Ukufundiswa UJehova Kuze Kube Yilolu Suku
‘UJehova unginike ulimi lwabafundi.’—ISAYA 50:4.
1, 2. (a) UJehova wamlungiselelani umfundi wakhe amthanda kakhulu, futhi waba yini umphumela? (b) UJesu wawuvuma kanjani uMthombo wezimfundiso zakhe?
UJEHOVA UNKULUNKULU ubelokhu enguMfundisi kusukela aba uBaba. Esikhathini esithile ngemva kokuba abanye babantwana bakhe behlubukile, walungiselela umfundi wakhe amthanda kakhulu, iZibulo lakhe, ukwenza inkonzo emhlabeni. (IzAga 8:30) U-Isaya isahluko 50 uveza lomfundi ngokwesiprofetho njengothi: “INkosi uJehova inginikile ulimi lwabafundi ukuba ngazi ukuvuselela oyethileyo ngamazwi ahlumelelayo.” (Isaya 50:4) Ngenxa yokusebenzisa imfundiso kaYise lapho esemhlabeni, uJesu wayengumthombo wokuqabuleka kubo bonke ‘ababekhathele nababesindwa.’—Mathewu 11:28-30.
2 UJesu wenza imisebenzi eminingi yamandla phakathi nekhulu lokuqala. Wavula amehlo ezimpumputhe wavusa ngisho nabafileyo, kodwa ngokuyinhloko abantu besikhathi sakhe babemazi njengomfundisi. Abalandeli bakhe nabaphikisi bakhe babembiza kanjalo. (Mathewu 8:19; 9:11; 12:38; 19:16; Johane 3:2) UJesu akazange nanini afune udumo ngalokho akufundisa kodwa wavuma ngokuthobeka: “Lokho engikufundisayo akukhona okwami, kodwa kungokwalowo ongithumile.” “Lezizinto ngizikhuluma njengoba nje uBaba angifundisa.”—Johane 7:16; 8:28; 12:49.
Ubuhlobo Obufiselekayo Bomfundi Nomfundisi
3. Isiprofetho sika-Isaya sisiveza kanjani isithakazelo sikaJehova kulabo abafundisayo?
3 Umfundisi ophumelelayo uba nesithakazelo somuntu siqu, esiqotho, nesothando kubafundi bakhe. U-Isaya isahluko 50 wembula ukuthi uJehova uNkulunkulu unalolo hlobo lwesithakazelo kulabo abafundisayo. Lesi siprofetho siyaphawula: “Ivusa njalo indlebe yami ekuseni imihla ngemihla ukuba ngizwe njengabafundi.” (Isaya 50:4) Ulimi olusetshenziswe lapha lusikisela umfundisi ovusa abafundi bakhe kusesekuseni ukuze abafundise. Siphawula ngokusebenza kwalesi siprofetho, esinye isazi seBhayibheli sathi: “Umqondo uwukuthi, uMhlengi wayeyoba . . . umuntu osesikoleni sikaNkulunkulu, ngomqondo ongokomfanekiso; futhi oyobe ekufanelekela ukudlulisela imfundo kwabanye. . . . UMesiya wayeyokufanelekela ngokuphawulekayo, ngemfundiso yaPhezulu, ukuba umfundisi wesintu.”
4. UJesu wasabela kanjani ekufundiseni kukaYise?
4 Ngokuvamile, abafundi bayasabela ekufundiseni komfundisi wabo. UJesu wasabela kanjani ekufundiseni kukaYise? Ukusabela kwakhe kwakuvumelana nalokho esikufunda ku-Isaya 50:5: “INkosi uJehova iyivulile indlebe yami, mina angihlubukanga, angihlehlanga nyovane.” Yebo, uJesu wayelangazelela ukufunda. Wayelalelisisa. Ngaphezu kwalokho, wayezimisele ukwenza noma yini uYise ayeyifuna kuye. Wayengenaso isimo sokuvukela; kunalokho, wathi: “Makungenzeki intando yami, kodwa eyakho.”—Luka 22:42.
