Ukuthola Ukukhanya Kweqiniso

KWAKUNGU-DECEMBER 18, 1810 sekuqala ukuhwalala. Ngasogwini oluseningizimu-mpumalanga yeScotland, umkhumbi omncane wempi waseBrithani i-HMS Pallas waduka olwandle olwalunesiphepho. Njengoba kwakuqhubeka kuba mnyama futhi likhithika kwaba nzima ngokwengeziwe ngeqembu lamatilosi ukubona izibani eziqondisa imikhumbi elalizidinga ukuze liqondise umkhumbi uye endaweni ephephile. Kumelwe ukuba kwathi gidi lapho libona izibani ezithile futhi laqondisa umkhumbi walo waya ngakuzo! Nokho, kuyadabukisa ukuthi lezi zibani kwakungezona lezo elalizidinga. Empeleni, kwakuyimililo eseduze kogu eyayibaswe izisebenzi. I-Pallas yaqondiswa emadwaleni futhi yaphahlazeka yaphela. Kwaminza amatilosi angu-11. Yeka inhlekelele!

Kule ndaba ye-Pallas, yiphutha elabangela le nhlekelele. Nokho, ngezinye izikhathi amatilosi abhekana nezingozi ezinkulu kakhulu—izibani eziwaholela ophathe. Ngokwencwadi ethi Wrecks, Wreckers and Rescuers lezo zibani zazifakwa ukuze ziyengele imikhumbi ogwini olunamadwala ukuze iphahlazeke bese iyaphangwa.

‘Imibhalo Engcwele Engakuholela Ensindisweni’

Uma ufuna ukukhanya, ubhekene nezingozi ezifana nalezo lawo matilosi ayebhekana nazo. Ungase ulandele ukwaziswa okudukisayo, noma ungase ube ngisho nayisisulu sokukhohliswa ngamabomu. Zombili lezi zindlela zingase ziholele enhlekeleleni. Yini ongayenza ukuze uzivikele? Qiniseka ukuthi umthombo wakho wolwazi ungoweqiniso futhi unokwethenjelwa. Sekuyiminyaka engaphezu kwengu-125 lo magazini utusa iBhayibheli, iZwi likaNkulunkulu eliphefumulelwe, njengomthombo wokukhanya onokwethenjelwa kunayo yonke ekhona ngoba liqukethe “imibhalo engcwele enamandla okukuhlakaniphisa nokukuholela ensindisweni.”—2 Thimothewu 3:15-17, New English Bible.

Yiqiniso, ukuze wethembe iBhayibheli njengokukhanya okunokwethenjelwa okungakuqondisa, kunengqondo ukuhlolisisa ubufakazi bokufaneleka kwalo. (IHubo 119:105; IzAga 14:15) Unganqikazi ukubhalela abanyathelisi balo magazini ukuze uthole ukwaziswa okuye kwasiza izigidi zagculiseka ukuthi ngempela iBhayibheli liphefumulelwe uNkulunkulu. Ngokwesibonelo, funda incwajana ethi Incwadi Yabo Bonke Abantu.a Iqukethe ukwaziswa okuningi okubonisa ukuthi iBhayibheli linembile, liyiqiniso futhi liphefumulelwe.

Amaqiniso Ayisisekelo

Ngakho, yimaphi amaqiniso ayisisekelo aqukethwe “imibhalo engcwele”? Cabanga ngezibonelo ezilandelayo.

Kukhona uNkulunkulu oyedwa onguMninimandla onke nonguMdali wazo zonke izinto. (Genesise 1:1) Sikhona nje “ngoba [uNkulunkulu] wadala zonke izinto” futhi wasipha ukuphila. (IsAmbulo 4:11) Yingakho kunguye kuphela okufanele simkhulekele. UMdali ungukuphela koMthombo wako konke ukukhanya. (IHubo 36:9; Isaya 30:20, 21; 48:17, 18) Unegama afuna ukuba silisebenzise. (Eksodusi 3:15) Lelo gama, elabhalwa ngezinhlamvu zesiHebheru futhi elibhalwa ngokuthi YHWH, livela izikhathi ezingaba ngu-7 000 eBhayibhelini. Sekuyiminyaka eminingi kusetshenziswa igama elithi “Jehova” ngesiZulu.—IHubo 83:18.

