Ukunikeza Usizo Encithakalweni
UMZAMO womuntu wokunikeza usizo ngemva kwenhlekelele ngokuqinisekile uyatuseka. Izinhlelo zokusiza eziningi ziye zasiza ngokwakha kabusha imizi, ukuhlanganisa imikhaya kabusha, futhi ngaphezu kwakho konke, ngokusindisa ukuphila.
Lapho kugadla inhlekelele, oFakazi BakaJehova basebenzisa—futhi babonge—noma imaphi amalungiselelo enziwa ngezinhlelo zokusiza zendawo. Ngesikhathi esifanayo, banesibopho esingokomBhalo ‘sokusebenza okuhle ikakhulukazi kulabo abahlobene nabo okholweni.’ (Galathiya 6:10) Yebo, oFakazi bazizwa njengokungathi bahlobene; bazibheka ‘njengomkhaya.’ Yingakho bebizana ngokuthi “mfowethu” nangokuthi “dadewethu.”—Qhathanisa noMarku 3:31-35; Filemoni 1, 2.
Ngakho lapho inhlekelele ihlasela endaweni, abangabadala koFakazi BakaJehova benza imizamo yokuzikhandla ukuze bathole ukuthi ilungu ngalinye lebandla likuphi futhi lidingani bese benza amalungiselelo osizo oludingekayo. Cabangela indlela lokhu okwenzeka ngayo e-Accra, eGhana; eSan Angelo, e-U.S.A.; naseKobe, eJapane.
E-Accra—“USuku LukaNowa Oluncane”
Laqala ukuna cishe ngo-11 ebusuku, futhi layidliva umvimbi amahora amaningi. “Lalina ngamandla kangangokuthi wonke umkhaya wami waqwasha,” kusho uJohn Twumasi, omunye woFakazi BakaJehova e-Accra. I-Daily Graphic yakubiza ngokuthi “uSuku LukaNowa oluncane.” “Sazama ukuyisa izinto ezithile ezibalulekile esitezi,” kuqhubeka uJohn, “kodwa sathi sivula umnyango oya ezitebhisini, isikhukhula samanzi sawulukuhleleka ngaphakathi.”
Iziphathimandla zakhipha isixwayiso sokuba kuphunywe, kodwa abaningi bazindela, besaba ukuthi indlu engenamuntu—yize igcwele amanzi—yayingase idonse abaphangi. Abanye babengenakuphuma ngisho noma babefuna. “Mina nomama sahluleka ukuvula umnyango,” kusho intombazane okuthiwa uPaulina. “Amanzi ayelokhu ephakama, ngakho sama emiphongolweni yokhuni sabambelela emshayweni wophahla. Ekugcineni, cishe ngehora lesihlanu ekuseni, omakhelwane bethu basitakula.”
Ngokushesha ngangokunokwenzeka, oFakazi BakaJehova baqala umsebenzi. Udade ongumKristu okuthiwa uBeatrice uyalandisa: “Abadala basebandleni babesithungatha, basithola emzini womunye uFakazi esikanye naye, lapho sasiphephele khona. Ezinsukwini ezintathu nje ngemva kwesikhukhula, abadala namalungu ebandla asemancane beza bazophala udaka ngaphakathi nangaphandle komuzi wethu. I-Watch Tower Society yasinikeza imithi yokuhlanza, izibulala-magciwane, upende, omatilasi, izingubo zokulala, izindwangu, nezambatho zezingane. Abazalwane basithumelela ukudla kwezinsuku eziningana. Ngathinteka kakhulu!”
UJohn Twumasi, ocashunwe ngaphambili, uyabika: “Ngatshela abanye abaqashile ukuthi iNhlangano yethu yayisithumelele imithi yokuhlanza nezibulala-magciwane—okwanele ukuhlanza sonke isakhiwo. Abaqashi abangaba ngu-40 basiza ekuhlanzeni. Nganikeza omakhelwane bami eminye yemithi yokuhlanza, kuhlanganise nomunye umlisa ongumpristi wesonto lendawo. Abantu engisebenza nabo babenephutha ngokucabanga ukuthi oFakazi BakaJehova babonisa uthando kubantu bakubo kuphela.”
