Izingelosi—Indlela Ezisithinta Ngayo Isintu

“Ngemva kwalezi zinto ngabona enye ingelosi yehla ezulwini, inegunya elikhulu . . . Yakhamuluka ngezwi elinamandla, ithi: ‘Liwile! IBhabhiloni Elikhulu liwile!’”—ISAMBULO 18:1, 2.

1, 2. Yini ebonisa ukuthi uJehova usebenzisa izingelosi ekufezeni intando yakhe?

NJENGOBA edingiselwe esiqhingini sasePhatmose, umphostoli osekhulile uJohane unikwa imibono eyisiprofetho. Ubona izenzakalo ezivusa amadlingozi njengoba ngokuphefumulelwa eba “sosukwini lweNkosi.” Lolo suku luqala lapho uJesu Kristu ebekwa esihlalweni sobukhosi ngo-1914, luqhubeke kuze kube sekupheleni kokuBusa kwakhe Kweminyaka Eyinkulungwane.—IsAmbulo 1:10.

² UJehova uNkulunkulu akamnikanga mathupha uJohane lesi sambulo. Wasebenzisa umzila othile. IsAmbulo 1:1 sithi: “Isambulo sikaJesu Kristu, uNkulunkulu amnika sona, ukuze abonise izinceku zakhe izinto okumelwe zenzeke maduzane. Wathuma ingelosi yakhe, wasethula ngayo ngezibonakaliso encekwini yakhe uJohane.” NgoJesu, uJehova wasebenzisa ingelosi ukuze azise uJohane izinto ezimangalisayo eziphathelene ‘nosuku lweNkosi.’ Ngesinye isikhathi, uJohane ‘wabona enye ingelosi yehla ezulwini, inegunya elikhulu.’ Sasiyini isabelo sale ngelosi? “Yakhamuluka ngezwi elinamandla, ithi: ‘Liwile! IBhabhiloni Elikhulu liwile!’” (isAmbulo 18:1, 2) Le ngelosi enamandla yanikwa ilungelo lokwenza isaziso sokuwa kweBhabhiloni Elikhulu, umbuso wezwe wenkolo yamanga. Ngakho, akungabazeki ukuthi uJehova usebenzisa izingelosi ngendlela ebalulekile ekufezeni intando yakhe. Ngaphambi kokuhlolisisa indima efezwa izingelosi enjongweni kaNkulunkulu nendlela ezisithinta ngayo, ake sihlole imvelaphi yalezi zidalwa zomoya.

Zaba Khona Kanjani Izingelosi?

3. Imuphi umbono oyiphutha abantu abaningi abanawo ngezingelosi?

³ Izigidi zabantu namuhla ziyakholwa ukuthi izingelosi zikhona. Kodwa abaningi banemibono eyiphutha ngezingelosi nangemvelaphi yazo. Ngokwesibonelo, abanye abantu abakholwayo bacabanga ukuthi lapho beshonelwa umuntu abamthandayo, usuke ebizwe uNkulunkulu ukuze ayokuba yingelosi ezulwini. Ingabe yilokho iZwi likaNkulunkulu elikufundisayo ngokudalwa, ukuba khona nangenjongo yezingelosi?

4. ImiBhalo isitshelani ngemvelaphi yezingelosi?

⁴ Ingelosi enamandla negunya elikhulu kakhulu—ingelosi eyinhloko—ibizwa ngokuthi uMikayeli. (Jude 9) InguJesu Kristu uqobo. (1 Thesalonika 4:16) Eminyakeni eminingi edlule, lapho uJehova enquma ukuqala ukudala, indalo yakhe yokuqala ngqá kwaba yile Ndodana yakhe eyingelosi. (IsAmbulo 3:14) Kamuva, uJehova wadala zonke ezinye izidalwa zomoya ngale Ndodana eyizibulo. (Kolose 1:15-17) Ebiza lezi zidalwa eziyizingelosi ngamadodana akhe, uJehova wabuza inzalamizi uJobe: “Wawukuphi lapho ngisekela umhlaba? Ngitshele, uma ukwazi ukuqonda. . . . Ngubani owabeka itshe lawo legumbi, lapho izinkanyezi zokusa zikhamuluka kanyekanye ngenjabulo, nawo wonke amadodana kaNkulunkulu eqala ukumemeza ehalalisa?” (Jobe 38:4, 6, 7) Kusobala ukuthi izingelosi ziyindalo kaNkulunkulu nokuthi zaba khona kudala, abantu bengakabikho.

