‘UJehova Akayikubalahla Abantu Bakhe’
“Ziningi izinhlupheko zolungileyo, kepha uJehova uyamkhulula kuzo zonke.”—IHUBO 34:19.
1, 2. (a) UJehova ubabusisa kanjani abantu bakhe namuhla? (b) AmaKristu amaningi abhekene nani, futhi yimiphi imibuzo ephakamayo?
EKUGCWALISEKENI kwesiprofetho seBhayibheli, abakhulekeli bakaJehova bahlala epharadesi elingokomoya. (2 Korinte 12:1-4) OFakazi BakaJehova banobudlelwane bomhlaba wonke obubonakala ngothando nobunye. (Johane 13:35) Bajabulela ulwazi olujulile nolubanzi lwamaqiniso eBhayibheli. (Isaya 54:13) Yeka indlela ababonga ngayo kuJehova ngokuthi ubanika ilungelo lokuba yizimenywa etendeni lakhe elingokomoya!—IHubo 15:1.
2 Nakuba bonke enhlanganweni kaJehova bejabulela ukuchuma ngokomoya, abanye kubonakala bephila ngokuthula nokuzola kwengqondo okuthile kuyilapho abanye behlupheka ngandlela-thile. AmaKristu amaningi azithola esesimweni esidabukisayo isikhathi eside futhi kungabonakali ezokhululeka ngokushesha. Kungokwemvelo ukudumazeka ngaphansi kwezimo ezinjalo. (IzAga 13:12) Ingabe usizi luwubufakazi bokuthi uNkulunkulu akasenameli? Ingabe uJehova unika amaKristu athile isivikelo esikhethekile kuyilapho elahla amanye?
3. (a) Ingabe nguJehova obangela izinhlupheko abantu bakhe ababhekana nazo? (b) Kungani ngisho nabakhulekeli bakaJehova abathembekile bebhekana nokuhlupheka kwesintu?
3 IBhayibheli liyaphendula: “Uma engaphansi kokulingwa, umuntu makangasho ukuthi: ‘Ngilingwa uNkulunkulu.’ Ngoba uNkulunkulu akanakulingwa ngezinto ezimbi futhi yena ngokwakhe akalingi muntu.” (Jakobe 1:13) UJehova unguMvikeli noMsekeli wabantu bakhe. (IHubo 91:2-6) ‘UJehova akayikubalahla abantu bakhe.’ (IHubo 94:14) Lokhu akusho ukuthi abakhulekeli abakholekile ngeke bahlupheke. Isimiso sezinto sezwe samanje sibuswa abantu abanokungapheleli abakuzuze njengefa. Abaningi bonakele, kanti abambalwa babi ngokuphelele. Akekho kubo obheka kuJehova ukuze athole ukuhlakanipha. Lokhu kuphumela ekuhluphekeni kwesintu okukhulu. IBhayibheli likwenza kucace ukuthi abantu bakaJehova abanakuyigwema ngaso sonke isikhathi imiphumela edabukisayo yokungapheleli nobubi besintu.—IzEnzo 14:22.
AmaKristu Athembekile Akulindele Ukuhlupheka
4. Yini wonke amaKristu angayilindela uma nje esaphila kulesi simiso sezinto esibi, futhi ngani?
4 Nakuba bengeyona ingxenye yezwe, abalandeli bakaJesu baphila kulesi simiso sezinto. (Johane 17:15, 16) EBhayibhelini uSathane udalulwa njengamandla abusa lelizwe. (1 Johane 5:19) Ngakho, wonke amaKristu angalindela ukuthi ngolunye usuku ayobhekana nezinkinga ezinkulu. Ecabanga ngalokho, umphostoli uPetru uthi: “Hlalani nisangulukile, lindani. Isitha senu, uDeveli, sihambahamba njengengonyama ebhongayo, efuna ukushwabadela othile. Kodwa thathani ukuma kwenu ngokumelene naye, niqinile okholweni, nazi ukuthi izinto ezifanayo eziyizinhlupheko ziyafezwa kuyo yonke inhlangano yabafowenu ezweni.” (1 Petru 5:8, 9) Yebo, yonke inhlangano yamaKristu ingalindela ukuhlupheka.
