Ingabe Ululungele Usuku LukaJehova?
“Usuku olukhulu lukaJehova luseduze. Luseduze, lushesha kakhulu.”—ZEFANIYA 1:14.
1-3. (a) Lithini iBhayibheli ngosuku lukaJehova? (b) Yiluphi “usuku lukaJehova” esibheke kulo?
USUKU olukhulu lukaJehova alulona usuku lwamahora angu-24. Luyisikhathi eside okuyokhishwa ngaso isahlulelo saphezulu phezu kwababi. Abangamkhonzi uNkulunkulu banesizathu sokulwesaba lolo suku lobumnyama, ukufutheka, intukuthelo evuthayo, ukucindezeleka nelokuchitha. (Isaya 13:9; Amose 5:18-20; Zefaniya 1:15) Isiprofetho sikaJoweli sithi: “Maye ngalolo suku; ngoba usuku lukaJehova luseduze, luyofika njengokuphanga okuvela kuMninimandla onke!” (Joweli 1:15) Nokho, ngalolo suku olukhulu, uNkulunkulu uyoba uMsindisi walabo “abaqotho enhliziyweni.”—IHubo 7:10.
2 Inkulumo ethi “usuku lukaJehova” ibhekisela ekukhishweni kwezahlulelo zaphezulu ngezikhathi ezihlukahlukene. Ngokwesibonelo, “usuku lukaJehova” lwafikela izakhamuzi zaseJerusalema lapho libhujiswa abaseBhabhiloni ngo-607 B.C.E. (Zefaniya 1:4-7) Ukukhishwa okufanayo kwesahlulelo sikaNkulunkulu kwenzeka ngo-70 C.E. lapho uNkulunkulu esebenzisa amaRoma ukuba akhiphe isahlulelo sakhe phezu kwesizwe samaJuda esingayamukelanga iNdodana yakhe. (Daniyeli 9:24-27; Johane 19:15) IBhayibheli libikezela ‘nangosuku lukaJehova’ ‘ayolwa ngalo nezizwe zonke.’ (Zakariya 14:1-3) Engaphansi kokuphefumulelwa, umphostoli uPawulu wahlobanisa lolo suku nokuba khona kukaKristu, okwaqala ngokubekwa kukaJesu njengeNkosi ezulwini ngo-1914. (2 Thesalonika 2:1, 2) Njengoba usuku lukaJehova selusemkhathizwe, isihloko sonyaka soFakazi BakaJehova sango-2007 besifaneleka ngokukhethekile. Sasithathwe kuZefaniya 1:14, ofundeka kanje: “Usuku olukhulu lukaJehova luseduze.”
3 Njengoba usuku olukhulu lukaNkulunkulu selusondele, manje yisikhathi sokuba uzibonakalise ululungele. Ungalulungiselela kanjani lolo suku? Ingabe zikhona izinyathelo ezengeziwe okudingeka uzithathe ukuze ulungele usuku lukaJehova?
Yiba Olulungele
4. Yiluphi uvivinyo olukhulu uJesu azilungiselela lona?
4 Esiprofethweni sakhe esiphathelene nesiphelo sesimiso sezinto, uJesu Kristu wathi kubafundi bakhe: “Yibani abakulungele.” (Mathewu 24:44) Ngesikhathi uJesu esho la mazwi, kwayena wayelungele uvivinyo olukhulu—ukufa kwakhe njengomhlatshelo wesihlengo. (Mathewu 20:28) Singafundani endleleni uJesu azilungiselela ngayo?
5, 6. (a) Uthando ngoNkulunkulu nangabantu lunayiphi indima ekubeni abalungele usuku lukaJehova? (b) Yisiphi isibonelo esabekwa uJesu ngokuqondene nothando ngomakhelwane?
5 UJesu wayemthanda ngenhliziyo yonke uJehova nezindinganiso zaKhe zokulunga. EyamaHebheru 1:9 ithi ngoJesu: “Wathanda ukulunga, wazonda ukweqa umthetho. Yingakho uNkulunkulu, uNkulunkulu wakho, akugcoba ngamafutha okwethaba ukudlula abangane bakho.” Ngenxa yokuthi uJesu wayemthanda uYise wasezulwini, wagcina ubuqotho bakhe kuye. Uma simthanda ngendlela efanayo uNkulunkulu futhi siphila ngokuvumelana nezimfuneko zakhe, uyosilonda. (IHubo 31:23) Uthando nokulalela okunjalo kuyosisiza silungele usuku olukhulu lukaJehova.
