“UNkulunkulu Wokuthula” Uyabakhathalela Abahluphekayo

IBHAYIBHELI likwenza kucace ukuthi uDavide wasendulo wayekwazi kahle ukuhlupheka. Iminyaka ethile wayephila njengombaleki, elokhu ezingelwa yinkosi embi nenenkani, eyayizimisele ukumbulala. Phakathi nalenkathi yokuhlupheka, uDavide wayecasha ezindaweni ezikude nabantu. Kodwa wayenza okuthile okungaphezulu kwalokho. Wayethandaza kuJehova ngobuqotho ngokuhlupheka kwakhe. Kamuva wabhala ngokuqondene nosizi lwakhe: “Ngiyakhala kuJehova ngezwi lami. . . . Ngiyathulula ebusweni bakhe isikhalo sami, ngibonakalisa kuye inhlupheko yami.”—IHubo 142:1, 2.

Namuhla, abanye bangakuhleka usulu ukwethembela kukaDavide kuNkulunkulu. Bangase bathi umthandazo umane nje uyisu lokululamisa ingqondo futhi uchitha isikhathi ekuphileni okungokoqobo. Nokho, ukuthembela kukaDavide kuNkulunkulu kwakungekhona okungafaneleki, ngoba izitha zakhe zanqotshwa ekugcineni. Ebheka emuva kokuhlangenwe nakho kwakhe, uDavide wabhala: “Nasi isihlupheki esakhala, uJehova wezwa, wasikhulula kuzo zonke izinhlupheko zaso.” (IHubo 34:6) UNkulunkulu weqiniso uDavide ayephendukela kuye ubizwa ngokuthi “uNkulunkulu wokuthula” kwezinye izindawo. (Filipi 4:9; Heberu 13:20) Ingabe uzoyiletha impumuzo ekuhluphekeni, kube ukuthula kithi?

UJehova Uyakukhathalela

UJehova akayena ongenandaba mayelana nezinhlupheko zabantu bakhe. (IHubo 34:15) Akagcini ngokuqaphela izidingo zezinceku zakhe njengeqembu kodwa futhi nezomuntu ngamunye omesabayo. Lapho enikezela ithempeli laseJerusalema lasendulo, uSolomoni wancenga uJehova ukuba alalele “namuphi umkhuleko nakuphi ukunxusa noma ngumuphi umuntu noma yibo bonke abantu bakho uIsrayeli abayakwazi, kube-yilowo nalowo inhlupheko yakhe nosizi lwakhe.” (2 IziKronike 6:29, omalukeke sizenzele.) Njengoba uSolomoni avuma, umuntu ngamunye unokuhlupheka kwakhe siqu okuhlukile akukhuthazelelayo. Komunye umuntu kungase kube ukugula. Komunye kube ukucindezeleka ngokomzwelo. Abanye bangase bahlupheke ngenxa yokushonelwa umuntu abamthandayo. Ukuswela umsebenzi, izinkinga zezomnotho nezinkinga zomkhaya nakho kuyizinhlupheko ezivamile kulezi zikhathi ezinzima.

Ake uthi ukucabanga ‘ngenhlupheko yakho nosizi lwakho.’ Ngezinye izikhathi mhlawumbe uye wazizwa njengomhubi uDavide, owabhala: “Bengibheka ukuhawukelwa, kepha akwabakho, nabaduduzayo, kepha angibatholanga.” Nokho, ungaqiniseka ukuthi uNkulunkulu unendaba ngesimo sakho, ngoba kamuva kulo leli hubo uDavide wabhala: “UJehova uyabalalela abampofu, neziboshwa zakhe akazideleli.”—IHubo 69:20, 33.

Lapho sisebenzisa amazwi kaDavide ngomqondo obanzi, singaqiniseka ukuthi uMdali wesintu uyayilalela imithandazo yalabo ababoshwe yizinhlupheko zabo ngomqondo othile. Ngaphezu kwalokho, uyasabela ekuhluphekeni kwabo. Cabanga ngamazwi alandelayo aveza isihawu sikaJehova ngabahluphekayo.

“Aniyikuhlupha-mfelokazi nentandane. Uma ubahlupha nakanjani, bakhale kimi nakancane, ngiyakuzwa nokuzwa ukukhala kwabo; ulaka lwami luyakuvutha.”—Eksodusi 22:22-24.

