Siyini Isihluthulelo Senjabulo Yangempela?

ABANTU babedalelwe ukuba bajabule. Kungani singaqiniseka ngalokho? Cabangela isikhathi sokudalwa komuntu.

UJehova uNkulunkulu wadala umbhangqwana wokuqala ongabantu ukwazi ukujabula. U-Adamu no-Eva babekwa epharadesi, insimu yenjabulo okuthiwa i-Edene. UMdali wabalungiselela zonke izinto zokuphila ezidingekayo. Lensimu ‘yayinemithi yonke ebukekayo, emihle, edliwayo.’ (Genesise 2:9) U-Adamu no-Eva babephile kahle, beqinile futhi bebahle—babephelele futhi bejabule ngempela.

Nokho, sasiyini isihluthulelo senjabulo yabo? Ingabe kwakuyikhaya labo eliyipharadesi noma mhlawumbe ukuphelela kwabo okungokomzimba? Lezi zipho ezivela kuNkulunkulu zazinezela ngempela ekujabuleleni kwabo ukuphila. Kodwa injabulo yabo yayingaxhomekile ezintweni ezinjalo ezibonakalayo. Insimu yase-Edene yayingelona nje ipaki elihle. Yayiyindawo engcwele, indawo yokukhulekela uNkulunkulu. Isihluthulelo senjabulo yabo sasiyikhono labo lokwakha nokulondoloza ubuhlobo bothando noMdali. Ukuze bajabule, kwakudingeka baqale babe abantu abangokomoya.—Qhathanisa noMathewu 5:3.

Ingokomoya Liholela Enjabulweni

Ekuqaleni u-Adamu wayenobuhlobo obungokomoya noNkulunkulu. Kwakuwubuhlobo bothando nobesisa obufana nobendodana noyise. (Luka 3:38) Ensimini yase-Edene, u-Adamu no-Eva babenezimo ezinhle ezazibavumela ukuba banelise isifiso sabo sokukhulekela. Ngokulalela uJehova ngokuzimisela nangothando, babengaletha udumo nenkazimulo kuNkulunkulu okungaphezulu kakhulu kwalokho okungalethwa indalo eyizilwane. Babengadumisa uNkulunkulu ngokuhlakanipha ngenxa yezimfanelo zakhe ezimangalisayo futhi babengasekela ubukhosi bakhe. Babengaqhubeka bethola ukunakekela kukaJehova kothando nokwesisa.

Lobo budlelwane noMdali nokulalela imithetho yakhe kwalethela abazali bethu bokuqala injabulo yangempela. (Luka 11:28) Kwakungalindelekile ukuba u-Adamu no-Eva baphile iminyaka eminingi bezama izinto ezihlukahlukene ngaphambi kokuba bathole isihluthulelo senjabulo. Babejabule kusukela esikhathini abadalwa ngaso. Ukuba nokuthula noNkulunkulu nokuzithoba egunyeni lakhe kwabenza bajabula.

Nokho, leyo njabulo yaphela lapho beyeka ukulalela uNkulunkulu. Ngokuhlubuka, u-Adamu no-Eva banqamula ubuhlobo babo obungokomoya noJehova. Babengasebona abangane bakaNkulunkulu. (Genesise 3:17-19) Kubonakala sengathi kusukela osukwini abaxoshwa ngalo ensimini, uJehova wayeka ukuxhumana nabo. Balahlekelwa ukuphelela kwabo, ithemba lokuphila phakade kanye nekhaya labo eliyinsimu. (Genesise 3:23) Kodwa okubaluleke nakakhulu, njengoba balahlekelwa ubuhlobo babo noNkulunkulu, balahlekelwa isihluthulelo senjabulo.

Ikhono Lethu Lokukhetha

Ngaphambi kokuba bafe, u-Adamu no-Eva badlulisela enzalweni yabo izici zobuntu babo, unembeza abadalwa nawo nekhono lokuba nengokomoya. Umkhaya wesintu awuzange wehliselwe ezingeni lezilwane. Singabuyisana noMdali. (2 Korinte 5:18) Njengezidalwa ezihlakaniphile, abantu bayaqhubeka benamandla okukhetha ukulalela uNkulunkulu noma ukungamlaleli. Lokhu kwabonakala emakhulwini amaningi eminyaka kamuva lapho uJehova enika isizwe sakwa-Israyeli esasisanda kwakhiwa ithuba lokuzikhethela ukuphila noma ukufa. Ngomkhulumeli wakhe uMose, uNkulunkulu wathi: “Ngibeké namuhla phambi kwakho ukuphila nokuhle, ukufa nokubi.”—Duteronomi 30:15-18.

Ngisho namanje, ngemva kwezinkulungwane zeminyaka iPharadesi lokuqala lalahleka, thina bantu sisakwazi ukwenza ukukhetha okuhle. Sinonembeza osebenzayo nekhono eliyisisekelo lokulalela imithetho kaNkulunkulu. IBhayibheli likhuluma ‘ngomuntu esinguye ngaphakathi’ nomuntu ‘wangaphakathi.’ (2 Korinte 4:16; Roma 7:22) Lamazwi abhekisela ekhonweni sonke esizalwa sinalo lokubonisa ubuntu bukaNkulunkulu, ukucabanga njengaye, ukuba abantu abangokomoya.

