa engenasithakazelo kangako. Khona-ke ngaphawula ukuthi insizwa eyayisanda kuzihlanganisa nathi yayilalele ngokucophelela. Lapho ngibona isithakazelo sayo, ngaqondisa ukunaka kwami kuyo, futhi ngemva kobufakazi obuhle, ngayimemela eSifundweni Sencwadi Sebandla. Ayizange ibe khona esifundweni, kodwa yaba khona eSikoleni Senkonzo Esingokwasezulwini futhi kamuva yaba khona njalo emihlanganweni. Yathuthuka kahle kakhulu, yabhapathizwa, futhi yakhonza iminyaka eminingana njengombonisi ojikelezayo, ihambisana nomkayo.

Bese kuba u-Arnaldo Orsi, engahlangana naye emsebenzini. Ngangifakaza njalo kothile engangisebenza naye kodwa ngaphawula ukuthi insizwa enentshebe yayihlala ilalele, ngakho ngaqala ukukhuluma nayo ngokuqondile. Yayivela emkhayeni wamaKatolika aqotho kodwa yayibuza imibuzo eminingi ngezindaba ezifana nokubhema, ukubuka izithombe ezingcolile zamabhayisikobho, nokusebenzisa ubuciko bokuzivikela be-judo. Ngayibonisa lokho okushiwo iBhayibheli, futhi okwangimangaza ngokujabulisayo, ngosuku olulandelayo yangimema ukuba ngizobona njengoba iphula inqawe yayo nokokuyokhela kanye nesiphambano sayo, yabulala amafilimu ayo ezithombe ezingcolile, futhi yashefa intshebe yayo. Umuntu oshintshile ngemizuzwana nje! Yayeka futhi ukusebenzisa i-judo futhi yacela ukutadisha iBhayibheli nami nsuku zonke. Naphezu kokuphikiswa umkayo noyise, iye yathuthuka kahle ngokomoya isizwa abazalwane ababehlala eduze nayo. Ngesikhashana, yabhapathizwa futhi namuhla ikhonza njengomdala webandla. Umkayo nabantwana nabo baye bamukela iqiniso.

Ukuhlanganyela Enkonzweni YoMbuso

Lapho ngineminyaka ecishe ibe ngu-14 ubudala, ngaqala ukusebenza enkampanini ekhangisayo, lapho ngafunda khona ukubhala izimpawu zokukhangisa ngopende. Lokhu kwabonakala kuwusizo kakhulu, futhi iminyaka eminingana ngangiwukuphela komzalwane eSão Paulo owayesetshenziselwa ukubhala ngopende izingqwembe nezimpawu ezazichonywa phezulu emigwaqweni zimemezela izinkulumo zeningi nemihlangano yoFakazi BakaJehova. Iminyaka ecishe ibe ngu-30, ngiye ngaba nelungelo lokukhonza njengombonisi woMnyango Wezimpawu emihlanganweni. Ngaso sonke isikhathi ngangilondoloza isikhathi sami sokuphumula ukuze ngisisebenzise emihlanganweni, ngize ngilale ngisho nasehholo lomhlangano ukuze ngikwazi ukubhala izimpawu ngopende kusenesikhathi.

Ngaba futhi nelungelo lokusebenza ngemoto enombhobho yeNhlangano, okwakuyinto engavamile ngempela ngalesosikhathi. Sasibeka izincwadi zethu zeBhayibheli entweni ethile, bese kuthi lapho imoto enombhobho isakaza isigijimi esiqoshiwe, thina sikhulume nabantu ababephuma emizini yabo ukuze bazobona okwakwenzeka. Ezinye izindlela esasizisebenzisa ukuze sazise izindaba ezinhle zoMbuso kwakuyigilamafoni ephathekayo, futhi namanje ngisenawo amarekhodi ayesetshenziselwa ukwethula izincwadi zeNhlangano. Kwahanjiswa izincwadi eziningi zeBhayibheli ngenxa yalokho.

