Indaba Yokuphila

Injabulo Engenakuqhathaniswa!

Njengoba Ilandiswa Ngu-Reginald Wallwork

“Akukho lutho kuleli zwe olungaqhathaniswa nenjabulo esiye sayithola ngokukhonza uJehova isikhathi esigcwele njengezithunywa zevangeli!” La mazwi alotshwe ngesandla ngawathola phakathi kwezincwadi zomkami ngemva nje kokushona kwakhe ngo-May 1994.

NJENGOBA ngicabanga ngamazwi ka-Irene, ngikhumbula iminyaka engu-37 ejabulisayo neyanelisayo siyizithunywa zevangeli ePeru. Sajabulela ubungane bobuKristu obuyigugu kusukela sashada ngo-December 1942—leyo yindawo efanelekile yokuqala indaba yami.

U-Irene wakhula njengomunye woFakazi BakaJehova eLiverpool, eNgilandi. Njengenye yamadodakazi amathathu, washonelwa uyise eMpini Yezwe I. Unina kamuva washada noWinton Fraser, bathola indodana, uSidney. Ngaphambi nje kweMpi Yezwe II, umkhaya wathuthela eBangor, eNyakatho Wales, lapho u-Irene abhapathizwa khona ngo-1939. USidney wayebhapathizwe onyakeni owawandulele, ngakho yena no-Irene bakhonza bobabili njengamaphayona—abashumayeli besikhathi esigcwele—begudla ugu lwasenyakatho yeWales, kusuka eBangor kuya eCaernarvon, kuhlanganise nesiqhingi sase-Anglesey.

Ngaleso sikhathi, ngangisebandleni lase-Runcorn, eliqhele ngamakhilomitha angaba ngu-20 eningizimu-mpumalanga yeLiverpool, ngikhonza njengalowo namuhla esimbiza ngokuthi umbonisi owengamele. U-Irene weza kimi emhlanganweni wesifunda ezobuza ukuthi wayengayithola yini insimu ayengashumayela kuyo, njengoba ayezohlala noVera, udadewabo oshadile owayehlala eRuncorn. Mina no-Irene sasizwana impela phakathi nalawo masonto amabili enathi, kamuva ngamvakashela kaningana eBangor. Yeka ukuthi ngajabula kanjani nje lapho ngenye impelasonto u-Irene evuma isicelo sami somshado!

Lapho ngibuyela ekhaya ngeSonto, ngokushesha ngaqala ukwenza amalungiselelo omshado wethu, kodwa ngoLwesibili ngangilindwe yithelegramu. Yayithi: “Ngiyaxolisa, le thelegramu izokudumaza. Ngiyawuhoxisa umshado wethu. Incwadi izolandela.” Ngakhungatheka. Kwakonakele kuphi?

Incwadi ka-Irene yafika ngosuku olulandelayo. Wangitshela ukuthi wayeya eHorsforth, eYorkshire eyophayona noHilda Padgett.a Wachaza ukuthi ezinyangeni ezingu-12 ngaphambili wayevumile ukuyokhonza lapho kunendingeko enkulu khona uma ecelwa. Wabhala: “Lokhu kimina kwakufana nesifungo kuJehova, futhi nginomuzwa wokuthi ngenxa yokuthi ngamthembisa ngaphambi kokuba ngikwazi, kufanele ngisigcwalise.” Nakuba ngangidumele, ngabazisa ubuqotho bakhe, ngamthumelela impendulo: “Hamba. Ngizokulinda.”

Ngesikhathi eseYorkshire, u-Irene wagwetshwa izinyanga ezintathu esejele ngoba wenqaba ukusekela impi ngenxa kanembeza. Kodwa ezinyangeni ezingu-18 kamuva, ngo-December 1942, sashada.

Izinsuku Zami Ngisemncane

Ngo-1919 umama wayethenge imiqulu ye-Studies in the Scriptures.b Nakuba, njengoba ubaba ayeke asho ngaleso sikhathi, wayengakaze afunde ncwadi ngaphambili, umama wayezimisele ukuyifunda ngokucophelela le miqulu kanye neBhayibheli lakhe. Wayifunda futhi wabhapathizwa ngo-1920.

