Ukuphila Ngokuvumelana Nesifungo Sakho Somshado!

USUKU lomshado luwusuku olujabulisayo. Futhi luyisenzakalo esingathi sína kakhulu. Umakoti nomkhwenyana benza isithembiso esingathi sína esiyothinta yonke ingxenye esele yokuphila kwabo. Labo abasemshadweni njengezimenywa bangofakazi balesi sithembiso esingathi sína, kodwa uJehova uNkulunkulu unguFakazi oyinhloko.

IBhayibheli alinikezi myalo wokuba kulandelwe inqubo ethile noma kwenziwe umkhosi womshado wohlobo oluthile olukhethekile. Nokho, kuqashelwa ukusungulwa kwawo kwaphezulu, ngokuvamile umshado ubhaliswa ngokomthetho ngokusetshenziswa kwezifungo zomshado emkhosini ongokwenkolo. Sekuyiminyaka ethile oFakazi BakaJehova besebenzisa isifungo somshado esilandelayo: “Mina—— ngiyakuthatha wena—— ukuba ube (umkami/umyeni wami) womshado, ukuba ngikuthande futhi ngikwazise (Umakoti: futhi ngikuhloniphe ngokujulile) ngokuvumelana nomthetho waphezulu njengoba uhlelelwe (abafazi/amadoda) angamaKristu emiBhalweni eNgcwele, uma nje sobabili sisaphila ndawonye emhlabeni ngokwelungiselelo likaNkulunkulu lomshado.”a

Okuthile Kokucabanga Ngakho

Uma ucabangela ukushada, kuyoba usizo olukhulu ukucabanga ngalokho okushiwo yilesi sifungo nokujula kwako ngaphambi kosuku lomshado. USolomoni wathi: “Ungabi-namawala ngomlomo wakho, nenhliziyo yakho mayingasheshi ukukhipha izwi phambi kukaNkulunkulu.” (UmShumayeli 5:2) Kuthiwani uma usushadile kakade? Khona-ke uyozuza ngokuzindla ngokubaluleka kwesithembiso esingathi sína owasenza phambi kukaJehova. Ingabe uphila ngokuvumelana naso? AmaKristu azithatha ngokungathi sína izithembiso zawo. USolomoni waqhubeka: “Feza lokhu okwethembisayo. Kungcono ukuba ungenzi isithembiso kunokuba [uthembise] ungafezi. Ungavumeli umlomo wakho ukuba wonise inyama yakho, futhi ungasho phambi kwesithunywa sikaNkulunkulu ukuthi kuyiphutha.”—UmShumayeli 5:4-6.

Akungabazeki ukuthi ukucabangela amazwi ngamanye esifungo somshado kuyothuthukisa ukuqonda kwakho lesi sithembiso esingathi sína.

“Mina—— ngiyakuthatha wena”: Lawa amazwi okuqala esifungo. Aqokomisa ukuthi unomthwalo wemfanelo womuntu siqu ngesinqumo sakho sokushada.

Ngaphansi kwelungiselelo lobuKristu, asikho isibopho esingokomBhalo sokushada. UJesu Kristu ngokwakhe wahlala engashadile futhi watusa ukungashadi kulabo ‘abangase bakwazi ukukutholela indawo.’ (Mathewu 19:10-12) Ngakolunye uhlangothi, iningi labaphostoli bakaJesu lalingamadoda ashadile. (Luka 4:38; 1 Korinte 9:5) Kusobala ukuthi ukushada isinqumo somuntu siqu. Akekho umuntu onegunya elingokomBhalo lokuphoqelela omunye ukuba ashade.

Ngakho, kuwumthwalo wakho wemfanelo ukukhetha ukushada. Cishe, uzikhethele umuntu oshada naye. Lapho wenza isifungo somshado, uthi, ‘Mina ngiyakuthatha wena——,’ usuke uthatha noma wamukela lowo muntu nezici zakhe ezinhle—kodwa futhi usuke umamukela namaphutha akhe.