“Ngokuqinisekile ngeke yini uNkulunkulu abangele ukuba benzelwe ubulungisa abantu bakhe abakhethiweyo abakhamuluka kuye imini nobusuku, ngisho nakuba engobhekakade kubo?”—Luka 18:7.

“Iyakukhulula ompofu ozikhalela kuyo, nohluphekayo ongenamsizi. Iyakuhawukela odangeleyo nompofu; iyakusindisa imiphefumulo yabampofu. Iyakukhulula umphefumulo wabo okhahlweni nasendluzuleni; igazi labo liyakuba-yigugu emehlweni ayo.”—IHubo 72:12-14.

“Othinta nina [abantu bakaNkulunkulu abasemhlabeni] uthinta inhlamvu yeso lakhe [uNkulunkulu].”—Zakariya 2:8.

Lezi zibonelo ezimbalwa zibonisa ukuthi uMdali wethu unesithakazelo esijulile enhlalakahleni yabantu bakhe. Ngakho-ke sinesizathu esihle sokulandela isiyalo somphostoli uPetru: “[Phonsani] konke ukukhathazeka kwenu phezu kwakhe, ngoba uyanikhathalela.” (1 Petru 5:7) Kodwa uyosisiza kanjani uNkulunkulu phakathi nezikhathi zokuhlupheka?

Indlela UNkulunkulu Abasiza Ngayo Abahluphekayo

Njengoba sibonile, lapho uDavide esekuhluphekeni, wayethandaza kuNkulunkulu ngobuqotho ecela isiqondiso. Ngesikhathi esifanayo, wathatha isinyathelo kuqala sokuba enze isimo sibe ngcono, wasebenzisa ubuhlakani ukuze aphunyule kubazingeli bakhe. Ngakho ukuthembela kuJehova, kuhlangene nomzamo wakhe siqu, kwenza uDavide wakwazi ukukhuthazelela ukuhlupheka kwakhe. Yini esingayifunda kulokhu?

Lapho sibhekene nokuhlupheka, ngokuqinisekile akukhona okungalungile ukuba sithathe isinyathelo esinengqondo ukuze sixazulule inkinga. Ngokwesibonelo, uma umKristu ezithola eswele umsebenzi, ngeke yini enze umzamo wokuthola umsebenzi? Noma uma ehlushwa ukugula okuthile, ngeke yini afune ukwelashwa? Empeleni ngisho noJesu, owayenamandla okwelapha zonke izinhlobo zokugula, wavuma ukuthi ‘abagulayo badinga udokotela.’ (Mathewu 9:12; qhathanisa neyoku-1 Thimothewu 5:23.) Yiqiniso, ezinye izinhlupheko azinakususwa; kumelwe zimane nje zikhuthazelelwe. Noma kunjalo, umKristu weqiniso akakubheki ukuhlupheka ngokwako njengento enhle, njengoba kwenza abathile. (Qhathanisa neyoku-1 AmaKhosi 18:28.) Kunalokho, uthatha noma iziphi izinyathelo angazithatha ukuze abhekane nokuhlupheka kwakhe.

Nokho, ngesikhathi esifanayo kunengqondo ukuyisa indaba kuJehova ngomkhuleko. Ngani? Okokuqala, ukuncika kuMdali wethu kusisiza ukuba ‘siqiniseke ngezinto ezibaluleke ngokwengeziwe.’ (Filipi 1:10) Ngokwesibonelo, lapho sifuna umsebenzi, ukuthembela kuNkulunkulu ngomthandazo kuyosisiza ukuba singamukeli umsebenzi ongqubuzana nezimiso zeBhayibheli. Siyogwema nokuba uthando lwemali ‘lusidukise okholweni.’ (1 Thimothewu 6:10) Ngempela, lapho senza izinqumo ezinzulu—eziqondene nomsebenzi noma noma yisiphi esinye isici sokuphila—kudingeka silandele isiyalo sikaDavide: “Phonsa phezu kukaJehova umthwalo wakho, uzakukuphasa; akayikuvuma naphakade ukuba olungileyo azanyazanyiswe.”—IHubo 55:22.