UJehova wadala amadoda nabesifazane ukuze baphile phakade ePharadesi khona lapha emhlabeni. Wapha isintu izimfanelo ezingokomoya ezifana nezakhe. Wasipha iziphiwo namakhono ayezosenza sijabulele ukuphila okuphakade okwanelisayo emhlabeni. (Genesise 1:26-28) Akukaze kube injongo yakhe ukuba umhlaba ube indawo yokuvivinya amadoda nabesifazane—ibhuloho lokudlulela ekuphileni komoya kwasezulwini, njengokungathi yilapho kuphela ababengajabulela khona ubuhlobo noNkulunkulu.

Indalo kaNkulunkulu engabantu yayingenasici. Ububi baqala lapho ezinye zezidalwa zikaNkulunkulu—ezingabantu nesomoya—ziyisebenzisa kabi inkululeko yazo yokuzikhethela futhi zihlubuka kuNkulunkulu. (Duteronomi 32:5) Abazali bethu bokuqala bagabadela ilungelo lokuba bazinqumele okuhle nokubi. (Genesise 2:17; 3:1-5) Lokho kwaletha ukufa emkhayeni wesintu. (Genesise 3:19; Roma 5:12) Ukuze alungise izimpikiswano ezaphakanyiswa ukuhlubuka, uJehova wanquma ukubuvumela okwesikhashana ububi. Kodwa injongo yakhe ngomhlaba nangomkhaya wesintu ayizange ishintshe. (Isaya 45:18) Ngakho, amadoda nabesifazane basazohlala phakade ePharadesi emhlabeni ohlanziwe.—Mathewu 6:10; IsAmbulo 21:1-5.

UJesu Kristu akayena uNkulunkulu uMninimandla onke, kodwa uyiNdodana kaNkulunkulu. UJesu Kristu ngokwakhe wafundisa abalandeli bakhe ukuthandaza: “Baba wethu osemazulwini, malingcweliswe igama lakho.” (Mathewu 6:9) Akakaze athi uyalingana noNkulunkulu. Kunalokho, wathi: “UBaba mkhulu kunami.”—Johane 14:28.

UJesu unendima ebalulekile ekufezekeni kwenjongo kaNkulunkulu. UNkulunkulu wamthuma “njengokukhanya ezweni, ukuze wonke umuntu oba nokholo [kuye] angahlali ebumnyameni.” (Johane 12:46) Ngokomphostoli uPetru, “ayikho insindiso kunoma ubani omunye.” (IzEnzo 4:12) Lokhu kuyiqiniso ngoba insindiso yethu ixhomeke egazini likaKristu eliyigugu. (1 Petru 1:18, 19) UJesu Kristu wanikela ngokuphila kwakhe njengomhlatshelo wesihlengo ukuze akhulule isintu esonweni eseza ngabazali baso bokuqala, u-Adamu no-Eva. (Mathewu 20:28; 1 Thimothewu 2:6) UJesu wabuye wasetshenziswa uNkulunkulu ekwambuleni intando nenjongo yaKhe.—Johane 8:12, 32, 46, 47; 14:6; IzEnzo 26:23.

UNkulunkulu uye wamisa uMbuso wasezulwini, noma uhulumeni, owakhiwa uJesu Kristu nalabo abakhethwe esintwini. Lesi sihloko sitholakala ngokuphindaphindiwe kulo lonke iBhayibheli. UNkulunkulu uphathise lo hulumeni umsebenzi wokuqinisekisa ukuthi intando yakhe iyenziwa emhlabeni njengasezulwini. (Mathewu 6:10) Ekuqaleni kwakungeyona injongo kaNkulunkulu ukuba abanye abantu baye ezulwini. Ikhaya labo kwakuzoba umhlaba. Kodwa ngemva kokuwela komuntu esonweni, uNkulunkulu wahlela into entsha. Wahlela ukukhetha abantu “kuzo zonke izinhlanga nezilimi nabantu nezizwe” ukuze ‘babuse njengamakhosi’ noKristu kuhulumeni wasezulwini. (IsAmbulo 5:9, 10) Maduze lowo hulumeni onguMbuso “uyochoboza uqede” zonke izinhlobo zokubusa kwabantu eziye zabangela ukuhlupheka okukhulu nobuhlungu emkhayeni wesintu.—Daniyeli 2:44.

Umphefumulo uyafa. Leli qiniso leBhayibheli eliyisisekelo licacisa okuningi ngomuntu nangamathemba akhe. Lisusa nokungaqondi kanye nokukhohliswa okuye kwadida abantu ngesimo sabafileyo.