5. Izingelosi zihlelwe kanjani?

⁵ Eyoku-1 Korinte 14:33 ithi: “UNkulunkulu unguNkulunkulu wokuthula akayena owesiyaluyalu.” Ngakho, uJehova uhlele amadodana akhe omoya ngezigaba ezintathu eziyisisekelo: (1) amaserafi, anjengabalindi besihlalo sobukhosi sikaNkulunkulu, amemezela ubungcwele bakhe futhi agcina abantu bakhe behlanzekile ngokomoya; (2) amakherubi, asekela ubukhulu bukaJehova obubabazekayo; (3) nezinye izingelosi ezifeza intando yakhe. (iHubo 103:20; Isaya 6:1-3; Hezekeli 10:3-5; Daniyeli 7:10) Iziphi ezinye zezindlela lezi zidalwa zomoya ezithinta ngazo abantu?—IsAmbulo 5:11.

Izingelosi Zifeza Yiphi Indima?

6. UJehova wawasebenzisa kanjani amakherubi ensimini yase-Edene?

⁶ Indawo yokuqala okukhulunywa kuyo ngokuqondile ngezidalwa zomoya ikuGenesise 3:24, lapho sifunda khona: “[UJehova] wamxosha umuntu futhi wamisa empumalanga yensimu yase-Edene amakherubi nenkemba eyayiziphendukela njalo futhi ivutha amalangabi ukuba aqaphe indlela eya emthini wokuphila.” La makherubi avimba u-Adamu no-Eva ukuba bangaphindeli ekhaya labo eliyinsimu. Kwakusekuqaleni komlando wesintu lapho. Iyiphi indima izingelosi eziye zayifeza kusukela ngaleso sikhathi?

7. Incazelo yamagama ezilimi zokuqala asho “ingelosi” ibonisani ngenye yezindima izingelosi ezizifezayo?

⁷ IBhayibheli likhuluma ngezingelosi izikhathi ezicishe zibe ngu-400. Amagama esiHebheru nesiGreki asho “ingelosi” angahunyushwa ngokuthi “isithunywa.” Ngakho, izingelosi ziye zasetshenziswa uNkulunkulu njengomzila wokuxhumana nesintu. Njengoba kushiwo ezigabeni ezimbili zokuqala zalesi sihloko, uJehova wasebenzisa ingelosi ekudluliseleni umyalezo wakhe kumphostoli uJohane.

8, 9. (a) Ukuhanjelwa yingelosi kwamthinta kanjani uManowa nomkakhe? (b) Yini abazali abangayifunda ekuhanjelweni kukaManowa yingelosi kaNkulunkulu?

⁸ Izingelosi zisetshenziselwa nokusekela nokukhuthaza izinceku zikaNkulunkulu emhlabeni. Ngokwesibonelo, kudala esikhathini sabaHluleli kwa-Israyeli, uManowa nomkakhe oyinyumba babefisa kakhulu ukuba nomntwana. UJehova wathumela ingelosi yakhe ukuba iyokwazisa umkaManowa ukuthi uzothola indodana. Ukulandisa kuyasitshela: “Bheka! uzokhulelwa, ngokuqinisekile uzozala indodana, futhi akukho nsingo okufanele ithinte ikhanda layo, ngoba lo mntwana uyoba umNaziri kaNkulunkulu lapho ephuma esiswini; nguye oyohola ekusindiseni u-Israyeli esandleni samaFilisti.”—AbaHluleli 13:1-5.