Ubaba wayelungile futhi engamvimbeli umama ekwenzeni lokho ayekufuna, okwakuhlanganisa nokukhulisa izingane zabo ezine—odadewethu ababili, uGwen no-Ivy; umfowethu, u-Alec; kanye nami—ngendlela yeqiniso. UStanley Rogers nabanye oFakazi abathembekile baseLiverpool babeye bayonikeza izinkulumo zeBhayibheli eRuncorn, lapho ngokushesha kwamiswa khona ibandla. Umkhaya wakithi kanye nebandla wachuma ngokomoya.

UGwen wayefunda izifundo zokuqiniswa eSontweni LaseSheshi kodwa wayeka lapho nje eseqale ukufunda iBhayibheli nomama. Lapho umfundisi evakashela ekhaya ukuze athole ukuthi kungani ayengasayi ezifundweni, wazithela ohideni lwemibuzo angakwazanga ukuyiphendula. UGwen wambuza ngencazelo yoMthandazo weNkosi okwagcina sekunguye omchazelayo! Waphetha ngokucaphuna eyoku-1 Korinte 10:21, ekwenza kucace ukuthi wayengeke esakwazi ukuqhubeka ‘edla ematafuleni amabili.’ Lapho umfundisi esevalelisa, wathi wayezomthandazela uGwen futhi abuye azophendula imibuzo yakhe, kodwa akazange abuye. Ngemva kokubhapathizwa kwakhe, ngokushesha uGwen waba umshumayeli wesikhathi esigcwele.

Ukunakwa kwentsha ebandleni lethu kwakutuseka. Ngikhumbula ngilalele inkulumo eyayibekwa umdala owayevakashile lapho ngineminyaka engu-7 ubudala. Wakhuluma nami ngemva kwesimiso. Ngamtshela ukuthi ngangifunda ngo-Abrahama nokuthi wazama kanjani ukunikela ngendodana yakhe u-Isaka. “Hamba uye ekhoneni lesiteji ungixoxele yonke indaba,” esho. Yeka ukuthi kwangijabulisa kanjani ukuma lapho ngibeke ‘inkulumo yami yeningi’ ngokokuqala ngqa!

Ngabhapathizwa ngineminyaka engu-15 ngo-1931, unyaka umama ashona ngawo, ngashiya nesikole ukuze ngifundele ukusebenza ngogesi. Ngo-1936 kwakudlalelwa abantu izinkulumo zeBhayibheli eziqoshiwe, futhi udade osekhulile wasikhuthaza mina nomfowethu ukuba sibe matasa kulo mkhakha womsebenzi. Ngakho mina no-Alec saya eLiverpool siyothenga ibhayisekili sihlele nokuba lakhelwe inqodlana eceleni ukuze likwazi ukuthwala igilamafomu. Kwafakwa umbhobho emuva kule nqodlana phezu kwepayipi elalingamamitha amabili ukuphakama. Umakhenika wasitshela ukuthi wayengakaze ayenze into efana naleyo ngaphambili, kodwa yaphumelela! Sayihlanganisa ngentshiseko insimu yethu, sibonga isikhuthazo sikadade namalungelo esawaphathiswa.

IMpi Yezwe II—Isikhathi Sokuvivinywa

Njengoba kwakufufusa impi, mina noStanley Rogers sasimatasa simemezela inkulumo yeningi ethi “Bhekana Namaqiniso,” eyayizonikezwa eLondon Royal Albert Hall ngo-September 11, 1938. Kamuva ngahlanganyela ekusakazeni incwajana eyayinale nkulumo, kanye nethi Fascism or Freedom, eyanyatheliswa ngonyaka owalandela. Zombili lezo zincwajana zazizidalula ngokucacile izifiso zobushiqela beJalimane kaHitler. Ngalesi sikhathi, ngase ngaziwa kakhulu eRuncorn ngenkonzo yami yasobala futhi ngangihlonishwa ngenxa yayo. Ngempela, iqiniso lokuthi ngangilokhu ngiphambili emisebenzini yaphezulu langibeka esimweni esihle sokusetshenziswa.

Inkampani engangiyisebenzela yaqashwa ukuba ifake izintambo zikagesi kwenye imboni entsha eyayisemaphethelweni edolobha. Ngemva kokuzwa ukuthi yayizoba imboni yezikhali zempi, ngenza kwacaca ukuthi ngangingeke ngisebenze lapho. Nakuba abaqashi bami kungabajabulisanga lokho, induna yami yangikhulumela, nganikwa omunye umsebenzi. Ngezwa kamuva ukuthi yayinobabekazi owayengomunye woFakazi BakaJehova.

