Gxila Ebuhleni Benhlangano KaJehova
“Ngokuqinisekile siyokwaneliswa ubuhle bendlu yakho.”—IHUBO 65:4.
1, 2. (a) Amalungiselelo asethempelini ayezoba naliphi ithonya kubantu bakaNkulunkulu? (b) UDavide wakusekela kanjani ukwakhiwa kwethempeli?
UDAVIDE wakwa-Israyeli wasendulo ungomunye wabantu abavelele okukhulunywa ngabo emiBhalweni YesiHebheru. Lo malusi owayengumculi, umprofethi nenkosi, wayethembele ngokuphelele kuJehova uNkulunkulu. Ubuhlobo obuseduze uDavide ayenabo noJehova bamenza wafisa ukumakhela indlu. Leyo ndlu, noma ithempeli, yayiyoba isikhungo sokukhulekela kweqiniso kwa-Israyeli. UDavide wayazi ukuthi amalungiselelo asethempelini ayezolethela abantu bakaNkulunkulu injabulo nezibusiso. Ngakho-ke, wahlabelela: “Uyajabula umuntu omkhethayo [wena Jehova] wenze ukuba asondele, ukuze ahlale emagcekeni akho. Ngokuqinisekile siyokwaneliswa ubuhle bendlu yakho, indawo engcwele yethempeli lakho.”—IHubo 65:4.
2 UDavide akavunyelwanga ukuba aqondise ukwakhiwa kwendlu kaJehova. Kunalokho, lelo lungelo lagcinelwa indodana yakhe uSolomoni. UDavide akazange abubule ngenxa yokuthi ilungelo ayelifisa ngobuqotho lanikwa omunye umuntu. Okwakubalulekile kuye kwakuwukuba ithempeli lakhiwe. Wawusekela ngenhliziyo yonke umsebenzi ngokunika uSolomoni amapulani okwakha ayewathole kuJehova. Ngaphezu kwalokho, uDavide wahlela izinkulungwane zamaLevi ngezigaba zenkonzo futhi wanikela ngegolide nesiliva eliningi ukuze kwakhiwe ithempeli.—1 IziKronike 17:1, 4, 11, 12; 23:3-6; 28:11, 12; 29:1-5.
3. Izinceku zikaNkulunkulu zinasiphi isimo sengqondo ngamalungiselelo okukhulekela kweqiniso?
3 Ama-Israyeli athembekile awasekela amalungiselelo okukhulekela kweqiniso endlini kaNkulunkulu. Njengezinceku zikaJehova zanamuhla, nathi siyawasekela amalungiselelo okukhulekela asengxenyeni yasemhlabeni yenhlangano kaJehova. Ngokwenza kanjalo, sibonisa ukuthi sinesimo sengqondo esifana nesikaDavide. Asinawo umoya wokukhononda. Kunalokho, sigxila ebuhleni benhlangano kaNkulunkulu. Wake wacabanga yini ngezinto eziningi ezinhle esingabonga ngempela ngazo? Ake sixoxe ngezinye zazo.
Siyabonga Ngabasiholayo
4, 5. (a) “Inceku ethembekileyo neqondayo” iwufeza kanjani umsebenzi ewuphathisiwe? (b) Abanye oFakazi baye bazizwa kanjani ngokudla okungokomoya abakutholayo?
4 Sinesizathu esihle sokubonga ‘ngenceku ethembekileyo neqondayo’ uJesu Kristu ayimise phezu kwempahla yakhe emhlabeni. Isigaba senceku esakhiwa amaKristu agcotshwe ngomoya siyahola ekushumayeleni izindaba ezinhle, sihlele imihlangano yokukhulekela futhi sinyathelise izincwadi ezisekelwe eBhayibhelini ngezilimi ezingaphezu kuka-400. Izigidi zabantu emhlabeni wonke zinokwazisa njengoba zidla lokhu ‘kudla okungokomoya ngesikhathi esifanele.’ (Mathewu 24:45-47) Asikho neze isizathu sokububula ngale nceku.
