Ukuqedwa Kobudlova Phakade—Kanjani?

UKUZE anqande igagasi lobudlova, amadolobha amaningana e-United States avela nomqondo ongavamile—ukunikeza imali noma impahla kumuntu obuyisa isibhamu, ngaphandle kokumbuza imibuzo. Ube yini umphumela? Ngokwesibonelo, idolobha laseSt. Louis laqoqa izibhamu ezingu-8 500, lalahlekelwa ama-dollar angu-341 000 (R1 238 000). Isimiso esifanayo eNew York City sangenisa izikhali ezingaphezu kwenkulungwane.

Konke lokhu kwaba namuphi umphumela ebugebengwini? Ngokudabukisayo, waba mncane kakhulu. Ngonyaka owalandela, ukubulala okuhlobene nezibhamu kwafinyelela inani eliphakeme kunanini ngaphambili eSt. Louis. ENew York City, kusenezibhamu ezilinganiselwa ezigidini ezimbili ezigcwele emigwaqweni. E-United States, kunezibhamu ezingaba izigidi ezingu-200 ezinabanikazi bazo, cishe indoda, owesifazane, nengane ngayinye inesibhamu esisodwa. Kwamanye amazwe, ubudlova obuhlobene nezibhamu banda ngezinga elithusayo. EBrithani “phakathi no-1983 no-1993, inani lamacala asemafayilini amaphoyisa ahilela amavolovolo laphindeka kabili, laba ngu-14 000,” kusho i-Economist. Nakuba izinga lokubulala liphansi kulelozwe uma kuqhathaniswa, cishe kunezikhali eziyisigidi ezingekho emthethweni.

Ngokuqinisekile, noma ikuphi ukuncishiswa kwalawo manani asabekayo kuyinqubekela-phambili. Nokho, izinyathelo ezinjengalezi ezichazwe ngenhla azifinyeleli neze ezimbangeleni eziyisisekelo zobudlova. Iziphi lezo zimbangela? Kuye kwabalwa izici eziningi, kodwa zimbalwa kuzo ezivelele. Ukungazinzi kwemikhaya nokungafundiswa ngokuziphatha kuye kwabangela intsha eningi ukuba ingenele amaqembu ezigilamkhuba ukuze ibe nabantu esondelene nabo. Ukuheha kwezinzuzo ezinkulu kubangela abaningi ukuba baphendukele ebudloveni. Ukungabibikho kobulungisa kushukumisela abanye ukuba balungise izinto ngezindlela ezinobudlova. Ukuziqhenya ngezwe, uhlanga, noma isimo sokuphila kubangela abantu ukuba bakushaye indiva ukuhlupheka kwabanye. Lezi izici ezijulile ezingenamakhambi alula.

Yini Engase Yenziwe?

Amaphoyisa engeziwe, izigwebo zejele eziqine kakhudlwana, ukulawulwa kwezibhamu, isigwebo sokufa—konke lokhu kuye kwahlongozwa futhi kwazanywa njengezindlela zokuvimbela ubugebengu nobudlova. Kuye kwaphumelela ngamazinga angalingani, kodwa iqiniso elidabukisayo liwukuthi ubudlova buseyingxenye yokuphila kwethu. Ngani? Ngoba lezi zinyathelo zibhekana nemiphumela kuphela.

Ngakolunye uhlangothi, ochwepheshe abaningi banomuzwa wokuthi isihluthulelo sokuqeda ubudlova yimfundo. Nakuba lombono unengqondo, kumelwe siqaphele ukuthi ubudlova abugcini emazweni lapho amathuba emfundo elinganiselwe khona. Empeleni, kubonakala sengathi amanye amazwe anobudlova kakhulu aphinde abe namazinga emfundo aphakeme kakhulu. Kuyacaca ukuthi lokho okudingekayo akuyona nje imfundo kodwa uhlobo olufanele lwemfundo. Kungaba yiluphi lolo hlobo? Ukhona yini okwazi ukufundisa abantu ukuthanda ukuthula nokuba abantu abaqotho?

