Ngafunda Iqiniso LeBhayibheli ERomania
NJENGOBA ILANDISWA NGUGOLDIE ROMOCEAN
Ngo-1970, ngavakashela izihlobo zami eRomania okokuqala cishe ngemva kweminyaka engu-50. Abantu babephila ngaphansi kombuso ocindezelayo wobuKhomanisi, futhi ngangihlale ngixwayiswa ukuba ngiqaphele engikushoyo. Khona-ke, njengoba ngangimi ehhovisi likahulumeni ledolobhana lakithi, isisebenzi sikahulumeni sanginxusa ukuba ngilishiye ngokushesha izwe. Ngaphambi kokuba ngichaze ukuthi kungani, ake ngilandise ukuthi ngalifunda kanjani iqiniso leBhayibheli eRomania.
NGAZALWA ngo-March 3, 1903, edolobhaneni lase-Ortelec enyakatho-ntshonalanga yeRomania eduze nedolobha laseZalău. Sasihlala endaweni enhle. Amanzi nomoya kwakuhlanzekile. Sasizilimela ukudla kwethu futhi singasweli lutho ngokwezinto ezibonakalayo. Lapho ngisemncane, izwe lalinokuthula.
Abantu babeyithanda kakhulu inkolo. Empeleni, umkhaya wakithi wawungamalungu ezinkolo ezintathu ezihlukene. Omunye wogogo bami wayengumKatolika Wobu-Orthodox, omunye engumSabatha, futhi abazali bami bengamaBaptist. Ngenxa yokuthi yayingekho ezinkolweni zabo engangivumelana nayo, umkhaya wakithi wathi ngiyoba umuntu ophika ubukhona bukaNkulunkulu. ‘Uma kunoNkulunkulu oyedwa,’ ngicabanga, ‘kufanele kube nenkolo eyodwa kuphela—hhayi ezintathu emkhayeni owodwa.’
Izinto engazibona enkolweni zangiphazamisa. Ngokwesibonelo, umpristi wayehambela amakhaya eqoqa imali yesonto. Lapho abantu bengenayo imali yokunikela, wayethatha izingubo zabo zokulala zikanokusho ezenziwe ngovolo. Esontweni lamaKatolika, ngangibukela ugogo eguqa ukuze athandaze phambi kwesithombe sikaMariya. Ngangizibuza, ‘Kungani kumelwe kuthandazwe esithombeni?’
Izikhathi Zezinkathazo
UBaba waya e-United States ngo-1912 ukuze athole imali yokukhokha isikweletu. Ngemva nje kwalokho kwaqubuka impi, futhi amadoda asedolobhaneni lakithi aya empini—kwasala abesifazane, izingane namakhehla kuphela. Idolobhana lakithi laba ngaphansi kombuso waseHungary isikhashana, kodwa amasosha aseRomania abe esebuya elithatha futhi leli dolobhana. Asiyala ukuba siphume ngokushesha. Nokho, kuleso sibhudubhudu nesidididi sokupakisha impahla yethu nezingane ekalishini, ngasala. Kuyaqondakala ngoba ngangimdala ezinganeni ezinhlanu.
Ngagijimela ekhehleni elingumakhelwane elalisele, futhi lathi: “Iya ekhaya. Ukhiye iminyango, futhi ungavuleli muntu.” Ngenza kanjalo ngokushesha. Ngemva kokuba ngidle isobho lenkukhu neklabishi elihlohlwe ilayisi nenyama okwakusele njengoba kwakuhanjwa ngokubhuduzela, ngaguqa eduze kombhede wami ngathandaza. Ngokushesha ngazumeka.
Lapho ngiphaphama, kwakusemini, futhi ngathi: “Ngiyakubonga Nkulunkulu! Ngiyaphila!” Izindonga zazigcwele izimbobo zezinhlamvu, njengoba kwakudutshulwa ubusuku bonke. Lapho umama eqaphela ukuthi ngangingekho phakathi kwabo edolobhaneni elilandelayo, wathumela insizwa okuthiwa uGeorge Romocean, eyangithola yabuyela nami emuva. Akuthathanga sikhathi ukuba sikwazi ukubuyela edolobhaneni lakithi futhi siqhubeke nokuphila lapho.