⁹ Ngemva kwesikhathi esithile, umkaManowa wazala indodana, uSamsoni, eyaduma emlandweni weBhayibheli. (AbaHluleli 13:24) Ngaphambi kokuzalwa komntwana, uManowa wacela ukuba ingelosi iphinde ibuye izobafundisa indlela okufanele bamkhulise ngayo umfana. UManowa wabuza: “Iyoba yini indlela yokuphila yomntwana nomsebenzi wakhe?” Ingelosi kaJehova yaphinda iziyalezo eyayizinike umkaManowa. (AbaHluleli 13:6-14) Yeka indlela okumelwe ukuba uManowa wazizwa ekhuthazeke ngayo! Namuhla izingelosi azihambeli abantu ngabanye ngale ndlela, kodwa njengoManowa, abazali bangafuna umqondo kaJehova lapho beqeqesha izingane zabo.—Efesu 6:4.

10, 11. (a) U-Elisha nesikhonzi sakhe basabela kanjani lapho bebona ibutho laseSiriya elalizobahlasela? (b) Kungasizuzisa kanjani ukucabanga ngalesi senzakalo?

¹⁰ Ukusekela kwezingelosi kwabonakala ngendlela ehlaba umxhwele ezinsukwini zomprofethi u-Elisha. Lo mprofethi wayehlezi okwesikhashana eDothani, umuzi othile wakwa-Israyeli. Ngolunye usuku lapho isikhonzi sika-Elisha sivuka ekuseni siqalaza phandle, sabona umuzi uzungezwe amahhashi nezinqola zempi. Inkosi yaseSiriya yayithumele ibutho lempi elinamandla ukuba liyobamba u-Elisha. Senzenjani isikhonzi sika-Elisha? Sesaba, mhlawumbe futhi sinetwetwe, samemeza: “Maye nkosi yami! Sizokwenzenjani?” Ngokwaso, lalibashonele. Kodwa u-Elisha waphendula: “Ungesabi, ngoba baningi abanathi kunabanabo.” Wayesho ukuthini?—2 AmaKhosi 6:11-16.

¹¹ U-Elisha wayebona ukuthi kwakukhona amabutho ezingelosi ayezomsekela. Isikhonzi sakhe sona sasingaboni lutho. Ngakho, “u-Elisha wathandaza wathi: ‘O Jehova, ngicela uvule amehlo akhe, ukuze abone.’ Masinyane uJehova wawavula amehlo alesi sikhonzi, kangangokuthi sabona; bheka! isifunda sezintaba sasigcwele amahhashi nezinqola zempi zomlilo nxazonke zika-Elisha.” (2 AmaKhosi 6:17) Isikhonzi sabe sesiwabona amabutho ezingelosi. Ngokuqonda okungokomoya, nathi singabona ukuthi zonke izingelosi eziqondiswa nguJehova noKristu zisekela futhi zivikele abantu bakaJehova.

Ukusekela Kwezingelosi Esikhathini SikaKristu

12. Ingelosi uGabriyeli yammisa kanjani idolo uMariya?

¹² Cabanga indlela intombi engumJuda, uMariya, eyaqina ngayo idolo lapho izwa lezi zindaba: “Uzokhulelwa, ubelethe indodana, kumelwe uyiqambe ngokuthi uJesu.” Ngaphambi nje kokuba imnikeze lo myalezo othusayo, ingelosi uGabriyeli, eyayithunywe nguNkulunkulu, yathi kuye: “Ungesabi, Mariya, ngoba uthole umusa kuNkulunkulu.” (Luka 1:26, 27, 30, 31) Yeka indlela okumelwe ukuba amkhuthaza futhi amqinisa ngayo uMariya la mazwi amqinisekisa ukuthi wayethole umusa kaNkulunkulu!

