Singazuza Ngokukhuthazelela Ukuhlupheka
“Sithi bayajabula labo abaye bakhuthazela.”—JAKOBE 5:11.
1, 2. Yini ebonisa ukuthi kwakungeyona injongo kaJehova ukuba umuntu ahlupheke?
AKEKHO umuntu ophile kahle ofuna ukuhlupheka; noMdali wethu, uJehova uNkulunkulu, akafuni abantu bahlupheke. Lokhu sikubona lapho sihlola iZwi lakhe eliphefumulelwe, siphawule lokho okwenzeka ngemva kokudala kwakhe owesilisa nowesifazane. UNkulunkulu waqale wadala owesilisa. “UJehova uNkulunkulu wabe esebumba umuntu ngothuli lomhlabathi wafuthela emakhaleni akhe umoya wokuphila, umuntu waba ngumphefumulo ophilayo.” (Genesise 2:7) U-Adamu wayephelele emzimbeni nasengqondweni, futhi wayengeke agule noma afe.
2 U-Adamu wayehlala endaweni enjani? “UJehova uNkulunkulu watshala insimu e-Edene, ngasempumalanga, wambeka lapho umuntu ayembumbile. Kanjalo uJehova uNkulunkulu wenza ukuba kumile emhlabathini yonke imithi efiselekayo emehlweni omuntu nefanelekele ukudliwa.” (Genesise 2:8, 9) U-Adamu wayenekhaya elihle ngempela. Kwakungekho ukuhlupheka e-Edene.
3. Umbhangqwana wokuqala wawusethubeni lokujabulela ini?
3 UGenesise 2:18 uyasitshela: “UJehova uNkulunkulu waqhubeka wathi: ‘Akukuhle ukuba umuntu ahlale yedwa. Ngizomenzela umsizi, abe umphelelisi wakhe.’” UJehova wabe esenzela u-Adamu umfazi ophelele, wabavulela ithuba lokuba nokuphila komkhaya okujabulisayo. (Genesise 2:21-23) IBhayibheli lisitshela okwengeziwe: “UNkulunkulu wababusisa futhi uNkulunkulu wathi kubo: ‘Zalani nande nigcwalise umhlaba niwunqobe.’” (Genesise 1:28) Lo mbhangqwana wokuqala wawuzoba nelungelo elimangalisayo lokwenza wonke umhlaba ube iPharadesi. Wawuzozala abantwana abajabulayo ababengeke bahlupheke. Yeka isiqalo esihle!—Genesise 1:31.
Ukuqala Kokuhlupheka
4. Yini esobala ngesintu lapho sibheka umlando?
4 Nokho, lapho sibheka isimo somkhaya wesintu kuwo wonke umlando, kusobala ukuthi kukhona okonakala kakhulu. Kuye kwenzeka izinto ezimbi futhi abantu baye bahlupheka kakhulu. Phakathi namakhulu eminyaka, yonke inzalo ka-Adamu no-Eva iye yagula, yaguga futhi ekugcineni iyafa. Umhlaba awulona neze ipharadesi elinabantu abajabulayo. AmaRoma 8:22 asichaza kahle lesi simo: “Yonke indalo iyaqhubeka ibubula kanyekanye futhi isezinhlungwini kanyekanye kuze kube manje.”
5. Abazali bethu bokuqala baba kanjani nesandla ekubangeleni abantu ukuhlupheka?
5 Akuyena uJehova oye wabangela lokhu kuhlupheka okungaka osekunesikhathi eside kukhona. (2 Samuweli 22:31) Abantu baye baba nesandla. “Benzé ngendlela echithayo, benzé ngendlela enengekayo ekusebenzelaneni kwabo nabanye.” (IHubo 14:1) Abazali bethu bokuqala banikezwa isiqalo esihle. Ukuze izinto ziqhubeke zihamba kahle kwakudingeka balalele uNkulunkulu, kodwa u-Adamu no-Eva bakhetha ukuziphilela ngaphandle kokuqondiswa uJehova. Ngenxa yokuthi abazali bethu bokuqala balahla uJehova, wayengeke esabagcina bephelele. Babeyowohloka baze baficwe ukufa futhi badlulisela ukungapheleli kithi.—Genesise 3:17-19; Roma 5:12.
6. USathane waba nayiphi ingxenye ekubangeleni ukuhlupheka?
6 Omunye owaba nengxenye ekubangeleni konke ukuhlupheka isidalwa somoya esaba uSathane uDeveli. Sasinikwe inkululeko yokuzikhethela. Kodwa sayisebenzisa kabi leyo nkululeko lapho sizama ukwenza abantu bakhulekele sona. Nokho, nguJehova kuphela okufanele akhulekelwe, hhayi indalo yakhe. NguSathane owayenga u-Adamu no-Eva ukuba bangafuni ukuqondiswa uJehova, njengokungathi ngokwenza kanjalo, ‘babeyoba njengoNkulunkulu, bazi okuhle nokubi.’—Genesise 3:5.