Engangisebenza naye wangikhuthaza kakhulu lapho ethi: “Besingenakulindela okuhlukile kuwe, Reg, ngoba usuneminyaka eminingi wenza lo msebenzi weBhayibheli.” Noma kunjalo, kwakudingeka ngiqaphe, ngoba iningi lengangisebenza nabo lalifuna ukungifaka enkingeni.

Ukubhalisa kwami njengomuntu owenqaba ukubuthelwa impi ngenxa kanembeza kwamukelwa yinkantolo yaseLiverpool ngo-June 1940 ngombandela wokuthi ngizohlala emsebenzini engangiwenza. Lokhu, kwakungivumela ukuba ngiqhubeke nenkonzo yami yobuKristu.

Ukungenela Inkonzo Yesikhathi Esigcwele

Njengoba impi iphela, nganquma ukusula emsebenzini ukuze ngihlanganyele no-Irene enkonzweni yesikhathi esigcwele. Ngo-1946, ngakha umahamba-nendlwana ongamamitha angu-5 owaba ikhaya lethu, ngonyaka olandelayo, sacelwa ukuba sithuthele e-Alveston, idolobhana eliseGloucestershire. Kamuva, saphayona edolobheni elidala laseCirencester nasedolobheni laseBath. Ngo-1951, ngamenywa ukuba ngihambele amabandla aseningizimu yeWales njengombonisi ojikelezayo, kodwa eminyakeni engaphansi kwemibili kamuva, sasisendleleni eya e-Watchtower Bible School of Gilead siyoqeqeshelwa ukuba yizithunywa zevangeli.

Ikilasi lama-21 lalesi sikole laliseSouth Lansing, enyakatho yesifundazwe saseNew York, futhi lathweswa iziqu ngo-1953 eMhlanganweni Womphakathi Wezwe Elisha eNew York City. Mina no-Irene sasingazi ukuthi isabelo sethu sasiyoba kuphi kwaze kwaba usuku lokuthweswa iziqu. Yeka ukuthi sajabula kanjani lapho sizwa ukuthi sabelwe ePeru. Ngani? Phela uSidney Fraser, umfowabo ka-Irene ngamzali munye, nomkakhe uMargaret, base benesikhathi esingaphezu konyaka bekhonza ehhovisi legatsha laseLima ngemva kokuphothula ekilasini le-19 laseGileyadi!

Lapho sisalindele ama-visa ethu, sasebenza isikhashana eBethel yaseBrooklyn, kodwa ngokushesha sase sisendleleni eya eLima. Isabelo sethu sokuqala kweziyishumi njengezithunywa zevangeli kwakuyiCallao, ichweba eliyinhloko lasePeru, entshonalanga yeLima. Nakuba sasifunde amagama athile ayisisekelo eSpanishi, ngaleso sikhathi akekho phakathi kwami no-Irene owayekwazi ukuqhuba ingxoxo ngalolo limi. Sasizokwenze njani?

Izinkinga Namalungelo Okushumayela

EGileyadi satshelwa ukuthi umama akamfundisi umntanakhe ulimi. Kunalokho, umntwana ufunda njengoba unina ekhuluma naye. Ngakho iseluleko esanikwa sona sasithi: “Qalani zibekwa nje emsebenzini wokushumayela, nifunde ulimi kubantu. Bayonisiza.” Njengoba ngangizama ukulubamba lolu limi, cabanga ukuthi ngazizwa kanjani lapho nje kusaphele amasonto amabili sifikile, ngimiswa njengombonisi owengamele eBandleni LaseCallao! Ngaya kobona uSidney Fraser, kodwa iseluleko sakhe sasifana naleso esasithola eGileyadi—zihlanganise nebandla nabantu abasensimini yakho. Ngazimisela ukusilandela lesi seluleko.

Ngomunye uMgqibelo ekuseni, ngahlangana nombazi eshabhu lakhe. Wathi: “Kumelwe ngiqhubeke nomsebenzi wami, kodwa ngicela uhlale phansi ukhulume.” Ngamtshela ukuthi ngizokwenza lokho kodwa ngaphansi kombandela owodwa: “Uma ngenza iphutha, ngicela ungilungise. Ngeke ngikhubeke.” Wamane wahleka wabe esesivuma isicelo sami. Ngangimhambela kabili ngesonto futhi ngathola ukuthi lokho kwakuyindlela enhle yokujwayelana nolimi olusha, njengoba nje ngangitsheliwe.

