Ukukhulekela UNkulunkulu Ngeqiniso
Ukuze ukukhulekela kwamukeleke kuNkulunkulu, kumelwe kusekelwe eqinisweni. (Johane 4:23) IBhayibheli libonisa ukuthi abakhulekeli beqiniso bayingxenye ‘yebandla likaNkulunkulu ophilayo, insika nozime lweqiniso.’ (1 Thimothewu 3:15) Labo abakha ibandla likaNkulunkulu abalikholelwa nje kuphela iqiniso leZwi likaNkulunkulu kodwa baphila nangokuvumelana nalo futhi bayalivikela, balenze laziwe emhlabeni wonke.—Mathewu 24:14; Roma 10:9-15.
OFAKAZI BAKAJEHOVA baziwa kakhulu ngomsebenzi wabo wokufundisa iBhayibheli, manje owenziwa emazweni angaphezu kuka-200. Batadisha iBhayibheli bese befundisa ngalo njengeliyiqiniso, ngaphandle kokulifaka ithonya elonakalisayo lamafilosofi abantu. Ingabe uyazazi izimfundiso zabo ezisekelwe eBhayibhelini? Abaningi bayangabaza ukulalela oFakazi BakaJehova ngenxa yezinto ezingezinhle ezishiwo ngabo. Kodwa abantu abanhliziyo ziqotho bacelwa ukuba bazinqumele ngokwabo ukuthi lokho okushunyayelwa oFakazi kuyiqiniso yini noma akulona. Isinqumo esibaluleke kanjalo akufanele sisekelwe kuyinzwabethi. Abaningi abaye bazihlolela ngokwabo izimfundiso zoFakazi BakaJehova baye bazuza kakhulu.
Ukwazi Iqiniso Kuqeda Ukwesaba
Ngokwesibonelo, cabangela isimo sika-Eugenia. Wakhuliswa emkhayeni wamaKatolika aqinile. Uyise wayengomunye wababenza amalungiselelo okuvakashela kukapapa eMexico ngo-1979. Lapho evakashele abangane bakhe, u-Eugenia wahlangana noFakazi BakaJehova. Ngosizo lwabo waqala ukuhlaziya ngokucophelela lokho okushiwo iBhayibheli. Uyakhumbula: “Ekuqaleni, ngafikelwa ukwesaba. Ngangithole iqiniso! Kodwa lokho kwakusho ukuthi eziningi zezinkolelo zami zangaphambili zazinephutha. Umkhaya wakithi, abangane bami, abantu engangibathanda—bonke babenephutha. Ngangethukile. Ngangilokhu ngizibuza ukuthi kazi umkhaya wakithi uzosabela kanjani kulokhu engisanda kukuthola. Ngokuhamba kwesikhathi nangosizo lukaJehova, ngaqala ukuzivumelanisa nalesi simo esasingikhungathekisa. Ngolunye usuku nganquma ukuthululela umngane womkhaya isifuba sami, owayenguprofesa wemfundiso yenkolo. Ngamtshela konke ngokuphathelene nesifiso sami sokuthola iqiniso. Wabe esephawula, ‘Uma ufuna ukwazi iqiniso, funa oFakazi BakaJehova.’”
Kwenzeka kona kanye lokho u-Eugenia ayekwesaba, umkhaya wakubo wamxosha ekhaya. Nokho, oFakazi baqhubeka bemnika usizo olungokomoya. Uyaphawula: “Ngaqiniselwa ukumelela iqiniso. Ngaqaphela ukuthi lalingokuthile okwakufaneleka ukuba ngikulwele. Indlela engamukelwa ngayo oFakazi BakaJehova yayibaluleke kakhulu. Ngazizwa ngithandwa ebandleni lobuKristu. Ukuba seduze nenhlangano kaNkulunkulu kwangisiza ukuba nginqobe ukwesaba ukuthi ngangizolimelela ngedwa [iqiniso].”
Cabangela esinye isibonelo. USabrina wakhula ejwayele ukuba nezingxoxo zomkhaya zeBhayibheli njalo. Eqinisweni, baba nohlobo oluthile ‘lwenkolo yomkhaya.’ Wakwenza umkhuba ukuhlangana namalungu ezinkolo ezihlukahlukene ukuze adalule amaphutha azo. Lapho omunye woFakazi BakaJehova ecela ukufunda naye iBhayibheli, wavuma ngokushesha ngenjongo yokulahla izinkolelo zabo. Uyakhumbula: “Ngemva kokufunda isikhathi esingaphezu konyaka, ngesaba ukuthi ngangizolahlekelwa ‘iqiniso lami.’ Ngangikuthole kulula ukudalula ukukhohlisa kwezinkolo eziningi engase ngihlangene nazo, kodwa kwakungelula kangako kulokhu.”