NguJehova Kuphela Onelungelo Lokubusa
7. Imiphumela yokuhlubuka kuJehova ibonisani?
7 Imiphumela emibi yokuhlubuka ibonisa ukuthi nguJehova kuphela, uMbusi Wendawo Yonke, onelungelo lokubusa futhi ukubusa kwakhe yikona kuphela okulungile. Izinkulungwane zeminyaka ezidlule ziye zabonisa ukuthi uSathane, owaba “umbusi waleli zwe,” uye waqala ukubusa okubi, okungalungile nokunobudlova okunganelisi neze. (Johane 12:31) Ukubusa kwabantu okulawulwa uSathane, osekunesikhathi eside kukhona nokudabukisayo, kuye kwabonisa nokuthi abakwazi ukubusa ngokulunga. (Jeremiya 10:23) Ngakho, zonke izinhlobo zokubusa ongazicabanga ngeke neze ziphumelele, ngaphandle kwekaJehova. Umlando uye wakufakazela ngokucacile lokhu.
8. Iyini injongo kaJehova ngazo zonke izinhlobo zokubusa kwabantu, futhi uyoyifeza kanjani?
8 Njengoba uJehova eye wavumela abantu ukuba bazame ukuzibusa izinkulungwane zeminyaka, kuyafaneleka ukuba aziqede zonke lezi zinhlobo zokubusa emhlabeni, esikhundleni sazo alethe owakhe uhulumeni. Isiprofetho esiphathelene nalokhu sithi: “Ezinsukwini zalawo makhosi [ababusi abangabantu] uNkulunkulu wezulu uyomisa umbuso [uhulumeni wakhe wasezulwini ophethwe uKristu] ongeke neze uchithwe. . . . Uyochoboza uqede yonke le mibuso, wona uqobo ume kuze kube nini nanini.” (Daniyeli 2:44) Ukubusa kwabantu namademoni kuyophela, futhi nguMbuso kaNkulunkulu wasezulwini kuphela oyoba khona ubuse umhlaba. UKristu uyoba iNkosi, futhi uyobusa nabantu abathembekile abangu-144 000 abathathwe emhlabeni.—IsAmbulo 14:1.
Ukuhlupheka Kungazuzisa
9, 10. UJesu wazuza kanjani ezintweni ahlupheka ngazo?
9 Kuhle ukuhlola izimfanelo zalabo abayobusa eMbusweni wasezulwini. Okokuqala, uKristu Jesu wabonisa indlela ayifanelekela kahle ngayo indima yakhe njengeNkosi. Wayechithe iminyakanyaka enoJehova enza intando kaYise, ‘eyisisebenzi sakhe esiyingcweti.’ (IzAga 8:22-31) Lapho uJehova ehlela ukuba uJesu eze emhlabeni, wavuma ngokuzithandela. Ngenkathi esemhlabeni wagxila ekutsheleni abanye ngobukhosi noMbuso kaJehova. Sonke uJesu wasibekela isibonelo esihle ngokuzithoba ngokuphelele kulobo bukhosi.—Mathewu 4:17; 6:9.
10 UJesu washushiswa futhi ekugcineni wabulawa. Phakathi nenkonzo yakhe, kuyo yonke indawo wayebona isimo sabantu esidabukisayo. Ingabe wazuza ngokubona konke lokhu nangokuhlupheka abhekana nakho? Yebo. AmaHebheru 5:8 athi: “Nakuba ayeyiNdodana [kaNkulunkulu], wafunda ukulalela ezintweni ahlupheka ngazo.” Izinto uJesu abhekana nazo ngenkathi esemhlabeni zamenza waba umuntu obonelelayo nonozwela ngokwengeziwe. Wasibona ngawakhe isimo sesintu. Wayengazwelana nalabo ababehlupheka futhi ayiqonde kangcono indima yakhe yokubasiza. Phawula indlela umphostoli uPawulu akugcizelela ngayo lokhu encwadini yamaHebheru: “Wayebophekile ukuba abe ‘njengabafowabo’ ezicini zonke, ukuze abe umpristi ophakeme onesihe nothembekile ezintweni eziphathelene noNkulunkulu, ukuze anikele umhlatshelo oyisihlawulelo ngenxa yezono zabantu. Ngoba ngenxa yokuthi yena ngokwakhe uye wahlupheka lapho evivinywa, uyakwazi ukusiza labo abavivinywayo.” “Lowo esinaye njengompristi ophakeme, akuyena ongenakuzwelana nobuthakathaka bethu, kodwa ngovivinyiwe ezicini zonke njengathi, kodwa ongenasono. Ngakho-ke, masisondele ngenkululeko yokukhuluma esihlalweni sobukhosi somusa ongafanelwe, ukuze sizuze isihe futhi sithole umusa ongafanelwe wokusiza ngesikhathi esifanele.”—Hebheru 2:17, 18; 4:14-16; Mathewu 9:36; 11:28-30.