6 Uthando ngabantu lwaluyisici esiphawulekayo sobuntu bukaJesu. Ngempela, ‘wafikelwa isihawu ngabo, ngoba babephundlekile futhi behlakazekile njengezimvu ezingenamalusi.’ (Mathewu 9:36) Ngenxa yalokho, uJesu washumayela izindaba ezinhle kubantu, njengoba nje uthando lusishukumisa nathi ukuba sisakaze isigijimi soMbuso komakhelwane. Uthando ngoNkulunkulu nangomakhelwane lusigcina sikhuthele njengezikhonzi ezingamaKristu, ngaleyo ndlela lusisize silungele usuku olukhulu lukaJehova.—Mathewu 22:37-39.
7. Njengoba silindele usuku lukaJehova, kungani singajabula?
7 UJesu wayekujabulela ukwenza intando kaJehova. (IHubo 40:8) Uma sinesimo sengqondo esifanayo, siyokujabulela ukwenza inkonzo engcwele kuNkulunkulu. NjengoJesu, siyoba abaphi abangenabugovu, futhi lokhu kuyosenza sijabule ngempela. (IzEnzo 20:35) Yebo, “injabulo kaJehova iyisiphephelo [sethu].” Iyosenza silulungiselele kangcono usuku olukhulu lukaNkulunkulu.—Nehemiya 8:10.
8. Kungani kufanele sisondele kuJehova ngomthandazo?
8 Ukuthandaza kuNkulunkulu ngokusuka enhliziyweni kwasiza uJesu walungiselela ukuvivinywa kokholo lwakhe. Wayethandaza ngesikhathi uJohane embhapathiza. Wathandaza ubusuku bonke ngesikhathi ezokhetha abaphostoli bakhe. (Luka 6:12-16) Ukhona yini futhi umfundi weBhayibheli ongathintwa imithandazo kaJesu esuka enhliziyweni yangobusuku bakhe bokugcina ephila emhlabeni? (Marku 14:32-42; Johane 17:1-26) Ingabe wena ungumuntu womthandazo, njengoJesu? Thandaza njalo kuJehova, ungajahi lapho uthandaza, cela isiqondiso somoya ongcwele bese uyashesha ukusamukela lapho usithola. Ubuhlobo obuqinile noBaba wethu wasezulwini bubalulekile kulesi sikhathi esibucayi lapho usuku olukhulu lukaNkulunkulu lusondela ngokushesha. Ngakho-ke qhubeka usondela kuJehova ngomthandazo.—Jakobe 4:8.
9. Kubaluleke kangakanani ukukhathalela ukungcweliswa kwegama likaJehova?
9 Ukukhathalela ukungcweliswa kwegama likaJehova elingcwele nako kwamsiza uJesu ukuba alungiselele izilingo abhekana nazo. Empeleni, wafundisa abalandeli bakhe ukuthi imithandazo yabo kuNkulunkulu kufanele ihlanganise nalesi sicelo: “Malingcweliswe igama lakho.” (Mathewu 6:9) Uma sifisa ngempela ukuba igama likaJehova lingcweliswe, siyolwela ukugwema ukwenza noma yini engalithela ngesihlamba. Uma senza kanjalo, siyobe silulungiselele kangcono usuku olukhulu lukaJehova.
Ingabe Kufanele Wenze Izinguquko Ezithile?
10. Kungani kufaneleka ukuba sihlole ukuphila kwethu?
10 Uma usuku lukaJehova lufika kusasa, ingabe uyobe ululungele ngempela? Ngamunye wethu wenza kahle ngokuhlola ukuphila kwakhe ukuze abone ukuthi zikhona yini izenzo noma indlela yokucabanga okudingeka ilungiswe. Ngenxa yobufushane nokungaqiniseki kokuphila komuntu, sonke kudingeka siphaphame ngokomoya usuku ngalunye. (UmShumayeli 9:11, 12; Jakobe 4:13-15) Ngakho masicabangele izici ezithile ekuphileni kwethu okungase kudingeke sizinake.
