I-Watchtower Educational Center Ikhipha Izithunywa Zevangeli

I-WATCHTOWER BIBLE SCHOOL OF GILEAD iye yaqhuba amakilasi ezindaweni ezihlukahlukene. Phakathi kuka-1943 no-1960, ezakhiweni eziseNingizimu Lansing, eNew York, e-U.S.A., amakilasi angu-35, ayenabafundi abavela emazweni angu-95, athola ukuqeqeshwa okukhethekile. Khona-ke lesi sikole sathuthela endlunkulu yomhlaba wonke eseBrooklyn, eNew York, lapho sasebenza khona iminyaka ecishe ibe ngu-28. Kusukela ngo-1988 kuze kube sekuqaleni kuka-1995, iSikole SaseGileyadi saqhuba amakilasi eWallkill, eNew York.

Phakathi naleminyaka lesi sikole sandisa umsebenzi waso. Ngaphansi kokuqondisa kwaso, amakilasi amathathu eMexico athola izifundo zamasonto ayishumi; amakilasi amahlanu anjalo ahlangana eJalimane; amabili eNdiya. Kusukela ngo-1987 isikole esisizayo esaziwa ngokuthi iSikole Sokuqeqeshelwa Inkonzo siye saqhuba amakilasi emazweni angu-34, sinikeza izifundo ezikhethekile zamasonto angu-8 zokuqeqeshwa kwezinsizwa ezifanelekayo. Nokho, imfundo eye yanikezwa ikilasi lama-99 laseGileyadi, e-Watchtower Educational Center esanda kwakhiwa ePatterson, eNew York, yathatha amasonto angu-20, kwakuyimfundo ehlanganisa ukutadishwa okuningiliziwe kwalo lonke iBhayibheli, ingxoxo yomlando nokuhlelwa kosuku lwanamuhla koFakazi BakaJehova, kanye neseluleko esibanzi esiphathelene nomsebenzi wezithunywa zevangeli wakwamanye amazwe.

Ngo-September 2, lelo kilasi lama-99 lathweswa iziqu. Isimiso sokuthweswa iziqu samahora amathathu saqhutshelwa ehholo elisha e-Watchtower Educational Center. Laligcwele pháma. Izilaleli ezengeziwe ezazisezakhiweni zeBethel ePatterson, eWallkill, naseBrooklyn zazixhunywe ngemishini. Lolu kwakungelona usuku olujabulisayo kulabo ababethweswa iziqu kanye nezihlobo zabo nabangane abaseduze kuphela, kodwa futhi nasemakhulwini alabo ababehlanganyele ekwakheni lesi sikole esisha esihle njengezisebenzi zokuzithandela.

Emazwini akhe okuvula, uCarey Barber weNdikimba Ebusayo wagxilisa ukunakekela ekubalulekeni kwalokho okwakwenzeka. Wathi: “Lesi kuzoba isikhungo somsebenzi wemfundo yaphezulu omkhulu kunayo yonke owake wenziwa kulomhlaba.” Wachaza ukuthi sisondela emvuthwandaba wempi ephakathi kwenzalo yowesifazane nenzalo yenyoka. (Genesise 3:15) Wabonisa ukuthi okuwukuphela kwabantu abayosinda empini esabekayo phakathi nosizi olukhulu oluzayo, kuyoba yilabo abanolwazi olunembile lweZwi likaNkulunkulu nabalilalelayo.

“Isimiso sethu semfundo esiqhubekayo njengamanje,” esho, “siklanyelwe ukuletha bonke abantu bakaJehova abakuzo zonke izindawo esimweni esihle sokuvuthwa esichazwe kuzAga 1:1-4—sokwazi ukuhlakanipha nokulaywa, ukukwazi ukuhlukanisa ukuqonda, ukwamukela ukulaywa okuletha ukuhlakanipha, ukulunga, ukwahlulela, iqiniso, namasu.” Yeka indlela okuyisivikelo ngayo ukuba nengcebo engokomoya enjalo!