11. Izinto amakhosi nabapristi besikhathi esizayo ababhekana nazo emhlabeni ziyobazuzisa kanjani lapho sebengababusi?
11 Kungashiwo okucishe kufane nangabangu-144 000, ‘abathengwa’ emhlabeni abayobusa noKristu Jesu eMbusweni wasezulwini. (IsAmbulo 14:4) Njengabantu, bonke bazalelwa emhlabeni, bakhulela khona bebona ukuhlupheka, futhi nabo bahlupheka. Abaningi bashushiswa, abanye baze babulawa ngenxa yokugcina ubuqotho babo kuJehova nangenxa yokulandela uJesu ngokuzithandela. Kodwa ‘abazange babe namahloni ngokufakaza mayelana neNkosi yabo, behlanganyela ekukhuthazeleni ngaphansi kokubi ngenxa yezindaba ezinhle.’ (2 Thimothewu 1:8) Izinto ababhekana nazo emhlabeni zibenza bakufanelekele ngokukhethekile ukwahlulela isintu besezulwini. Baye bafunda ukuba nozwela nomusa ngokwengeziwe futhi bayakulangazelela ukusiza abantu.—IsAmbulo 5:10; 14:2-5; 20:6.
Injabulo Yalabo Abanethemba Lasemhlabeni
12, 13. Ukuhlupheka kungabazuzisa kanjani abanethemba lasemhlabeni?
12 Ukuhlupheka kwamanje kungabazuzisa yini ngandlela-thile abanethemba lokuphila phakade epharadesi emhlabeni ongenakugula, ukudabuka nokufa? Akekho umuntu ofisa ukuzwa ubuhlungu nomunyu okubangelwa ukuhlupheka. Kodwa lapho sizikhuthazelela lezi zinto, zingathuthukisa izimfanelo zethu ezinhle futhi zisenze sijabule.
13 Cabanga ngalokho iZwi likaNkulunkulu eliphefumulelwe elikushoyo ngalokhu: “Ngisho noma ningahlupheka ngenxa yokulunga, niyajabula.” “Uma nihlanjalazwa ngenxa yegama likaKristu, niyajabula.” (1 Petru 3:14; 4:14) “Niyajabula lapho abantu benihlambalaza, benishushisa futhi besho yonke inhlobo yento embi ngani, beniqambela amanga ngenxa yami. Jabulani nigxumagxume ngenjabulo, ngoba umvuzo wenu mkhulu emazulwini.” (Mathewu 5:11, 12) “Uyajabula umuntu oqhubeka ekhuthazelela ukulingwa, ngoba lapho amukeleka uyokwamukela umqhele wokuphila.”—Jakobe 1:12.
14. Ukuhlupheka kubenza kanjani abakhulekeli bakaJehova bajabule?
14 Ngokuqinisekile, ukuhlupheka esingase sibhekane nakho akukhona ngokwako okusenza sijabule. Injabulo nokwaneliseka kubangelwa ukwazi ukuthi sihlupheka ngoba senza intando kaJehova futhi silingisa isibonelo sikaJesu. Ngokwesibonelo, ekhulwini lokuqala abanye abaphostoli bafakwa ejele base belethwa phambi kwenkantolo ephakeme yamaJuda, balahlwa ngecala ngoba beshumayela ngoJesu Kristu. Babhambabulwa base bededelwa. Bazizwa kanjani? Ukulandisa kweBhayibheli kuthi “basuka phambi kweSanhedrini bejabula, ngoba bebalwe njengabakufanelekele ukuhlaziswa ngenxa yegama lakhe.” (IzEnzo 5:17-41) Babengajabuleli ukubhambabulwa nobuhlungu ababebuzwa, kodwa babejabula ngoba beqonda ukuthi lokhu kwakwenzeke ngenxa yokugcina ubuqotho babo kuJehova nokulandela ezinyathelweni zikaJesu.—IzEnzo 16:25; 2 Korinte 12:10; 1 Petru 4:13.