5. (a) Yini ebonisa ukuthi uJesu wayezazi kusengaphambili izilingo ayezobhekana nazo emhlabeni? (b) Sagcwaliseka kanjani isiprofetho esiku-Isaya 50:6?
5 Lesi siprofetho sibonisa ukuthi iNdodana yayiyazi imiphumela yokwenza kwayo intando kaNkulunkulu. Lokhu kuboniswa yilokho umfundi akushoyo: “Nganika abashayi umhlane, nezihlathi zami kubo abahluthula isilevu; angibusithelisanga ubuso bami ekuhlazisweni nasekufelweni amathe.” (Isaya 50:6) Njengoba isiprofetho sibonisa, uJesu waphathwa ngonya emhlabeni. “Bamkhafulela ebusweni,” kubhala umphostoli uMathewu. “Abanye bamshaya ngezimpama ebusweni.” (Mathewu 26:67) Lokhu kwenzeka ngaphansi kokuqondisa kwabaholi benkolo ngobusuku bePhasika lika-33 C.E. Ngosuku olulandelayo uJesu wanika abashayayo umhlane wakhe, lapho amasosha amaRoma emshaya ngokungenaluzwela ngaphambi kokuba amlengise esigxotsheni ukuba afe.—Johane 19:1-3, 16-23.
6. Yini ebonisa ukuthi uJesu akazange ayeke ukumethemba uMfundisi wakhe, futhi ukwethemba kwakhe kwavuzwa kanjani?
6 INdodana, eyayifundiswe kahle kusengaphambili, ayizange iyeke ukumethemba uMfundisi wayo. Lokhu kuboniswa yilokho ekushoyo ngokulandelayo ngokwesiprofetho: “Ngokuba iNkosi uJehova iyakungisiza; ngalokho angijabhanga.” (Isaya 50:7) Ukuthembela kukaJesu osizweni loMfundisi wakhe kwavuzwa kakhulu. UYise wamphakamisa, embusisa ngesikhundla esiphakeme ngaphezu kwesazo zonke ezinye izinceku zikaNkulunkulu. (Filipi 2:5-11) Nathi sigcinelwe izibusiso ezinhle uma sinamathela ngokulalela ekufundiseni kukaJehova futhi ‘singahlehli nyovane.’ Ake sibheke indlela leyo mfundiso eyenziwe yatholakala ngayo osukwini lwethu.
Isimiso Esandisiwe Sokufundisa
7. UJehova uye wafundisa kanjani emhlabeni?
7 Njengoba siphawulile ngaphambili, uJehova wasebenzisa uMmeleli wakhe wasemhlabeni, uJesu Kristu, ukuze aqhube ukufundisa kwaphezulu phakathi nekhulu lokuqala. (Johane 16:27, 28) Ngaso sonke isikhathi uJesu wayebhekisela eZwini likaNkulunkulu njengegunya lokufundisa kwakhe, ebabekela isibonelo labo ayebafundisa. (Mathewu 4:4, 7, 10; 21:13; 26:24, 31) Kamuva, ukufundisa kukaJehova kwenziwa emhlabeni ngenkonzo yabafundi abanjalo. Khumbula ukuthi uJesu wabayala: “Ngakho-ke hambani niyokwenza abantu bazo zonke izizwe babe abafundi, . . . nibafundise ukugcina zonke izinto enginiyale ngazo.” (Mathewu 28:19, 20) Lapho abafundi sebenziwe, babeba ingxenye ‘yendlu kaNkulunkulu, ibandla likaNkulunkulu ophilayo.’ (1 Thimothewu 3:15) Futhi babehlelwa babe amabandla ababefundiswa kuwo uJehova. (IzEnzo 14:23; 15:41; 16:5; 1 Korinte 11:16) Ingabe ukufundisa kwaphezulu kuye kwaqhubeka ngaleyo ndlela kwaze kwaba sosukwini lwethu?