5 UFakazi kaJehova osekhulile okuthiwa u-Elfi useneminyaka eminingi ethola induduzo nosizo ngokulalela iseluleko esingokomBhalo esisezincwadini zesigaba senceku. Ukwazisa okujulile kwamenza wabhala: “Bengingaba yini nje ngaphandle kwenhlangano kaJehova?” UPeter no-Irmgard nabo sebenamashumi eminyaka beyizinceku zikaNkulunkulu. U-Irmgard uyabonga ngazo zonke izincwadi ezilungiselelwa “inhlangano kaJehova enothando nekhathalelayo.” Zihlanganisa nezincwadi zabantu abanezidingo ezikhethekile, njengalabo abangaboni noma abayizithulu.
6, 7. (a) Umsebenzi wamabandla asemhlabeni wonke uqondiswa kanjani? (b) Yini eye yashiwo ngengxenye yasemhlabeni yenhlangano kaJehova?
6 “Inceku ethembekileyo” imelelwa iNdikimba Ebusayo YoFakazi BakaJehova, eyiqembu elincane lamadoda agcotshwe ngomoya akhonza endlunkulu yomhlaba wonke yoFakazi BakaJehova eseBrooklyn, eNew York. INdikimba Ebusayo imisa izinceku zikaJehova ezinokuhlangenwe nakho ukuba zikhonze emahhovisi amagatsha aqondisa umsebenzi wamabandla angaphezu kuka-98 000 emhlabeni wonke. Amadoda ahlangabezana nezimfuneko zeBhayibheli amiswa njengabadala nezinceku ezikhonzayo kula mabandla. (1 Thimothewu 3:1-9, 12, 13) Abadala bayahola futhi ngothando beluse umhlambi kaNkulunkulu abawuphathisiwe. Yeka isibusiso okuyiso ukuba ingxenye yalowo mhlambi nokuzwa uthando nobunye obuphakathi kwabo “bonke abazalwane”!—1 Petru 2:17; 5:2, 3.
7 Kunokufaka izikhalo, abantu bavame ukuzwakalisa ukubonga ngesiqondiso esingokomoya sothando abasithola kubadala. Ngokwesibonelo, cabanga ngoBirgit, inkosikazi engumKristu eseminyakeni yawo-30 ubudala. Lapho esemusha, wajwayelana nabantu abangalungile futhi wacishe wona. Kodwa iseluleko esicacile sabadala esisekelwe eBhayibhelini nokusekela kwamanye amaKristu kwamsiza waphuma esimweni esasingase sibe ingozi. Uzizwa kanjani manje uBirgit? Uthi: “Angive ngibonga ngokuthi ngisesenhlanganweni kaJehova enhle ngokumangalisayo.” U-Andreas oneminyaka engu-17 uthi: “Lena yinhlangano kaJehova ngempela, inhlangano ezidlula zonke emhlabeni.” Akufanele yini nathi sibonge ngobuhle bengxenye yasemhlabeni yenhlangano kaJehova?
Abaholayo Bangabantu Abangaphelele
8, 9. Yini eyenziwa abanye babantu besikhathi sikaDavide, futhi yena wenze njani?
8 Yebo, labo abamiswe ukuba bahole ekukhulekeleni kweqiniso abaphelele. Bonke bayawenza amaphutha, futhi abanye banobuthakathaka obuphikelelayo abazama kanzima ukubulawula. Ingabe lokhu kufanele kusicasule? Cha. Ngisho nabantu ababephathiswe umthwalo wemfanelo omkhulu kwa-Israyeli wasendulo benza amaphutha amakhulu. Ngokwesibonelo, lapho uDavide esemusha wabizwa ukuba azothoba inhliziyo yeNkosi uSawule ngokuyidlalela umculo. Kamuva, uSawule wazama ukubulala uDavide, okwadingeka azisindise ngokubaleka.—1 Samuweli 16:14-23; 18:10-12; 19:18; 20:32, 33; 22:1-5.