Incwadi yokuqala yeBhayibheli iyasitshela: “UJehova uNkulunkulu wabe esebumba umuntu ngothuli lomhlabathi wafuthela emakhaleni akhe umoya wokuphila, umuntu waba ngumphefumulo ophilayo.” (Genesise 2:7) Uyazi ukuthi kusho ukuthini lokho? Umphefumulo awusona isithunzi esithile esingaphakathi kumuntu. Umuntu akanawo umphefumulo. Ungumphefumulo—inhlanganisela yezinto ezitholakala ‘othulini lomhlabathi’ namandla okuphila avela kuNkulunkulu. Umphefumulo uyafa. Lapho umuntu efa, umphefumulo uyafa.—Genesise 3:19; UmShumayeli 9:5, 10.

Abafileyo bangabuyiselwa ekuphileni ngovuko. Lapho isikhathi uNkulunkulu abuvumele ngaso ububi okwesikhashana sesiphelile, ‘bonke abasemathuneni bayokhunjulwa futhi bayolizwa izwi likaJesu baphume, abenze okuhle baphumele ovukweni lokuphila, ababenomkhuba wokwenza okubi ovukweni lokwahlulelwa.’ (Johane 5:28, 29; IzEnzo 24:15) Uvuko luyokwenza abantu babuyele ekuphileni kobuntu epharadesi emhlabeni, uNkulunkulu ayekuhlosele umkhaya wakhe wesintu ekuqaleni.

Hlola ImiBhalo Ngokucophelela Nsuku Zonke

Uyabona ukuthi ulwazi lwala maqiniso ayisisekelo lungakusiza kanjani? Kulezi zikhathi ezibucayi ezineziyaluyalu, lolu lwazi lungakuvikela ‘kulokho okubizwa ngokungeyikho ngokuthi “ulwazi”’ okusakazwa uSathane uDeveli. Uzenza “ingelosi yokukhanya,” futhi abameleli bakhe bazenza “izikhonzi zokulunga.” (1 Thimothewu 6:20; 2 Korinte 11:13-15) Ulwazi olunembile lweBhayibheli lungakuvikela kulokho okubizwa ngokuthi ukukhanya okusekelwe kumafilosofi ‘ezihlakaniphi nongqondongqondo,’ bezwe ‘abalé lona kanye izwi likaJehova.’—Mathewu 11:25; Jeremiya 8:9.

Ngosuku lomphostoli uJohane zaziziningi kakhulu izimfundiso namafilosofi adukisayo, ngakho waxwayisa amaKristu ekhulu lokuqala: “Ningakholwa yizo zonke izinkulumo eziphefumulelwe.” Wathi: “Zivivinyeni izinkulumo eziphefumulelwe ukuze nibone ukuthi zivela kuNkulunkulu yini.” (1 Johane 4:1) Cabanga ngalo mfanekiso. Uma ubungathola umyalezo ongaba nethonya elikhulu ekuphileni kwakho, ingabe ubungamane uwamukele kalula nje ngoba ubonakala uvela emthonjeni onokwethenjelwa? Lutho neze. Ngaphambi kokuba uthathe isinyathelo, ubuzowuhlolisisa lowo mthombo nokuqukethwe yilowo myalezo.

Ngokwenza ukuba kube nombhalo olotshiwe ophefumulelwe oqukethe amaqiniso ayisisekelo, uNkulunkulu uye wenza ukuba ukwazi ukwenza lokho kanye—‘uqiniseke’ ukuthi izibani eziqondisayo ozilandelayo ziyiqiniso. (1 Thesalonika 5:21) Ngekhulu lokuqala abantu ababenengqondo enhle batuswa ngoba ‘bahlola ngokucophelela imiBhalo nsuku zonke’ ukuze baqiniseke ukuthi lokho ababekufunda kwakuyiqiniso isibili. (IzEnzo 17:11) Nawe ungenza okufanayo. Vumela iBhayibheli ukuba likuqondise endaweni ephephile ‘njengesibani esikhanya endaweni emnyama.’ (2 Petru 1:19-21) Uma wenza kanjalo, “uyoluthola ulwazi ngoNkulunkulu” oluletha ukukhanya kweqiniso.—IzAga 2:5.

[Umbhalo waphansi]

[Isithombe ekhasini 4]

IZwi likaNkulunkulu linjengesibani

[Isithombe ekhasini 5]

Ubani igama likaNkulunkulu?

[Isithombe ekhasini 5]

Liyini ikusasa lesintu?

[Isithombe ekhasini 6]

Ingabe uJesu unguNkulunkulu uMninimandla onke?

[Isithombe ekhasini 6]

Bakuphi abafileyo?

[Isithombe ekhasini 7]

Uvuko lwabafileyo lungelinye lamaqiniso ayisisekelo afundiswa iBhayibheli