Ukwesaba kukaSabrina kwamenza wayeka ukufunda iBhayibheli noFakazi BakaJehova. Kodwa wabe esezizwa entula ngokomoya. Wanquma ukuqalisa kabusha isifundo sakhe futhi ekugcineni walamukela leli qiniso ayesanda kulithola. USabrina wathuthuka waze wafinyelela eqophelweni lokufuna ukukuhlanganyela nabanye lokho ayekufunda. Wacela ngisho nokuhamba noFakazi enkonzweni yabo yendlu ngendlu. USabrina uyachaza: “Ngaphambi kokugunyazwa ukuba ngishumayele noFakazi BakaJehova, ngabuzwa: ‘Uyafuna ngempela ukuba omunye woFakazi BakaJehova?’ ‘Cha!’ ngiphendula. Ngangiphinde ngafikelwa ukwesaba.” Ekugcineni, ngemva kokuqhubeka eba khona kuyo yonke imihlangano futhi eqaphela abantu bakaNkulunkulu nendlela abasebenzisa ngayo izimiso zeBhayibheli, uSabrina wafinyelela isiphetho sokuthi kwakuyiqiniso ngempela. Wabhapathizwa futhi manje ungumshumayeli wevangeli wesikhathi esigcwele.
Kungani Zihluke Kangaka?
Omunye angase abuze, ‘Kungani izimfundiso zoFakazi BakaJehova zihluke kangaka kwezezinye izinkolo?’ Ukuhlola kafushane lokho oFakazi abakukholelwayo kuzokusiza ukuba ubone ukuthi bangamaKristu aqotho nabafundi beBhayibheli abenza ngokuvumelana nonembeza babo. Sikukhuthaza ukuba uyibheke eBhayibhelini lakho imibhalo ekulezi zimfundiso eziyisisekelo ezibekwe ngamafuphi eziboniswe ngenhla.
Ngokuhlola ngokucophelela lokho oFakazi BakaJehova abakukholelwayo nendlela abanamathela ngayo kulokho iBhayibheli elikufundisayo, ungabusiswa ngenkululeko enikezwa iqiniso. (Johane 17:17) Asikho isizathu sokwesaba iqiniso. Khumbula isithembiso sikaJesu: “Niyolazi iqiniso, futhi iqiniso liyonikhulula.”—Johane 8:32.
[Ibhokisi ekhasini 6]
EZINYE ZEZIMFUNDISO EZIYISISEKELO ZOFAKAZI BAKAJEHOVA
◯ UJehova nguNkulunkulu ongumninimandla onke. Igama lakhe livela izikhathi ezingaphezu kuka-7 000 emibhalweni yeBhayibheli yokuqala yesandla.—IHubo 83:18.
◯ UJesu Kristu yiNdodana kaNkulunkulu, eyeza emhlabeni ukuze inikele ngokuphila kwayo ukuze kuzuze isintu. (Johane 3:16, 17) OFakazi BakaJehova balandela izimfundiso zikaJesu Kristu ezitholakala emaVangelini.
◯ Igama elithi oFakazi BakaJehova lisekelwe ku-Isaya 43:10, othi: “Ningofakazi bami, usho uJehova.”
◯ UMbuso abantu abawuthandazelayo emthandazweni ‘kaBaba Wethu’ uwuhulumeni wasezulwini ngokushesha ozoqeda konke ukuhlupheka nobuhlungu emhlabeni ukuze ube iPharadesi elithenjiswa iBhayibheli.—Isaya 9:6, 7; Daniyeli 2:44; Mathewu 6:9, 10; IsAmbulo 21:3, 4.
◯ Wonke umuntu owenza intando kaNkulunkulu usethubeni lokujabulela izibusiso zoMbuso phakade.—Johane 17:3; 1 Johane 2:17.
◯ AmaKristu kumelwe enze ukuziphatha kwawo kuvumelane nalokho okushiwo iBhayibheli. Kumelwe alwele ukwethembeka, ukuphila ukuphila okuhlanzekile, okunokuziphatha okuhle futhi abonise uthando komakhelwane bawo.—Mathewu 22:39; Johane 13:35; 1 Korinte 6:9, 10.
[Isithombe ekhasini 5]
OFakazi BakaJehova bazisa abantu abasemazweni angaphezu kuka-200 iqiniso leBhayibheli