Fundisani Izingane Zenu Ukuba Zithande UJehova

“Njengemicibisholo esandleni sendoda enamandla, banjalo abantwana bobusha.”—IHUBO 127:4.

1, 2. Izingane zifana kanjani ‘nemicibisholo esandleni sendoda enamandla’?

UMCIBI ulungiselela ukuciba into ethile ngomcibisholo. Uwubeka osingeni lomnsalo ngokucophelela athi ukuqinisa imisipha njengoba egoba umnsalo. Naphezu kokuqhansa kwemisipha, uzinika isikhathi sokuwukhomba kahle umcibisholo entweni ayihlosile, abese ewudedela. Ingabe uzonemba? Impendulo ixhomeke ezicini eziningana, ezihlanganisa ikhono lakhe, umoya nesimo somcibisholo.

² INkosi uSolomoni yafanisa izingane ‘nemicibisholo esandleni sendoda enamandla.’ (IHubo 127:4) Cabanga indlela lo mfanekiso ongasetshenziswa ngayo. Uma kuqhathaniswa, sincane isikhathi umcibisholo oba semnsalweni ngaso. Ukuze umcibi anembe into ayihlosile, kumelwe awudedele ngokushesha. Nabazali banesikhathi esifushane, uma kuqhathaniswa, sokuhlakulela ezinganeni zabo uthando olusuka enhliziyweni ngoJehova. Ngemva kwesikhathi esingase sibonakale siyiminyaka embalwa, izingane ziyakhula zihambe ekhaya. (Mathewu 19:5) Ingabe bayonemba—ngamanye amazwi, ingabe izingane ziyoqhubeka zithanda futhi zikhonza uNkulunkulu ngemva kokuhamba ekhaya? Impendulo ixhomeke ezicini eziningana. Nazi ezintathu zazo: ikhono lomzali, indawo izingane ezikhulela kuyo nendlela ingane, noma ‘umcibisholo,’ esabela ngayo ekuqeqeshweni ekutholayo. Ake sihlole ngasinye salezi zici ngokuningiliziwe. Okokuqala, sizocabangela ezinye zezici zomzali onekhono.

Abazali Abanekhono Babeka Isibonelo Esihle

3. Kungani amazwi omzali kumelwe asekelwe izenzo?

³ UJesu wabekela abazali isibonelo ngoba wayekwenza ayekufundisa. (Johane 13:15) Ngakolunye uhlangothi, wabalahla abaFarisi ‘ababekhuluma’ kodwa “bangenzi.” (Mathewu 23:3) Ukuze abazali bashukumise izingane zabo ukuba zithande uJehova, abakushoyo nabakwenzayo kumelwe kuvumelane. Amazwi angasekelwa izenzo awasizi ngalutho, anjengomnsalo ongenalo usinga.—1 Johane 3:18.

4. Imiphi imibuzo abazali abenza kahle ngokuzibuza yona, futhi ngani?

⁴ Kungani isibonelo sabazali sibaluleke kangaka? Njengoba nje abantu abadala bengafunda ukuthanda uNkulunkulu ngokubheka isibonelo sikaJesu, nezingane zingafunda ukuthanda uJehova ngokulingisa isibonelo esihle sabazali bazo. Abangane bengane bangase bayiqinise noma ‘bonakalise imikhuba yayo emihle.’ (1 Korinte 15:33) Engxenyeni enkulu yokuphila kwengane, futhi ikakhulukazi phakathi neminyaka ebalulekile yokukhula kwayo, abantu esuke isondelene kakhulu nabo futhi abangabangane abanethonya elikhulu kuyo, ngabazali bayo. Ngakho-ke, abazali benza kahle ngokuzibuza: ‘Ngingumngane onjani? Ingabe isibonelo sami sikhuthaza ingane yami ukuba ibe nemikhuba ewusizo? Ngiyibekela siphi isibonelo ezindabeni ezibalulekile, njengomthandazo nesifundo seBhayibheli?’

