Ukudumisa UJehova Esikoleni
EMHLABENI wonke, oFakazi BakaJehova abasebasha bathola izindlela zokudumisa uNkulunkulu esikoleni—kokubili ngenkulumo nangokuziphatha kwabo. Phawula lokhu okuhlangenwe nakho okubonisa intshiseko yabo yobusha.
UFakazi osemusha eGrisi wabelwa ukuba abhale umbiko ngokungcoliswa komoya emhlabeni. Ngemva kokubheka kuyi-Watch Tower Publications Index, wathola ukwaziswa okuwusizo kumagazini i-Phaphama!, wayesebonisa esiphethweni sendaba yakhe ukuthi ukwaziswa ukuthathe kuyo. Uthisha wakhe wamtshela ukuthi iyindaba enhle kunazo zonke ake azifunda. Kamuva uthisha wasebenzisa lokho kwaziswa emhlanganweni wothisha futhi kwaba nemiphumela emihle. Ngakho lo dade osemusha wanquma ukunikeza uthisha omagazini abengeziwe be-Phaphama! kanye nalona onochungechunge lwezihloko ezithi “Othisha—Besiyoba Yini Ngaphandle Kwabo?” Kamuva lo thisha wayitusa i-Phaphama! ekilasini, futhi abanye abafundi baqala ukucela amakhophi. Kwadingeka lo dade eze namakhophi e-Phaphama! esikoleni ukuze bawafunde.
EBenin, e-Afrika, umKristu osemusha wabhekana nokucindezelwa okungavamile. Njengenhlalayenza, abazali abaningi babafundi basesikoleni sakhe bahlangana ukuze baqashe othisha abazosiza izingane zabo ezifundweni ezinzima ukuze zilungele ukuhlolwa. Nokho, ukuze baqhube lezi zifundo othisha bakhetha usuku lwangoMgqibelo ekuseni. Lo Fakazi osemusha wenqaba: “UMgqibelo ekuseni yisikhathi lapho lonke ibandla lihlangana khona ukuze liyoshumayela. Lesi isikhathi esijabulisa kakhulu kimi, futhi akukho lutho oluyongenza ngiphuthe!” Uyise, ongumzali ongayedwa futhi onguFakazi, wavuma futhi wazama ukuba iqembu labazali nothisha lishintshe lesi simiso. Kodwa, bonke benqaba. Le ntombazanyana yanquma ukuba ingayitholi leyo mfundo. Esikhundleni salokho yahlanganyela nebandla lakubo emsebenzini wokushumayela. Ayefunda nabo bamhleka, bemkhuthaza ukuba ayeke ukushumayela kanye noNkulunkulu wakhe. Babeqiniseka ngokuthi wayengeke aphumelele lapho sekuhlolwa. Nokho, kwenzeka isimanga, lelo qembu elalifundiswa othisha alizange liphumelele, kanti lo dadewethu omncane waphumelela. Akubuzwa, ukugconwa kwaphela. Manje abafundi bathi kuye, “Kufanele uqhubeke nokukhonza uNkulunkulu wakho.”
ECzech Republic, intombazane eneminyaka engu-12 ubudala kwakudingeka ilungiselele umbiko ngencwadi. Unina wayikhuthaza ukuba isebenzise incwadi ethi Umuntu Omkhulu Kunabo Bonke Owake Waphila. Yaqala umbiko wayo ngemibuzo ethi: “Ucabangani? Ubani ongaba umuntu omkhulu kunabo bonke owake waphila?” Yachaza uJesu, ukuphila kwakhe emhlabeni nezimfundiso zakhe. Yabe isixoxa ngesahluko esithi “Isifundo Sokuthethelela.” Uthisha wakhe wababaza, “Wenze umbiko omuhle ukuyedlula yonke owake wayenza!” futhi ngenjabulo wayithatha ikhophi yencwadi. Nabanye abafundi bafuna awabo amakhophi. Ngakusasa, le ntombazane yakujabulela ukuhambisa izincwadi ezingu-18.
Leyo ntsha ithola injabulo enkulu ngokudumisa uJehova esikoleni. Sonke kufanele silingise intshiseko yayo yobusha.