9 Amanye ama-Israyeli enza ngobuqili. Ngokwesibonelo, umlawuli wamabutho kaDavide uJowabe wabulala isihlobo sikaSawule, u-Abhineri. U-Absalomu wakhela uyise uDavide uzungu ukuze athole ubukhosi. Futhi umeluleki kaDavide ayemethemba, u-Ahithofeli, wamhlubuka. (2 Samuweli 3:22-30; 15:1-17, 31; 16:15, 21) Nokho, uDavide akazange akhononde ngenhliziyo ebuhlungu; futhi akazange afulathele ukukhulekela kweqiniso. Empeleni, kwenzeka okuphambene nalokho. Izinhlupheko zenza uDavide wanamathela kuJehova futhi walondoloza isimo sengqondo esihle ayenaso lapho ebalekela uSawule. Ngaleso sikhathi, uDavide wahlabelela: “Ngibonise umusa, Nkulunkulu, ngibonise umusa, ngoba umphefumulo wami uphephelé kuwe; ngiphephela emthunzini wamaphiko akho kuze kudlule okubi.”—IHubo 57:1.
10, 11. UmKristu okuthiwa uGertrud wabhekana nani esemusha, futhi wathini ngokushiyeka kwamanye amaKristu?
10 Asinasizathu sokukhononda ngokuthi enhlanganweni kaNkulunkulu namuhla kukhona ukwakhelwa uzungu. UJehova, izingelosi zakhe nabelusi abangokomoya abakubekezeleli ukuba khona kwabantu ababi, abakhela abanye uzungu, ebandleni lobuKristu. Nokho, sonke sibhekana nokungapheleli kobuntu—okwethu nokwezinye izinceku zikaNkulunkulu.
11 Lapho esemusha, umkhulekeli kaJehova ongumakad’ ebona okuthiwa uGertrud wamangalelwa ngamanga kwathiwa ungumkhohlisi, akayena ummemezeli woMbuso wesikhathi esigcwele. Wenze njani? Ingabe uGertrud wabubula ngokuphathwa kanjalo? Cha. Ngaphambi nje kokuba ashone ngo-2003 eneminyaka engu-91, wacabanga ngokuphila kwakhe, wabe esechaza: “Lesi senzakalo nezinye zakamuva zangifundisa ukuthi naphezu kwamaphutha enziwa abantu, nguJehova oqondisa umsebenzi wakhe obalulekile asebenzisa kuwo thina bantu abangaphelele.” Lapho kudingeka abhekane nokungapheleli kwezinye izinceku zikaNkulunkulu, uGertrud wayethandaza kuJehova ngokusuka enhliziyweni.
12. (a) Isiphi isibonelo esibi esabekwa amanye amaKristu ekhulu lokuqala? (b) Yini okufanele sigxilise imicabango yethu kuyo?
12 Njengoba ngisho namaKristu aqotho nazinikele kunawo wonke engaphelele, lapho inceku emisiwe yenza iphutha, masiqhubeke senza “zonke izinto ngaphandle kokububula.” (Filipi 2:14) Yeka ukuthi kungadabukisa kanjani uma singalandela isibonelo esibi sabambalwa ebandleni lobuKristu lekhulu lokuqala! Ngokomfundi uJude, abafundisi bamanga balolo suku ‘babengabunaki ubukhosi futhi bekhuluma ngokuhlambalaza ngabakhazimulayo.’ Ngaphezu kwalokho, labo benzi bokubi ‘babengabantu ababubulayo, abakhonondayo ngokuphila kwabo.’ (Jude 8, 16) Kwangathi singenqaba ukulingisa isibonelo sabantu ababebubula bekhononda, sigxilise imicabango yethu ezintweni ezinhle esizithola ‘ngenceku ethembekileyo.’ Masibazise ubuhle benhlangano kaJehova ‘siqhubeke senza zonke izinto ngaphandle kokububula.’