Isifiso Sami Sokwazi Iqiniso LeBhayibheli
UMama wayefuna ngibhapathizwe ngibe umBaptist, kodwa ngangingafuni ukwenza kanjalo ngoba ngangingakholelwa ukuthi uNkulunkulu onothando wayengashisa abantu esihogweni phakade. Ezama ukuchaza, umama wathi: “Yebo, uma bebabi.” Kodwa ngaphendula: “Uma bebabi, babulale, kodwa ungabahluphi. Ngeke ngihluphe ngisho nenja noma ikati.”
Ngiyakhumbula ukuthi ngosuku oluhle lwasentwasahlobo, lapho ngineminyaka engu-14, umama wayengithume ukuyisa izinkomo emadlelweni. Njengoba ngangilele otshanini eceleni komfula, ngifulathele ihlathi, ngabheka esibhakabhakeni ngathi: “Nkulunkulu, ngiyazi ukuthi ukhona; kodwa ayikho engiyithandayo kulezi zinkolo. Kumelwe ube neyodwa elungile.”
Ngiyakholwa ngempela ukuthi uNkulunkulu wawuzwa umthandazo wami ngoba ngalo kanye lelo hlobo lika-1917, kwafika abaFundi BeBhayibheli (njengoba oFakazi BakaJehova babebizwa kanjalo ngaleso sikhathi) ababili edolobhaneni lakithi. Babengama-colporteur, noma izikhonzi zesikhathi esigcwele, futhi bafika esontweni lamaBaptist kusaqhutshwa inkonzo.
Ukusakazeka Kweqiniso LeBhayibheli ERomania
Eminyakeni embalwa ngaphambili, ngo-1911, uCarol Szabo noJosif Kiss, ababa abaFundi BeBhayibheli e-United States, babuyela eRomania ukuze benze iqiniso leBhayibheli laziwe lapho. Bazinza eTîrgu-Mureş, esebangeni elingamakhilomitha angaphansi kuka-160 ukuya eningizimu-mpumalanga yedolobhana lakithi. Phakathi neminyaka embalwa, amakhulu abantu asabela esigijimini soMbuso futhi ahlanganyela enkonzweni yobuKristu.—Mathewu 24:14.
Khona-ke, lapho laba baFundi BeBhayibheli ababili abasebasha befika esontweni lamaBaptist edolobhaneni lakithi e-Ortelec, uGeorge Romocean, nakuba ayeneminyaka engu-18 kuphela, wayeqhuba inkonzo futhi ezama ukuchaza lokho okushiwo eyabaseRoma 12:1. Ekugcineni, omunye walama-colporteur asemasha wasukuma wathi: “Bafowethu, bangane, yini umphostoli uPawulu azama ukusitshela yona lapha?”
Lapho ngizwa lokho, ngajabula kakhulu! Ngacabanga, ‘Kumelwe ukuba laba bantu bayakwazi ukuchaza iBhayibheli.’ Kodwa iningi lababekhona lamemeza: “Abaprofethi bamanga! Siyazi ukuthi ningobani!” Kwabe sekuba nokuxokozela. Kodwa uyise kaGeorge wabe esesukuma ethi: “Thulani! Hlobo luni lomoya lolu—uhlobo olubangelwa ukudakwa? Uma laba bantu benokuthile abafuna ukusitshela khona futhi ningafuni ukulalela, ngibamemela kwami. Noma ubani ofuna ukuza wamukelekile.”
Ngagijimela ekhaya ngijabulile futhi ngatshela umama ngalokho okwakwenzekile. Ngangingomunye wabamukele isimemo sokuya kwaRomocean. Yeka indlela engangijabule ngayo ngalobo busuku ngokufunda eBhayibhelini ukuthi asikho isihogo esivuthayo nokubona eBhayibhelini lami lesiRomania igama likaNkulunkulu, elithi Jehova! Lama-colporteur ahlela ukuba umFundi weBhayibheli ahambele kwaRomocean njalo ngeSonto azosifundisa. Ngehlobo elilandelayo, ngineminyaka engu-15, ngabhapathizwa njengophawu lokuzinikezela kwami kuJehova.
