Ukuqinisa Ukholo Lwethu Ezwini LikaNkulunkulu
BANINGI abantu abaye bafunda iBhayibheli kunanoma iyiphi enye incwadi. Kodwa bangaki abaye babonisa ukholo esigijimini salo? IBhayibheli ngokwalo liyachaza ukuthi “ukholo alulona olwabo bonke abantu.” (2 Thesalonika 3:2) Ngokusobala, asizalwa sinokholo. Kumelwe luhlakulelwe. Ngisho nalabo abanesilinganiso esithile sokholo kufanele bangaluthathi kalula. Ukholo lungancipha futhi lufe. Ngakho, kudingeka umzamo ukuze umuntu ahlale ‘ephilile okholweni.’—Thithu 2:2.
Khona-ke, iNdikimba Ebusayo YoFakazi BakaJehova yasikhetha ngesizathu esihle isihloko sochungechunge lwemihlangano yabo yesigodi ka-1997/98 esithi “Ukholo EZwini LikaNkulunkulu.” Ngakho izigidi zoFakazi nabanye ziye zaba nelungelo lokuhlangana ndawonye ukuze ziqinise ukholo lwazo eZwini likaNkulunkulu.
IZwi LikaNkulunkulu Liyiqiniso—Isisekelo Sokholo Lwethu
Lesi kwakuyisihloko sosuku lokuqala lomhlangano. Kwaqale kwanconywa bonke ababekhona. Ukuba khona emhlanganweni kwakuwubufakazi bokuhlonipha iBhayibheli. Nokho, kwabuzwa imibuzo esangulukisayo ngokuphathelene nesimo sokholo lwethu: ‘Ingabe siyakwazi ukuvikela izinkolelo zethu, sisebenzisa iZwi likaNkulunkulu njengegunya? Ingabe siyakwazisa ukudla okungokomoya, ngokungalithathi kalula iBhayibheli, imihlangano yebandla nezincwadi ezisekelwe eBhayibhelini? Ingabe siyakhula othandweni, olwazini olunembile nasekuqondeni?’ Isikhulumi sakhuthaza wonke umuntu ukuba alalelisise, ephawula ukuthi “loMhlangano Wesigodi ‘Wokholo EZwini LikaNkulunkulu’ uye walungiselelwa ukuze usisize sizihlole futhi sihlole nesilinganiso kanye nesimo sokholo lwethu ngabanye.”
Inkulumo eyisihluthulelo yayinesihloko esithi “Ukuhamba Ngokholo, Hhayi Ngokubona.” (2 Korinte 5:7) Isikhulumi sathi: “Ukholo lwalabo ababa oFakazi BakaJehova akulona olokuthatheka.” Yeka ukuthi kuyiqiniso kangakanani lokhu! Ukholo lweqiniso aluphumputhekile. Lusekelwe ezintweni ezingokoqobo. Incwadi yamaHeberu 11:1 ithi: “Ukholo luwukulindelwa okuqinisekisiwe kwezinto ezithenjwayo, ukuboniswa okusobala kwezinto ezingokoqobo nakuba zingabonwa.” Isikhulumi saphawula: “Ukuze sihambe ngokholo ngempela, sidinga ukholo olunesisekelo esiqinile.” Ngenxa yokuthi sihamba ngokholo, hhayi ngokubona, asiyidingi imininingwane mayelana nokuthi uJehova uyosifeza kanjani noma nini isici ngasinye senjongo yakhe. Lokho esesikwazi kakade ngaye kusenza sithembele ngokuphelele emandleni akhe okugcwalisa izithembiso zakhe ngothando nangokulunga.
Inkulumo eyayithi “Intsha EngamaKristu—Iyingxenye Ebalulekile Yebandla” yakhumbuza intsha indlela eyigugu ngayo kuJehova. Yakhuthazwa ukuba ikhule ngokomoya ngokuphishekela imigomo enjengokulifunda lonke iBhayibheli nokuhlangabezana nalokho okudingekayo ukuze umuntu azinikezele futhi abhapathizwe. Ukuthatha imfundo yokwenezela kuyindaba umuntu ngamunye azinqumela yona nabazali bakhe, kodwa uma ithathwa, umgomo kufanele njalo ube ukuhlomela ukukhonza uNkulunkulu ngokuphumelelayo. Imfundo yezwe ingafeza injongo enenzuzo uma ‘siqiniseka ngezinto ezibaluleke ngokwengeziwe’ ezihlobene nokholo lwethu.—Filipi 1:9, 10.
