Dumisa UJehova “Phakathi Kwebandla”

IMIHLANGANO yobuKristu iyilungiselelo likaJehova lokugcina abantu bakhe beqinile ngokomoya. Ukuya kwethu njalo emihlanganweni, kubonisa ukuthi siyawazisa amalungiselelo kaJehova. Ngaphezu kwalokho, kusenza sikwazi ‘ukuvuselelana nabafowethu uthando nemisebenzi emihle,’ okuyindlela ebalulekile yokubonisana ukuthi siyathandana. (Hebheru 10:24; Johane 13:35) Nokho, singabavuselela kanjani abafowethu emihlanganweni?

Vuma Obala

INkosi uDavide yabhala yathi ngayo siqu: “Ngizomemezela igama lakho kubafowethu; ngizokudumisa phakathi kwebandla. Ukudumisa kwami ebandleni elikhulu kuyovela kuwe.” “Ngiyokudumisa ebandleni elikhulu; phakathi kwabantu abaningi ngiyokudumisa.” “Ebandleni elikhulu ngizikhulumile izindaba ezinhle zokulunga. Bheka! Izindebe zami angizivimbeli.”—IHubo 22:22, 25; 35:18; 40:9.

Osukwini lomphostoli uPawulu, lapho amaKristu ayehlangana ngenjongo yokukhulekela, nawo ayevuma ukholo lwawo kuJehova futhi akhulume ngenkazimulo yakhe. Ngale ndlela ayekhuthazana avuselelane uthando nemisebenzi emihle. Osukwini lwethu, ngemva kwamakhulu amaningi eminyaka kusukela kuDavide noPawulu, impela ‘siyalubona usuku lukaJehova lusondela.’ (Hebheru 10:24, 25) Isimiso sezinto sikaSathane siyadiyazela sibheke ekubhujisweni, futhi izinkinga zilokhu zanda. ‘Sinesidingo sokukhuthazela’ kunanini ngaphambili. (Hebheru 10:36) Uma kungabi abafowethu, ubani nje ongasikhuthaza ukuba sikhuthazele?

Njengakudala, namuhla kwenziwe amalungiselelo okuba amakholwa ngamanye avume ukholo lwawo “phakathi kwebandla.” Elinye ithuba elivulekele wonke umuntu elokuphendula imibuzo ebhekiswa ezilalelini emihlanganweni yebandla. Ungalokothi uzithathe kalula izinzuzo ezingalethwa yilokhu. Ngokwesibonelo, izimpendulo ezibonisa indlela yokunqoba noma yokugwema izinkinga zenza abafowethu bazimisele nakakhulu ukulandela izimiso zeBhayibheli. Izimpendulo ezichaza imiBhalo yeBhayibheli ekhonjiwe kodwa yangacashunwa noma ezihlanganisa imiqondo etholakale ngokuzicwaningela zingase zikhuthaze abanye ukuba bahlakulele imikhuba engcono yokutadisha.

Ukuqonda ukuthi ukuphendula kwethu emihlanganweni kuyosizuzisa thina nabanye kufanele kushukumisele bonke oFakazi BakaJehova ukuba banqobe uvalo noma amahloni. Kubaluleke ngokukhethekile ukuba abadala nezinceku ezikhonzayo baphendule emihlanganweni, ngoba kulindeleke ukuba bahole ekuhlanganyeleni nasekubeni khona emihlanganweni. Nokho, umuntu angathuthukisa kanjani uma esithola siyinselele lesi sici somsebenzi wakhe wobuKristu?

Ukusikisela Kokuthuthukisa

Khumbula ukuthi uJehova uhilelekile. Udade ongumKristu ohlala eJalimane uchaza indlela azibheka ngayo izimpendulo zakhe. “Ziyimpendulo yami emizamweni kaSathane yokuvimba abantu bakaNkulunkulu bangakhulumi ngokholo lwabo.” Umzalwane osanda kubhapathizwa ohlanganyela ebandleni elifanayo uthi: “Uma kuziwa endabeni yokuphendula, ngithandaza kakhulu.”