Ngokuhamba kwesikhathi cishe uyobona izici ebuntwini bomngane wakho obungazilindele. Kuyoba nokudumala ngezikhathi ezithile. IBhayibheli lithi “bonke bonile futhi bayasilela enkazimulweni kaNkulunkulu.” (Roma 3:23) Ngakho kungase kudingeke wenze ushintsho ukuze uzivumelanise nomngane wakho. Lokhu kungase kube nzima, futhi ngezinye izikhathi ungase uzizwe ufuna ukuyeka. Kodwa khumbula, isifungo somshado senziwa phambi kukaJehova. Angakusiza ukuba uphumelele.

“Ukuba ube (umkami/umyeni wami) womshado”: Emshadweni wokuqala ngqá, lapho u-Eva endiselwa ku-Adamu, uJehova uNkulunkulu wathi “bayakuba-nyamanye.” (Genesise 2:24; Mathewu 19:4-6) Ngakho isibopho somshado siwubuhlobo obuseduze kunabo bonke obungaba khona phakathi kwabantu ababili. Umshado uniletha ebuhlotsheni obusha. Wamukela umuntu othile ukuba abe ‘umkakho womshado’ noma ‘umyeni wakho womshado.’ Akufani nanoma yibuphi obunye ubuhlobo. Izenzo ezibangela ukulimala okuncane kobunye ubuhlobo zingase zibangele ukulimala okukhulu phakathi kwelungiselelo lomshado.

Ngokwesibonelo, cabangela iseluleko esingokomBhalo esitholakala kweyabase-Efesu 4:26. Lapho, iBhayibheli lithi: “Thukuthelani, kodwa nokho ningoni; ilanga malingashoni nisesimweni sokucasuka.” Mhlawumbe awuzange ngaso sonke isikhathi uxazulule izinkinga zakho nezihlobo nabangane ngokushesha ngendlela okufanele wenze ngayo. Kodwa umngane wakho womshado usondelene kakhulu nawe kunanoma yisiphi esinye isihlobo noma umngane. Ukwehluleka ukuxazulula izindaba ngokushesha nomuntu oshade naye kungase kufake ubuhlobo benu obukhethekile engozini.

Ingabe uyakuyekelela ukungavumelani phakathi kwakho nomngane wakho ukuba kukhule kuze kube yimbangela yokucasuka nokunengwa okuqhubekayo? Ingabe ukungaqondani nezimo ezicasulayo kuhlala kungaxazululiwe izinsuku eziningi? Ukuze uphile ngokuvumelana nesifungo sakho, lapho kuphakama izinkinga ungavumi ukuba usuku ludlule ungazange wenze ukuthula nomngane wakho. Lokhu kusho ukuthethelela nokukhohlwa kanye nokuvuma amaphutha akho.—IHubo 51:5; Luka 17:3, 4.

“Ukuba ngikuthande”: Lowo ozoba umyeni ufunga ukuthi ‘uzothanda futhi azise’ umakoti wakhe. Lolu thando luhlanganisa nothando lokukhangana okungenzeka yilo olubahlanganisile. Kodwa uthando lokukhangana alwanele. Uthando umKristu afunga ukuthi uzoba nalo ngomngane wakhe lujule kakhudlwana futhi lubanzi kakhudlwana.

Eyabase-Efesu 5:25 ithi: “Madoda, qhubekani nithanda omkenu, njengoba nje noKristu alithanda ibandla.” Akunakwenzeka ukuba uthando lukaJesu ngebandla lube ngolohlobo olufanayo nothando lokukhangana phakathi kwabantu bobulili obuhlukile. Igama elithi “nithanda” nelithi “alithanda” asetshenziswe kulombhalo asuselwe egameni elithi a·gaʹpe, elibhekisela othandweni oluqondiswa izimiso. IBhayibheli lapha liyala amadoda ukuba abonise uthando lwasikhathi sonke, olungaguquki, olukhuthazelayo ngomkawo.

Akuwona nje umzwelo wokuthi “Ngiyakuthanda ngoba nawe uyangithanda.” Indoda ifuna inhlalakahle yomkayo ngisho nangaphambi kweyayo, nomfazi uthanda umyeni wakhe ngendlela efanayo. (Filipi 2:4) Ukuhlakulela uthando olujulile ngomngane wakho kuyokusiza ukuba uphile ngokuvumelana nesifungo sakho somshado.