Abafowethu nodadewethu abangamaKristu balwazisa kakhulu usizo lothando abalunikezwa. UMfoweth’ uTwumasi uphetha ngokuthi: “Nakuba izinto ezangilahlekela ngesikhukhula zazibiza kakhulu kunezinto zosizo esazinikezwa, mina nomkhaya wami sinomuzwa wokuthi ngenxa yaleli lungiselelo leNhlangano elithinta inhliziyo, siye sazuza okukhulu kakhulu kunokwasilahlekela.”
ESan Angelo—“Kwakuzwakala Sengathi Umhlaba Uyabhubha”
Iziphepho ezinkulu ezonakalisa iSan Angelo ngo-May 28, 1995, zasiphula imithi, zephula izigxobo zikagesi, zajikijela nezintambo ezinogesi emigwaqweni. Umoya wawuvunguza ngejubane elingangamakhilomitha angu-160 ngehora, walimaza izakhiwo zezinkonzo zomphakathi. Imizi engaphezu kuka-20 000 yahanjelwa ugesi. Kwabe sekufika isichotho. I-National Weather Service (INhlangano Yesizwe Yesibikezelo Sezulu) yabika ukuthi kwakuwa “isichotho esingangebhola legalofu,” kwase kuba “isichotho esingangebhola le-softball,” ekugcineni kwaba “isichotho esingange-grapefruit.” Umsindo wawuvala izindlebe. Esinye isakhamuzi sathi: “Kwakuzwakala sengathi umhlaba uyabhubha.”
Ngemva kwalesi sivunguvungu kwaba nokuthula okwethusayo. Abantu baqala ukuphuma ezindlini zabo ezidoklozekile ukuze bahlole umonakalo. Imithi eyayisamile yayiphundlekile. Izindlu ezazisamile zazivithizekile. Kwezinye izindawo isichotho sasimboze phansi sakha amabibi ajule kangangemitha. Isivunguvungu sasibulale izinkulungwane zamafasitela ezindlu nawezimoto, kangangokuthi manje kwase kubenyezela izingcezu zezingilazi eziphukile eceleni kwesichotho esasimboze phansi. “Lapho ngifika kwami,” kusho omunye wesifazane, “ngavele ngahlala emotweni egcekeni ngakhala. Umonakalo wawumubi kakhulu, ngamane nje ngakhungatheka.”
Izinhlelo zokusiza nezibhedlela zaphuthuma zanikeza usizo lwemali, izinto zokwakha, ukwelashwa, nokwelulekwa. Ngokuncomekayo, abantu abaningi ababeyizisulu zesivunguvungu ngokwabo benza okusemandleni ukuze basize abanye.
Amabandla oFakazi BakaJehova nawo athatha isinyathelo. U-Aubrey Conner, umdala eSan Angelo, uyabika: “Sathi singaphela isivunguvungu, sahlala ezingcingweni sihlolana. Sasizana futhi sasiza nomakhelwane bethu abangebona oFakazi ngokufaka izingqwembe emafasiteleni, ukumboza uphahla ngepulasitiki, nokuvikela izindlu ngangokunokwenzeka esimweni sezulu. Sabe sesibhala phansi wonke umuntu ebandleni omuzi wakhe wawuthintekile. Kwakunemizi engaba yikhulu eyayidinga ukulungiswa, futhi izinto ezazinikezwe amanxusa osizo zazingenele. Ngakho sathenga izinto ezengeziwe sabe sesizihlelela ukusebenza. Sebebonke, oFakazi abangaba ngu-1 000 basiza ngokuzithandela, abangaba ngu-250 impelasonto ngayinye. Babesuka kude ezindaweni eziqhele ngamamayela angu-460 [amakhilomitha angu-740]. Bonke basebenza bengakhathali, ezikhathini eziningi esimweni sezulu esingu-100° [okungaba ngu-40°C.]. Ngisho nodade oneminyaka engu-70 ubudala wayesebenza nathi ngazo zonke izimpelasonto, ngaphandle kweyodwa, futhi leyo kwakuyilapho kulungiswa owakhe umuzi. Futhi ngaleyo mpelasonto wayephezu kophahla lwakhe esiza ngokululungisa!