Lungiselela kahle. Uma ungayitadishi kusengaphambili indaba, uyokuthola kunzima ukuphendula futhi izimpendulo zakho ngeke zizuzise kangako. Ukusikisela kwendlela yokuphendula emihlanganweni yebandla kunikezwe encwadini ethi Zuza Emfundweni Yesikole Senkonzo Esingokwasezulwini, ikhasi 70.a

Zibekele umgomo wokuphendula okungenani kanye emhlanganweni ngamunye. Lokhu kusho ukulungiselela izimpendulo eziningana, ngoba lapho usiphakamisa kaningi isandla, aba maningi amathuba okuba umzalwane oqhubayo akukhombe. Ungase uthande ngisho nokumtshela kusengaphambili ukuthi yimiphi imibuzo olungele ukuyiphendula. Lokhu kusiza kakhulu uma usaqala. Njengoba kungase kube nzima ukuba uphakamise isandla “ebandleni elikhulu,” ukwazi ukuthi lesi yisigaba sakho nokuthi oqhuba umhlangano uzobheka isandla sakho kuyokukhuthaza ukuba uphendule.

Phendula kusesekuqaleni. Ukuhlehlisa umsebenzi onzima akuwenzi ube lula. Ukuphendula kusesekuqaleni komhlangano kungasiza. Kuyokumangaza ukuthi kuba lula kangakanani ukuphendula okwesibili noma okwesithathu uma usuyinqobile ingqinamba yokuphendula okokuqala.

Khetha indawo ekahle yokuhlala. Abanye bakuthola kulula ukuphendula lapho behlala maphambili eHholo LoMbuso. Ziba mbalwa iziphazamiso, abe mancane namathuba okuba umqhubi angababoni. Uma ukuzama lokhu, khumbula ukuba ukhulumele phezulu ngokwanele ukuze wonke umuntu akuzwe, ikakhulu uma ibandla lingayisebenzisi imibhobho ehanjiswayo.

Lalelisisa. Lokhu kuyokusiza ukuba ugweme ukuphinda into esanda kushiwo omunye. Futhi izimpendulo zabanye zingase zikukhumbuze umBhalo noma iphuzu elingakhela emqondweni osanda kuvezwa. Ngezinye izikhathi, okuhlangenwe nakho okufushane kungase kubonise indlela elisebenza ngayo iphuzu okuxoxwa ngalo. Izimpendulo ezinjalo zisiza kakhulu.

Funda ukuphendula ngamazwi akho. Ukufunda impendulo esigabeni kungase kubonise ukuthi uyitholile impendulo enembile, futhi kungase kube indlela enhle yokuqala ukuphendula. Kodwa ukuthuthukela ekuphenduleni ngamazwi akho kubonisa ukuthi uyaliqonda iphuzu. Izincwadi zethu akudingeki zicashunwe izwi nezwi. OFakazi BakaJehova abaphindi nje lokho okushiwo izincwadi zabo.

Hlala usendabeni. Izimpendulo ezingahlobene nendaba noma ezicezile emiqondweni eyinhloko okuxoxwa ngayo azifaneleki. Lokhu kusho ukuthi izimpendulo zakho kufanele zihlobane nendaba okuxoxwa ngayo. Uma zinjalo ziyoba nomthelela ekwenzeni ingxoxo yesihloko esifundwayo yakhe ngokomoya.

Yiba nomgomo wokukhuthaza. Njengoba isizathu esikhulu sokuphendula siwukukhuthaza abanye, kumelwe sizame ukugwema ukusho izinto ezingase zibadikibalise. Ngaphezu kwalokho, ungaphenduli sonke isigaba kangangokuba abanye basalelwe ubala, noma bangasalelwa lutho abangalusho. Izimpendulo ezinde noma eziyinkimbinkimbi ziyakusithibeza lokho okuqondiwe. Izimpendulo ezimfushane ezinamazwi ambalwa nje zingaba zinhle kakhulu, futhi ziyokhuthaza abasanda kuhlanganyela ukuba bazinikeze nezabo izimpendulo ezimfushane.

Indima Yalabo Abaqhuba Imihlangano

Ngokuphathelene nokukhuthaza, lowo oqhuba umhlangano unomthwalo wemfanelo osindayo. Ubonisa isithakazelo esiqotho empendulweni ngayinye enikezwayo ngokulalelisisa nangokumbheka ngenhlonipho lowo ophendulayo kunokuba abe matasa nezinye izinto. Yeka ukuthi bekungaba okungafaneleki kanjani uma ebengase angalalelisisi abese, ngenxa yalokho, ephinda into esanda kushiwo noma abuze umbuzo osanda kuphendulwa!