15. Ukukhuthazelela kwethu ukuhlupheka manje kungasizuzisa kanjani esikhathini esizayo?
15 Uma ukuphikiswa nokushushiswa sikukhuthazelela ngesimo sengqondo esifanele, kungayikhulisa le mfanelo yokukhuthazela. Lokhu kuyosisiza ukuba sibhekane ngokuphumelelayo nokuhlupheka esikhathini esizayo. Siyafunda: “Kubhekeni njengenjabulo yodwa, bazalwane, lapho nihlangabezana nokulingwa okuhlukahlukene, njengoba nazi ukuthi lesi simo esivivinyiwe sokholo lwenu siveza ukukhuthazela.” (Jakobe 1:2, 3) Ngokufanayo, amaRoma 5:3-5 ayasitshela: “Masethabe lapho sisezinsizini, njengoba sazi ukuthi usizi luveza ukukhuthazela; ukukhuthazela kona kuveza ukwamukeleka; ukwamukeleka kuveza ithemba, futhi ithemba aliholeli ekudumazekeni.” Ngakho lapho sikhuthazelela ukulingwa ngokwengeziwe manje ngenxa yenkambo yethu yobuKristu, sikuhlomela kangcono ukukhuthazelela ukulingwa okwengeziwe kulesi simiso sezinto esibi.
UJehova Uyobavuza Abakhuthazelela Ukuhlupheka
16. Yini uJehova ayoyenzela amakhosi nabapristi besikhathi esizayo eyokwenza ukuhlupheka kwabo kube yize?
16 Ngisho noma singalahlekelwa impahla yethu lapho siphikiswa noma sishushiswa ngenxa yokunamathela endleleni yobuKristu, singaneliseka ngokwazi ukuthi uJehova uyosivuza ngokugcwele. Ngokwesibonelo, umphostoli uPawulu wabhalela abathile ababenethemba lokuya ezulwini: “Nakwamukela ngenjabulo ukuphangwa kwezinto zenu, nazi ukuthi nina ninempahla engcono nehlalayo” njengababusi eMbusweni kaNkulunkulu. (Hebheru 10:34) Cabanga injabulo abayoba nayo lapho bedlulisela izibusiso ezimangalisayo ezakhamuzini zezwe elisha beqondiswa uJehova noKristu. Yeka indlela ayiqiniso ngayo amazwi ashiwo umphostoli uPawulu kumaKristu athembekile: “Ngicabanga ukuthi izinhlupheko zenkathi yamanje azilutho uma ziqhathaniswa nenkazimulo ezokwambulwa kithi.”—Roma 8:18.
17. UJehova uyobenzelani labo abanethemba lasemhlabeni abamkhonza ngobuqotho manje?
17 Ngokufanayo, kungakhathaliseki ukuthi yini labo abanethemba lasemhlabeni abangase balahlekelwe yiyo noma bayidele ngokuzithandela ngenxa yokukhonza uJehova, uyobavuza kakhulu ngalokho ayokwenza esikhathini esizayo. Uyobanika ukuphila okuphelele nokungenasiphelo emhlabeni oyipharadesi. Kulelo zwe elisha, uJehova “uyosula zonke izinyembezi emehlweni abo, ukufa ngeke kusaba khona, noma ukulila noma ukukhala noma ubuhlungu ngeke kusaba khona.” (IsAmbulo 21:4) Yeka isithembiso esihle! Akukho lutho esingaludela sithanda noma ngempoqo kuleli zwe ngenxa kaJehova olungalingana nokuphila okumangalisayo okuzayo ayokunika izinceku zakhe ezithembekile ezikhuthazelela ukuhlupheka.
18. Isiphi isithembiso esiduduzayo uJehova asinikeza sona eZwini lakhe?
18 Noma ikuphi ukuhlupheka okusengadingeka sikukhuthazelele ngeke neze kusiphuce injabulo yokuphila phakade ezweni elisha likaNkulunkulu. Izimo ezinhle zezwe elisha ziyokwenza kube yize ngokuphelele konke lokho kuhlupheka. U-Isaya 65:17, 18 uthi: “Izinto zangaphambili ngeke zikhunjulwe, futhi ngeke zifike enhliziyweni. Kodwa yethabani, nijabule kuze kube phakade ngalokho engikudalayo.” Ngakho, kwakufaneleka ngoJakobe, umfowabo kaJesu ukuba athi: “Sithi bayajabula labo abaye bakhuthazela.” (Jakobe 5:11) Yebo, uma sikukhuthazelela ngokwethembeka ukuhlupheka esibhekene nakho, singazuza manje nasesikhathini esizayo.
Ungaphendula Kanjani?
• Ukuhlupheka kwabantu kwaqala kanjani?
• Ukuhlupheka kungazizuzisa kanjani izakhamuzi nababusi bomhlaba besikhathi esizayo?
• Kungani singajabula kwamanje naphezu kokuhlupheka?
[Isithombe ekhasini 27]
Abazali bethu bokuqala babeyoba nekusasa elihle
[Isithombe ekhasini 29]
Ukubona ukuhlupheka kwasiza uJesu ukuba alungele ukuba umPristi Ophakeme neNkosi enhle
[Isithombe ekhasini 31]
Abaphostoli ‘bajabula ngokubalwa njengabakufanelekele ukuhlaziswa ngenxa yokholo lwabo’