Iseluleko Esiqondiswe Ekilasini Elithweswa Iziqu

Lawo mazwi esethulo alandelwa uchungechunge lwezinkulumo ezinhlanu ezimfushane ezaziqondiswe ekilasini elithweswa iziqu. UHarold Jackson, owayekade efundisa eGileyadi futhi manje oyilungu lezisebenzi zasendlunkulu eBrooklyn, wanxusa ikilasi, “Bambelelani Ngokuqinile Ekwanelisekeni Kwenu Kokuhlonipha UNkulunkulu.” ULloyd Barry, owayeyisithunywa sevangeli isikhathi eside futhi manje oyilungu leNdikimba Ebusayo, wakhuluma ngesithi “Ukukhonza UJehova Ngokuthobeka.” Wachaza ukuthi lemfanelo yayiyoba ebalulekile kulaba ababethweswa iziqu ekuzivumelaniseni kwabo nezimo ezintsha kanye nasebuhlotsheni babo nezithunywa zevangeli abakanye nazo, namabandla abayokhonza kuwo, nanabantu bendawo.

UKarl Adams, njengamanje okhonza esikhungweni semfundo saseGileyadi, wabonisana nekilasi ngombuzo othi “Ukholo Lwakho Luyokuholela Ukuba Wenzeni?” Walikhuthaza ukuba lingafani nalawo ma-Israyeli akhononda ngezimo zasehlane futhi alangazelela ukuba semuva eGibithe, kodwa kunalokho, libe njengo-Abrahama, owabheka uMbuso kaNkulunkulu njengekhambi lezinkinga kunokubuyela e-Uri lamaKaledi. (Eksodusi 16:2, 3; Heberu 11:10, 15, 16) U-Ulysses Glass, umbhalisi wasesikoleni, wasebenzisa okuhlangenwe nakho kuka-Asafa njengoba kulotshwe kumaHubo 73 ukuze ayale ikilasi elithweswa iziqu ngesithi, “Phinda Ubale Izibusiso Zakho.” Futhi u-Albert Schroeder, ilungu leKomiti Yokufundisa yeNdikimba Ebusayo, wakhuluma ngesihloko esithi “UJehova Uyalungiselela.” Njengobufakazi balokho kulungiselela, wabhekisela eSikoleni SaseGileyadi ngokwaso nendima yaso ekufezeni umsebenzi omkhulu wokushumayela nokwenza abafundi.

Kamuva izethameli zalalela ngesithakazelo esiqotho lapho uMilton Henschel, umongameli we-Watch Tower Society, ekhuluma ngesithi “Amalungu Omunye Nomunye.” Wafunda futhi wakhulumela kabanzi eyabaseRoma isahluko 12. Phakathi kokunye, wathi: “Kufanele sicabangele ukuthi sinobuhlobo obuseduze kakhulu nezinceku esikanye nazo ebandleni.” Wanezela: “Kuhle ngathi ukuba ngaso sonke isikhathi sicabange ngomunye nomunye wethu njengoyimpahla kaJehova, futhi kunokuba sibe abagxekayo, kunokuba sifune amaphutha, ngaso sonke isikhathi masibe usizo. Lapho silondoloza ubunye obungokomoya bebandla lobuKristu sizisiza thina.” Wabonisa indlela ukuba usizo okunjalo okungase kuboniswe ngayo lapho kulungiswa ukudla emakhaya ezithunywa zevangeli, ukucabangela iqiniso lokuthi akuwona wonk’ umuntu ongase akwazi ukudla into efanayo. Wakhuthaza nokuba usizo kunokuba abagxekayo lapho kuhlanganyelwa enkonzweni yasensimini namaKristu esikanye nawo antulayo ngokwezinto ezibonakalayo. UMfoweth’ uHenschel wabonisa ukuthi uma siba usizo ngempela, sakhana, futhi sikhuthazana, “uJehova uyosithanda ngenxa yalokhu.” Yeka iseluleko esihle esiqondiswe ezithunyweni zevangeli ezazizobe zikhonza emazweni ahluke kakhulu kulawo eziwashiya ngemuva!

Ukulazi Kangcono Ikilasi

Ngokwesilinganiso, laba bafundi abangu-48 bekilasi lama-99 baneminyaka engu-32 ubudala futhi kakade sebeye banikela ngeminyaka engu-11 enkonzweni yesikhathi esigcwele.

Izingxoxo ezaziyingxenye yesimiso sokuthweswa iziqu zanikeza izilaleli ithuba lokwazi kangcono abambalwa bazo. UNikki Liebl, wase-United States, noSimon Bolton, waseNgilandi, balandisa ngezigameko ezazivivinye ukholo lwabo ekutheni uJehova wayeyozilungiselela izidingo zabo ezingokwenyama. Bathola ukunakekela kukaJehova njengoba babegcina inkonzo yabo yesikhathi esigcwele iza kuqala.