5. UJesu wakucacisa kanjani ukuthi amaKristu akholekile ayobhekana nezinto ezidabukisayo ekuphileni?
5 Ngisho noma simthanda ngokujulile uJehova futhi sithembekile ezimisweni zakhe, siyobhekana nezinto ezidabukisayo ekuphileni. UJesu wakucacisa lokhu emfanekisweni wakhe olotshwe kuMathewu 7:24-27, lapho abonisa khona umehluko phakathi kwalabo abalalela amazwi akhe nalabo abangawalaleli. Wafanisa abafundi abalalelayo nendoda enokuqonda eyakha indlu phezu kwedwala eliqinile. Labo abangawalaleli amazwi akhe wabafanisa nendoda eyisiwula eyakha indlu yayo phezu kwesihlabathi. Ngemva kwesivunguvungu esikhulu, kwasinda indlu eyakhiwe edwaleni kuphela. Phawula ukuthi ngokuqondene nendlu yendoda enokuqonda, ‘layithela imvula futhi kwafika izikhukhula kwavunguza nemimoya yayishaya leyondlu, kodwa ayizange ibhidlike.’ UJesu akazange athembise ukuthi indoda enokuqonda yayiyojabulela ukuthula nokuzola kwengqondo ngaso sonke isikhathi. Kunalokho, ukuqonda kwaleyo ndoda kwakuyoyisiza ukuba ibhekane nesivunguvungu. Kuvezwe iphuzu elifanayo nasemfanekisweni womhlwanyeli. Kuwo, uJesu uchaza ukuthi ngisho nabakhulekeli abalalelayo ‘abanenhliziyo ekahle nenhle, babeyothela izithelo ngokukhuthazela.’—Luka 8:4-15.
6. Emfanekisweni kaPawulu wezinto ezingashi, obani ababhekana novivinyo olunjengomlilo?
6 Lapho ebhalela abaseKorinte, umphostoli uPawulu wasebenzisa isingathekiso ukuze abonise isidingo sezimfanelo ezihlala njalo ezingasisiza ukuba sibhekane nokuvivinywa. Izinto ezinjalo ezingashi njengegolide, isiliva namatshe ayigugu zifana nezimfanelo zokuhlonipha uNkulunkulu. (Qhathanisa nezAga 3:13-15; 1 Petru 1:6, 7.) Ngakolunye uhlangothi, izici ezingokwenyama zifaniswa nezinto ezishayo. UPawulu ube esethi: “Umsebenzi walowo nalowo uyobonakala, ngoba usuku luyowuveza, ngoba uyokwambulwa ngomlilo; futhi umlilo ngokwawo uyobonisa ukuthi umsebenzi walowo nalowo uluhlobo luni. Uma umsebenzi womuntu awakhele kuso usala, uyothola umvuzo.” (1 Korinte 3:10-14) Nalapha, iBhayibheli lichaza ukuthi sonke asinakukugwema ukubhekana nohlobo oluthile lovivinyo olunjengomlilo.
7. NgokweyabaseRoma 15:4, imiBhalo ingasisiza kanjani ukuba sikhuthazelele ukulingwa?
7 EBhayibhelini kunokulandisa okuningi okuphathelene nezinceku zikaNkulunkulu ezithembekile okuye kwadingeka zikhuthazelele usizi, ngezinye izikhathi isikhathi eside. Kodwa uJehova akazange azishiye. Cishe umphostoli uPawulu wayecabanga ngezibonelo ezinjalo lapho ethi: “Zonke izinto ezalotshwa esikhathini esingaphambili zalotshelwa ukuba kufundiswe thina, ukuze kuthi ngokukhuthazela kwethu nangenduduzo evela emiBhalweni sibe nethemba.” (Roma 15:4) Cabangela izibonelo zamadoda amathathu abhekana nosizi olunzima nakuba ayenobuhlobo obuseduze noNkulunkulu.