Ngokuphathelene nesimo sethu sokuziphatha nonembeza, umphostoli uPawulu wabhala: “Noma nini lapho abantu bezizwe abangenawo umthetho benza ngokwemvelo izinto zomthetho, lababantu, nakuba bengenawo umthetho, bangumthetho kubo ngokwabo. Yibo kanye ababonisa ukuthi ingqikithi yomthetho ilotshiwe ezinhliziyweni zabo, lapho unembeza wabo ufakazelana nabo, futhi phakathi kwemicabango yabo siqu, babekwa icala noma baze ngisho bavunwe.”—Roma 2:14, 15.

Ukulalela Nokuhlakanipha Kokuhlonipha UNkulunkulu—Isihluthulelo

Nokho, omunye angase abuze, ‘Uma sonke sinokuthambekela okungokwemvelo kokukhulekela uNkulunkulu, futhi ngenxa yalokho, singaba nenjabulo yangempela, kungani ukungajabuli kusakazeke kangaka?’ Kungenxa yokuthi ngamunye wethu kumelwe akhule ngokomoya ukuze sijabule. Nakuba ekuqaleni adalwa ngomfanekiso kaNkulunkulu, umuntu uye wahlukaniswa noMdali wakhe. (Efesu 4:17, 18) Ngakho, ngamunye wethu kumelwe athathe izinyathelo eziwujuqu zokwakha nokulondoloza ubuhlobo obungokomoya noNkulunkulu. Ubuhlobo obunjalo ngeke buzenzakalele.

UJesu waveza izimiso ezimbili ezibalulekile ekwakheni ingokomoya. Esinye siwukuthola ulwazi olunembile ngoNkulunkulu, kanti esinye siwukuzithoba entandweni yakhe. (Johane 17:3) Ecaphuna eZwini likaNkulunkulu, uJesu wathi: “Kulotshiwe ukuthi, ‘Umuntu akumelwe aphile ngesinkwa sodwa, kodwa ngawo wonke amazwi aphuma emlonyeni kaJehova.’” (Mathewu 4:4) Ngesinye isikhathi, uJesu wathi: “Ukudla kwami kuwukuba ngenze intando yalowo ongithumile nokuba ngiqede umsebenzi wakhe.” (Johane 4:34) Akudingekile ukuba sichithe amashumi eminyaka sifuna injabulo ngokuzama izinto ezihlukahlukene. Ukuzama izinto ezihlukahlukene akusona isihluthulelo senjabulo. Kunalokho, ngukulalela uMdali wethu nokuhlakanipha kokuhlonipha uNkulunkulu kuphela okungaholela enjabulweni yangempela ekuphileni.—IHubo 19:7, 8; UmShumayeli 12:13.

Ngokusobala, singayithola injabulo elethwa ukusebenzisa ukuhlakanipha kokuhlonipha uNkulunkulu nokuba nokuma okuhle phambi kwakhe. (IzEnzo 17:26, 27) Ulwazi ngoJehova nenjongo yakhe luyatholakala kuwo wonke umuntu. Njengoba linamakhophi ayizinkulungwane zezigidi ngezilimi eziningi, iBhayibheli liyaqhubeka liyincwadi esakazwa kabanzi kunazo zonke emhlabeni. IBhayibheli lingakusiza ukuba ube umngane kaNkulunkulu futhi ube nenjabulo yangempela, ngoba imiBhalo isitshela ukuthi “[bayajabula, NW] abantu abaNkulunkulu wabo unguJehova.”—IHubo 144:15.

[Ibhokisi ekhasini 6]

Izinyathelo Eziholela Enjabulweni

1. Qaphela futhi uhlakulele ingokomoya. UJesu wathi: “Bayajabula labo abezwa izwi likaNkulunkulu nabaligcinayo!”—Luka 11:28.

2. Qaphela ukuthi ukwamukelwa uNkulunkulu kubaluleke kakhulu kunengcebo noma ukunethezeka. UPawulu wabhala: “Empeleni, kuyiyo indlela yokuthola inzuzo enkulu, lokhu kuzinikela kokuhlonipha uNkulunkulu kanye nokwaneliswa. . . . Uma sinokokuzisekela nokokuzimboza, siyokwaneliswa yilezizinto.”—1 Thimothewu 6:6-8.

3. Zama ukuhlakulela nokwenza ngokuvumelana nonembeza oqeqeshwe ngokweBhayibheli.—Roma 2:14, 15.

4. Zimisele ukulalela uJehova uNkulunkulu, ngaleyo ndlela ufanelekele ukuba ngomunye wabantu bakhe. UDavide wasendulo wabhala: “[Bayajabula, “NW”] abantu abaNkulunkulu wabo unguJehova.”—IHubo 144:15.

[Isithombe ekhasini 7]

“Bayajabula abaqaphela isidingo sabo esingokomoya.”—Mathewu 5:3