Kwaziqondanela nje ukuba, e-Ica, isabelo sethu sesibili, ngihlangane nomunye umbazi ngabe sengimchazela ilungiselelo enganginalo eCallao. Wavuma ukungisiza ngendlela efanayo, ngakho iSpanishi sami sathuthuka kahle kakhulu, nakuba kwathatha iminyaka emithathu ngaphambi kokuba ngisikhulume ngokushelelayo. Le ndoda yayihlale imatasa kakhulu, kodwa ngakwazi ukuqhuba isifundo seBhayibheli ngokufunda imiBhalo bese ngiyichazela ukuthi isho ukuthini. Ngelinye isonto lapho ngiya koyibona, umqashi wayo wangitshela ukuthi ithole omunye umsebenzi eLima. Ngemva kwesikhathi esithile, lapho mina no-Irene sifika eLima size emhlanganweni, ngahlangana nale ndoda futhi. Yeka ukuthi ngajabula kanjani lapho ngizwa ukuthi yayithintane noFakazi bendawo ukuze iqhubeke nesifundo sayo, nokuthi yona nomkhaya wayo base beyizinceku zikaJehova ezizinikezele!

Kwelinye ibandla, sathola ukuthi kwakunombhangqwana owawungashadile, kodwa ubhapathiziwe. Njengoba sibonisana nawo ngezimiso ezingokoMbhalo ezihilelekile, wanquma ukubhalisa umshado wawo, okwakuzowubeka esimweni sokuba oFakazi ababhapathiziwe. Ngakho ngahlela ukuwuyisa kwaMuhle ukuze ubhalise umshado wawo. Kodwa-ke kwabe sekuphakama inkinga ngenxa yokuthi wawunezingane ezine nazo ezazingabhalisiwe, kanti lokho kwakuyimfuneko engokomthetho. Sasizibuza ukuthi kazi imeya izothatha ziphi izinyathelo. “Ngenxa yokuthi laba bantu abahle, abangane bakho abangoFakazi BakaJehova, baye bahlela ukuba ushade ngokusemthethweni,” kusho imeya, “ngeke ngizikhiphe izincwadi ezikubizela enkantolo ngengane ngayinye ukuze ibhaliswe, ngizozibhalisa ngaphandle kwecala.” Yeka ukuthi sajabula kanjani, ngoba lona kwakungumkhaya ompofu, noma iyiphi inhlawulo yayizokuba umthwalo omkhulu kuwona!

U-Albert D. Schroeder wasendlunkulu yaseBrooklyn yoFakazi BakaJehova kamuva wasivakashela, watusa ukuba kusungulwe ikhaya lezithunywa zevangeli elisha kwenye ingxenye yeLima. Ngakho mina no-Irene kanye nodade ababili base-United States, uFrances no-Elizabeth Good, nombhangqwana oshadile waseCanada, sathuthela esifundeni saseSan Borja. Kungakapheli neminyaka emibili noma emithathu, sabusiswa ngelinye futhi ibandla elalichuma.

Lapho sikhonza eHuancayo, ephakeme ngamamitha angaphezu kuka-3 000 phezulu enkabeni yenkangala, sahlanganyela nebandla lakhona elalinoFakazi abangu-80. Lapho, ngahlanganyela ekwakhiweni kweHholo LoMbuso lesibili ezweni. Ngamiswa njengommeleli woFakazi BakaJehova kwezomthetho, ngoba kwadingeka siye kathathu enkantolo ukuze sithole amalungelo ethu angokomthetho ngesiza esasisithengile. Izinyathelo ezinjalo, ezazihambisana nomsebenzi omkhulu wokwenza abafundi owawenziwa izithunywa zevangeli eziningi ezithembekile kuleyo minyaka yokuqala, zabeka isisekelo esiqinile sokwanda okuhle esikubonayo manje ePeru—kusuka koFakazi abangu-283 ngo-1953 kuya kwabangaphezu kuka-83 000 namuhla.