“Le Nkulumo Iyashaqisa”
13. Abanye benze njani ngokuqondene nezimfundiso ezithile zikaJesu Kristu?
13 Ngekhulu lokuqala, abathile babubula ngezinceku ezimisiwe, kanti abanye babubula ngezimfundiso zikaJesu. Njengoba kulotshwe kuJohane 6:48-69, uJesu wathi: “Lowo odla inyama yami, aphuze igazi lami unokuphila okuphakade.” Lapho bezwa la mazwi, “abaningi kubafundi bakhe . . . bathi: ‘Le nkulumo iyashaqisa; ubani ongayilalela na?’” UJesu wayazi ukuthi “abafundi bakhe babekhononda ngalokhu.” Ngaphezu kwalokho, “ngenxa yalokhu abaningi [kubo] bahamba baya ezintweni ababezishiye emuva futhi ababange besahamba naye.” Kodwa akubona bonke abafundi ababubula. Phawula lokho okwenzeka lapho uJesu ebuza abaphostoli abangu-12: “Nifuna ukuhamba yini nani?” Umphostoli uPetru waphendula: “Nkosi, ubani esizoya kuye? Nguwe onamazwi okuphila okuphakade; siye sakholwa futhi sesiyazi ukuthi ungoNgcwele kaNkulunkulu.”
14, 15. (a) Kungani abambalwa benganeliseki ngesici esithile sezimfundiso zobuKristu? (b) Yini esingayifunda endabeni yendoda okuthiwa u-Emanuel?
14 Ezikhathini zanamuhla, kuye kwaba nabambalwa kakhulu phakathi kwabantu bakaNkulunkulu abaye banganeliseka ngesici esithile semfundiso yobuKristu base bebubula ngengxenye yasemhlabeni yenhlangano kaJehova. Kwenziwa yini lokhu? Ngokuvamile, ukububula okunjalo kubangelwa ukungayiqondi indlela kaNkulunkulu yokwenza izinto. UMdali wembulela abantu bakhe iqiniso kancane kancane. Ngakho, indlela esiqonda ngayo imiBhalo iyohlale ilungiswa nakanjani. Iningi labantu bakaJehova liyakujabulela lokho kulungisa. Abambalwa baba ‘abalunge ngokwedlulele,’ bacunulwe yilezo zinguquko. (UmShumayeli 7:16) Ukuqhosha kungase kube nomthelela, futhi abanye babanjwa ugibe lokuzicabangela ngendlela yabo. Noma ngabe kubangelwa yini, ukububula okunjalo kuyingozi, ngoba kungasibuyisela emuva ezweni nasezindleleni zalo.
15 Ngokwesibonelo, u-Emanuel nguFakazi owayegxeka izinto ezithile ezincwadini ‘zenceku ethembekileyo neqondayo.’ (Mathewu 24:45) Wayeka ukufunda izincwadi zethu zobuKristu futhi wagcina etshele abadala bebandla lakubo ukuthi akasafuni ukuba omunye woFakazi BakaJehova. Nokho, ngemva kwesikhashana u-Emanuel wabona ukuthi izimfundiso zenhlangano kaJehova zinembile ngempela. Wathintana noFakazi, wavuma iphutha lakhe, wabuyiselwa ekuhlanganyeleni njengomunye woFakazi BakaJehova. Konke kwaphinde kwahamba kahle.
16. Yini engasisiza ukuba sinqobe ukungabaza esinakho ngezimfundiso zobuKristu ezithile?
16 Kuthiwani uma silingeka ukuba sibubule ngoba sizizwa singabaza izimfundiso ezithile bonke abantu bakaJehova abazikholelwayo? Uma kunjalo, masibe nesineke. “Inceku ethembekileyo” ingase igcine inyathelise okuthile okuyophendula imibuzo yethu, kususe ukungabaza esinakho. Kuwukuhlakanipha ukufuna usizo lwabadala abangamaKristu. (Jude 22, 23) Umthandazo, isifundo somuntu siqu nobudlelwane namaKristu angabantu abangokomoya nakho kungasisiza ekususeni ukungabaza nasekujuliseni ukwazisa kwethu amaqiniso eBhayibheli aqinisa ukholo esiwafunde ngomzila kaJehova wokuxhumana nabantu.