Ngokuhamba kwesikhathi, cishe wonke umkhaya wakwaProdan nowakwaRomocean wamukela iqiniso leBhayibheli futhi wanikezela ukuphila kwawo kuJehova. Nabanye abaningi edolobhaneni lakithi benza kanjalo, kuhlanganise nombhangqwana osemusha umuzi wawo owawusetshenziswa njengesonto lamaBaptist ngaphambili. Ngemva kwalokho bawushintsha bawenza indawo abaFundi BeBhayibheli abahlangana kuyo ukuze bafunde. Iqiniso elingokomBhalo lasakazeka ngokushesha emadolobhaneni aseduze, futhi ngo-1920 kwakunabamemezeli boMbuso abangaba ngu-1 800 eRomania!
Ukuya E-United States
Sasilangazelela ukuhlanganyela lokho esasikufundile nobaba, uPeter Prodan. Kodwa, ngokumangalisayo, ngaphambi kokuba sibhale, sathola incwadi evela kuye esitshela ukuthi wayeseyinceku kaJehova ebhapathiziwe. Wayefunde nabaFundi BeBhayibheli e-Akron, e-Ohio, futhi wayefuna sonke siyohlala naye e-United States. Nokho, umama wenqaba ukusuka eRomania. Ngakho, ngo-1921, ngisebenzisa imali engangiyithunyelelwe ubaba, ngahamba ngayohlala naye e-Akron. UGeorge Romocean nomfowabo kakade base bethuthele e-United States ngonyaka owawandulele.
Lapho ngifika ngomkhumbi e-Ellis Island, eNew York, isisebenzi sasehhovisi labafuduki sasingazi ukuthi singalihumushela kanjani esiNgisini igama lami elithi Aurelia, ngakho sathi: “UnguGoldie.” Lelo kwaba igama lami kusukela lapho. Ngemva nje kwalokho, ngo-May 1, 1921, mina noGeorge Romocean sashada. Cishe ngemva konyaka kamuva, ubaba wabuyela eRomania futhi ngo-1925 wabuya nodadewethu omncane, uMary e-Akron. Ubaba wabe esebuyela eRomania ukuze abe nomama nawo wonke umkhaya osele.
Inkonzo Yethu Yokuqala E-United States
UGeorge wayeyinceku kaJehova ethembekile nezinikele kakhulu. Phakathi kuka-1922 no-1932, sabusiswa ngamadodakazi amane amahle—u-Esther, u-Anne, uGoldie Elizabeth, no-Irene. Kwamiswa ibandla lesiRomania e-Akron, futhi ekuqaleni imihlangano yayiqhutshelwa emzini wethu. Ekugcineni, njalo ngemva kwezinyanga eziyisithupha ibandla lethu lalihanjelwa ummeleli ovela endlunkulu yomhlaba yabaFundi BeBhayibheli eBrooklyn, eNew York, futhi wayehlala nathi.
Ngezinsuku eziningi zangeSonto sasisebenzisa usuku lonke emsebenzini wokushumayela. Sasipakisha izikhwama zethu zezincwadi nokudla kwasemini, sifake amadodakazi kuyi-Model T Ford, futhi sichithe usuku lonke sishumayela ensimini yasemaphandleni. Ebusuku sasibe sesiya eSifundweni Se-Nqabayokulinda. Amadodakazi ethu awuthanda umsebenzi wokushumayela. Ngo-1931, ngaba khona eColumbus, e-Ohio, lapho abaFundi BeBhayibheli bamukela khona igama labo elibahlukanisayo elithi oFakazi BakaJehova.
Ukulungiswa Engangikudinga
Eminyakeni embalwa kamuva, ngathukuthelela uJoseph F. Rutherford, owayengumongameli we-Watch Tower Bible and Tract Society ngaleso sikhathi. UFakazi owayesanda kuhlanganyela waba nomuzwa wokuthi uMfoweth’uRutherford wayemphathe ngokungafanele, engazange amlalelisise. Ngaba nomuzwa wokuthi uMfoweth’uRutherford wayenephutha. Khona-ke, ngolunye usuku ngeSonto savakashelwa udadewethu uMary nomyeni wakhe, uDan Pestrui. Ngemva kokudla kwasemini uDan wathi: “Asilungeleni ukuya emhlanganweni.”
“Asisayi emihlanganweni,” ngisho. “Sithukuthelele uMfoweth’uRutherford.”
UDan wabeletha izandla zakhe wayisa umzimba wakhe emuva naphambili, wabe esethi: “Wawumazi uMfoweth’uRutherford lapho ubhapathizwa?”
