Abazenzelanga Igama
IBHAYIBHELI aliwavezi amagama abakhi bombhoshongo odumile waseBabele. Ukulandisa kuthi: “Bathi: Wozani, asakhe umuzi nombhoshongo osiqongo sawo sisezulwini, sizenzele igama, funa sihlakazeke ebusweni bomhlaba wonke.” (Omalukeke sizenzele.)—Genesise 11:4.
Obani okuthiwa “bathi”? Lesi senzakalo senzeka eminyakeni engu-200 ngemva kweSikhukhula. Ngaleso sikhathi uNowa, owayeseneminyaka engaba ngu-800 ubudala, wayephila phakathi kwezinkulungwane zezizukulwane zakhe. Bonke babekhuluma ulimi olufanayo futhi babehlala ndawonye endaweni lapho yena namadodana akhe abazinza kuyo ngemva kweSikhukhula. (Genesise 11:1) Ngemva kwesikhathi esithile abathile kuleli qembu labantu elikhulu basuka baya ngasempumalanga futhi “bafumana ithafa ezweni laseShineyari.”—Genesise 11:2.
Ukuhluleka Ngokuphelele
Kukuleli thafa lapho leli qembu lanquma khona ukuvukela uNkulunkulu. Kanjani? UJehova uNkulunkulu wayeyivezile injongo yakhe lapho eyala umbhangqwana wokuqala ongabantu ukuba ‘uzalane, wande, ugcwalise umhlaba.’ (Genesise 1:28) Lokhu kwaphindwa futhi kuNowa namadodana akhe ngemva kweSikhukhula. UNkulunkulu wabayala: “Kepha zalani nina, nande, nichume emhlabeni, nivame kuwo.” (Genesise 9:7) Bemelana nesiqondiso sikaJehova, abantu bakha umuzi ukuze ‘bangahlakazeki ebusweni bomhlaba wonke.’
Laba bantu baqala futhi ukwakha umbhoshongo ngenjongo yokuba ‘bazenzele igama.’ Kodwa ngokuphambene namathemba abo, abazange baqede ukwakha umbhoshongo. Umbhalo ogciniwe weBhayibheli ubonisa ukuthi uJehova wasanganisa ulimi lwabo ukuze bangezwani. “Kanjalo,” kusho ukulandisa okuphefumulelwe, “uJehova wabahlakazela emhlabeni wonke, bephuma lapho; bayeka ukwakha umuzi.”—Genesise 11:7, 8.
Ukuhluleka ngokuphelele kwalo mzamo kugcizelelwa iqiniso lokuthi abakhi ‘abazenzelanga igama,’ noma udumo. Eqinisweni, amagama abo awaziwa futhi asuliwe emlandweni wesintu. Kodwa kuthiwani ngoNimrode, umzukulu kaNowa? Ingabe wayengaholi kulokhu kuvukela uNkulunkulu? Ingabe igama lakhe alaziwa?
UNimrode—Umvukeli Odelelayo
Akungabazeki ukuthi uNimrode wayengumholi waleli qembu. UGenesise isahluko 10 umethula ngokuthi “wayeyiphisi elinamandla ebusweni bukaJehova.” (Genesise 10:9) ImiBhalo ithi futhi “waqala ukuba-ngonamandla emhlabeni.” (Genesise 10:8) UNimrode wayeyiqhawe, indoda enobudlova. Waba umbusi wokuqala ongumuntu ngemva kweSikhukhula, ezibeka yena siqu njengenkosi. UNimrode wayengumakhi futhi. IBhayibheli lithi wayengumsunguli wemizi engu-8, kuhlanganise neBabele.—Genesise 10:10-12.
Ngakho-ke, uNimrode—umphikisi kaNkulunkulu, inkosi yaseBabele, nomakhi wemizi—ngokungangabazeki wahlanganyela ekwakheni umbhoshongo waseBabele. Ingabe akazenzelanga igama? Ngokuphathelene negama elithi Nimrode, isazi samasiko aseMpumalanga u-E. F. C. Rosenmüller sabhala: “Igama uNimrode ethiwa lona lalisuselwa kwelithi [ma·radhʹ], ngesiHeberu elisho ukuthi ‘wavukela,’ ‘wahlubuka.’” URosenmüller ube esechaza ukuthi “abaseMpumalanga bavamile ukwetha abantu bezwe lakubo abadumile amagama ngemva kokufa, ngezinye izikhathi okubangela ukuvumelana okumangalisayo phakathi kwalawo magama nezinto abazenza lapho besaphila.”
Izazi eziningana zivumelana nombono wokuthi igama likaNimrode kwakungelona igama alethiwa lapho ezalwa. Kunalokho, balibheka njengegama alethiwa kamuva ukuze lifanelane nenkambo yakhe yokuvukela ngemva kokuba ibe sobala. Ngokwesibonelo, uC. F. Keil uthi: “Igama ngokwalo, elithi Nimrod elivela kwelithi [ma·radhʹ], ‘sizovukela,’ libonisa ukumelana noNkulunkulu okunobudlova. Leli gama limfanele ngempela kangangokuba kwakungaba abantu ayephila nabo kuphela ababengametha lona, kanjalo laba yigama lakhe.” Embhalweni waphansi, uKeil ucaphuna isazi-mlando uJacob Perizonius esabhala ukuthi: “Ngikholelwa ukuthi le ndoda [uNimrode], njengoba yayiyiphisi elinobudlova futhi izungezwe ibutho labangane bayo, lalingasuki emlonyeni wayo futhi yayilisho iliphindaphinde lelo gama elithi ‘nimrode, nimrode,’ okungukuthi, ‘Masivukele! Masivukele!’ ukuze ishoshozele abanye ukuba nabo bavukele. Ngakho-ke, kamuva, abanye, ngisho noMose ngokwakhe, bambiza ngalelo gama njengokungathi igama lakhe siqu.”
Ngokusobala, uNimrode akazenzelanga igama. Kusobala ukuthi alaziwa igama alethiwa lapho ezalwa. Lisuliwe emlandweni, ngokufanayo nelalabo ababelandela ukuhola kwakhe. Akazange ashiye ngisho nenzalo eyayizoqhubeka izibiza ngegama lakhe. Esikhundleni sokuthola inkazimulo nodumo, unedumela elihlazisayo. Igama elithi Nimrode liye lamhlukanisa phakade njengomvukeli odelelayo ngobuwula owabekela uJehova uNkulunkulu inselele.