“Sasiwezwa kaningi amazwi ezibukeli anjengathi, ‘Uthi bekungeke kube kuhle ukube nezinye izinkolo bezingawenzela lokhu amalungu azo?’ Omakhelwane bethu kwabahlaba umxhwele ukubona iqembu lezisebenzi zokuzithandela ezingu-10 kuya ku-12 (kuhlanganise nodade) lifika endlini yomunye uFakazi elikanye naye ekuseni ngoLwesihlanu, lilungele ukulungisa ngisho nokwakha kabusha lonke uphahla mahhala. Ezimweni eziningi umsebenzi wawuqedwa ngempelasonto eyodwa. Ngezinye izikhathi, umakhi wangaphandle wayesuke esephakathi nomsebenzi wokufulela lapho iqembu lethu lifika kamakhelwane. Sasiludiliza futhi silwakhe kabusha uphahla lwethu futhi sihlanze igceke bengakaluqedi olwabo. Ngezinye izikhathi babeyeka ukusebenza ukuze nje babukele thina!”
UMfoweth’ uConner uphetha ngokuthi: “Sonke sizokukhumbula okuhlangenwe nakho esiye sakujabulela ndawonye. Siye sazana sibonana ngelinye iso ngokubonisa nangokuboniswa uthando lobuzalwane ngendlela engakaze yenzeke. Sinomuzwa wokuthi lokhu kumane kubonisa lokho okuyoba yikho ezweni elisha likaNkulunkulu, lapho abafowethu nodadewethu besizana ngoba befuna ngempela.”—2 Petru 3:13.
EKobe—“Isibhicongo Samapulangwe, Udaka Nezidumbu Zabantu”
Kwakucatshangwa ukuthi izakhamuzi zaseKobe zikulungele. Empeleni, njalo ngo-September 1 zigubha i-Disaster Prevention Day (USuku Lokuvinjelwa Kwenhlekelele). Izingane zesikole zivivinyelwa ukubhekana nokuzamazama komhlaba, amabutho empi aprakthize izenzo zokutakula ngendiza enophephela emhlane, kuthi iminyango yabacishi-mlilo ilethe imishini yayo elingisa ukuzamazama komhlaba, amavolontiya abonisa kuyo amakhono okusinda ngaphakathi ebhokisini elingangendlu elizamazama lixukuzeke njengokungathi okwangempela. Kodwa lapho okwangempela kwenzeka ngo-January 17, 1995, konke ukulungiselela kwafana neze. Uphahla lwamashumi ezinkulungwane zezindlu lwawohloka—into eyayingenzeki emishinini. Izitimela zawa ngezinhlangothi; izingxenye zemigwaqo emikhulu zabhidlika; amapayipi egesi nawamanzi agqabuka; imizi yabhidlika njengokungathi yenziwe ngekhadibhodi. Umagazini i-Time wachaza isimo ngokuthi “isibhicongo samapulangwe, udaka nezidumbu zabantu.”
Kwabe sekuba nemililo. Izakhiwo zazilanguka amalangabi ngenkathi abacishi-mlilo bevalelwe izimoto eziminyene ibanga elingamakhilomitha amaningi. Labo ababefika emililweni, ezikhathini eziningi babethola ukuthi akutholakali manzi esimisweni samanzi sedolobha esasilimele. “Ngosuku lokuqala kwakuwubudididi bangempela,” kusho esinye isikhulu. “Angikaze ngizizwe ngingenamandla kanjena ekuphileni kwami, ngazi ukuthi kwakunenqwaba yabantu abavaleleke kulezo zindlu ezishayo. Futhi ngazi ukuthi kwakungekho lutho engangingalwenza.”
Sekukonke, kwafa abantu abangaba ngu-5 000, futhi cishe izakhiwo ezingu-50 000 zaba incithakalo. IKobe yayinengxenye eyodwa kwezintathu kuphela yokudla eyayikudinga. Ukuze bathole amanzi, abanye baphendukela ekuguguluzeni uketshezi olungcolile ngaphansi kwamapayipi amanzi agqabukile. Abaningi balabo ababengasenamizi babalekela eziphephelweni, ezinye zazo ezazaba ukudla, umuntu ngamunye athole ilayisana elincane ngosuku. Ngokushesha ukungeneliseki kwanda. “Iziphathimandla azenzanga lutho,” kukhononda omunye umlisa. “Uma silokhu sithembela kuzo sizobulawa yindlala.”