“Cha-bo,” ngiphendula. “Uyazi ukuthi ngabhapathizwa eRomania.”
“Kungani wabhapathizwa?” ebuza.
“Yingoba ngathola ukuthi uJehova unguNkulunkulu weqiniso, futhi ngangifuna ukunikezela ukuphila kwami ukuze ngimkhonze,” ngiphendula.
“Ungalokothi ukukhohlwe lokho!” ephendula. “Kuthiwani uma uMfoweth’uRutherford engashiya iqiniso, ingabe nawe ungalishiya?”
“Phinde, phinde!” ngiphendula. Lokhu kwangenza ngasanguluka, futhi ngathi: “Wonke umuntu makalungele ukuya emhlanganweni.” Futhi kusukela lapho asizange siyeke. Yeka ukuthi ngambonga kanjani uJehova ngokulungiswa ngothando umyeni kadadewethu!
Ukuphila Phakathi Nenkathi Yokuwohloka Kwezomnotho
Phakathi nenkathi Yokuwohloka Kwezomnotho ngawo-1930, kwakunzima. Ngolunye usuku uGeorge wabuya emsebenzini edangele kakhulu, wangazisa ukuthi udiliziwe efektri yenjoloba ayesebenza kuyo. “Ungakhathazeki,” ngisho, “sinoBaba ocebile ezulwini, futhi ngeke asishiye.”
Ngalo kanye lolo suku uGeorge wahlangana nomngane wakhe owayephethe ubhasikidi omkhulu onamakhowe. Lapho uGeorge ethola ukuthi umngane wakhe wayewakhe kuphi, wafika nenqwaba yamakhowe ekhaya. Wabe esesebenzisa ama-dollar ethu amathathu okugcina ethenga obhasikidi abancane. “Ungakwenza kanjani lokho,” ngibuza, “njengoba sinamadodakazi amancane adinga ubisi?”
“Ungakhathazeki,” ephendula, “yenza njengoba ngisho.” Emasontweni ambalwa alandela, saba nefektri encane emzini wethu, sihlanza futhi sipakishe amakhowe. Sasiwathengisa ezindaweni zokudlela ezithe ukuthuthuka futhi sasibuyela ekhaya nama-dollar angu-30 kuya kwangu-40 ngosuku, okwakuyimali eningi ngempela kithi ngaleso sikhathi. Umlimi owasinika imvume yokukha amakhowe edlelweni lakhe wathi usehlale lapho iminyaka engu-25 kodwa wayengakaze abone amakhowe amaningi kangako. Kungakabiphi, ifektri yenjoloba yambuyisela uGeorge emsebenzini.
Ukulondoloza Ukholo Lwethu
Ngo-1943 sathuthela eLos Angeles, eCalifornia, futhi eminyakeni emine kamuva sazinza e-Elsinore. Savula isitolo sokudla lapho, futhi wonke umkhaya wethu wawushintshana ngokusebenza kuso. Ngaleso sikhathi, i-Elsinore yayiyidolobha elincane nje labantu abangaba ngu-2 000, futhi kwakudingeka sihambe amakhilomitha angu-30 lapho siya emihlanganweni yethu yobuKristu eyayikwelinye idolobha. Yeka ukuthi ngajabula kanjani ukubona kumiswa ibandla elincane e-Elsinore ngo-1950! Manje kunamabandla angu-13 kuleyo ndawo.
Ngo-1950 indodakazi yethu uGoldie Elizabeth (manje iningi eliyazi ngokuthi uBeth) yathweswa iziqu e-Watchtower Bible School of Gilead eSouth Lansing, eNew York, futhi yabelwa eVenezuela njengesithunywa sevangeli. Ngo-1955 uthumbu wethu, u-Irene, wajabulela ukuba umyeni wakhe amenyelwe ukuyokhonza njengesikhonzi esijikelezayo emsebenzini wesifunda. Khona-ke ngo-1961, ngemva kokuya eSikoleni Senkonzo SoMbuso eSouth Lansing, eNew York, bathunyelwa eThailand. Ngezinye izikhathi ngangiwakhumbula kakhulu amadodakazi ami kangangokuthi ngangikhala, kodwa ngibe sengicabanga, ‘Yilokho ebengifuna bakwenze.’ Ngakho ngangithatha isikhwama sami sezincwadi ngiye emsebenzini wokushumayela. Njalo ngangibuyela ekhaya ngijabulile.