Lokho Esikufunda Ekulandiseni KweBhayibheli
8. Yini uJehova ayivumela kuJosefa, futhi isikhathi eside kangakanani?
8 Indodana kaJakobe uJosefa yayithandwa uJehova kusukela isencane. Nokho, yabhekana nezinsizi eziningi nakuba yayingenaphutha. Abafowabo bayithumba futhi bayiphatha ngonya. Yathengiswa njengesigqila ezweni eyayingalazi lapho yamangalelwa khona ngamanga futhi yafakwa “emgodini.” (Genesise 40:15) Lapho, ‘balimaza izinyawo zayo ngamaketanga, yaboshwa ngensimbi.’ (IHubo 105:17, 18) Phakathi nobugqila nokuboshwa kwakhe, akungabazeki ukuthi uJosefa wacela kuJehova ngokuphindaphindiwe ukuba akhululwe. Nokho, nakuba uJehova amqinisa ngezindlela ezihlukahlukene, iminyaka engu-13, wayevuka njalo ekuseni esalokhu eyisigqila noma isiboshwa.—Genesise 37:2; 41:46.
9. Yini uDavide okwadingeka ayikhuthazelele iminyaka eminingi?
9 Kwenzeka okufanayo nakuDavide. Lapho uJehova ekhetha indoda efanelekayo ukuba ibuse u-Israyeli, wathi: “Ngithole uDavide indodana kaJese, indoda ethandwa inhliziyo yami.” (IzEnzo 13:22) Nakuba ayethandeka emehlweni kaJehova, uDavide wahlupheka kakhulu. Esengozini yokufa, wacasha iminyaka eminingi ehlane, emihumeni, emihosheni nasezweni ayengalazi. Ezingelwa njengenyamazane, wabhekana nokudumazeka nokwesaba. Nakuba kunjalo, wakhuthazela ngamandla kaJehova. Esusela kulokho ayebhekane nakho uDavide wayengathi: “Ziningi izinhlupheko zolungileyo, kepha uJehova uyamkhulula kuzo zonke.”—IHubo 34:19.
10. Yiluphi usizi olukhulu olwehlela uNaboti nomkhaya wakhe?
10 Osukwini lomprofethi u-Eliya, babengu-7 000 kuphela kwa-Israyeli ababengazange baguqe kunkulunkulu wamanga uBali. (1 AmaKhosi 19:18; Roma 11:4) UNaboti, cishe owayengomunye wabo, waba isisulu sokungabi nabulungisa okubi. Wathunazwa ngokumangalelwa ngokuthi uhlambalazile. Lapho etholakala enecala, wagwetshwa ngesinqumo senkosi ukuba afe ngokukhandwa ngamatshe, futhi igazi lakhe laxhashwa izinja. Ngisho namadodana akhe abulawa! Kodwa wayengenacala. Labo ababenikeza ubufakazi obumlahlayo babenamanga. Konke lokhu kwakuwuzungu olwaluboshwe iNdlovukazi u-Izebeli ukuze inkosi idle isivini sikaNaboti.—1 AmaKhosi 21:1-19; 2 AmaKhosi 9:26.
11. Umphostoli uPawulu usitshelani ngabesilisa nabesifazane abakholekile emlandweni weBhayibheli?
11 UJosefa, uDavide noNaboti bamane bayizibonelo ezintathu zabesilisa nabesifazane abaningi abakholekile abaphawulwe eBhayibhelini ababhekana nezinsizi. Umphostoli uPawulu wabhala umlando omfushane wezinceku zikaJehova eminyakeni eminingi edlule. Kuwo, wakhuluma ngalabo ‘abamukela ukulingwa kwabo ngokuhlekwa insini nangokubhaxabulwa, impela, okungaphezu kwalokho, ngezibopho nangamatilongo. Bakhandwa ngamatshe, baquliswa, banqunywa ngokusahwa, bafa ngokubulawa ngenkemba, bazulazula bembethe izikhumba zezimvu, izikhumba zezimbuzi, kuyilapho beswela, besosizini, bengaphansi kokuphathwa kabi; futhi izwe lalingabafanele. Bazulazula ezingwadule nasezintabeni nasemihumeni nasemiphandwini yomhlaba.’ (Heberu 11:36-38) Kodwa uJehova akazange abashiye.