13. Izingelosi zamsekela kanjani uJesu?

¹³ Esinye isenzakalo sokusekela kwezingelosi senzeka ngemva kokuba uJesu emelane nezilingo ezintathu zikaSathane ehlane. Ukulandisa kusitshela ukuthi ngemva kwalolu vivinyo, “uDeveli wamshiya, futhi, bheka! izingelosi zeza zamkhonza.” (Mathewu 4:1-11) Nangobusuku obandulela ukufa kwakhe kwenzeka into ethi ayifane. Esosizini, uJesu waguqa wathandaza, wathi: “‘Baba, uma uthanda, susa le ndebe kimi. Noma kunjalo, makungenzeki intando yami, kodwa eyakho.’ Khona-ke ingelosi evela ezulwini yabonakala kuye futhi yamqinisa.” (Luka 22:42, 43) Kodwa izingelosi zisisekela kanjani namuhla?

Ukusekela Kwezingelosi Ezikhathini Zanamuhla

14. Ikuphi ukushushiswa oFakazi BakaJehova abaye bakubekezelela ezikhathini zanamuhla, futhi umphumela uye waba yini?

¹⁴ Lapho sicabanga ngomlando wanamuhla womsebenzi wokushumayela woFakazi BakaJehova, asibuboni yini ubufakazi bokusekela kwezingelosi? Ngokwesibonelo, abantu bakaJehova bákwazi ukubekezelela ukuhlukunyezwa amaNazi eJalimane naseNtshonalanga Yurophu ngaphambi naphakathi neMpi Yezwe II (yango-1939 kuya ku-1945). Ngaphansi kwemibuso yobuFascist bobuKatolika e-Italy, eSpain nasePortugal, babekezelela ukushushiswa isikhathi eside nangokwengeziwe. Futhi kwaphela amashumi eminyaka beshushiswa endaweni eyayiyiSoviet Union nasemazweni ayencike kuyo. Bashushiswa nasemazweni athile ase-Afrika.a Ezikhathini zamuva, izinceku zikaJehova ziye zashushiswa ngonya ezweni laseGeorgia. USathane wenze konke okusemandleni akhe ukuze amise umsebenzi woFakazi BakaJehova. Nokho, njengenhlangano, baye basinda kulokho kuphikiswa futhi bachuma. Ngokwengxenye, lokhu kuye kwabangelwa isivikelo sezingelosi.—IHubo 34:7; Daniyeli 3:28; 6:22.

15, 16. Izingelosi zibasekela kanjani oFakazi BakaJehova enkonzweni yabo yomhlaba wonke?

¹⁵ OFakazi BakaJehova bawuthatha ngokungathí sina umsebenzi abawunikiwe wokushumayela izindaba ezinhle zoMbuso kaNkulunkulu emhlabeni wonke nowokwenza abafundi ngokufundisa abantu abanesithakazelo iqiniso leBhayibheli yonke indawo. (Mathewu 28:19, 20) Nokho, bazi kahle ukuthi lo msebenzi abanakuwufeza ngaphandle kokusekela kwezingelosi. Ngakho-ke, lokho okushiwo kusAmbulo 14:6, 7 kubakhuthaza njalo. Lapho, umphostoli uJohane uthi: “Ngabona enye ingelosi indiza emkhathini, inezindaba ezinhle zaphakade ukuba izimemezele njengezindaba ezithokozisayo kwabahlala emhlabeni, nakuzo zonke izizwe nezinhlanga nezilimi nabantu, ithi ngezwi elikhulu: ‘Mesabeni uNkulunkulu nimnike inkazimulo, ngoba ihora lokwahlulela kwakhe selifikile, ngakho khulekelani Lowo owenza izulu nomhlaba nolwandle nemithombo yamanzi.’”

¹⁶ La mazwi abonisa ngokucacile ukuthi umsebenzi omkhulu wokushumayela owenziwa oFakazi BakaJehova emhlabeni wonke usekelwa futhi uqondiswe izingelosi. UJehova usebenzisa izingelosi zakhe ukuze abaqondise koFakazi bakhe abantu abaqotho. Izingelosi ziye zaqondisa noFakazi kubantu abafanelekayo. Lokhu kwenza kuqondakale ukuthi kungani kuvame kangaka ukuba omunye woFakazi BakaJehova ahlangane nomuntu lapho nje ebhekene nesimo esibucayi futhi edinga usizo olungokomoya—kuvame kakhulu kangangokuthi akunakuba ukuziqondanela nje.