8. UJesu wabonisa kanjani ukuthi umsebenzi wokushumayela wawuyoqondiswa emhlabeni ngaphambi kokuba kufike ukuphela?
8 Kunjalo ngempela! Ezinsukwini ezintathu ngaphambi kokufa kwakhe, uJesu wabikezela ukuthi ngaphambi kokuphela kwalesi simiso sezinto, kuyoba nomsebenzi omkhulu wokushumayela. Wathi: “Lezizindaba ezinhle zombuso ziyoshunyayelwa emhlabeni wonke owakhiweyo ngenjongo yobufakazi ezizweni zonke; khona-ke ukuphela kuyofika.” UJesu waqhubeka wachaza indlela isimiso somhlaba wonke sokushumayela nokufundisa esasiyoqhutshwa ngayo. Wakhuluma ‘ngesigqila esikholekile nesiqondayo’ esasiyoba umzila, noma ithuluzi, lokunikeza izinceku zaKhe ukudla okungokomoya. (Mathewu 24:14, 45-47) UJehova uNkulunkulu uye wasebenzisa lesi “sigqila” ukuba sinakekele izithakazelo zoMbuso kuwo wonke umhlaba.
9. Obani abakha isigqila esikholekile nesiqondayo?
9 Namuhla, isigqila esikholekile nesiqondayo sakhiwa insali yezindlalifa zoMbuso. Lezi zingamaKristu agcotshiwe, abasele emhlabeni babangu-144 000, ‘abangabakaKristu’ futhi abayingxenye ‘yembewu ka-Abrahama.’ (Galathiya 3:16, 29; IsAmbulo 14:1-3) Ungasibona kanjani isigqila esikholekile nesiqondayo? Ngokuyinhloko ngomsebenzi esiwenzayo nangokunamathela kwaso ngokungagudluki eZwini likaNkulunkulu, iBhayibheli.
10. Yimaphi amathuluzi asetshenziswa isigaba sesigqila ukuze siqhubekisele phambili izimfundiso zikaJehova?
10 UJehova usebenzisa lesi “sigqila” njengendlela yakhe yokufundisa abantu namuhla. Labo besigaba sesigqila bamukela igama elithi oFakazi BakaJehova ngo-1931. Kusukela ngaleso sikhathi izigidi ziye zahlanganyela nabo futhi ziye zamukela lelo gama futhi zahlanganyela ekumemezeleni uMbuso kaNkulunkulu. Lomagazini, INqabayokulinda Ememezela UMbuso KaJehova, uyithuluzi eliyinhloko elisetshenziswa “isigqila” emsebenzini wokufundisa. Nokho, kunezinye izincwadi ezisetshenziswayo, kuhlanganise nezincwajana, izincwajana ezingangomagazini, amapheshana, nomagazini i-Phaphama!
11. Yiziphi izikole “isigqila” esiye sazihlela futhi saziqhuba, futhi ngasinye salezi zikole sifeza yiphi injongo?
11 Ngaphezu kwalokho, “isigqila” sihlela futhi siqhube izikole ezihlukahlukene. Lezi zihlanganisa ne-Watchtower Bible School of Gilead, eyimfundo yezinyanga ezinhlanu ehlomisela izikhonzi ezisezintsha inkonzo yezithunywa zevangeli kwamanye amazwe, nemfundo yezinyanga ezimbili yeSikole Sokuqeqeshela Inkonzo, esiqeqeshela abadala nezinceku ezikhonzayo abangashadile izabelo ezikhethekile ezingokwasezulwini. Kukhona neSikole Senkonzo SoMbuso, lapho abadala abangamaKristu nezinceku ezikhonzayo befundiswa khona ngezikhathi ezithile ngemithwalo yabo yemfanelo yebandla, neSikole Senkonzo Samaphayona, esihlomisela abashumayeli bevangeli besikhathi esigcwele ukuba baphumelele ngokwengeziwe emsebenzini wabo wokushumayela.
12. Yisiphi isici samasonto onke sesimiso sokufundisa?
12 Esinye isici sesimiso sokufundisa yimihlangano emihlanu yamasonto onke eqhutshwa emabandleni abantu bakaJehova angaphezu kuka-75 500 emhlabeni wonke. Ingabe uzuza ngokugcwele ngangokunokwenzeka kulemihlangano? Ngokulalelisisa kwakho imfundo enikezwayo, ingabe ubonisa ukuthi ukukholelwa ngempela ukuthi usesikoleni sikaNkulunkulu, ngomqondo ongokomfanekiso? Ingabe intuthuko yakho engokomoya ikwenza kubonakale kwabanye ukuthi ‘unolimi lwabafundi’?—Isaya 50:4; 1 Thimothewu 4:15, 16.