Kwalandela uchungechunge lwezinkulumo ezintathu olunesihloko esithi “Izindinganiso Zikabani Ozigcinayo?” Ukholo eZwini likaNkulunkulu lusishukumisela ukuba sibambelele ezindinganisweni zeBhayibheli. AmaKristu alalela imithetho futhi aphile ngezindinganiso zikaJehova. Ngokwesibonelo, imiBhalo isiyala ukuba singasebenzisi inkulumo engcolile nechaphayo. (Efesu 4:31, 32) Isikhulumi sabuza: “Lapho unengekile noma ucasukile, ingabe umthethisa ngokuchaphayo umngane wakho womshado noma izingane zakho?” Yiqiniso, lokho bekungeke kuvumelane nobuKristu. Futhi uNkulunkulu unezindinganiso ngokuphathelene nokubukeka kwethu. AmaKristu kufanele agqoke ‘izingubo ezilungiswe kahle, ngesizotha.’ (1 Thimothewu 2:9, 10) Igama elithi ‘isizotha’ linomqondo wokuzihlonipha, umuzwa wokudumisa, wokusanguluka nokulinganisela. Sishukunyiswa uthando ngabanye futhi siqondiswa izimiso zeBhayibheli nomuzwa wokufanele.
Izinkulumo ezimbili ezalandela zahlanganisa ukucatshangelwa kwevesi ngalinye lencwadi yamaHeberu 3:7-15 no-4:1-16. Lezi zingxenye zeBhayibheli zisixwayisa ngengozi yokuba ‘senziwe lukhuni amandla okukhohlisa esono.’ (Heberu 3:13) Singanqoba kanjani empini yethu yokulwa nesono? UJehova uyasisiza ngeZwi lakhe. Ngokuqinisekile, “izwi likaNkulunkulu liyaphila futhi linamandla futhi . . . liyakwazi ukuqonda imicabango nezinhloso zenhliziyo.”—Heberu 4:12.
Inkulumo yokugcina yosuku lokuqala lomhlangano yayithi “Incwadi Yabo Bonke Abantu.” Yaqokomisa ubuqiniso, ukunemba nokuba inzuzo kweBhayibheli. Yeka ukuthi kwakuvusa amadlingozi kanjani ukuzwa isikhulumi simemezela ukukhululwa kwencwajana entsha engangomagazini enamakhasi angu-32 enesihloko esithi Incwadi Yabo Bonke Abantu! Lencwajana entsha ilungiselelwe ngokukhethekile abantu abafundile kodwa abangalazi iBhayibheli. Lenkulumo yaphetha ngamazwi athi: “Abantu kudingeka bazihlolele ngokwabo iZwi likaNkulunkulu. Siyaqiniseka ukuthi uma bezihlolela ngokwabo, bayoqaphela ukuthi lencwadi eyingqayizivele, iBhayibheli, ngempela iyincwadi yabo bonke abantu!”
Lingisa ‘UMphelelisi Wokholo Lwethu’
Lesi sihloko sosuku lwesibili lomhlangano sadonsela ukunakekela kuJesu Kristu, ‘uMphelelisi wokholo lwethu.’ Kudingeka ‘silandele izinyathelo zakhe eduze.’ (Heberu 12:2; 1 Petru 2:21) Abaningi kweLobukholwa batshelwa ukuthi: ‘Kholwa iNkosi uJesu, uyosindiswa!’ Kodwa ingabe yilokho nje okuhilelekile ekubeni nokholo? IBhayibheli lithi ‘ukholo ngaphandle kwemisebenzi lufile.’ (Jakobe 2:26) Ngakho-ke, ngaphandle kokukholwa kuJesu, kumelwe senze imisebenzi ayenza, ikakhulukazi ngokushumayela izindaba ezinhle zoMbuso kaNkulunkulu.
Isimiso sasekuseni sagxila emsebenzini wokushumayela ivangeli. NjengoPawulu, kufanele sikulangazelele ukumemezela izindaba ezinhle zensindiso. (Roma 1:14-16) UJesu washumayela kubantu kuyo yonke indawo. Nakuba inkonzo yethu evamile yendlu ngendlu iba nemiphumela emihle, baya ngokwanda abantu abangatholakali emakhaya lapho sibahambela. (IzEnzo 20:20) Abaningi basezikoleni, bayasebenza, bayothenga noma basohambweni. Ngakho, nathi kudingeka sishumayele ezindaweni zomphakathi nanoma ikuphi lapho abantu bengatholakala khona.
Inkulumo ethi “Yibani Abagxilile Nabaqinile Eqinisweni” yasikhumbuza ngabafundi abaningi abasha ababhapathizwayo—isilinganiso sabangaphezu kwenkulungwane usuku ngalunye! Kubalulekile ukuba laba abasha bagxile futhi baqine okholweni. (Kolose 2:6, 7) Isikhulumi sachaza ukuthi izimpande ezingokoqobo zidonsa amanzi nezakhi kuyilapho futhi zisekela isitshalo. Ngokufanayo, ngokuba nemikhuba emihle yokufunda kanye nobudlelwane obuhle, abafundi abasha bangaqina eqinisweni.