Umthandazo usisiza nokuba sigcine ingqondo yethu inokulinganisela, ukuze ukuhlupheka kwethu kungasikhungathekisi. Umphostoli uPawulu wabhala: “Kukho konke izicelo zenu mazaziwe uNkulunkulu ngomthandazo nangokunxusa kanye nokubonga.” Kube namuphi umphumela? “Ukuthula kukaNkulunkulu okudlula konke ukucabanga kuyoqapha izinhliziyo zenu namandla enu engqondo ngoKristu Jesu.” (Filipi 4:6, 7) Yebo, ukuthula, ukuthula kukaNkulunkulu. Lokho kuthula “kudlula konke ukucabanga,” ngakho kungasizimazisa lapho sisindwa umthwalo wemizwelo ecindezelayo. ‘Kuyoqapha izinhliziyo zethu namandla ethu engqondo,’ kanjalo kusisize sigweme ukusabela ngamawala nangokungahlakaniphi, okungase kwenezele ekuhluphekeni kwethu.—UmShumayeli 7:7.

Umthandazo ungenza okungaphezu kwalokho futhi. Ungenza isimo sibe nomphumela ohlukile. Cabanga ngesibonelo esiseBhayibhelini. Lapho umphostoli uPawulu eboshiwe eRoma, wakhuthaza amaKristu akanye nawo ukuba amthandazele. Ngani? Wawabhalela: “Nginikhuthaza ikakhulukazi ukuba nenze lokhu, ukuze ngibuyiselwe kini ngokushesha.” (Heberu 13:19) UPawulu wayazi ukuthi imithandazo ephikelelayo yamakholwa akanye nawo yayingenza umehluko ekutheni ukhululwa nini.—Filemoni 22.

Ingabe umthandazo uyowushintsha umphumela wokuhlupheka kwakho? Ungase uwushintshe. Nokho, kufanele siqaphele ukuthi uJehova akayiphenduli njalo imithandazo yethu ngendlela esingase siyilindele. Ngokwesibonelo, uPawulu wathandaza ngokuphindaphindiwe ngokuqondene ‘neva lakhe enyameni’—mhlawumbe inkinga esemzimbeni ehlobene namehlo akhe. Kunokuba akususe lokho kuhlupheka, uNkulunkulu watshela uPawulu: “Umusa wami ongafanelwe ukwanele; ngoba amandla ami enziwa aphelele ebuthakathakeni.”—2 Korinte 12:7-9.

Ngakho ngezinye izikhathi izinhlupheko zethu ngeke zisuswe. Kunalokho, siyoba nethuba lokufakazela ukuthi siyethembela kuMdali wethu. (IzEnzo 14:22) Ngaphezu kwalokho, singaqiniseka ukuthi ngisho noma uJehova engakususi ukuhlupheka, ‘uyokwenza nendlela yokuphuma ukuze sikwazi ukukukhuthazelela.’ (1 Korinte 10:13) Yebo, kungesizathu esihle ukuthi uJehova ubizwa ngokuthi ‘uNkulunkulu wenduduzo yonke, osiduduza osizini lwethu lonke.’ (2 Korinte 1:3, 4) Usinika esikudingayo ukuze sikhuthazele sinokuthula okukhulu.

Ngokushesha—Izwe Elingenakho Ukuhlupheka!

UMdali uthembisa ukuthi ngoMbuso wakhe, ngokushesha uzoziqeda izinhlupheko zesintu. Uzokufeza kanjani lokhu? Ngokususa uSathane uDeveli, umbangeli wokuhlupheka oyinhloko nesitha esiphambili sokuthula, iBhayibheli elisibiza ngokuthi “unkulunkulu walesisimiso sezinto.” (2 Korinte 4:4) Kodwa ukubusa kwakhe isintu kuzonqamuka kungekudala. Ukususwa kwakhe kuzovula indlela yokuba labo abesaba uNkulunkulu bathole izibusiso ezingenakubalwa. IBhayibheli lithembisa ukuthi uJehova “uyosula zonke izinyembezi emehlweni [abo], futhi ukufa ngeke kusaba khona, noma ukulila noma ukukhala noma ubuhlungu ngeke kusaba khona. Izinto zangaphambili zidlulile.”—IsAmbulo 21:1-4.

