Imibuzo Evela Kubafundi
UJehova wasivumela isithembu ezincekwini zakhe zasendulo, ama-Israyeli, kodwa akasivumeli manje. Ingabe indinganiso yakhe iyashintsha?
UJehova akawushintshanga umbono wakhe ngesithembu. (IHubo 19:7; Malaki 3:6) Sasingeyona ingxenye yelungiselelo alenzele abantu ekuqaleni, futhi asiyona namanje. Lapho edala u-Eva njengomfazi ka-Adamu, uJehova wathi indinganiso yakhe kwakuwukuba indoda ibe nomfazi oyedwa. “Yingakho indoda iyoshiya uyise nonina inamathele kumkayo babe nyamanye.”—Genesise 2:24.
Ngesikhathi esemhlabeni, uJesu Kristu wayiphinda le ndinganiso lapho ephendula ababembuza ngesahlukaniso nokuphinde ushade. Wathi: “Anifundanga yini ukuthi lowo owabadala kusukela ekuqaleni wabenza kwaba owesilisa nowesifazane, wathi, ‘Ngenxa yalesi sizathu indoda iyoshiya uyise nonina inamathele kumkayo, futhi laba ababili bayoba nyamanye’? Ngakho abasebabili, kodwa sebenyamanye.” UJesu wanezela wathi: “Noma ubani ohlukanisa nomkakhe, ngaphandle kwesizathu sobufebe, ashade nomunye, uyaphinga.” (Mathewu 19:4-6, 9) Kusobala kulokhu ukuthi ukuthatha omunye noma abanye abafazi nakho kuwukuphinga.
Pho sasivunyelelwani isithembu endulo? Khumbula ukuthi akuyena uJehova owaqala lo mkhuba. Umuntu wokuqala oshiwo eBhayibhelini ukuthi wayenabafazi abangaphezu koyedwa uLameka, oyinzalo kaKhayini. (Genesise 4:19-24) Lapho uJehova eletha uZamcolo wosuku lukaNowa, uNowa wayenomfazi oyedwa kuphela kanjalo namadodana akhe amathathu. Bonke ababenesithembu babhujiswa uZamcolo.
Emakhulwini eminyaka kamuva lapho uJehova ekhetha ama-Israyeli njengabantu bakhe, abanye kuwo babenesithembu kakade, nakuba kusobala ukuthi okwakuvame kakhulu kwakuwukuba nomfazi oyedwa. UNkulunkulu akashongo ukuthi mayihlukane imikhaya enabafazi abangaphezu koyedwa. Esikhundleni salokho, wawubekela imithetho eqinile lo mkhuba.—Eksodusi 21:10, 11; Duteronomi 21:15-17.
Ukuthi lokhu kubekezelela isithembu kwakuyinto yesikhashana akubonakali nje kuphela ngalokho uJesu akusho ngendinganiso kaJehova yasekuqaleni ngomshado kodwa nangalokho umphostoli uPawulu akubhala ephefumulelwa umoya ongcwele kaNkulunkulu. Wathi: “Yileyo naleyo ndoda mayibe nowayo umfazi nalowo nalowo wesifazane abe nowakhe umyeni.” (1 Korinte 7:2) UPawulu waphefumulelwa nokuba abhale ukuthi noma iyiphi indoda emiswa ukuba ibe umbonisi noma inceku ekhonzayo ebandleni lobuKristu kumelwe kube “indoda emfazi munye.”—1 Thimothewu 3:2, 12; Thithu 1:6.
Ngakho, ukubekezelela kukaJehova isithembu kwaphela lapho kumiswa ibandla lobuKristu eminyakeni engaba ngu-2 000 edlule. Ngaleso sikhathi, indinganiso yomshado yabuyela kulokho eyayiyikho ekuqaleni kokudala kukaNkulunkulu owesilisa nowesifazane: ukuba indoda ibe nomfazi oyedwa. Yileyo indinganiso esebenzayo namuhla kubantu bakaNkulunkulu emhlabeni wonke.—Marku 10:11, 12; 1 Korinte 6:9, 10.