Zizofeza Indima Ebaluleke Kakhulu Maduze

17. Kwenzekani lapho abase-Asiriya behlaselwa ingelosi eyodwa vo?

¹⁷ Ngaphezu kokuba yizithunywa nokuqinisa abakhulekeli bakaJehova, izingelosi zifeza nenye injongo. Esikhathini esidlule, zazifeza izahlulelo zikaNkulunkulu. Ngokwesibonelo, kudala ngekhulu lesi-8 B.C.E., iJerusalema lalisongelwa ibutho elikhulu lamasosha ase-Asiriya. Yini uJehova ayenza? Wathi: “Ngokuqinisekile ngizowuvikela lo muzi ukuze ngiwusindise ngenxa yami nangenxa kaDavide inceku yami.” Ukulandisa kweBhayibheli kusitshela okwenzeka: “Kwathi ngalobo busuku ingelosi kaJehova yaphuma yabulala abayizinkulungwane eziyikhulu namashumi ayisishiyagalombili nanhlanu ekamu lama-Asiriya. Lapho abantu bevuka ekuseni, phela, bonke babeyizidumbu.” (2 AmaKhosi 19:34, 35) Yeka ubuze bamabutho abantu lapho eqhathaniswa namandla engelosi eyodwa qhwaba!

18, 19. Iyiphi indima ebaluleke kakhulu ezofezwa izingelosi maduze nje, futhi lokho kuzosithinta kanjani isintu?

¹⁸ Maduze izingelosi zizosetshenziswa njengabakhiphi bezahlulelo bakaNkulunkulu. Sekuseduze kakhulu ukuba uJesu eze “nezingelosi [zakhe] ezinamandla emlilweni ovutha amalangabi.” Umgomo wabo kuzobe kuwukuletha “impindiselo phezu kwalabo abangamazi uNkulunkulu nakulabo abangazilaleli izindaba ezinhle mayelana neNkosi yethu uJesu.” (2 Thesalonika 1:7, 8) Yeka indlela lesi sinyathelo esizosithinta ngayo isintu! Labo abenqabayo ukusabela ezindabeni ezinhle zoMbuso kaNkulunkulu ezimenyezelwa emhlabeni wonke manje bazobhujiswa. Yilabo kuphela abafuna uJehova, ukulunga nobumnene, ‘abayositshekelwa ngosuku lwentukuthelo kaJehova’ basinde.—Zefaniya 2:3.

¹⁹ Siyakwazisa ukusebenzisa kukaJehova izingelosi zakhe ezinamandla ukuze zisekele futhi ziqinise abakhulekeli bakhe emhlabeni. Ukuqonda kwethu indima izingelosi eziyifezayo enjongweni kaNkulunkulu kududuza ngokukhethekile, njengoba kukhona izingelosi eziye zamhlubuka uJehova zalandela uSathane. Isihloko esilandelayo sizoxoxa ngezinyathelo amaKristu eqiniso angazithatha ukuze azivikele ethonyeni elinamandla likaSathane uDeveli namademoni akhe.

[Umbhalo waphansi]

Ufundeni?

• Izingelosi zaba khona kanjani?

• Izingelosi zasetshenziswa kanjani ezikhathini zeBhayibheli?

• IsAmbulo 14:6, 7 sembulani ngalokho izingelosi ezikwenzayo namuhla?

• Iyiphi indima ebaluleke kakhulu ezofezwa izingelosi maduze?

[Isithombe ekhasini 22]

UManowa nomkakhe bakhuthazwa ingelosi

[Isithombe ekhasini 23]

“Baningi abanathi kunabanabo”