Abazali Abanekhono Bathandaza Nezingane Zabo

5. Izingane zingafundani emithandazweni yomzali?

⁵ Izingane zakho zingafunda okuningi ngoJehova ngokulalela imithandazo yakho. Uma zikuzwa ubonga uNkulunkulu ngezikhathi zokudla futhi uthandaza nalapho nifunda iBhayibheli, zingase ziphethe ngokuthini? Cishe ziyofunda ukuthi uJehova usinikeza izidingo zethu ezingokwenyama—okufanele simbonge ngazo—nokuthi usifundisa amaqiniso angokomoya. Lezi izifundo ezibalulekile.—Jakobe 1:17.

6. Abazali bangazisiza kanjani izingane ukuba zibe nomuzwa wokuthi uJehova unesithakazelo kuzo njengabantu ngabanye?

⁶ Nokho, uma uthandaza nomkhaya wakho nangezinye izikhathi ngaphandle kwezikhathi zokudla nezesifundo seBhayibheli somkhaya futhi uma emthandazweni wakho uhlanganisa nezindaba eziqondile ezithinta wena nezingane zakho, uyofeza ngisho nokwengeziwe. Uyosiza izingane zakho ukuba zibe nomuzwa wokuthi uJehova uyingxenye yomkhaya, nokuthi unikhathalela ngokujulile njengabantu ngabanye. (Efesu 6:18; 1 Petru 5:6, 7) Omunye ubaba uthi: “Kusukela indodakazi yethu izalwa, sasithandaza nayo. Njengoba ikhula, sasithandaza ngezindaba zobuhlobo bethu nabanye nangezinye izindaba ezaziyithinta. Yaze yashada kungakaze kudlule ngisho nosuku singathandazanga ndawonye.” Ungathandaza yini nawe nezingane zakho nsuku zonke? Ungazisiza yini ukuba zibheke uJehova njengoMngane, onganelisi nje izidingo zazo ezingokwenyama nezingokomoya kuphela, kodwa futhi okhathalela nezidingo zazo ezingokomzwelo?—Filipi 4:6, 7.

7. Ukuze imithandazo yabo ingagwegwesi, yini abazali okudingeka bayazi?

⁷ Yebo, ukuze imithandazo yakho ingagwegwesi, kudingeka wazi ukuthi kwenzekani ekuphileni kwengane yakho. Phawula amazwi ashiwo omunye ubaba owakhulisa izingane ezimbili: “Ekupheleni kwesonto ngalinye, ngangicabanga ngale mibuzo emibili: ‘Iziphi izinto ebezikhathaza izingane zami kuleli sonto? Iziphi izinto ezinhle ezizijabulele?’” Bazali, ningazibuza yini imibuzo enjengaleyo bese nifaka ezinye zalezo zimpendulo emithandazweni yenu nezingane zenu? Uma kunjalo, niyobe ningazifundisi nje ukuthandaza kuJehova—uMuzwi womthandazo—kodwa niyobe nizifundisa nokumthanda.—IHubo 65:2.

Abazali Abanekhono Bakhuthaza Imikhuba Emihle Yokutadisha

8. Kungani abazali kumelwe basize izingane zabo zihlakulele umkhuba wokutadisha iZwi likaNkulunkulu?

⁸ Isimo sengqondo somzali ngesifundo seBhayibheli singabuthonya kanjani ubuhlobo bengane noNkulunkulu? Ukuze noma ibuphi ubuhlobo bukhule futhi bungapheli, abahilelekile kumelwe bangagcini nje ngokuxoxa kodwa kumelwe futhi balalelane. Enye yezindlela esilalela ngayo uJehova iwukutadisha iBhayibheli sisebenzisa izincwadi ezilungiselelwe “inceku ethembekileyo.” (Mathewu 24:45-47; IzAga 4:1, 2) Ngakho-ke, ukuze basize izingane zabo zibe nobuhlobo bothando noJehova nobuhlala njalo, abazali benza kahle ngokuzikhuthaza ukuba zihlakulele umkhuba wokutadisha iZwi likaNkulunkulu.