UJehova Uyabanakekela Abahluphekayo
12. Yiziphi ezinye izinhlupheko oFakazi BakaJehova ababhekana nazo namuhla?
12 Kuthiwani ngabantu bakaJehova namuhla? Njengenhlangano, singalindela isivikelo saphezulu nokudlula ngokuphephile ezinsukwini zokugcina nasosizini olukhulu. (Isaya 54:17; IsAmbulo 7:9-17) Nokho, njengabantu ngabanye, siyaqaphela ukuthi bonke abantu bahlangabezana “nesikhathi nethuba.” (UmShumayeli 9:11) Namuhla kunamaKristu akholekile amaningi abhekana nosizi. Amanye akhuthazelela ubumpofu obukhulu. IBhayibheli likhuluma ‘ngezintandane nabafelokazi’ abangamaKristu abasosizini. (Jakobe 1:27) Abanye bahlupheka ngenxa yezinhlekelele zemvelo, ngenxa yezimpi, ubugebengu, ukusetshenziswa kabi kwamandla, ukugula nokufa.
13. Yikuphi okuhlangenwe nakho okunzima okuye kwabikwa muva nje?
13 Ngokwesibonelo, emibikweni yawo ka-1996 eya eNdikimbeni Ebusayo YoFakazi BakaJehova, amahhovisi egatsha e-Watch Tower alandisa ukuthi abanye babafowethu nodadewethu bayaboshwa ngaphansi kwezimo ezidabukisayo ngenxa yokunamathela kwabo ezimisweni zeBhayibheli. Amabandla amathathu ezweni elithile laseNingizimu Melika ahlakazwa lapho abashokobezi bephoqelela amakhulu oFakazi ukuba aphume kuleyo ndawo. Ezweni elithile eliseNtshonalanga Afrika, oFakazi abathile abavimbeleka empini yombango babulawa. Ezweni eliseMelika Ephakathi, isimo esingokwezimali sabanye abafowethu esasivele sibucayi saba sibi kakhulu ngokugadla kwesiphepho. Kwezinye izindawo lapho ubumpofu nokuswelakala kokudla kungase kungabi izinkinga ezinkulu, amathonya amabi angase anciphise injabulo yabanye. Abanye basindwa ukucindezela kokuphila kwanamuhla. Ngenxa yokunganaki komphakathi, nabanye bangase bazizwe bedumele lapho beshumayela izindaba ezinhle zoMbuso.
14. (a) Sifundani esibonelweni sikaJobe? (b) Kunokuba sicabange ngokuphambene, kufanele senzeni lapho sibhekana nokucindezeleka?
14 Lezi zimo akumelwe zibhekwe njengobufakazi bokuthi uNkulunkulu akasenameli. Khumbula indaba kaJobe nezinhlupheko eziningi abhekana nazo. ‘Wayengumuntu ongenasici nolungileyo.’ (Jobe 1:8) Yeka ukuthi kumelwe ukuba uJobe wadumala kanjani lapho u-Elifazi emsola ngokuthi wenze okubi! (Jobe, izahluko 4, 5, 22) Asifuni ukusheshe siphethe ngokuthi sibhekana nosizi ngoba siyé sadumaza uJehova ngandlela-thile noma ngenxa yokuthi uJehova uye wahoxisa isibusiso sakhe. Ukucabanga okuphambene lapho sibhekene nosizi kungalwenza buthaka ukholo lwethu. (1 Thesalonika 3:1-3, 5) Lapho sicindezelekile, kungcono kakhulu ukuzindla ngeqiniso lokuthi uJehova noJesu baseduze nabalungileyo kungakhathaliseki ukuthi kwenzekani.