Ukufundiswa Emihlanganweni Yebandla
13. (a) Iyiphi indlela ebalulekile uJehova afundisa ngayo abantu bakhe namuhla? (b) Singakubonisa kanjani ukwazisa kwethu INqabayokulinda?
13 Ngokuyinhloko uJehova ufundisa abantu bakhe ngesifundo seBhayibheli samasonto onke, esebenzisa INqabayokulinda njengensiza-kufundisa. Ingabe lomhlangano uwubheka njengendawo lapho ungafundiswa khona uJehova? Nakuba u-Isaya 50:4 ngokuyinhloko esebenza kuJesu, angasebenza nakubo bonke abazenza batholakalele amalungiselelo kaNkulunkulu okuthola “ulimi lwabafundi.” Enye indlela ongabonisa ngayo ukuthi uyayazisa INqabayokulinda iwukufunda umagazini ngamunye ngokushesha ngangokunokwenzeka lapho uwuthola. Khona-ke, lapho INqabayokulinda ifundwa ebandleni, ungabonisa ukwazisa kwakho kuJehova ngokuba khona nangokulungela ukulivuma obala ithemba lakho.—Heberu 10:23.
14. (a) Kungani ukuphendula emihlanganweni kuyilungelo elibaluleke kangaka? (b) Yiziphi izimpendulo zabancane ezikhuthaza kakhulu?
14 Uyaqaphela yini ukuthi ngezimpendulo zakho emihlanganweni, ungaba nengxenye esimisweni sikaJehova esihle kakhulu sokufundisa? Ngokuqinisekile, ukuphendula emihlanganweni kuyindlela ebalulekile esingavuselelana ngayo “othandweni nasemisebenzini emihle.” (Heberu 10:24, 25) Ingabe izingane zingahlanganyela kulesi simiso semfundo? Yebo, kunjalo. Izimpendulo eziqotho zabasebancane ngokuvamile ziyabakhuthaza abantu abadala. Ngezinye izikhathi, abaqalayo ukuba semihlanganweni yethu baye bashukunyiswa izimpendulo zezingane ukuba babe nesithakazelo sangempela eqinisweni leBhayibheli. Abanye abasebancane bakwenza umkhuba ukufunda izimpendulo ngokuqondile esigabeni noma baphinde lokho umuntu omdala abahlebele khona. Nokho, kukhuthaza kakhulu lapho izimpendulo zabo zilungiselelwe kahle. Ukuphendula okunjalo kuletha udumo ngempela kuMfundisi wethu Omkhulu nasesimisweni sakhe sokufundisa sezinga eliphezulu.—Isaya 30:20, 21.
15. Yini abazali abangayenza ukuze basize izingane ziphendule ngokuphumelela ngokwengeziwe?
15 Kuyinjabulo ukubona izingane zifuna ukuhlanganyela ekudumiseni uNkulunkulu wethu. UJesu wayewazisa amazwi okudumisa avela ezinganeni. (Mathewu 21:15, 16) Omunye umdala ongumKristu uyaphawula: “Lapho ngiseyingane, ngangikuthanda ukuphendula eSifundweni Se-Nqabayokulinda. Ngemva kokungisiza ukuba ngilungiselele impendulo, ubaba wayefuna ngiprakthize leyo mpendulo okungenani kasikhombisa.” Cishe phakathi nesifundo senu seBhayibheli somkhaya, nina bazali ningasiza izingane zenu ukuba zilungiselele ukuphendula ngamazwi azo siqu ezigabeni ezithile ku-Nqabayokulinda. Zisize ziqaphele ukuthi zinelungelo elikhulu kangakanani lokuhlanganyela esimisweni sikaJehova sokufundisa.