Ngalezozinsuku iSonto LamaKatolika laliba nabantu abaningi ababenza udwendwe emigwaqweni yaseSão Paulo, ngokuvamile kunamadoda avula indlela ngaphambili. Ngolunye usuku ngeSonto, mina nobaba sasihambisa INqabayokulinda ne-Phaphama! emgwaqweni lapho kuqhamuka udwendwe olude. Ubaba, njengomkhuba wakhe, wayefake isigqoko. Enye yalamadoda ayephambili kuloludwendwe yamemeza: “Khumula isigqoko! Awuboni ukuthi kuza udwendwe?” Lapho ubaba engasikhumuli isigqoko, kweza amadoda engeziwe, esisunduzela eceleni ngasefasiteleni lesitolo futhi ephazamisa. Lokhu kwadonsa ukunaka kwephoyisa, eleza ukuzobona okwakwenzeka. Enye yalamadoda yalibamba ngengalo, ifuna ukukhuluma nalo. “Susa isandla sakho ezingutsheni zami!” kuyala iphoyisa, lishaya isandla salendoda. Lase libuza ukuthi kwakwenzekani. Lendoda yachaza ukuthi ubaba akazange asikhumule isigqoko sakhe lapho kuza udwendwe, inezela: “NgingumRoma Katolika ongumphostoli.” Impendulo engalindelekile yathi: “Uthi ungumRoma? Khona-ke phindela eRoma! Lapha kuseBrazil.” Lase liphendukela kithi, libuza: “Obani abafike kuqala lapha?” Lapho ubaba ephendula ukuthi yithina esasifike kuqala, leliphoyisa labaxosha lababantu futhi lasitshela ukuthi siqhubeke nomsebenzi wethu. Lama eduze kwethu kwaze kwaba yilapho lonke loludwendwe seludlulile—futhi ubaba wayelokhu esigqokile isigqoko!

Izenzakalo ezifana nalesi zazingavamile. Kodwa lapho zenzeka, kwakukhuthaza ukwazi ukuthi kwakunabantu ababekholelwa ekuphatheni idlanzana ngobulungisa futhi ababengazithobi ngokweqile eSontweni LamaKatolika.

Kwesinye isenzakalo, ngahlangana nothile osemusha owabonisa isithakazelo futhi wangicela ukuba ngibuye esontweni elilandelayo. Lapho ngiphindela wangamukela kahle kakhulu futhi wangingenisa. Yeka indlela engamangala ngayo lapho ngizithola ngizungezwe iqembu lentsha elalingihleka usulu futhi lizama ukungithukuthelisa! Isimo sashuba, futhi ngaba nomuzwa wokuthi lalizongihlasela ngokushesha. Ngatshela lowo owayengimemile ukuthi uma kwenzeka noma yini kimi, wayezolandisa ngokugcwele nokuthi umkhaya wakithi wawazi ukuthi ngangikuphi. Ngalicela ukuba lingiyeke ngihambe, futhi leliqembu lavuma. Nokho, ngaphambi kokuba ngihambe, ngathi noma ubani kuleliqembu owayefuna ukukhuluma nami eyedwa, ngangingatholakala. Kamuva, ngathola ukuthi kwakuyiqembu elishiseka ngokweqile, abangane bompristi wendawo, owayelikhuthaze ukuba lihlele lomhlangano. Ngakujabulela ukuphuma phakathi kwalo.

Yiqiniso, ekuqaleni intuthuko yayincane eBrazil, cishe yayingabonakali. Sasisengxenyeni yokuqala ‘yokutshala,’ sinesikhathi esincane ‘sokuhlakula nokuvuna’ izithelo zemisebenzi yethu. Sasikukhumbula njalo lokho okwabhalwa umphostoli uPawulu: “Mina ngatshala, u-Apholo wanisela, kodwa uNkulunkulu waqhubeka ekhulisa; kangangokuthi lowo otshalayo akalutho nalowo oniselayo, kodwa uNkulunkulu okhulisayo nguye owutho.” (1 Korinte 3:6, 7) Lapho kufika abafundi ababili ababethweswe iziqu eGileyadi ngo-1945, saba nomuzwa wokuthi sase sifikile isikhathi salokhu kwanda okwase kulindelwe isikhathi eside.

Isibindi Lapho Sibhekene Nokuphikiswa

Nokho, ukwanda kwakungenakuza ngaphandle kokuphikiswa, ikakhulukazi ngemva kokuqala kweMpi Yezwe II eYurophu. Kwaba nokushushiswa okuqondile ngenxa yokuthi iningi labantu nezinye iziphathimandla zazingakuqondi ukuma kwethu kokungathathi-hlangothi. Kwesinye isenzakalo, ngo-1940, lapho sisenza umsebenzi wasemgwaqweni ngezingqwembe maphakathi neSão Paulo, kweza iphoyisa ngemva kwami, langihlubula izingqwembe, futhi langibamba ngengalo ukuze lingiyise esiteshini samaphoyisa. Ngaqalaqalaza ubaba, kodwa angizange ngimbone. Yena kanye nabanye abafowethu nodade abaningana, kuhlanganise noMfoweth’ uYuille, owayengamele umsebenzi eBrazil, kakade base beyiswe esiteshini samaphoyisa ngingazi. Njengoba kuboniswe esigabeni sokuqala, lapho ngaphinde ngahlangana nobaba.