9. Izingane zingasizwa kanjani ukuba zibe nemikhuba emihle yokutadisha?

⁹ Izingane zingasizwa kanjani ukuba zibe nemikhuba emihle yokutadisha? Nalapha futhi, isibonelo somzali sifundisa kangcono kakhulu. Ingabe izingane zakho zikubona njalo ufunda iBhayibheli noma ulitadisha? Yiqiniso, kungenzeka umatasa kakhulu unakekela izingane zakho, futhi kungenzeka uyazibuza ukuthi ungasitholaphi isikhathi sokufunda nokutadisha. Kodwa zibuze, ‘Ingabe izingane zami zingibona njalo ngibukele ithelevishini?’ Uma kunjalo, ungakwazi yini ukusebenzisa esinye saleso sikhathi uzibekele isibonelo esihle ngokuqondene nesifundo somuntu siqu?

10, 11. Kungani abazali kufanele babe nezingxoxo zomkhaya zeBhayibheli njalo?

¹⁰ Enye indlela esebenzayo abazali abangafundisa ngayo izingane ukulalela uJehova ukuba nezingxoxo zomkhaya zeBhayibheli njalo. (Isaya 30:21) Nokho, abanye bangase bazibuze, ‘Kungani izingane zidinga isifundo somkhaya nakuba abazali bazo beya nazo njalo emihlanganweni yebandla?’ Kunezizathu eziningana ezinhle. UJehova uphathise abazali umthwalo wemfanelo oyinhloko wokufundisa izingane zabo. (IzAga 1:8; Efesu 6:4) Isifundo seBhayibheli somkhaya sifundisa izingane ukuthi ukukhulekela akuwona nje umcikilisho ongokomthetho owenziwa eningini kuphela, kodwa kuyingxenye yokuphila komkhaya kwangasese.—Duteronomi 6:6-9.

¹¹ Ngaphezu kwalokho, isifundo somkhaya esiqhutshwa kahle singenza abazali babone ukuthi izingane zabo zicabangani ngezindaba ezingokomoya nezokuziphatha. Ngokwesibonelo, lapho izingane zisezincane, abazali bangasebenzisa izincwadi ezinjengethi Funda KuMfundisi Omkhulu.a Cishe esigabeni ngasinye sale ncwadi eyinsiza-kutadisha iBhayibheli, izingane zicelwa ukuba ziveze umbono wazo ngezindaba okuxoxwa ngazo. Ngokubonisana nazo ngemiBhalo ekule ncwadi, abazali bangase bakwazi ukusiza izingane zabo ukuba zithuthukise amandla azo okuqonda ukuze ‘zihlukanise kokubili okulungile nokungalungile.’—Hebheru 5:14.

12. Abazali bangase basifanelanise kanjani isifundo somkhaya nezidingo zengane, futhi yini wena oye wayithola iphumelela kule ndaba?

¹² Njengoba izingane zakho zikhula, yenza isifundo sivumelane nezidingo zazo. Phawula indlela omunye umbhangqwana owasiza ngayo izingane zawo ezeve eshumini nambili ukuba zibonisane ngesicelo sesikole sokuba zibe semdansweni wesikole. Ubaba uthi: “Satshela izingane zethu ukuthi engxenyeni yesifundo sethu somkhaya esilandelayo, mina nomkami sizoba izingane, zona zibe ngabazali. Noma iyiphi ingane yayingaba ubaba noma umama, kodwa kwakumelwe zisebenze ndawonye zicwaninge ngale ndaba futhi zinikeze isiqondiso ngokuphathelene nemidanso yesikole.” Waba yini umphumela? Ubaba uyaqhubeka: “Yasimangaza indlela amadodakazi ethu (endimeni yawo njengabazali) avuthwe ngayo lapho esichazela (thina njengezingane) izizathu zawo ezisekelwe eBhayibhelini zokuthi kungani kungekhona ukuhlakanipha ukuya kulowo mdanso. Okwasihlaba umxhwele kakhulu izinto asikisela ukuthi zingenziwa esikhundleni sokuya emdansweni. Lokhu kwasisiza ukuba sibe nombono wokucabanga kwawo nezifiso zawo.” Ngempela, ukuze isifundo somkhaya siqhutshwe njalo futhi sivumelane nezidingo zomkhaya kudinga ukuphikelela nokubona into ngeso lengqondo, kodwa imivuzo iwufanele lowo mzamo.—IzAga 23:15.