“NginguJehova uNkulunkulu wakho okufundisile okukusizayo, okuholile ngendlela omelwe ukuhamba ngayo. Sengathi nga ulalele imiyalo yami! Khona ukuthula kwakho kwakuyakuba-njengomfula, nokulunga kwakho njengamaza olwandle.” (Isaya 48:17, 18, omalukeke sizenzele.) UJehova uNkulunkulu ubafundisa kanjani abantu ukuthanda ukuthula nokuba nokulunga? Ngokuyinhloko ngeZwi lakhe, iBhayibheli.

Amandla EZwi LikaNkulunkulu

Ngokuqinisekile iBhayibheli alilona nje iqoqo lezinganekwane nezisho ezindala eseziphelelwe isikhathi nezingasasebenzi. Liqukethe izimiso nemibono evela kuMdali wesintu, owazi isimo sabantu kangcono kunanoma ubani omunye, esendaweni yakhe ephakeme abuka ekuyo. UJehova uNkulunkulu uthi: “Njengamazulu ephakeme kunomhlaba, kanjalo izindlela zami ziphakeme kunezindlela zenu, nemicabango yami kunemicabango yenu.”—Isaya 55:9.

Ngenxa yalesi sizathu umphostoli uPawulu uqinisekisa ukuthi “izwi likaNkulunkulu liyaphila futhi linamandla futhi libukhali kunanoma iyiphi inkemba esika nhlangothi zombili futhi lihlaba kuze kuhlukane umphefumulo nomoya, amalunga nomnkantsha wawo, futhi liyakwazi ukuqonda imicabango nezinhloso zenhliziyo.” (Heberu 4:12) Yebo, iZwi likaNkulunkulu linamandla okufinyelela nokuthinta inhliziyo yomuntu bese lishintsha ukucabanga nokuziphatha kwakhe. Ingabe akukhona lokhu okudingekayo ukuze kushintshwe ukuziphatha kwabantu kobudlova namuhla?

OFakazi BakaJehova, manje ababalelwa ezigidini ezingaba nhlanu emazweni angaphezu kwangu-230, bawubufakazi obuphathekayo bokuthi iZwi likaNkulunkulu ngempela linamandla okuguqula ukuphila kwabantu kube ngcono. Phakathi kwabo kunabantu bazo zonke izizwe, izilimi, nezinhlanga. Futhi baphuma kuzo zonke izindlela zokuphila nezizinda ezingokwenhlalo. Abanye babo ngaphambili babephila ukuphila okunobudlova nokugcwele izinkathazo. Kodwa esikhundleni sokuvumela izici ezinjalo zakhe ubutha, umbango, ubandlululo, nenzondo phakathi kwabo, baye bafunda ukunqoba lezi zithiyo futhi baye baba abantu abathanda ukuthula nabanobunye emhlabeni wonke. Yini eye yenza lokhu kwaba nokwenzeka?

Umkhankaso Oqeda Ubudlova

OFakazi BakaJehova banesibopho sokusiza abanye bazuze ulwazi oluqondile ngenjongo kaNkulunkulu njengoba yembulwe eZwini lakhe, iBhayibheli. Kuwo wonke amagumbi omhlaba, bafuna labo abafuna ukufunda izindlela zikaJehova nokufundiswa nguye. Imizamo yabo iyakhiqiza. Umphumela walomkhankaso wokufundisa uwukugcwaliseka kwesiprofetho esimangalisayo.

Eminyakeni engaba ngu-2 700 edlule, umprofethi u-Isaya waphefumulelwa ukuba abhale: “Kuyakuthi ngezinsuku ezizayo . . . abantu abaningi bayakuhamba, bathi: Wozani sikhuphukele entabeni kaJehova endlini kaNkulunkulu kaJakobe; uyakusifundisa izindlela zakhe, sihambe emikhondweni yakhe.”—Isaya 2:2, 3.