15. Sazi kanjani ukuthi uJehova ukhathazeka ngokujulile ngosizi abantu bakhe ababhekana nalo?
15 Umphostoli uPawulu uyasiqinisekisa lapho ethi: “Ubani oyosihlukanisa nothando lukaKristu? Ingabe usizi noma ukucindezeleka noma ukushushiswa noma ukulamba noma ukuhamba-ze noma ingozi noma inkemba? . . . Ngiyaqiniseka ukuthi nakufa nakuphila nazingelosi nawohulumeni nazinto ezikhona manje nazinto ezizayo namandla nakuphakama nakujula nanoma iyiphi enye indalo ngeke kukwazi ukusihlukanisa nothando lukaNkulunkulu olukuKristu Jesu iNkosi yethu.” (Roma 8:35, 38, 39) UJehova usikhathalela ngokujulile futhi uyakuqaphela ukuhlupheka kwethu. Lapho esengumbaleki, uDavide wabhala: “Amehlo kaJehova akubo abalungileyo; izindlebe zakhe zikukho ukukhala kwabo. UJehova useduze nabo abanenhliziyo eyaphukileyo.” (IHubo 34:15, 18; Mathewu 18:6, 14) UBaba wethu osezulwini uyasikhathalela futhi unesihawu ngabahluphekayo. (1 Petru 5:6, 7) Usinikeza lokho esikudingayo ukuze sikhuthazelele noma yikuphi ukuhlupheka esingase sibhekane nakho.
Izipho ZikaJehova Ziyasisekela
16. Yiliphi ilungiselelo likaJehova elisisiza ukuba sikhuthazele, futhi kanjani?
16 Nakuba singenakulindela ukuphila okungenazinhlupheko kulesi simiso sezinto esidala, “asishiywa dengwane.” (2 Korinte 4:8, 9) UJesu wathembisa ukunikeza abalandeli bakhe umsizi. Wathi: “Ngiyocela uBaba futhi uyoninika omunye umsizi ukuze abe nani kuze kube phakade, umoya weqiniso.” (Johane 14:16, 17) NgePhentekoste lika-33 C.E., umphostoli uPetru watshela izilaleli zakhe ukuthi zingamukela “isipho samahhala somoya ongcwele.” (IzEnzo 2:38) Ingabe umoya ongcwele uyasisiza namuhla? Yebo! Amandla kaJehova asebenzayo asinikeza izithelo ezimangalisayo: “Uthando, injabulo, ukuthula, ukubhekakade, umusa, ubuhle, ukholo, ubumnene, ukuzithiba.” (Galathiya 5:22, 23) Zonke lezi ziyizimfanelo ezibalulekile ezisisiza ukuba sikhuthazele.
17. Yimaphi amanye amaqiniso eBhayibheli aqinisa ukholo nokuzimisela kwethu ukulindela uJehova ngesineke?
17 Umoya ongcwele usisiza nokuba siqonde ukuthi usizi lwamanje “lungolomzuzwana futhi lulula” lapho luqhathaniswa nomvuzo wokuphila okumi phakade. (2 Korinte 4:16-18) Siyaqiniseka ukuthi uNkulunkulu ngeke ayikhohlwe imisebenzi yethu nothando esilubonisayo ngaye. (Heberu 6:9-12) Lapho sifunda amazwi eBhayibheli aphefumulelwe, siduduzwa izibonelo zezinceku zasendulo ezikholekile ezakhuthazelela izinsizi eziningi kodwa okwathiwa ziyajabula. UJakobe uyabhala: “Bafowethu, thathani abaprofethi abakhuluma egameni likaJehova njengesibonelo sokukhuthazelelwa kokubi nokuboniswa kokubekezela. Bhekani! Sithi bayajabula labo abaye bakhuthazela.” (Jakobe 5:10, 11) IBhayibheli lithembisa “amandla angaphezu kwavamile” ayosisiza sikhuthazelele ukulingwa. UJehova usibusisa nangethemba lovuko. (2 Korinte 1:8-10; 4:7) Ngokufunda iBhayibheli nsuku zonke nokuzindla ngalezi zithembiso, siyoqinisa ukholo lwethu nokuzimisela kwethu ukulindela uNkulunkulu ngesineke.—IHubo 42:5, qhathanisa ne-NW.