Ingabe ukuba khona kwezwe elingenakho ukuhlupheka kuzwakala kungakholeleki? Sesikujwayele kakhulu ukuphila ngokuhlupheka kangangokuthi kunzima kithi ukukucabanga kungasekho. Kodwa ukukhululeka ekwesabeni, ekukhathazekeni nasezinhlekeleleni yilokho kanye uNkulunkulu ayekuhlosele isintu lapho edala, futhi injongo yakhe izophumelela.—Isaya 55:10, 11.

Yileli ithemba uSonia, uFabiana no-Ana, okukhulunywe ngabo esihlokweni sokuqala, abalithola. USonia, owashonelwa amadodana akhe amabili ebulawa yingculaza, wathola ukuthula okukhulu ethembeni elinikezwa yiBhayibheli—uvuko lwabalungile nabangalungile. (IzEnzo 24:15) “Engiqiniseka ngakho,” esho “ukuthi ithemba lethu lidlula noma yibuphi ubuhlungu.”

Lapho esahlala ekhaya lezintandane, u-Ana wavakashelwa omunye woFakazi BakaJehova. “Wangibonisa igama likaJehova eBhayibhelini,” kusho u-Ana, “futhi ngakhala izinyembezi zenjabulo. Ngangiludinga kakhulu usizo, futhi ngathola ukuthi ukhona uNkulunkulu osikhathalelayo.” Ngemva kokuphuma ekhaya lezintandane, u-Ana wamukela isifundo seBhayibheli futhi wafunda okwengeziwe ngezithembiso zikaJehova. Wabe esenikezela ukuphila kwakhe kuJehova futhi wakubonisa ngokubhapathizwa. “Kusukela lapho ngiye ngaqhubeka ngithembela kuJehova ngomthandazo, futhi siyangiduduza isiqinisekiso sokuthi uzongisiza.”

UFabiana naye, ngokufunda ngezithembiso zikaNkulunkulu ngekusasa uye wathola induduzo nokuthula kwengqondo okukhulu lapho ehlupheka. “Ukufunda iqiniso eBhayibhelini kunjengokuphuma endaweni emnyama bhuqé ehwaqabalisayo ungene ekamelweni elikhanya bhá nelijabulisayo.”—Qhathanisa neHubo 118:5.

Kodwa ukuthula kwangempela embulungeni yonke kuyofika kanjani futhi nini? Ake sibone ezihlokweni ezilandelayo.

[Ibhokisi ekhasini 6]

Izici Eziningi Zokuhlupheka

▪ Cishe ingxenye eyodwa kwezine yabantu emhlabeni idla imbuya ngothi, futhi izigidi ezengeziwe ziphila ezimweni ezingamfanele umuntu ezisongela ukuphila kwazo.

▪ Izingane ezingaphezu kwezigidi ezingu-200 azondlekile.

▪ Unyaka nonyaka isifo sohudo sibulala izingane ezingaphansi kweminyaka emihlanu ubudala ezingaba yizigidi ezintathu.

▪ Izifo ezithathelwanayo zabulala abantu abangaba yizigidi ezingu-16,5 ngo-1993 kuphela. Njengoba amanye amazwe ezihlukanisa ngendlela ehlukile izifo, kungenzeka ukuthi inani eliyilonalona liphakeme kakhulu kunaleli.

▪ Abantu abalinganiselwa ezigidini ezingu-500 banohlobo oluthile lwenkinga yengqondo.

▪ Amanani abazibulalayo anda ngokushesha entsheni kunanoma yisiphi esinye isigaba sobudala.

▪ “Indlala nokuswela umsebenzi kuye kwaba izici ezingathandeki emhlabeni,” kusho i-Unesco Courier. “Emazweni ayisikhombisa acebe kunawo wonke emhlabeni kunabantu abayizigidi ezingu-35 abaswele umsebenzi, futhi eBrazil nje kuphela kunezisebenzi eziyizigidi ezingu-20 okuthi noma zisebenza zihluleke ngisho nokudla zisuthe.”

[Izithombe ekhasini 7]

Umthandazo ungasisiza sigxile esithembisweni sikaNkulunkulu sezwe elingenakho ukuhlupheka