11. Uyini umgomo wakho wokufunda iBhayibheli?
11 Esinye sezici ezibalulekile yisikhuthazo ‘senceku ethembekileyo’ sokufunda iBhayibheli nsuku zonke. (Mathewu 24:45) Ungase ukwenze umgomo ukufunda nokuzindla ngemiBhalo kusukela kuGenesise kuya encwadini yesAmbulo njalo ngonyaka. Ngokufunda izahluko ezingaba zine ngosuku, ungazifunda zonke izahluko zeBhayibheli ezingu-1 189 ngonyaka owodwa. Inkosi ngayinye yakwa-Israyeli kwakufanele ifunde uMthetho kaJehova “zonke izinsuku zokuphila kwayo.” Kubonakala sengathi uJoshuwa wenza okufanayo. (Duteronomi 17:14-20; Joshuwa 1:7, 8) Yeka indlela okubaluleke ngayo ngabelusi abangokomoya ukuba bafunde iZwi likaNkulunkulu nsuku zonke, ngoba lokhu kuyabasiza bafundise “imfundiso ephilayo”!—Thithu 2:1.
12. Ukusondela kosuku lukaJehova kufanele kukwenze ukuba wenzeni?
12 Ukusondela kosuku lukaJehova kufanele kukwenze ube khona njalo emihlanganweni yobuKristu futhi uhlanganyele kuyo ngokugcwele ngangokunokwenzeka. (Hebheru 10:24, 25) Ukwenza kanjalo kuyokusiza ucije amakhono akho njengommemezeli woMbuso ozama ukuthola nokusiza abantu abathambekele ngokufanele ekuphileni okuphakade. (IzEnzo 13:48) Mhlawumbe ungahlanganyela ngokwengeziwe ebandleni nangezinye izindlela, njengokusiza asebekhulile nokukhuthaza intsha. Yeka indlela le mizamo engakwenza waneliseke ngayo!
Ubuhlobo Bakho Nabanye
13. Yimiphi imibuzo esingase sizibuze yona ngokugqoka ubuntu obusha?
13 Njengoba usuku lukaJehova selusemnyango, ingabe kudingeka uzame kakhudlwana ‘ukugqoka ubuntu obusha obadalwa ngokwentando kaNkulunkulu ngokulunga kweqiniso nokuthembeka’? (Efesu 4:20-24) Njengoba uhlakulela izimfanelo ezinjengezikaNkulunkulu, cishe abanye bayobona ukuthi ‘uhamba ngomoya kaNkulunkulu’ nokuthi ubonisa izithelo zawo. (Galathiya 5:16, 22-25) Zikhona yini izenzo ongazibalula ezibonisa ukuthi wena nomkhaya wakho senigqoke ubuntu obusha? (Kolose 3:9, 10) Ngokwesibonelo, ingabe waziwa ngezenzo zomusa ozenzela okholwa nabo kanye nabanye? (Galathiya 6:10) Ukutadisha njalo imiBhalo kuyokusiza ekukhuliseni izimfanelo ezinjengezikaNkulunkulu eziyokulungiselela usuku lukaJehova.
14. Kungani kufanele umuntu athandazele umoya ongcwele njengoba ezama ukuhlakulela ukuzithiba?
14 Kuthiwani uma uyisififane futhi ubona ukuthi udinga ukuzithiba okwengeziwe? Le mfanelo iphakathi kwezithelo umoya ongcwele kaNkulunkulu ongaziveza kuwe. Ngakho-ke, thandazela umoya ongcwele ngokuvumelana namazwi kaJesu: “Qhubekani nicela, niyophiwa; qhubekani nifuna, niyothola; qhubekani ningqongqoza, niyovulelwa. . . . Uma nina, nakuba nibabi, nikwazi ukunika abantwana benu izipho ezinhle, kangakanani-ke ngoBaba osezulwini, uyobanika umoya ongcwele labo abawucela kuye!”—Luka 11:9-13.
15. Yini okufanele yenziwe uma ningahoshelani nokholwa naye?
15 Ake sithi wena nokholwa naye anihoshelani kahle. Uma kunjalo, yenza konke ongakwenza ukuze ulungise leso simo, kanjalo wandise ukuthula nobunye bebandla. (IHubo 133:1-3) Sebenzisa iseluleko sikaJesu esikuMathewu 5:23, 24 noma kuMathewu 18:15-17. Uma bewuvumela ilanga lishone usathukuthele, shesha ulungise isimo. Ngokuvamile okusuke kudingeka nje ukuzimisela ukuxola. UPawulu wabhala: “Yibani nomusa komunye nomunye, ninobubele besisa, nithethelelane ngokukhululekile njengoba nje noNkulunkulu anithethelela ngokukhululekile ngoKristu.”—Efesu 4:25, 26, 32.