Yenza Kube Nesimo Sokuthula

13, 14. (a) Abazali bangalenza kanjani ikhaya libe indawo enokuthula? (b) Kungaba namuphi umphumela omuhle lapho umzali evuma ukuthi wenze iphutha?

¹³ Umcibisholo ungayinemba into uma umcibi ewuqondisa futhi awudedele umoya usathule. Ngokufanayo, cishe izingane ziyofunda ukuthanda uJehova uma abazali benza ikhaya libe indawo enokuthula. UJakobe wabhala: “Imbewu yesithelo sokulunga ihlwanyelwa ngaphansi kwezimo zokuthula kulabo abenza ukuthula.” (Jakobe 3:18) Abazali bangalenza kanjani ikhaya libe indawo enokuthula? Umbhangqwana oshadile kudingeka ugcine ubuhlobo bomshado wawo buqinile. Indoda nomfazi abathandanayo nabahloniphanayo banethuba elingcono lokufundisa izingane zabo ukuthanda nokuhlonipha abanye abantu, kuhlanganise noJehova. (Galathiya 6:7; Efesu 5:33) Uthando nenhlonipho kukhuthaza ukuthula. Umbhangqwana onokuthula uyakwazi ukuzisingatha kangcono izingxabano ezingase zivele ekhaya.

¹⁴ Yebo, njengoba nje ingekho imishado ephelele, ayikho nemikhaya ephelele emhlabeni. Ngezinye izikhathi abazali bangase bahluleke ukubonisa izithelo zomoya lapho besebenzelana nezingane zabo. (Galathiya 5:22, 23) Abazali kufanele benzenjani uma kwenzeka lokhu? Uma bevuma ukuthi benze iphutha, ingabe kuyokwenza ingane ingabe isabahlonipha? Cabanga ngesibonelo somphostoli uPawulu. Wayenjengobaba ongokomoya kwabaningi. (1 Korinte 4:15) Nokho, akazange afihle ukuthi wayewenza amaphutha. (Roma 7:21-25) Noma kunjalo, ukuthobeka nokwethembeka kwakhe kujulisa inhlonipho yethu ngaye kunokuba kuyinciphise. Naphezu kwamaphutha akhe, uPawulu wakwazi ukuba nesibindi sokubhalela ibandla laseKorinte: “Yibani abalingisi bami, njengoba nje nami ngingumlingisi kaKristu.” (1 Korinte 11:1) Uma nawe uwavuma amaphutha akho, cishe izingane zakho ziyowashalazela.

15, 16. Kungani abazali kufanele baqeqeshe izingane zabo ukuba zithande abafowabo nodadewabo abangamaKristu, futhi lokhu kungenziwa kanjani?