Ukuhamba Okubuhlungu

Sasijabulela ubuhlobo obumangalisayo nezithunywa zevangeli esasikanye nazo kuwo wonke amakhaya ethu ezithunywa zevangeli, lapho ngokuvamile ngangiba nelungelo lokukhonza njengombonisi wekhaya. Njalo ngoMsombuluko ekuseni, sasihlangana ndawonye ukuze sikhulume ngemisebenzi yalelo sonto, sabelane nemisebenzi yokunakekela ikhaya lethu. Into eyinhloko, esayiqaphela sonke, kwakuwukushumayela, futhi sinalowo mgomo engqondweni sasebenza ndawonye ngokuvumelana. Ngiyajabula uma ngikhumbula ukuthi sasingakaze sibe nengxabano enkulu kunoma yiliphi lamakhaya ethu.

Isabelo sethu sokugcina sasiseBreña, enye ingxenye yedolobha laseLima. Ibandla lakhona elinothando loFakazi abangu-70 lakhula ngokushesha laba nabangaphezu kwekhulu, lapho kumiswa elinye ibandla ePalominia. Yilesi sikhathi u-Irene agula ngaso. Okokuqala ngaphawula ukuthi ngezinye izikhathi wayengakwazi ukukhumbula lokho akushilo, futhi ngezinye izikhathi wayeba nobunzima bokukhumbula indlela eya ekhaya. Nakuba athola ukwelashwa okuhle, kancane kancane isimo sakhe sawohloka.

Ngokudabukisayo, ngo-1990, kwadingeka ngenze amalungiselelo okuba sibuyele eNgilandi lapho udadewethu u-Ivy asamukela khona ngomusa emzini wakhe. Eminyakeni emine kamuva, onyakeni wakhe wama-81, u-Irene washona. Ngiye ngaqhubeka enkonzweni yesikhathi esigcwele, ngikhonza njengomdala kwelinye lamabandla amathathu edolobheni lakithi. Ngezinye izikhathi, ngiye ngihambele naseManchester ngiyokhuthaza iqembu lakhona leSpanishi.

Ngisanda kuba nokuhlangenwe nakho okujabulisayo okwaqala emashumini eminyaka adlule lapho ngidlalela abaninikhaya izintshumayelo zemizuzu emihlanu egilamafomini lami. Ngiyikhumbula kahle intombazanyana yesikole encane eyayimi ngemva kukanina emnyango, ilalele isigijimi.

Le ntombazane yagcina ithuthele eCanada, futhi umngane osahlala eRuncorn nonguFakazi manje waqhubeka exhumana nayo. Muva nje iye yabhala ithi oFakazi ababili bayihambela basebenzisa izinkulumo ezamane zabuyisa izinkumbulo zalokho eyakuzwa kuleyo ntshumayelo yemizuzu emihlanu eyayiqoshiwe. Iqaphela iqiniso, manje iyinceku kaJehova ezinikezele futhi yacela ukuba kudluliselwe ukubonga kwayo ezinsizweni ezimbili ezahambela kubo eminyakeni engaphezu kuka-60 edlule! Ngempela, ngeke sazi ukuthi imbewu yeqiniso iyogxila futhi ikhule kanjani.—UmShumayeli 11:6.

Yebo, ngibheka emuva ngokwazisa ngokuphila kwami enkonzweni kaJehova eyigugu. Kusukela ngazinikezela ngo-1931, angikaze ngiphuthe nakowodwa wemihlangano emikhulu yabantu bakaJehova. Nakuba mina no-Irene singenazo izingane okungezethu, ngiyajabula ngokuba namadodana namadodakazi angaphezu kuka-150 ngomqondo ongokomoya, wonke ekhonza uBaba wethu wasezulwini, uJehova. Njengoba umkami othandekayo akubeka, amalungelo ethu ngokuqinisekile aye aba yinjabulo engenakuqhathaniswa.

[Imibhalo yaphansi]

[Isithombe ekhasini 24]

Umama, ekuqaleni kwawo-1900

[Isithombe ekhasini 24, 25]

Kwesobunxele: UHilda Padgett, yimina, u-Irene, noJoyce Rowley eLeeds, eNgilandi, ngo-1940

[Isithombe ekhasini 25]

Ngenhla: U-Irene kanye nami phambi komuzi wethu ongumahamba-nendlwana

[Isithombe ekhasini 27]

Simemezela inkulumo yeningi eCardiff, eWales, ngo-1952