Lesi seluleko sasifaneleka kakhulu kulabo ababezobhapathizwa. Yebo, ngosuku lwesibili lomhlangano, kwabhapathizwa izixuku ezinkulu zabafundi abasha, zilandela isibonelo sikaJesu. Inkulumo eyayithi “Ukholo EZwini LikaNkulunkulu Luholela Obhapathizweni” yakhumbuza ababezobhapathizwa ukuthi ukufakwa ngaphansi kwamanzi kuwuphawu olufanelekayo lokufa kwabo enkambweni yabo yokuphila yangaphambili yokuzanelisa. Ukukhushulwa kwabo emanzini kumelela ukuphiliswa ukuze benze intando kaNkulunkulu.
Inkulumo eyayithi “Lulwele Kanzima Ukholo” yayisekelwe encwadini yeBhayibheli kaJude. Sakhuthazwa ukuba sivikele ukholo lwethu ngokwenqaba amathonya alimazayo, anjengokuziphatha okubi, ukuvukela nokuhlubuka. Ngemva kwalokho, kwagxilwa ngokukhethekile kubazali—ikakhulukazi obaba—enkulumweni eyayithi “Yondla Abendlu Yakho.” Ukunakekela izidingo zomkhaya ezingokomoya, ezingokwenyama nezingokomzwelo kuyisibopho esingokomBhalo. (1 Thimothewu 5:8) Lokhu kudinga isikhathi, ukukhulumisana nokusondelana. Ngokuqinisekile uJehova uNkulunkulu uyakwazisa konke ukuzikhandla kwabazali abangamaKristu ukuze bakhulisele izingane zabo eqinisweni.
Uchungechunge olwalandela, olwaluthi “Masiye Endlini KaJehova,” lwakha ukwazisa ngemihlangano yobuKristu. Iyasiphumuza ezinkathazweni zalelizwe. Emihlanganweni siba nethuba lokukhuthazana, futhi singabonisa uthando lwethu ngesikholwa nabo. (Heberu 10:24, 25) Futhi imihlangano isisiza ukuba silole amakhono ethu njengabafundisi, futhi ijulisa ukuqonda kwethu injongo kaNkulunkulu. (IzAga 27:17) Kwangathi singelokothe sizahlukanise nebandla, futhi masikhumbule amazwi kaJesu athi: “Lapho kukhona khona ababili noma abathathu bebuthene ndawonye egameni lami, ngikhona lapho phakathi kwabo.”—Mathewu 18:20.
Inkulumo yokugcina yosuku yayithi “Isimo Sokholo Lwakho—Sivivinywa Manje.” Ukholo olungavivinyiwe ngeke kuthiwe lufanelekile, futhi isimo salo sihlala singaziwa. Lufana nesheke elingakashintshwa. Ingabe uzoyithola ngempela lemali ebhalwe kulo? Ngokufanayo, ukholo lwethu kumelwe luvivinywe ukuze kufakazelwe ukuthi luqinile futhi lusesimweni esihle. (1 Petru 1:6, 7) Isikhulumi sathi: “Ngezinye izikhathi, abezindaba kanye neziphathimandla bakhohliswa abefundisi nezihlubuki ukuba basimangalele ngamanga, bahlanekezele izinkolelo zethu zobuKristu nendlela yethu yokuphila. . . . Ingabe siyobavumela labo abaphuphuthekiswe uSathane ukuba basesabise, basidumaze futhi basenze sibe namahloni ngezindaba ezinhle? Ingabe siyovumela amanga ngeqiniso ukuba akhinyabeze ukuya kwethu njalo emihlanganweni nasemsebenzini wokushumayela? Noma ingabe siyoma siqine, sibe nesibindi futhi sizimisele ngokwengeziwe kunanini ukuqhubeka simemezela iqiniso ngoJehova noMbuso wakhe?”
Phila Ngenxa Yokholo
Isihloko sosuku lwesithathu lomhlangano sasisekelwe emazwini kaPawulu athi: “Kusobala ukuthi ngomthetho akekho okuthiwa ulungile kuNkulunkulu, ngoba ‘olungileyo uyophila ngenxa yokholo.’” (Galathiya 3:11) Uchungechunge olunesihloko esithi “Amazwi KaJoweli Angokwesiprofetho Osukwini Lwethu,” lwalungenye yezinkulumo ezivelele ekuseni. Incwadi kaJoweli ikhomba esikhathini sethu futhi isho ngomuzwa wokuphuthuma ukuthi: “Hawu lolosuku! Ngokuba usuku lukaJehova lusondele, lufika njengokuchitha kuvela kuSomandla.” (Joweli 1:15) Ngendlela efana neyesikhonyane esihlasela ngamandla, amaKristu agcotshiwe awazange avumele lutho ukuba luwavimbele ekumemezeleni ngoMbuso kulesi sikhathi sokuphela.