18. (a) Kweyesi-2 Korinte 1:3, 4, sikhuthazwa ukuba senzeni? (b) Ababonisi abangamaKristu bangazibonakalisa kanjani beyimithombo yenduduzo nokuqabuleka?
18 Ngaphezu kwalokho, uJehova uye wasinikeza ipharadesi elingokomoya lapho singajabulela khona uthando lweqiniso lwabafowethu nodadewethu abangamaKristu. Sonke sinendima okumelwe siyifeze ekududuzaneni. (2 Korinte 1:3, 4) Ababonisi abangamaKristu ikakhulukazi bangaba umthombo oyinhloko wenduduzo nokuqabuleka. (Isaya 32:2) ‘Njengezipho ezingabantu,’ bayalwe ukuba bakhe labo abahluphekayo, ‘bakhulume ngokududuzayo nemiphefumulo ecindezelekile’ futhi ‘basekele ababuthakathaka.’ (Efesu 4:8, 11, 12; 1 Thesalonika 5:14) Abadala bakhuthazwa ukuba babasebenzise kahle omagazini INqabayokulinda ne-Phaphama!, kanye nezinye izincwadi ezilungiselelwa ‘ngesigqila esikholekile nesiqondayo.’ (Mathewu 24:45-47) Lezi ziqukethe inala yeseluleko esisekelwe eBhayibhelini esingasisiza ukuba sixazulule—futhi size sivimbele—ezinye zezinkinga ezisibangela ukukhathazeka. Kwangathi singalingisa uJehova ngokududuzana nokukhuthazana ezikhathini ezinzima!
19. (a) Yini esisiza ukuba sigweme izinhlupheko ezithile? (b) Ngokuyinhloko, ubani okumelwe simethembe, futhi yini eyosenza sikwazi ukubhekana nokuvivinywa?
19 Njengoba singena shí ezinsukwini zokugcina futhi izimo ziba zimbi kakhulu kulesi simiso sezinto samanje, amaKristu enza konke okusemandleni awo ukuze agweme usizi. (IzAga 22:3) Ukwahlulela okuhle, ukuhluzeka kwengqondo nolwazi lwezimiso zeBhayibheli kungasisiza ukuba senze izinqumo ezihlakaniphile. (IzAga 3:21, 22) Silalela iZwi likaJehova futhi silithobele ukuze sigweme ukwenza amaphutha angadingekile. (IHubo 38:4) Noma kunjalo, siyaqaphela ukuthi noma singenza imizamo engakanani ngeke sikususe ngokuphelele ukuhlupheka ekuphileni kwethu. Kulesi simiso sezinto, abaningi abalungileyo babhekana nezinhlupheko ezinzima. Nokho, singabhekana nokuvivinywa kwethu ngethemba eliphelele lokuthi ‘uJehova akayikubalahla abantu bakhe.’ (IHubo 94:14) Futhi siyazi ukuthi lesi simiso sezinto nosizi lwaso kuzodlula ngokushesha. Ngakho-ke, kwangathi singanquma ‘ukungayeki ukwenza okuhle, ngoba ngenkathi efanele siyovuna uma singakhathali.’—Galathiya 6:9.
Sifundeni?
◻ Yikuphi ukulingwa yonke inhlangano yamaKristu ebhekana nakho?
◻ Yiziphi izibonelo zeBhayibheli ezisisiza ukuba siqonde ukuthi usizi alubona ubufakazi bokuthi uJehova akasenameli?
◻ UJehova uzizwa kanjani ngokuhlupheka abantu bakhe ababhekana nakho?
◻ Yiziphi ezinye zezipho zikaJehova ezisisiza ukuba sikhuthazelele ukuvivinywa?
[Izithombe ekhasini 10]
UDavide, uNaboti noJosefa amadoda amathathu abhekana nosizi