16. Iye yaba yini inzuzo yeSikole Senkonzo Esingokwasezulwini, futhi obani abangase babhalise esikoleni?
16 Ukufundisa kweminye imihlangano yobuKristu nakho kufanele kuthathwe ngokungathi sína, kokubili yilabo abanelungelo lokudlulisela ukwaziswa nalabo abalalele imfundo enikezwayo. Iminyaka engaphezu kuka-50 manje, uJehova uye wasebenzisa iSikole Senkonzo Esingokwasezulwini samasonto onke ukuze aqeqeshe izigidi zabesilisa nabesifazane ukuba zinikeze isigijimi soMbuso ngokuphumelela ngokwengeziwe. Labo abahlanganyela ngenkuthalo nebandla bangabhalisa, kuhlanganise nabantu abasanda kuqala ukuza emihlanganweni, uma nje bephila ukuphila okuvumelana nezimiso zobuKristu.
17. (a) Wamiselwa yiphi injongo ngokuyinhloko uMhlangano Weningi? (b) Yiziphi izinto izikhulumi zasobala okufanele zizikhumbule?
17 Esinye isici esikade saba khona sesimiso sokufundisa uMhlangano Weningi. Njengoba igama lawo libonisa, ngokuyinhloko lomhlangano wamiswa ngenjongo yokwenza abantu abangebona oFakazi bajwayele izimfundiso eziyisisekelo zeBhayibheli. Ngakho, lowo onikeza inkulumo kudingeka adlulisele ukwaziswa ngendlela eyokwenza labo abaqalayo ukuzwa isigijimi basiqonde. Lokhu kusho ukuchaza amagama anjengathi “ezinye izimvu,” “abazalwane,” nelithi “insali,” amagama umuntu ongeyena uFakazi angase angawaqondi. Njengoba abantu abeza eMhlanganweni Weningi bengase babe nezinkolelo noma izindlela zokuphila eziphambene nemiBhalo—nakuba zamukeleka emphakathini wanamuhla—ngaso sonke isikhathi isikhulumi kufanele sibe nobuchule futhi singalokothi sihlekise ngezinkolelo ezinjalo noma izindlela zokuphila.—Qhathanisa neyoku-1 Korinte 9:19-23.
18. Yimiphi eminye imihlangano yebandla yamasonto onke ekhona, futhi ifeza ziphi izinjongo?
18 ISifundo Sencwadi Sebandla siwumhlangano lapho izincwadi ezilungiselelwe ngaphansi kokuqondisa kwesigqila esikholekile nesiqondayo zifundwa khona neBhayibheli isonto ngalinye. Incwadi ethi IsAmbulo—Umvuthwandaba Waso Omkhulu Useduze! yiyo efundwayo manje emazweni amaningi. UMhlangano Wenkonzo uklanyelwe ukuhlomisa abantu bakaJehova ukuba bahlanganyele ngokugcwele ekushumayeleni izindaba ezinhle zoMbuso futhi benze abafundi.—Mathewu 28:19, 20; Marku 13:10.
Ukufundiswa Emihlanganweni Emikhulu
19. Yimiphi imibuthano emikhulu ehlelwa “isigqila” unyaka ngamunye?
19 Iminyaka engaphezu kwekhulu, ‘isigqila esikholekile’ siye sahlela imihlangano emikhulu nemincane ukuze kufundiswe futhi kukhuthazwe ngokukhethekile amaKristu eqiniso. Imihlangano emikhulu enjalo emithathu iqhutshwa unyaka ngamunye. Kuba nomhlangano wosuku olulodwa okuya kuwo idlanzana lamabandla akha isifunda. Phakathi nonyaka, isifunda ngasinye sibuye sibe nombuthano wezinsuku ezimbili obizwa ngokuthi umhlangano wesifunda. Ngaphezu kwalokho, kunombuthano obizwa ngokuthi umhlangano wesigodi, okuya kuwo idlanzana lezifunda. Ngeminye iminyaka kungase kube nemihlangano yezizwe. Lemibuthano emikhulu eba noFakazi abayizivakashi abavela emazweni amaningi iqinisa ukholo ngempela kubantu bakaJehova!—Qhathanisa noDuteronomi 16:16.
