Induduzo Kwabahluphekile
LAPHO amadoda nabesifazane abathembekile endulo bebhekana nokuhlupheka, babethandaza ngobuqotho kuNkulunkulu becela isiqondiso. Nokho, babethatha nesinyathelo sokukunciphisa lokho kuhlupheka, njengokusebenzisa ubuhlakani ukuze baphunyuke kubacindezeli. Ngokwesibonelo, ukuthembela kuJehova kuhlangene nemizamo yomuntu siqu kwenza uDavide wakwazi ukukhuthazelela usizi lwakhe. Kuthiwani ngathi namuhla?
Lapho ubhekene nokuhlupheka, cishe uthatha isinyathelo sokuxazulula leyo nkinga. Ngokwesibonelo, uma uzithola ungasasebenzi, awuzami yini ukuthola umsebenzi ofanele oyokwazi ukukondla wena nomkhaya wakho? (1 Thimothewu 5:8) Noma uma ugula, awufuni yini usizo lwezokwelapha olufanele? Kuyathakazelisa ukuthi uJesu, owayenamandla avela kuNkulunkulu okwelapha zonke izinhlobo zezifo, wavuma ukuthi ‘abagulayo badinga udokotela.’ (Mathewu 9:12) Noma kunjalo, izinhlupheko zakho zingase zingapheli njalo; kungase kudingeke uzikhuthazelele ngokwezinga elithile.
Kungani ungayisi inkinga kuJehova uNkulunkulu ngomthandazo? Ngokwesibonelo, lapho sifuna umsebenzi, ukuthembela kuNkulunkulu ngomthandazo kuyosisiza simelane nanoma yisiphi isilingo sokuthatha umsebenzi ongqubuzana nezimiso zeBhayibheli. Siyogwema nokuba ubugovu noma uthando lwemali ‘kusidukise okholweni.’ (1 Thimothewu 6:10) Ngempela, lapho senza izinqumo ezibalulekile ngokuqondene nomsebenzi noma izinkinga zomkhaya noma zempilo, singalandela isikhuthazo sikaDavide: “Phonsa umthwalo wakho phezu kukaJehova, yena uyokusekela. Akasoze avumele olungileyo antengantenge.”—IHubo 55:22.
Umthandazo osuka enhliziyweni uyosisiza futhi ukuba sigcine izingqondo zethu zinokulinganisela ukuze ukuhlupheka kwethu kungasikhungathekisi. NjengomKristu oqotho, umphostoli uPawulu, wabhala: “Kukho konke izicelo zenu mazaziwe nguNkulunkulu ngomthandazo nangokunxusa kanye nokubonga.” Ungasiduduza ngayiphi indlela umthandazo oqotho? “Ukuthula kukaNkulunkulu okudlula konke ukucabanga kuyolinda izinhliziyo zenu namandla enu engqondo ngoKristu Jesu.” (Filipi 4:6, 7) Ukuthula kukaNkulunkulu “kudlula konke ukucabanga.” Ngakho-ke, kungasiqinisa lapho sisindwa imizwelo ecindezelayo. ‘Kuyolinda izinhliziyo zethu namandla ethu engqondo,’ ngaleyo ndlela kusisize sigweme ukusabela ngokuphamazela nangokungahlakaniphi, okungase kwenezele ekuhluphekeni kwethu.
Umthandazo ungenza nokuba isimo sibe nomphumela ohlukile. Lapho umphostoli uPawulu eba isiboshwa eRoma, ngokuthobeka wacela amaKristu ayekanye nawo ukuba amthandazele. Kungani uPawulu acela lokho? Wawabhalela: “Nginikhuthaza ikakhulukazi ukuba nenze lokhu ukuze ngibuyiselwe kini ngokushesha.” (Hebheru 13:19) Ngamanye amazwi, uPawulu wayazi ukuthi ukuzwa kukaJehova imithandazo ephikelelayo yamakholwa akanye nawo kwakungase kwenze umahluko ekutheni ukhululwa nini.—Filemoni 22.
Ingabe umthandazo uyowushintsha umphumela wokuhlupheka kwethu? Ungase uwushintshe. Nokho, kufanele siqonde ukuthi uJehova uNkulunkulu angase angayiphenduli imithandazo yethu ngendlela esingafisa ukuba ayiphendule ngayo. UPawulu wathandaza izikhathi eziningana ‘ngeva enyameni’ yakhe, mhlawumbe inkinga eyayisemzimbeni. Nokho, kunokuba akususe lokho kuhlupheka, uNkulunkulu watshela uPawulu: “Umusa wami ongafanelwe ukwanele; ngoba amandla ami enziwa aphelele ebuthakathakeni.”—2 Korinte 12:7-9.
Ngakho-ke, ukuhlupheka kwethu kungase kungapheli ngokushesha. Nokho, siyoba nethuba lokufakazela ukuthembela kwethu kuBaba wethu wasezulwini. (Jakobe 1:2-4) Qiniseka ukuthi ngisho noma uJehova uNkulunkulu engakuqedi ukuhlupheka, ‘angayenza indlela yokuphuma ukuze sikwazi ukukukhuthazelela.’ (1 Korinte 10:13) Kuyaphawuleka ukuthi uJehova ubizwa “[ngo]Nkulunkulu wenduduzo yonke, osiduduza osizini lwethu lonke.” (2 Korinte 1:3, 4) UNkulunkulu angasinika esikudingayo ukuze sikhuthazele, futhi sinethemba lokuphila okuphakade.
IZwi likaNkulunkulu, iBhayibheli, lithembisa ukuthi uJehova “uyosula zonke izinyembezi emehlweni abo, ukufa ngeke kusaba khona, noma ukulila noma ukukhala noma ubuhlungu ngeke kusaba khona.” (IsAmbulo 21:3, 4) Ingabe ukuba khona kwezwe elingenakho ukuhlupheka kuzwakala kungakholeki? Kungezwakala kanjalo uma ubulokhu ujwayelene nokuphila ngokuhlupheka. Noma kunjalo, ukukhululeka ekwesabeni nasosizini yikona uNkulunkulu akuthembisile, futhi injongo yakhe iyophumelela nakanjani.—Isaya 55:10, 11.
[Izithombe ekhasini 9]
Ukusuka ekuphelelweni ithemba kuya ekukhululekeni