Amasonto Avuma Izono
“Upapa Uqulisa Isonto Icala.” “INkantolo Yamacala Ezihlubuki Nokubandlululwa KwamaJuda—ISonto Lilungiselela I-‘Mea Culpa’ Yalo.”a “I-‘Mea Culpa’ YokuQothulwa Kwesizwe SamaJuda.” “AbaseWeseli Bayaxolisa EmaNdiyeni AseNtshonalanga Ekude.”
INGABE wake wazifunda izihloko zezindaba ezinjena? Kubonakala kuya ngokwanda ukuba amasonto avume ukuthi anecala futhi axolise ngalokho aye akwenza phakathi namakhulu eminyaka. Abezindaba bahlale beqokomisa ama-mea culpa amasha enziwa upapa.
Lapho Upapa Ecela Intethelelo
Phakathi kuka-1980 no-1996, uJohn Paul II ‘waqaphela amaphutha avelele emlandweni weSonto noma wacela intethelelo’ okungenani izikhathi ezingu-94, kusho umkhulumeli waseVatican uLuigi Accattoli encwadini yakhe ethi Quando il papa chiede perdono (Lapho Upapa Ecela Intethelelo). Ngokuka-Accattoli, “eSontweni LamaKatolika, upapa kuphela onelungelo lokwenza i-mea culpa.” Futhi uye wenza lokhu, ebhekisela emlandweni ovusa impikiswano kakhulu wamaKatolika—iZimpi Zenkolo, izimpi, ukusekela ubushiqela, ukuhlukana emasontweni, ukuBandlululwa KwamaJuda, iNkantolo Yamacala Ezihlubuki, iQembu Lezigelekeqe nobuhlanga. Encwadini ayithumela kokhadinali ngo-1994 (ebhekwa abathile njengencwadi ebaluleke kakhulu yobupapa), uJohn Paul II wenza isiphakamiso sokuba ‘wonke umuntu avume izono zeminyaka eyinkulungwane.’
Izikhulu eziningana zesonto ziye zalandela isibonelo sikapapa. Ngo-December 1994 iphephandaba lase-Italy i-Giornale labika: “Ababhishobhi abaningi baseMelika bavela kuyithelevishini futhi bacela intethelelo obala.” Ngani? Ngenxa yokuyithatha kalula inkinga yabapristi abanukubeza izingane ngokobulili, okwaphumela ekulimaleni kwentsha eningi eyizisulu. Ngo-January 1995 iphephandaba okuthiwa yi-La Repubblica labika ‘ngesinyathelo esingalindelekile emlandweni wobuKatolika banamuhla’—kwadingidwa inkinga yokuthula kukaPapa uPius XII ngokuphathelene nokuQothulwa Kwesizwe SamaJuda. Ngo-January 1995, iphephandaba elifanayo labika ukuthi indikimba yababhishobhi yaseJalimane yacela intethelelo ‘ngamaphutha amaningi’ amaRoma Katolika ayesekela izenzo ezimbi zamaNazi. Amasonto amaningi obuProthestani nawo aye azigxeka wona ngokwawo.
Kungani Enza Kanjalo?
IBhayibheli lisikhuthaza ukuba sicele intethelelo lapho senze iphutha, futhi abaningi bayawancoma amasonto lapho ezigxeka wona ngokwawo. (Jakobe 5:16) Kodwa kungani amasonto enza lokhu? Lokhu kufanele kuyithinte kanjani indlela esiwabheka ngayo?
[Umbhalo waphansi]
a Inkulumo yesiLatini esho ukuthi “iphutha lami,” iyingxenye yomthandazo wamaKatolika (i-Confiteor noma ukuthi, “ngiyasivuma isono sami”), lapho abathembekile bephindaphinda khona la mazwi.