Ukufundiswa uJehova nokuhamba emikhondweni yakhe kungabangela izinguquko ezimangalisayo ekuphileni kwabantu. Olunye lwalezi zinguquko lubikezelwe esiprofethweni esifanayo: “Bayakukhanda izinkemba zabo zibe-ngamakhuba, nemikhonto yabo ibe-ngocelemba; isizwe asiyikuphakamisela isizwe inkemba, zingabe zisafunda ukulwa.” (Isaya 2:4) Abantu abaningi baye bawufunda lombhalo. Eqinisweni, lombhalo uqoshwe odongeni e-United Nations Plaza eNew York City. Uyisikhumbuzo salokho iZizwe Ezihlangene ezikufisayo kodwa eziye zahluleka ukukufeza. Lokhu kuqedwa kwempi nobudlova ngeke kufezwe yinoma iyiphi inhlangano yezombangazwe eyenziwe ngabantu. UJehova uNkulunkulu kuphela ongakwazi ukukwenza. Uyokufeza kanjani?

Ngokusobala akuwona wonke umuntu oyosabela esimemweni ‘sokukhuphukela entabeni kaJehova,’ ‘afundiswe izindlela zakhe’ futhi ‘ahambe emikhondweni yakhe’; akubona bonke futhi abayozimisela ‘ukukhanda izinkemba zabo zibe-ngamakhuba nemikhonto yabo ibe-ngocelemba.’ Uyobenzenjani uJehova abantu abanjalo? Ngeke abavulele ithuba noma abalinde ukuba bashintshe kuze kube phakade. Ukuze aqede ubudlova, uJehova uyoqeda nalabo abaphikelelayo ekuziphatheni kwabo kobudlova.

Isifundo Esibalulekile

Lokho uNkulunkulu akwenza osukwini lukaNowa kusinikeza isifundo esixwayisayo namuhla. Ukulandisa kweBhayibheli kubonisa uhlobo lwezwe langaleso sikhathi: “Umhlaba wawonakele ebusweni bukaJehova; umhlaba wagcwala [ubudlova, NW].” Ngenxa yalokhu, uNkulunkulu watshela uNowa: “Ukuphela kwenyama yonke kufikile phambi kwami, ngokuba umhlaba ugcwele [ubudlova, NW] ngenxa yabantu; bheka, ngiyakubachitha kanye nomhlaba.”—Genesise 6:11, 13.

Kunephuzu elilodwa elibalulekile okumelwe siliphawule. Lapho uNkulunkulu eletha uZamcolo kuleso sizukulwane, walondoloza uNowa nomkhaya wakhe. Ngani? IBhayibheli liyaphendula: “UNowa wayeyindoda eqotho, engenacala esizukulwaneni sakhe; uNowa wayehamba noNkulunkulu.” (Genesise 6:9; 7:1) Nakuba kungewona wonke umuntu owayephila ngaleso sikhathi owayengumuntu onobudlova, uNowa kuphela nomkhaya wakhe ‘ababehamba noNkulunkulu.’ Ngenxa yalokho basinda lapho lelozwe elinobudlova liqedwa.

Njengoba sibona umhlaba uphinda ‘ugcwala ubudlova,’ singaqiniseka ukuthi uNkulunkulu uyakuqaphela lokhu. Njengoba nje enza osukwini lukaNowa, ngokushesha uzothatha isinyathelo futhi aqede ubudlova—unomphela. Kodwa uyolungiselela nendlela yokuphepha kulabo abafunda ‘ukuhamba noNkulunkulu’ manje, labo abasabelayo emkhankasweni wakhe omkhulu wokufundisa ngokuthula.

Ngomhubi, uJehova unikeza lesi siqinisekiso: “Kusengumzuzwana, omubi angabe esabakho; kuyakuthi lapho uhlola indawo yakhe, uyakube engasekho. Kepha abathobekileyo bazakulidla ifa lomhlaba, bathokoze ngokuthula okukhulu.”—IHubo 37:10, 11.

OFakazi BakaJehova bayokujabulela ukutadisha iBhayibheli nawe ukuze uhlanganyele nalabo abathi: ‘Masikhuphukele entabeni kaJehova endlini kaNkulunkulu kaJakobe; uyakusifundisa izindlela zakhe, sihambe emikhondweni yakhe.’ (Isaya 2:3) Ngokwenza kanjalo, ungaba phakathi kwalabo abayobona ukuphela kwabo bonke ububi nobudlova. ‘Ungathokoza ngokuthula okukhulu.’

[Umthombo Wesithombe ekhasini 5]

Reuters/Bettmann