Njengoba ngangisemncane, ngangingenakuboshwa futhi ngokushesha iphoyisa langiyisa ekhaya futhi langiyisa kumama. Ngaleyontambama odade nabo bakhululwa. Kamuva amaphoyisa anquma ukukhulula bonke abazalwane, cishe abayishumi ngesibalo, ngaphandle kukaMfoweth’ uYuille. Nokho, abafowethu baphikelela: “Sihamba sonke noma akekho ohambayo.” Amaphoyisa ayenenkani, ngakho bonke bahlala ubusuku bendawonye ekamelweni elibandayo elinosimende. Ngosuku olulandelayo bonke bakhululwa ngaphandle kwemibandela. Abafowethu babeboshwa izikhathi eziningana ngenxa yokufakaza ngezingqwembe. Lezizimpawu zazimemezela inkulumo yeningi nencwajana enesihloko esithi Fascism or Freedom, futhi ezinye iziphathimandla zakuthatha njengokusho ukuthi sasisekela ubuFascism, okwaholela ngokufanelekile ekushayisaneni kwemibono.

Inkonzo yezempi eyenziwa ngenkani nayo yabalethela izinkinga abafowethu abasebasha. Ngo-1948, ngaba owokuqala ukuboshwa eBrazil ngenxa yalendaba. Iziphathimandla zazingazi ukuthi zenzeni ngami. Ngathunyelwa ekamu lombutho wezempi eCaçapava futhi ngafakwa emsebenzini wokutshala nokunakekela imifino esivandeni kanye nokuhlanza negumbi izikhulu ezazilisebenzisela umdlalo wokuhlabana ngezingcula. Ngaba namathuba amaningi okufakaza nawokuhambisela abantu izincwadi. Isikhulu esasiphethe sasingesokuqala ukwamukela ikhophi yencwadi yeNhlangano ethi Children. Kamuva, nganikezwa ngisho nelungelo lokufundisa ngenkolo amasosha acishe abe ngu-30 noma 40 ayengakwazi ukuvivinya umzimba futhi ehlala endlini. Ekugcineni, ngemva kwezinyanga ezicishe zibe yishumi ngisejele, ngalethwa phambi kwenkantolo futhi ngakhululwa. Ngiyambonga uJehova, owanginika amandla okubhekana nokusongelwa, ukwehliswa isithunzi, nokuhlekwa usulu engangikuthola kubantu abathile.

Umsizi Othembekile Oqotho

Ngo-June 2, 1951, ngashada noBarbara, futhi kusukela ngalesosikhathi ubengumngane othembekile ekufundiseni abantwana bethu nasekubakhuliseni “ngesiyalo nangokuqondisa umqondo kukaJehova.” (Efesu 6:4) Kubantwana bethu abahlanu, abane babo bakhonza uJehova ngokujabula emikhakheni ehlukahlukene. Ithemba esinalo liwukuthi bayoqhubeka bephikelela eqinisweni kanye nathi futhi babe neqhaza entuthukweni yenhlangano nasemsebenzini owenziwayo. Amalungu omkhaya asesithombeni ayizinceku zikaJehova ezizinikezele ngaphandle komncane kunabo bonke, umntwana ogoniwe. Abane bangabadala kanti ababili babo bangamaphayona avamile, okubonisa ukuba yiqiniso kwezAga 17:6: “Abantwana babantwana bangumqhele wabadala, nodumo lwabantwana lungoyise.”

Manje, njengoba sengineminyaka engu-68 ubudala, impilo yami ayiseyinhle neze. Ngo-1991, ngavuma ukuyokwenziwa ukuhlinzwa okuthiwa i-triple bypass futhi kamuva kwaba i-angioplasty. Nokho, ngijabulela ukuthi ngiyakwazi ukuqhubeka ngikhonza njengombonisi owengamele ebandleni laseSão Bernardo do Campo, ngilandela ezinyathelweni zikababa, owayephakathi kwabokuqala abaqala umsebenzi lapho. Isizukulwane sethu siyingqayizivele ngempela, sibe nelungelo lokuhlanganyela ekumemezeleni ukumiswa koMbuso kaJehova wobuMesiya okungasoze kwaphindwa. Ngakho akumelwe silokothe sikhohlwe amazwi kaPawulu kuThimothewu: “Nokho, wena, . . . wenze umsebenzi womvangeli, uyifeze ngokugcwele inkonzo yakho.”—2 Thimothewu 4:5.

[Isithombe ekhasini 23]

Abazali bami, u-Estefano noJuliana Maglovsky

[Isithombe ekhasini 26]

UJosé noBarbara benamalungu omkhaya wabo wezinceku zikaJehova ezizinikezele