¹⁵ Yini enye abazali abangayenza ukuze ikhaya libe indawo izingane zabo ezingakhulisa kuyo uthando lwazo ngoJehova? Umphostoli uJohane wabhala: “Uma umuntu ethi: ‘Ngiyamthanda uNkulunkulu,’ kodwa abe ezonda umfowabo, ungumqambimanga. Ngoba ongamthandi umfowabo, ambonileyo, akunakwenzeka ukuthi uyamthanda uNkulunkulu, angambonanga.” (1 Johane 4:20, 21) Ngakho-ke, lapho uqeqesha izingane zakho ukuba zithande abafowabo nodadewabo abangamaKristu, usuke uzifundisa ukuthanda uNkulunkulu. Abazali benza kahle ngokuzibuza, ‘Ingabe izinto engizixoxa ngebandla ziyakha noma ziyagxeka?’ Ungazi kanjani? Nakisisa indlela izingane zakho ezikhuluma ngayo ngemihlangano nangamalungu ebandla. Cishe indlela oxoxa ngayo iyozwakala ezinkulumweni zazo.

¹⁶ Yini abazali abangayenza ukuze basize izingane zabo ukuba zithande abafowabo abangokomoya? UPeter, ubaba wabafana ababili abeve eshumini nambili, uthi: “Kusukela abafana bethu bebancane, besilokhu simema njalo abantu abavuthiwe ngokomoya ukuba bazodla nathi futhi bachithe isikhathi nathi ekhaya, futhi lokhu kuye kwasijabulisa kakhulu. Abafana bethu baye bakhula bejwayelene nabantu abathanda uJehova, futhi manje bayabona ukuthi ukukhonza uNkulunkulu kuyindlela yokuphila ejabulisayo.” UDennis, ubaba onamadodakazi amahlanu, uthi, “Sasikhuthaza amadodakazi ethu ukuba akhe ubungane namaphayona asemadala ebandleni, futhi lapho izimo zivuma sasimema ababonisi abajikelezayo nomkabo.” Ningasithatha yini nani isinyathelo sokusiza izingane zenu ukuba zibheke ibandla njengengxenye yomkhaya wenu?—Marku 10:29, 30.

Umthwalo Wemfanelo Wengane

17. Isiphi isinqumo okudingeka izingane zisenze ekugcineni?

¹⁷ Ake uphinde ucabangele lowaya mfanekiso womcibi. Nakuba engase abe nekhono, cishe uyogeja uma umcibisholo wakhe ugobile. Yiqiniso, abazali bayozama kanzima ukuwuqondisa lo mcibisholo ongokomfanekiso, ngokuzama ukulungisa ukucabanga kwengane okungalungile. Kodwa yizingane ekugcineni okumelwe zizinqumele ukuthi zifuna ukuba leli zwe lizilolongele ukwenza intando yalo noma zifuna ukuba uJehova ‘aqondise izindlela zazo.’—IzAga 3:5, 6; Roma 12:2.

18. Isinqumo sengane singaba namuphi umphumela kwabanye?

¹⁸ Nakuba abazali benomthwalo wokukhulisa izingane zabo “ngesiyalo nangokuqondisa umqondo kukaJehova,” isinqumo sokugcina sokuthi ingane iyokhula ibe yini sisemahlombe ayo. (Efesu 6:4) Ngakho-ke, zingane, zibuzeni, ‘Ngiyokwamukela yini ukuqeqesha kothando kwabazali bami?’ Uma nikwamukela, niyobe nikhetha indlela engcono kakhulu yokuphila. Niyokwenza abazali benu bajabule kakhulu. Okubaluleke nakakhulu, niyokwenza inhliziyo kaJehova ijabule.— IzAga 27:11.

[Umbhalo waphansi]

Uyakhumbula?

• Abazali bangasibeka kanjani isibonelo esihle endabeni yomthandazo nesifundo seBhayibheli?

• Abazali bangalenza kanjani ikhaya libe indawo enokuthula?

• Yisiphi isinqumo izingane okufanele zisenze, futhi leso sinqumo siyobathinta kanjani abanye?

[Isithombe ekhasini 28]

Ingabe uyibekela isibonelo esihle ingane yakho ngokuba nesifundo somuntu siqu?

[Isithombe ekhasini 29]

Isimo somkhaya esinokuthula sandisa injabulo