Ngo-1966 umyeni wami othandekayo, uGeorge, wafa uhlangothi. UBeth, owayesebuyile eVenezuela ngenxa yezinkinga zempilo, wasiza ekumnakekeleni. UGeorge washona ngonyaka olandelayo, futhi ngaduduzwa ukuthi wahlala ekholekile kuJehova futhi wayesamukele umvuzo wakhe wasezulwini. Ngemva kwalokho uBeth waya eSpain eyokhonza lapho indingeko yabamemezeli boMbuso inkulu khona. Indodakazi yami enkulu, u-Esther, yaphathwa umdlavuza futhi yashona ngo-1977, futhi ngo-1984, u-Anne wabulawa i-leukemia. Ngamunye wayeyinceku kaJehova ekholekile ukuphila kwakhe konke.
Lapho u-Anne eshona, uBeth no-Irene base bebuyile ezabelweni zabo zokushumayela kwamanye amazwe. Babesizile ekunakekeleni odadewabo, futhi sonke sadabuka kakhulu. Ngemva kwesikhathi ngatshela amadodakazi ami: “Kulungile-ke, sekwanele! Siye saduduza abanye ngezithembiso zeBhayibheli eziyigugu. Manje kumelwe sizivumele ukuba siduduzeke. USathane ufuna ukusiphuca injabulo yethu yokukhonza uJehova, kodwa asinakumvumela.”
Umkhaya Wakithi Okholekile ERomania
Ngo-1970 mina nodadewethu uMary sathatha lolo hambo olukhumbulekayo lokuvakashela umkhaya wakithi eRomania. Omunye wodadewethu wayeseshonile, kodwa sakwazi ukuvakashela umfowethu uJohn nodadewethu uLodovica, ababesahlala edolobhaneni lase-Ortelec. Ngesikhathi sokuvakasha kwethu, ubaba nomama base beshonile, futhi babeye bahlala bekholekile kuJehova. Abaningi basitshela ukuthi ubaba wayeyinsika ebandleni. Ngisho nezinye zezingane zabazukulu bakhe eRomania sezingoFakazi. Savakashela nezihlobo eziningi zabasemzini wami ezahlala ziqinile eqinisweni leBhayibheli.
Ngo-1970, iRomania yayingaphansi kombuso ononya wobuKhomanisi kaNicolae Ceauşescu, futhi oFakazi BakaJehova babeshushiswa ngonya. Indodana yomfowethu uJohn, uFlore, nezinye izihlobo zami, bachitha iminyaka eminingi emakamu okuhlushwa ngenxa yenkolo yabo yobuKristu, kwaba njalo nangomzala womyeni wami, uGabor Romocean. Akumangalisi ukuthi lapho sithunywe ukuba sihambise izincwadi endlunkulu yoFakazi BakaJehova eNew York, abafowethu baseRomania bathi ngeke bakhululeke kuze kube yilapho bezwa ukuthi siphume siphephile kulelozwe!
Lapho siqaphela ukuthi ama-visa ethu ayesephelelwe isikhathi, saya ehhovisi likahulumeni e-Ortelec. KwakungoLwesihlanu ntambama, futhi kwakunesisebenzi sikahulumeni esisodwa esasisebenza. Lapho sizwa ukuthi sasivakashele obani nokuthi indodana yomfowethu yayisekamu lokuhlushwa, sathi: “Makhosazana, phumani niphele lapha!”
“Kodwa asikho isitimela esihambayo namuhla,” kuphendula udadewethu.
“Akunandaba,” sisho ngokushesha. “Gibelani ibhasi. Gibelani isitimela. Gibelani itekisi. Hambani ngezinyawo. Phumani nje niphele lapha ngokushesha ngangokunokwenzeka!”
Lapho sithi siyaphuma, sabizwa futhi saziswa ukuthi isitimela sombutho wezempi esasingekho ohlelweni sasizodlula ngo-6:00 ntambama. Yeka ukuthi kwaba inhlanhla kanjani lokho! Esitimeleni esivamile, amaphepha ethu ayeyohlolwa ngokuphindaphindiwe, kodwa njengoba lesi sitimela sasithwele izisebenzi zombutho wezempi futhi sasiwukuphela kwezakhamuzi ezazilapho, akekho owacela ukubona izincwadi zethu zokungena kwelinye izwe. Kungenzeka ukuthi bacabanga ukuthi sasingogogo bezinye zezikhulu.