Amabandla oFakazi BakaJehova eKobe nasezindaweni eziseduze azihlela ngokushesha. Umshayeli wendiza enophephela emhlane owawubona ngawakhe umsebenzi wabo wathi: “Ngaya endaweni yenhlekelele ngosuku lokuzamazama futhi ngahlala khona isonto. Lapho ngifika kwenye indawo eyisiphephelo, konke kwakuwubuxakalala. Wawungekho nomncane umsebenzi wokusiza owawenziwa. OFakazi BakaJehova kuphela abagijimela kulendawo, babamba lokhu nalokhuya.”
Ngempela, kwakunomsebenzi omkhulu wokwenziwa. AmaHholo OMbuso ayishumi kwathiwa awakufanelekeli ukusetshenziswa, futhi oFakazi abangaphezu kuka-430 babengenamizi. Imizi eyengeziwe engu-1 206 ababehlala kuyo yayidinga ukulungiswa. Akupheleli lapho, imikhaya yoFakazi abangu-15 ababefe kulenhlekelele yayiyidinga kakhulu induduzo.
OFakazi abangaba ngu-1 000 abavela kulo lonke lelizwe banikela ngesikhathi sabo ukuzosiza emsebenzini wokulungisa. “Lapho sisebenza emizini yabasafundelwa iBhayibheli ababengakabhapathizwa,” kuphawula omunye umzalwane, “sasibuzwa njalo ukuthi, ‘Kufanele sikhokhe malini ngakho konke lokhu?’ Lapho sibatshela ukuthi lomsebenzi wawusekelwa amabandla, babesibonga, bathi, ‘Lokho esikufundile kwenzeka ngokoqobo manje!’”
Abaningi kwabahlaba umxhwele ukusabela okusheshayo nokungashwampuluzi koFakazi kulenhlekelele. “Ngahlabeka umxhwele kakhulu,” kusho umshayeli wendiza ocashunwe ngaphambili. “Nibizana ngokuthi ‘mfowethu’ nangokuthi ‘dadewethu.’ Ngiyibonile indlela enisizana ngayo; niwumkhaya ngempela.”
OFakazi ngokwabo bafunda izifundo ezibalulekile kulokhu kuzamazama. Omunye udade wavuma: “Bengilokhu nginomuzwa wokuthi lapho inhlangano ethile iba nkulu, kuba nzima ngokwengeziwe ukubonisa ukukhathalela komuntu siqu.” Kodwa ukunakekelwa kwesisa akuthola kwawushintsha umbono wakhe. “Ngiyazi manje ukuthi uJehova akasinakekeli njengenhlangano kuphela kodwa futhi nanjengabantu ngabanye.” Nokho, ukukhululeka ezinhlekeleleni okuhlala njalo kuseza.
Ukukhululeka Okuhlala Njalo Kuseduze!
OFakazi BakaJehova babheka phambili esikhathini lapho ukuphila kwabantu kungeke kusanqanyulwa izinhlekelele. Ezweni elisha likaNkulunkulu, umuntu uyofundiswa ukusebenzisana nendawo ezungezile emhlabeni. Njengoba abantu belahla izenzo zobugovu, ukuchayeka kwabo ezingozini ezingokwemvelo kuyoncipha.
Ngaphezu kwalokho, uJehova uNkulunkulu—uMdali wamandla emvelo—uyoqikelela ukuthi umkhaya wakhe wesintu nendalo yasemhlabeni akuphindi kusongelwe amandla emvelo. Umhlaba uyobe uyipharadesi ngempela ngaleso sikhathi. (Isaya 65:17, 21, 23; Luka 23:43) Isiprofetho sesAmbulo 21:4 siyogcwaliseka ngokukhazimulayo: “Uyosula zonke izinyembezi emehlweni aso, futhi ukufa ngeke kusaba khona, noma ukulila noma ukukhala noma ubuhlungu ngeke kusaba khona. Izinto zangaphambili zidlulile.”
[Isithombe ekhasini 5]
UBeatrice Jones (kwesobunxele) ubonisa indlela yena nabanye ababambana ngayo ngezandla ukuze banqamule emanzini ayisikhukhula
[Isithombe ekhasini 6]
Umsebenzi wokusiza ngemva kweziphepho ezinkulu