“Ngikwazise”: Ngokwesichazamazwi esithile, “ukwazisa” kusho ‘ukuthanda, ukuba nozwela noma ukubonisa uthando ngento ethile.’ Uthando lwakho kumelwe ulubonise kokubili ngamazwi nangezenzo! Umfazi ikakhulukazi udinga ukuba umyeni wakhe ambonise uthando njalo. Umyeni wakhe angase azinakekele kahle izidingo zakhe ezingokwenyama, kodwa lokhu akwanele. Kunabafazi abanokudla okwanele nemizi enethezekile kodwa abangajabulile neze ngenxa yokushaywa indiva noma ukunganakwa abangane babo bomshado.

Ngakolunye uhlangothi, umfazi owaziyo ukuthi uyathandwa futhi uyaziswa unazo zonke izizathu zokujabula. Yebo, kungashiwo okufanayo nangendoda. Uthando lweqiniso lukhuliswa kakhulu amazwi othando aqotho. Encwadini yesiHlabelelo seziHlabelelo, isoka elingumalusi liyababaza: “Amnandi kangakanani amazwi akho othando, dadewethu, makoti wami! Mahle kangakanani amazwi akho othando kunewayini, nephunga lamafutha akho kunamakha onke!”—IsiHlabelelo seziHlabelelo 4:10, qhathanisa ne-NW.

“Futhi ngikuhloniphe ngokujulile”: Kuwo wonke lamakhulu eminyaka amanye amadoda ebexhaphaza futhi elulaza abesifazane. Ngisho nanamuhla, ngokukamagazini i-World Health, “ubudlova kwabesifazane benzeka kuwo wonke amazwe nakuzo zonke izigaba ezingokwenhlalo nezingokwezomnotho. Ezizweni eziningi, ukushaywa kwabafazi kubhekwa njengelungelo lendoda.” Kungenzeka amadoda amaningi awanalo icala lokuziphatha okunjalo. Nakuba kunjalo, kubonakala sengathi amadoda amaningi ayahluleka ukubonisa isithakazelo esiqotho ezindabeni eziphathelene nabesifazane. Umphumela uye waba ukuthi abesifazane abaningi baye baba nesimo sengqondo esiphambene ngabesilisa. Abanye abafazi baye bazwakala bethi, “Ngiyamthanda umyeni wami, kodwa ngimane nje ngiyahluleka ukumhlonipha!”

Nokho, uJehova uNkulunkulu, uyamazisa owesifazane ozama ukuhlonipha umyeni wakhe—ngisho noma ngezinye izikhathi ehluleka ukwenza lokho akulindele. Uyaqaphela ukuthi unesabelo, noma isikhundla asinikezwe uNkulunkulu. (1 Korinte 11:3; Efesu 5:23) Ngakho inhlonipho ejulile ngomyeni wakhe iyingxenye yokukhulekela nokulalela kwakhe uJehova. UNkulunkulu akakushayi indiva ukulalela kwabesifazane abanokwesaba kokuhlonipha uNkulunkulu.—Efesu 5:33; 1 Petru 3:1-6; qhathanisa namaHeberu 6:10.

Inhlonipho emshadweni kumelwe ibe into yabantu ababili, futhi kufanele izuzwe kunokuba imane ilindelwe noma ifunwe ngenkani. Ngokwesibonelo, inkulumo ehlabayo noma ekhubekisayo ayinandawo elungiselelweni lomshado. Ngeke kubonise uthando noma inhlonipho ukusho amazwi ajivazayo ngomyeni wakho noma umkakho. Ngeke kusize ngalutho ukwambula ukushiyeka komngane wakho kwabanye noma ukukhuluma ngakho obala. Ngisho noma edlala umuntu angabonisa ukuntula inhlonipho okubi kakhulu kulesi sici. Amazwi akweyabase-Efesu 4:29, 32 asebenza kubo bobabili indoda nomfazi. Lapho, iBhayibheli lithi: “Makungaphumi lizwi elibolile emlonyeni wenu, kodwa noma yiliphi izwi elihle ekwakheni kuye ngokwesidingo . . . Yibani nomusa komunye nomunye, ninobubele besisa.”