Londoloza Isimo Sengqondo Esihle
17, 18. Kunokuba sibubule, isiphi isimo sengqondo okufanele sibe naso, futhi ngani?
17 Kuyiqiniso ukuthi abantu abangaphelele bazalwa bethambekele ekoneni, futhi abanye bangase babe nokuthambekela okunamandla kokukhononda ngokungadingekile. (Genesise 8:21; Roma 5:12) Kodwa uma singakwenza umkhuba ukububula, siyobe sifaka ubuhlobo bethu noJehova uNkulunkulu engozini. Ngakho, kudingeka silawule noma ikuphi ukuthambekela kokububula okungenzeka sinakho.
18 Kunokuba sibubule ngezinto ezenzeka ebandleni, kuhle silondoloze isimo sengqondo esihle futhi siphile ngendlela esigcina simatasa, sijabule, sinenhlonipho, silinganisela futhi siphilile okholweni. (1 Korinte 15:58; Thithu 2:1-5) UJehova ulawula konke okwenzeka enhlanganweni yakhe, futhi uJesu uyakubona okwenzeka ebandleni ngalinye, njengoba nje ayekubona ekhulwini lokuqala. (IsAmbulo 1:10, 11) Ngesineke, lindela uNkulunkulu noKristu, iNhloko yebandla. Kungase kusetshenziswe abelusi abaphathiswe umthwalo wemfanelo ekulungiseni izinto ezidinga ukulungiswa.—IHubo 43:5; Kolose 1:18; Thithu 1:5.
19. Njengoba uMbuso ungakaziqondisi ngokugcwele izindaba zesintu, yini okufanele sigxile kuyo okwamanje?
19 Maduze, lesi simiso sezinto esibi sizophela, uMbuso KaMesiya uqale ukuqondisa izindaba zesintu ngokugcwele. Okwamanje, yeka indlela okubaluleke ngayo ukuba ngamunye wethu alondoloze isimo sengqondo esihle! Lokhu kuyosisiza sibone izici ezinhle zabafowethu nodadewethu, kunokuba sigxile emaphutheni abo. Ukugxila ezicini ezinhle zobuntu babo kuyosenza sijabule. Ngokwenza kanjalo, siyokhuthazeka futhi sakheke ngokomoya kunokuba sikhandleke ngokomzwelo ngenxa yokububula.
20. Ukuba nesimo sengqondo esihle kuyosenza sikwazi ukujabulela ziphi izibusiso?
20 Isimo sengqondo esihle siyosenza futhi sikwazi ukukhumbula izibusiso eziningi esizijabulelayo ngenxa yokuzihlanganisa nengxenye yasemhlabeni yenhlangano kaJehova. Lena ukuphela kwenhlangano eqotho kuMbusi wendawo yonke emhlabeni. Uzizwa kanjani ngalokho nangelungelo lokukhulekela owukuphela kukaNkulunkulu weqiniso, uJehova? Kwangathi isimo sakho sengqondo singaba njengesikaDavide, owahlabelela: “O Muzwi womthandazo, impela abantu bayo yonke inyama bayokuza kuwe. Uyajabula umuntu omkhethayo wenze ukuba asondele, ukuze ahlale emagcekeni akho. Ngokuqinisekile siyokwaneliswa ubuhle bendlu yakho.”—IHubo 65:2, 4.
Uyakhumbula?
• Kungani kufanele sibonge ngalabo abaholayo ebandleni?
• Kufanele sisabele kanjani lapho abazalwane abanomthwalo wemfanelo benza amaphutha?
• Kufanele sikubheke kanjani ukuthuthukiswa kwendlela esiqonda ngayo imiBhalo?
• Yini engasiza umKristu ukuba anqobe ukungabaza?
[Isithombe ekhasini 20]
UDavide wanikeza uSolomoni amapulani ethempeli futhi wasekela ukukhulekela kweqiniso ngenhliziyo yonke
[Isithombe ekhasini 23]
Abadala abangamaKristu bayakujabulela ukunikeza usizo olungokomoya