Incwadi kaJoweli inikeza nethemba, lapho ithi: “Bonke ababiza igama likaJehova [bayokhululwa].” (Joweli 2:32) Lokhu kusho okungaphezu kokumane usebenzise igama likaJehova. Kudingeka ukuphenduka okuqotho, futhi lokhu kuhlanganisa nokuphenduka ebubini bethu. (Joweli 2:12, 13) Asikho isikhathi sokulibala ngoba ngokushesha uJehova uzokhipha isahlulelo phezu kwezizwe, njengoba nje enza ngabakwaMowabi, abakwa-Amoni nasesifundeni esisezintabeni zaseSeyiri ngezinsuku zeNkosi uJehoshafati yakwaJuda.—2 IziKronike 20:1-30; Joweli 3:2, 12.
Bonke bakhuthazwa inkulumo ethi “Bonisa Ukholo Ngokulindela UJehova.” Manje njengoba sesingene sagamanxa esikhathini sokuphela, singabheka emuva ekugcwalisekeni kwezithembiso eziningi zikaJehova, futhi sinesithakazelo esikhulu ezintweni ezisazokwenzeka. Abantu bakaJehova kumelwe baqhubeke benesineke, bekhumbula ukuthi konke uNkulunkulu akuthembisile kuyokwenzeka.—Thithu 2:13; 2 Petru 3:9, 10.
Isimiso sasekuseni saphetha ngedrama ethi “Gcina Iso Lakho Lilihle.” Ledrama engokoqobo yasikhuthaza ukuba sihlole isimo sethu sengqondo ngokuphathelene nokuphishekela izinto ezibonakalayo. Kungakhathaliseki ukuthi sihlalaphi, uma sifuna ukuba ukuphila kwethu kungabi nezinkathazo, kumelwe silandele iseluleko sikaJesu sokugcina iso lethu lilihle, ligxile ngokuphelele eMbusweni kaNkulunkulu.—Mathewu 6:22.
Inkulumo yeningi yayinesihloko esivusa isithakazelo esithi “Ukholo Nekusasa Lakho.” Yanikeza ubufakazi bokuhluleka kwabaholi abangabantu ukuxazulula izinkinga zezwe. (Jeremiya 10:23) Umlando womuntu ulokhu uphindaphinda into efanayo—ngezinga elikhulu nelonakalisa ngokwengeziwe. OFakazi BakaJehova bazizwa kanjani ngekusasa? Sikholelwa ukuthi isintu esithembekile sinekusasa eliqhakazile ngaphansi koMbuso kaNkulunkulu. (Mathewu 5:5) UNkulunkulu uyogcwalisa izithembiso zakhe ukuze kuzuze wonke umuntu onokholo eZwini lakhe, elinxusayo: “Mfuneni uJehova esenokutholwa, nimbize eseseduze.”—Isaya 55:6.
UJesu waphakamisa umbuzo obalulekile ngokuphathelene nosuku lwethu. Wabuza: “Lapho iNdodana yomuntu ifika, ingabe ngempela iyoluthola ukholo emhlabeni?” (Luka 18:8) Inkulumo yokuphetha yabukeza isimiso somhlangano futhi yabonisa indlela esisinike ngayo ubufakazi obuqand’ikhanda bokuthi lukhona ukholo eZwini likaNkulunkulu, nakuba siphila ezweni elingenakholo neligxile ezithakazelweni zalo.
Nokho, singazibuza ngabanye, ‘Ingabe ngiphakathi kwalabo abanokholo olungenakunyakaziswa kuNkulunkulu naseZwini lakhe?’ UMhlangano Wesigodi ‘Wokholo EZwini LikaNkulunkulu’ kufanele usisize ukuba siphendule lowo mbuzo ngoyebo. Futhi yeka indlela esimbonga ngayo uJehova ngokuqinisa ukholo lwethu kuye naseZwini lakhe eliphefumulelwe, iBhayibheli!
[Izithombe ekhasini 24]
Izisebenzi zokuzithandela eziningi zasebenza ngenjabulo ukuze zitholele izinkulungwane zezihambeli indawo yokuhlala
[Isithombe ekhasini 24]
Kwasetshenziswa izinkundla zemidlalo ezinkulu emhlabeni wonke
[Isithombe ekhasini 25]
UL. A. Swingle weNdikimba Ebusayo ekhulula incwajana entsha engangomagazini
[Isithombe ekhasini 26]
Abaningi babhapathizwa njengesibonakaliso sokuzinikezela kwabo kuJehova
[Izithombe ekhasini 27]
Ababekhona emhlanganweni bahlabelela ngenjabulo izingoma zoMbuso. Isithombe esingaphakathi: idrama ethi “Gcina Iso Lakho Lilihle”