“Ngokuvumelana nomthetho waphezulu njengoba uhlelwe emiBhalweni eNgcwele”: UNkulunkulu ufuna sijabulele inkululeko yokuzikhethela nokwenza esikuthandayo. Akasithwesi umthwalo ngohlu oluningiliziwe lwemithetho elawula ukuphila kwasemshadweni. Nokho, ngokwenzuzo yethu siqu uye wahlela iziqondiso ezithile.

Namuhla, kunezinhlobo eziningi zokwaziswa okunyathelisiwe okuphathelene nomshado, futhi abantu banezinkolelo zabo siqu. Kodwa qaphela! Endabeni yomshado, ukwaziswa okuningi okusakazekile kuyaphikisana neBhayibheli.

Futhi qaphela ukuthi izimo zombhangqwana ngamunye ziyahluka. Ngandlela-thile, imibhangqwana eshadile injengezingcezu zeqhwa; ingase ibonakale ifana uma ukude, kodwa empeleni ngamunye wayo uhlukile kuyo yonke eminye. Ubuntu bakho buhlangene nobomngane wakho abufani nobanoma yimuphi omunye umbhangqwana oshadile emhlabeni. Ngakho ungaxhamazeli ekwamukeleni imibono yabanye. Awukho umthetho owenziwe umuntu osebenza kuyo yonke imishado!

Ngokuphambene, yonke imiyalo yeBhayibheli iyiqiniso futhi iyasebenza. Umphostoli uPawulu wabhala: “Yonke imiBhalo iphefumulelwe uNkulunkulu futhi inenzuzo yokufundisa, yokusola, yokuqondisa izinto.” (2 Thimothewu 3:16; IHubo 119:151) Uma ufunda iBhayibheli futhi wamukela izimfundiso zalo njengesiqondiso ekuphileni kwakho kwansuku zonke, uyokwazi ukuphila ngokuvumelana nesifungo sakho somshado.—IHubo 119:105.

“Uma nje sobabili sisaphila ndawonye emhlabeni”: Lokhu kubhekisela ekubeni ndawonye okuthatha isikhathi eside. UNkulunkulu uyala ukuthi “indoda iyakushiya uyise nonina, inamathele kumkayo.” (Genesise 2:24) UJehova ufuna ukuba nibe ndawonye. Khonzani uNkulunkulu ndawonye. Tadishani iZwi lakhe ndawonye. Zinikeni isikhathi sokuhamba ndawonye, ukuhlala ndawonye, ukudla ndawonye. Jabulelani ukuphila ndawonye!

Eminye imibhangqwana yenza umzamo wokubekela isikhathi eceleni nsuku zonke ukuze nje ixoxe. Ngisho nangemva kweminyaka eminingi emshadweni, lokhu kuba ndawonye kubalulekile ukuze kube nenjabulo emshadweni.

“Ngokwelungiselelo likaNkulunkulu lomshado”: Umshado uyisipho esivela kuJehova uNkulunkulu, owasungula ilungiselelo lomshado. (IzAga 19:14) Ukuhluleka ukulandela ilungiselelo lakhe ngeke kusongele injabulo yakho yasemshadweni nje kuphela kodwa kuyosongela nobuhlobo bakho noMdali. Ngakolunye uhlangothi, lapho indoda nomfazi behlakulela ubuhlobo obuhle noJehova, okubonakaliswa ngokulalela amalungiselelo akhe, bayoba nobuhlobo obunokuthula nabanye, kuhlanganise naphakathi kwabo bobabili.—IzAga 16:7.

Ungalokothi ukhohlwe ukuthi uJehova unguFakazi oyinhloko esifungweni sakho somshado. Qhubeka uphila ngokuvumelana nalesi sithembiso esingathi sína, futhi umshado wakho uyoba umthombo wokudumisa nokukhazimulisa uJehova uNkulunkulu!

[Umbhalo waphansi]

[Amazwi acashunwe esihlokweni ekhasini 22]

Ngandlela-thile, imibhangqwana eshadile injengezingcezu zeqhwa. Yonke ingase ibonakale ifana uma ukude, kodwa empeleni umbhangqwana ngamunye uhluke ngokuphelele

[Umthombo]

Snow Crystals/Dover