Imibuzo Evela Kubafundi

Kungani u-Elisha acela “izingxenye ezimbili” zomoya ka-Eliya?

Ngaphambi nje kokuba u-Eliya aqede isabelo sakhe sokuba umprofethi kwa-Israyeli, u-Elisha, umprofethi owayemncane kunaye, wamcela: “Ngicela ukuba izingxenye ezimbili emoyeni wakho zize kimi.” (2 AmaKhosi 2:9) Ngomqondo ongokomoya, kusobala ukuthi u-Elisha wayecela izingxenye ezimbili ezinjengalezo ezazinikezwa indodana eyizibulo. (Duteronomi 21:17) Ukuyihlola kafushane le ndaba kuzokucacisa lokhu futhi kuzosisiza ukuba sifunde izifundo kulokho okwenzeka.

Ngokuvumelana nesiqondiso sikaJehova, umprofethi u-Eliya wayegcobe u-Elisha ukuba amlandele esikhundleni. (1 AmaKhosi 19:19-21) U-Elisha waba inceku ka-Eliya ethembekile iminyaka engaba yisithupha futhi wayezimisele ukukwenza lokhu kuze kube sekugcineni. Ngisho nangosuku lokugcina u-Eliya engumprofethi kwa-Israyeli, u-Elisha wanamathela kumfundisi wakhe. Nakuba u-Eliya acela u-Elisha ukuba ayeke ukumlandela, kathathu lo mprofethi osemusha wathi: “Ngeke ngikushiye.” (2 AmaKhosi 2:2, 4, 6; 3:11) Ngempela, u-Elisha wayebheka lo mprofethi osekhulile njengoyise ongokomoya.—2 AmaKhosi 2:12.

Nokho, kwakungeyena yedwa u-Elisha owayeyindodana ka-Eliya engokomoya. U-Eliya no-Elisha babejwayelene neqembu lamadoda elalaziwa ngokuthi “amadodana abaprofethi.” (2 AmaKhosi 2:3) Ukulandisa okukweyesiBili YamaKhosi kubonisa ukuthi la ‘madodana’ nawo ayesondelene kakhulu noyise ongokomoya, u-Eliya. (2 AmaKhosi 2:3, 5, 7, 15-17) Nokho, njengoba u-Elisha ayegcotshelwe ukulandela u-Eliya esikhundleni, wayevelele emadodaneni ka-Eliya angokomoya—wayefana nezibulo. Kwa-Israyeli wasendulo, indodana eyizibulo yayithola izingxenye ezimbili zefa likayise, kuyilapho amanye amadodana ethola ingxenye eyodwa. Ngenxa yalokho, u-Elisha wacela izingxenye ezimbili zefa elingokomoya lika-Eliya.

Kungani u-Elisha enza lesi sicelo ngalesi sikhathi? Ngoba wayesezoqala umsebenzi onzima wokuba umprofethi kwa-Israyeli elandela u-Eliya. U-Elisha waqaphela ukuthi ukuze akwazi ukwenza imisebenzi eyayihilelekile kulesi sabelo esasingaphezu kwamandla akhe, wayedinga amandla angokomoya angaphezulu kakhulu kwawakhe, amandla ayengatholakala kuJehova kuphela. Kwakudingeka abe njengo-Eliya, angesabi. (2 AmaKhosi 1:3, 4, 15, 16) Ngakho, wacela izingxenye ezimbili zomoya ka-Eliya, umoya wokuba nesibindi nowokuba ‘nomhawu ngokuphelele ngoJehova’—izimfanelo ezinhle ezibangelwa umoya kaNkulunkulu. (1 AmaKhosi 19:10, 14) Wamphendula wathini u-Eliya?

U-Eliya wayazi ukuthi u-Elisha wayecele into okunguNkulunkulu kuphela onelungelo lokuphana ngayo hhayi yena. Ngakho ngokuzithoba u-Eliya wamphendula: “Ucele into elukhuni. Uma ungibona lapho ngisuswa kuwe, kuzokwenzeka kuwe ngaleyo ndlela.” (2 AmaKhosi 2:10) Nembala, uJehova wamvumela u-Elisha ukuba abone u-Eliya enyuka ngesivunguvungu. (2 AmaKhosi 2:11, 12) Isicelo sika-Elisha samukelwa. UJehova wamnikeza umoya ayewudinga ukuze aqale umsebenzi wakhe omusha futhi abhekane novivinyo olwalusazokuza.

Namuhla, amaKristu agcotshiwe (ngezinye izikhathi abizwa ngokuthi isigaba sika-Elisha) kanye nazo zonke izinceku zikaNkulunkulu zingathola isikhuthazo esikhulu kulokhu kulandisa kweBhayibheli. Ngezinye izikhathi, lapho sinikezwa isabelo esisha, singase sicabange ukuthi singaphezu kwamandla ethu futhi asisifanele, noma lapho sibhekene nokunganakwa okwandayo noma ukuphikiswa ensimini yethu singase singabi naso isibindi sokuqhubeka nomsebenzi wethu wokushumayela ngoMbuso. Nokho, uma sinxusa uJehova ukuba asisekele, uyosinikeza umoya ongcwele esiwudingayo ukuze sibhekane nezinselele nezimo ezishintshayo. (Luka 11:13; 2 Korinte 4:7; Filipi 4:13) Yebo, njengoba nje uJehova amqinisa u-Elisha ukuze afeze izabelo zakhe ezinzima, nathi sonke, abancane nabadala, uzosisiza ukuze sifeze inkonzo yethu.—2 Thimothewu 4:5.