Safika eTimisoara ngosuku olulandelayo ekuseni, futhi ngosizo lomngane wesihlobo sethu, sakwazi ukuthola ama-visa ethu. Ngosuku olulandelayo saphuma kulelozwe. Sabuyela ekhaya nezinkumbulo eziningi ezinhle nezingenakulibaleka zabafowethu nodadewethu abangamaKristu abathembekile eRomania.
Eminyakeni eyalandela ukuvakashela kwethu eRomania, sezwa imininingwane embalwa ngomsebenzi wokushumayela ngemva kweKhethini Lensimbi. Nokho, sasiqiniseka ukuthi abafowethu nodadewethu abangamaKristu babeyohlala bethembekile kuNkulunkulu wethu—kungakhathaliseki ukuthi isimo sinjani. Futhi ngokuqinisekile baye benza kanjalo! Yeka injabulo okwaba yiyo ukuzwa ukuthi ngo-April 1990 oFakazi BakaJehova baqashelwa ngokomthetho njengenhlangano engokwenkolo eRomania! Ngehlobo elalandela sajatshuliswa imibiko yemihlangano emikhulu eyaqhutshwa eRomania. Phela, ababa khona baba ngaphezu kuka-34 000 emadolobheni angu-8, futhi kwabhapathizwa abangu-2 260! Manje kunabangaphezu kuka-35 000 abahlanganyela emsebenzini wokushumayela eRomania, futhi ngonyaka odlule abangu-86 034 baba khona eSikhumbuzweni sokufa kukaKristu.
Iqiniso Liseyigugu Kimi
Iminyaka embalwa, ngayeka ukudla izifanekiselo eSikhumbuzweni. Ngabona abafowethu abafaneleka kakhulu bengadli, futhi ngacabanga: ‘Kungani uJehova enganika mina ilungelo lokuba indlalifa kanye neNdodana yakhe ezulwini kuyilapho abanye beyizikhulumi eziqephuza kangaka?’ Kodwa lapho ngingadlanga, ngangizizwa ngiphazamiseke kakhulu. Kwakungathi ngangenqaba okuthile. Ngemva kokutadisha kakhulu nokunxusa ngomthandazo, ngaqala ukudla futhi. Ngabuye ngaba nokuthula nenjabulo, futhi ngiye ngaqhubeka nginakho.
Nakuba ngingasaboni lapho ngifunda, ngilalela amakhasethi eBhayibheli nawe-Nqabayokulinda ne-Phaphama! nsuku zonke. Futhi ngisahlanganyela emsebenzini wokushumayela. Ngokuvamile ngihambisa omagazini abaphakathi kwamashumi ayisithupha nekhulu inyanga ngayinye, kodwa lapho sinomkhankaso okhethekile we-Phaphama! ngo-April odlule, ngahambisa abangu-323. Ngosizo lwamadodakazi ami, ngiyakwazi nokuba nengxenye eSikoleni Senkonzo Esingokwasezulwini. Ngiyajabula ngokuthi ngiyakwazi ukuqhubeka ngikhuthaza abanye. Cishe wonke umuntu eHholo LoMbuso ungibiza ngoGogo.
Lapho ngibheka emuva eminyakeni engu-79 yenkonzo yokuzinikezela kuJehova, ngimbonga nsuku zonke ngokuthi uye wangivumela ukuba ngazi iqiniso lakhe eliyigugu futhi ngisebenzise ukuphila kwami enkonzweni yakhe. Ngijabula kakhulu ngokuthi ngiye ngaphila ukuze ngibone ukugcwaliseka kweziprofetho zeBhayibheli ezimangalisayo ezabikezela ngokuqoqwa kwabantu bakaNkulunkulu abanjengezimvu kulezi zinsuku zokugcina.—Isaya 60:22; Zakariya 8:23.
[Isithombe ekhasini 23]
Abamile udadewethu uMary nobaba, bese kuba yimi noGeorge namadodakazi ethu u-Esther no-Anne
[Isithombe ekhasini 24]
Nginamadodakazi ami uBeth no-Irene nomyeni ka-Irene namadodana abo amabili, bonke abakhonza uJehova ngokukholeka