Ukuhlanganiselwa Endleleni Engcono Kakhulu Yokuphila
Uma inani labantu bomhlaba liqhubeka landa, ngokushesha kuzoba nabantu abayizigidi eziyizinkulungwane eziyisithupha emhlabeni. Nakuba bonke bevela kukhokho oyedwa, abaningi babonakala bengavumi ukuthi bangamalungu omkhaya wembulunga yonke ayolandisa kuMdali ohlakaniphile nonothando. Ukuntuleka kobunye nezingxabano phakathi kwezizwe, izinhlanga namasiko kunikeza ubufakazi obungajabulisi balesi simo esidabukisayo.
NNGENXA yezimo zezwe zanamuhla, ukwenza ukuba imbulunga yonke ibe nobunye kungase kubonakale kuwumgomo ongenakufinyeleleka. I-Columbia History of the World ithi: “Odabeni olubaluleke kakhulu lokuthi kungahlalwa kanjani ndawonye, izwe lanamuhla alinambono omusha elingawunikeza, ngisho nowodwa nje.”
Nokho, ukwenza zonke izakhamuzi zomhlaba zibe nobunye akudingi umbono omusha. Indlela yokwenza kube nobunye itholakala emiBhalweni Engcwele. Igxile ekukhulekeleni Lowo owadala umhlaba nakho konke ukuphila okukuwo. Abantu bakaNkulunkulu kakade sebenobunye endleleni abacabanga ngayo, banenjongo kanye nendlela yokuphila efanayo. Njengoba bebalelwa ezigidini ezingaphezu kwezinhlanu nengxenye emazweni angu-233, bamunye ekukholelweni ukuthi indlela kaNkulunkulu yokuphila iyindlela engcono kakhulu. Njengomhubi, bathandaza bathi: “Ngifundise, Jehova, indlela yakho; ngiyakuhamba eqinisweni lakho; yenza inhliziyo yami iqonde-ntonye, yesabe igama lakho.”—IHubo 86:11.
Lokhu kuhlanganiswa kwabantu ekukhulekeleni okuhlanzekile kwabikezelwa kudala ngumprofethi u-Isaya. Wa-bhala: “Kuyakuthi ngezinsuku ezizayo intaba yendlu kaJehova iqiniswe esiqongweni sezintaba, iphakame kunamagquma, nezizwe zonke ziyakugobhozela khona. Abantu abaningi bayakuhamba, bathi: Wozani sikhuphukele entabeni kaJehova endlini kaNkulunkulu kaJakobe; uyakusifundisa izindlela zakhe, sihambe emikhondweni yakhe.”—Isaya 2:2, 3.
Ubunye boFakazi BakaJehova buhlukile. Emabandleni angaphezu kuka-87 000 emhlabeni wonke, bahlanganyela ekudleni okufanayo okungokomoya emihlanganweni yabo isonto ngalinye. (Mathewu 24:45-47) Nokho, kusukela phakathi no-1998 kuze kube sekuqaleni kuka-1999, oFakazi babonisa ubunye babo ngenye indlela—ngokuhlangana emihlanganweni yabo yezinsuku ezintathu ‘Yendlela KaNkulunkulu Yokuphila’ emhlabeni wonke. Emazweni angu-13, le mibuthano yahlanganisa nabameleli abaningi bamazwe ahlukahlukene futhi yayibizwa ngokuthi imihlangano yezizwe. Eminye kuthiwa imihlangano yesigodi. Kodwa yonke le mihlangano yayinesimiso esifanayo sezinto ezinhle ezingokomoya.
Yeka ukuthi kwakumnandi kanjani ukubona abameleli abajabule nabagqoke kahle begobhozela emahholo nasezinkundleni zezemidlalo ukuze bafundiswe uJehova! Amazwi ayevamile yilawo ashiwo omunye ummeleli wakomunye umhlangano wezizwe owawuseMichigan, e-U.S.A. Wathi: “Bekujabulisa kakhulu ukubona abafowethu abavela emhlabeni wonke—eCzech Republic, eBarbados, eNigeria, eHungary, eNgilandi, eHolland, e-Ethiopia, eKenya nakwamanye amazwe amaningi—bangana! Kube kuhle ukubona abafowethu behleli ndawonye ngobunye, bekhala izinyembezi zenjabulo ngenxa yokuthandana kwabo nothando abanalo ngoNkulunkulu wethu omkhulu, uJehova.” Isihloko esilandelayo sizohlola isimiso somhlangano esajatshulelwa izigidi emhlabeni wonke.
[Umthombo Wesithombe ekhasini 3]
Mountain High Maps® Copyright © 1997 Digital Wisdom, Inc.