U-Isabelle Kazan, olimi lwakhe lwendabuko luyisiFulentshi, wathi wayefunde isi-Arabhu ukuze afakaze kubantu abakhuluma isi-Arabhu ezweni lakubo. Lapho eqala ngo-1987, iqembu elilodwa elaliseParis lalinabazalwane abane kuphela abakhuluma isi-Arabhu, bese kuba nguye nomunye udade ababesafunda ukukhuluma lolu limi. (Kwakungelula. Isonto ngalinye babechitha amahora angu-8 belungiselela isifundo sabo se-Nqabayokulinda ukuze bakwazi ukunikeza izimpendulo.) Ingabe kwakuwufanele lomzamo? Namuhla kunoFakazi abakhuluma isi-Arabhu abahlelwe baba izifunda ezinhlanu kulo lonke elaseFrance. Omunye umfundi, uMiko Puro, walandisa ngendlela isiFulentshi ayesifunde esikoleni esamsiza ngayo ukuba ashumayele kubabaleki base-Afrika ababeseFinland adabuka kuyo, futhi sizoba usizo esabelweni sakhe sezithunywa zevangeli eBenin. UBonny Bowes walandisa ngokukhandleka kwakhe efunda ukukhuluma isiFulentshi ngokushelela ukuze akwazi ukukhonza ngokuphumelelayo eQuebec, eCanada. Futhi uBjarki Rasmussen, waseDenmark, walandisa okuhlangenwe nakho yena nomkakhe abase bebe nakho kakade phakathi neminyaka eminingi yokukhonza eFaeroe Islands. Yebo, lezi zithunywa zevangeli ezintsha ziyizikhonzi zesikhathi esigcwele ezingomakadebona.

Laba ababethweswa iziqu babelwa emazweni angu-19—e-Afrika, eMelika Ephakathi neseNingizimu, eMpumalanga Yurophu, nasemazweni aseMpumalanga. Abathweswa iziqu emakilasini adlule kakade sebeye bakhonza emazweni angaphezu kwangu-200. Abaningi balabo asebathweswa iziqu basasebenza ngenkuthalo ezabelweni zabo. Lezi zithunywa zevangeli ezintsha manje zizohlanganyela nabo ekwandiseni ubufakazi boMbuso ngokuqhubekayo kuze kube semikhawulweni yomhlaba.—IzEnzo 1:8.

[Izithombe ekhasini 25]

Emakilasini e-Watchtower Educational Center

[Isithombe ekhasini 26]

Ikilasi Lama-99 Elithweswa Iziqu Le-Watchtower Bible School of Gilead

Ohlwini olungezansi, imigqa ibalwa kusukela phambili kuya emuva, futhi amagama ahlelwe kusukela kwesobunxele kuya kwesokudla emgqeni ngamunye.

(1) Heffey, S.; Riley, E.; Mortensen, D.; Honable, A.; Bolton, J.; Poole, J.; Siimes, G.; Sousa, L. (2) Pashnitski, B.; Shepherd, D.; Pashnitski, W.; Järvinen, J.; Paulsen, K.; Rasmussen, E.; Schewe, C.; Olsson, L. (3) Paulsen, E.; Samsel, T.; Bowes, B.; Harris, E.; Kazan, I.; Liebl, N.; Sousa, P.; Puro, J. (4) Lager, K.; Lager, V.; Golden, K.; Bolton, S.; Johnson, M.; Johnson, S.; Liebl, A.; Rasmussen, B. (5) Harris, D.; Samsel, W.; Schewe, O.; Heffey, R.; Kazan, L.; Riley, T.; Järvinen, O.; Puro, M. (6) Mortensen, D.; Golden, R.; Honable, L.; Shepherd, M.; Bowes, R.; Siimes, T.; Poole, E.; Olsson, J.

[Izithombe ekhasini 27]

Basesezabelweni zabo: (kwesobunxele) uCharles Leathco nomkakhe, uFern, eBrazil, bathweswa iziqu ekilasini lokuqala nelesithupha laseGileyadi; (ngezansi) uMartha Hess, eJapane, owathweswa iziqu ekilasini lesi-7 laseGileyadi