Bekungadumaza futhi uma njalo umqhubi eyiphinda ngamazwi athe ukuhluka impendulo esanda kushiwo, njengokungathi usikisela ukuthi leyo mpendulo ibinganele ngandlela-thile. Ngakolunye uhlangothi, yeka indlela okukhuthaza ngayo lapho izimpendulo ziholela ekubeni kuxoxwe nakakhulu ngephuzu elithile elibalulekile. Imibuzo enjengokuthi, ‘Singakusebenzisa kanjani lokhu ebandleni lethu?’ noma, ‘Imuphi umBhalo osesigabeni osekela lokhu okusanda kushiwo?’ ikhuthaza izimpendulo ezakhayo, eziyingxenye ebalulekile.

Yebo, abasanda kuhlanganyela noma abanamahloni kufanele batuswe ngokukhethekile lapho bephendula. Umqhubi angase enze lokhu bebobabili ngemva kwesifundo ukuze agweme ukubaphathisa amahloni futhi abe nethuba lokunikeza ukusikisela lapho kufaneleka.

Engxoxweni evamile, umuntu ongabaniki abanye ithuba uyakuvimba ukukhulumisana. Izilaleli zakhe zibona kungenasidingo sokuba ziveze imicabango yazo. Zivele zilalele sakugcina icala, uma zilalela kwakulalela. Kungase kwenzeke okuthi akufane lapho umqhubi encisha abanye amathuba okukhuluma engxoxweni ngokuthi akhulume kakhulu. Nokho, ngezinye izikhathi lowo oqhuba umhlangano angase adonse izilaleli futhi ashukumise ukucabanga kwazo endabeni ethile ngokubuza imibuzo eyengeziwe. Imibuzo enjalo kufanele ibe mbalwa.

Umqhubi ngeke njalo akhombe umuntu wokuqala ophakamisayo. Ukwenza kanjalo kungabadikibalisa labo abadinga isikhashana ukuze bahlanganise imicabango yabo. Ngokulinda kancane, uyonika obengakaphenduli ithuba lokuphendula. Uyobonisa ukuqonda nangokuba angathi izingane ezincane maziphendule imibuzo ephathelene nezindaba izingane ezingaziqondi.

Kuthiwani uma kunikezwa impendulo enganembile? Umqhubi kufanele agweme ukumphathisa amahloni lowo ophendulile. Ngisho nalapho zinganembile, ngokuvamile izimpendulo ziba nokuthile okuyiqiniso. Ngokusebenzisa ikhono lokungacasuli akhethe lokho okungenzeka kuyiqiniso, abuze umbuzo ngamanye amazwi, noma abuze omunye onezelayo, umqhubi angalungisa izinto ngaphandle kokubangela ukuphoxeka okungadingekile.

Ukuze akhuthaze ukuphendula, umqhubi womhlangano kuyoba ngcono agweme imibuzo engabheke ndawo, enjengokuthi, ‘Ukhona omunye osenephuzu?’ Umbuzo othi, ‘Ukhona ongakaphenduli? Yithuba lakho lokugcina leli!’ kungenzeka unezinhloso ezinhle, kodwa cishe ngeke ukhuthaze umuntu ukuba akhululeke ukuphendula. Abazalwane akufanele benziwe bazizwe benecala ngokuthi abaphendulanga sisesekuqaleni isifundo. Kunalokho, kufanele bakhuthazwe ukwabelana nabanye ngalokho abakwaziyo ngoba ukwabelana kuyisenzo sothando. Ngaphezu kwalokho, ngemva kokuba umqhubi ekhombe othile ukuze aphendule, kungaba ngcono angasho ukuthi, “Ngemva kwakhe, sizozwa iphuzu likaMfoweth’ uSibanibani bese kuba elikaDade Sibanibani.” Umqhubi kufanele alalele impendulo kuqala bese kuba yimá enquma ukuthi iyadingeka yini enye.

Ukuphendula Kuyilungelo

Ukuba semihlanganweni yobuKristu kuyimfuneko engokomoya; ukuphendula kuyo kuyilungelo elikhethekile. Izinga esiyisebenzisa ngalo le ndlela ehlukile yokudumisa uJehova “phakathi kwebandla” yilona zinga esilandela ngalo isibonelo sikaDavide, nesilalela ngalo iseluleko sikaPawulu. Ukuhlanganyela kwethu emihlanganweni kubonisa ukuthi siyabathanda abafowethu nokuthi siyingxenye yebandla elikhulu likaJehova. Yikuphi nje lapho obungafuna ukuba khona njengoba ‘ubona usuku lusondela’?—Hebheru 10:25.

[Umbhalo waphansi]

[Izithombe ekhasini 20]

Kokubili ukulalela nokuphendula kubalulekile emihlanganweni yobuKristu

[Isithombe ekhasini 21]

Umqhubi ubonisa isithakazelo esiqotho empendulweni ngayinye