20. Yini eye yagcizelelwa ngokungaguquki emibuthanweni emikhulu yoFakazi BakaJehova?
20 Ngo-1922, lapho abangaba ngu-10 000 behlangene eCedar Point, e-Ohio, e-U.S.A., izihambeli zomhlangano zashukunyiswa isikhuthazo sesikhulumi: “Lolu usuku olukhulu kunazo zonke. Bhekani, iNkosi iyabusa! Nina ningamanxusa ayo okumemezela. Ngakho-ke memezelani, memezelani, memezelani, iNkosi nombuso wayo.” Imihlangano emikhulu enjalo iye yawugcizelela ngokungaguquki umsebenzi wokushumayela. Ngokwesibonelo, emhlanganweni wezizwe eNew York City ngo-1953, kwenziwa isaziso ngokuqalwa kwesimiso sokuqeqeshela indlu ngendlu kuwo wonke amabandla. Ukusetshenziswa kwaso kwaba nomphumela omuhle kakhulu ekushumayeleni ngoMbuso emazweni amaningi.
Ukufundiswa UNkulunkulu Ukuba Sifundise
21. Yiliphi ilungelo esifuna ukulamukela, singalahlekelwa injongo yalo?
21 Ngokuqinisekile, uJehova unesimiso esihle kakhulu sokufundisa emhlabeni namuhla! Bonke abasisebenzisa ngokugcwele bangafundiswa uNkulunkulu, yebo, bangaba phakathi kwalabo abaye banikezwa “ulimi lwabafundi.” Yeka ilungelo okuyilo ukuba sesikoleni sikaNkulunkulu, ngomqondo ongokomfanekiso! Kodwa, lapho samukela leli lungelo, akumelwe silahlekelwe injongo yalo. UJehova wafundisa uJesu ukuze afundise abanye, noJesu wafundisa abalandeli bakhe ukuze benze umsebenzi awenza kodwa ngisho nangezinga elikhulu. Ngokufanayo, siqeqeshwa esimisweni sikaJehova sokufundisa esihle ngenjongo yokufundisa abanye.—Johane 6:45; 14:12; 2 Korinte 5:20, 21; 6:1; 2 Thimothewu 2:2.
22. (a) Iyiphi inkinga uMose noJeremiya ababenayo, kodwa yaxazululwa kanjani? (b) Yikuphi ukuqiniseka esinakho kokuthi uNkulunkulu uyoqikelela ukuthi ukushumayela ngoMbuso kuyenziwa?
22 Ingabe njengoMose uthi, “Angizange ngibe-ngumuntu oyiqaphuqaphu,” noma njengoJeremiya uthi, “Angikwazi ukukhuluma”? UJehova uyokusiza njengoba abasiza. Watshela uMose: “Ngizakuba-nomlomo wakho.” Futhi wathi kuJeremiya: “Ungabesabi, ngokuba nginawe.” (Eksodusi 4:10-12; Jeremiya 1:6-8) Lapho abaholi benkolo befuna ukuthulisa abafundi bakhe, uJesu wathi: “Uma laba bebengahlala bethule, amatshe abeyokhamuluka.” (Luka 19:40) Kodwa amatshe akudingekanga akhamuluke ngaleso sikhathi, futhi akudingekile namanje ngoba uJehova usebenzisa ulimi lwabafundi bakhe ekudluliseleni isigijimi sakhe soMbuso.
Ungaphendula?
◻ Yibuphi ubuhlobo obufiselekayo bomfundi noMfundisi obuqokonyiswa ku-Isaya isahluko 50?
◻ UJehova uye wasiqhuba kanjani isimiso esibanzi sokufundisa?
◻ Yiziphi ezinye zezici zesimiso sikaJehova sokufundisa?
◻ Kungani kuyilungelo elimangalisayo ukuhlanganyela esimisweni sikaJehova sokufundisa?
[Isithombe ekhasini 16]
Izimpendulo eziqotho zezingane ngokuvamile ziyabakhuthaza abantu abadala