16. Ububele budingeka kuziphi izimo emshadweni?
16 Emshadweni kudingeka ububele besisa, futhi ngezinye izikhathi nokuthethelela. Uma kudingeka umthande futhi umbonise ububele ngokwengeziwe umngane wakho womshado, sebenzela kulo mgomo ngosizo lukaNkulunkulu neZwi lakhe. Ingabe kukhona okudingeka ukwenze ukuze uzivumelanise neyoku-1 Korinte 7:1-5 ukuze unciphise ukucindezeleka futhi ugweme ukungathembeki? Impela, lesi yisici sokuphila esidinga ukuba indoda noma inkosikazi ibe ‘nobubele besisa.’
17. Yiziphi izinyathelo umuntu owenze isono esingathí sina okufanele azithathe?
17 Kuthiwani uma uye wenza isono esingathí sina? Thatha izinyathelo zokulungisa isimo masinyane. Lucele nakanjani usizo lwabadala abangamaKristu. Imithandazo nezeluleko zabo kuyokusiza ukuba ululame ngokomoya. (Jakobe 5:13-16) Thandaza kuJehova unesimo sengqondo sokuphenduka. Ukwehluleka ukwenza lokhu kuyokushiya nesazela nonembeza olimele. Yilokho okwenzeka kuDavide, kodwa yeka ukuthi wajabula kanjani lapho esesivumile isono sakhe kuJehova! UDavide wabhala: “Uyajabula umuntu okuvukela kwakhe kuxolelwe, osono sakhe simboziwe. Uyajabula umuntu uJehova angambaleli siphambeko, nokungekho nkohliso emoyeni wakhe.” (IHubo 32:1-5) UJehova uyabathethelela abonayo kodwa baphenduke ngobuqotho.—IHubo 103:8-14; IzAga 28:13.
Zigcine Ungeyona Ingxenye Yezwe
18. Kufanele ulibheke kanjani izwe?
18 Ngokungangabazeki ubheke phambili ezweni elihle elisha elithenjiswe uBaba wethu osezulwini. Kodwa ulibheka kanjani leli zwe lomphakathi wesintu ongalungile ohlukanisiwe noNkulunkulu? USathane, “umbusi waleli zwe,” akambambanga ndawo uJesu Kristu. (Johane 12:31; 14:30) Ngokuqinisekile awufuni uDeveli nezwe lakhe bakubambe, ngakho lalela amazwi omphostoli uJohane: “Ningalithandi izwe noma izinto ezisezweni.” Yinkambo yokuhlakanipha leyo ngoba “izwe liyadlula, kanjalo nesifiso salo, kodwa lowo owenza intando kaNkulunkulu uhlala kuze kube phakade.”—1 Johane 2:15-17.
19. Intsha engamaKristu ikhuthazwa ukuba ibe nemigomo enjani?
19 Ingabe uyabasiza abantabakho ukuba ‘bazigcine bengenalo ibala ezweni’? (Jakobe 1:27) USathane angathanda ukubamba abantabakho ngendlela efana naleyo umuntu abamba ngayo izinhlanzi. Amaqembu nezinhlangano ezihlukahlukene kuhloselwe ukwenza intsha ibe ingxenye yezwe likaSathane. Kodwa izikhonzi zikaJehova kakade sezisenhlanganweni okuyiyona yodwa eyosinda ekupheleni kwalesi simiso esibi sezinto. Ngakho intsha engamaKristu kufanele ikhuthazwe ukuba ibe “nokuningi kokukwenza emsebenzini weNkosi.” (1 Korinte 15:58) Abazali abahlonipha uNkulunkulu kudingeka basize abantababo ukuba bazibekele imigomo eyobalethela ukuphila okujabulisayo nokwanelisayo, okudumisa uNkulunkulu nokubasiza ukuba balungele usuku lukaJehova.
Bheka Ngalé Kosuku Olukhulu LukaJehova
20. Kungani kufanele sihlale sinombono wokuphila okuphakade?
20 Uyokwazi ukulinda usuku lukaJehova ngesineke uma uhlale unombono wokuphila okuphakade. (Jude 20, 21) Ubheke phambili ekuphileni okuphakade ePharadesi, futhi ngenxa yalokho unethemba lokubuyela ebungqabavwini bobusha bakho nelokuthola isikhathi esiningi sokufinyelela imigomo emihle nokufunda okwengeziwe ngoJehova. Empeleni ungaqhubeka ufunda ngoNkulunkulu kuze kube phakade ngoba abantu manje bazi “amaphethelo ezindlela zakhe” nje kuphela. (Jobe 26:14) Yeka ukuthi kuyojabulisa kanjani!
21, 22. Kungenzeka kube nakuphi ukwabelana ngokwaziswa phakathi kwakho nabavusiwe?
21 EPharadesi, abavusiwe bayokwazi ukusinikeza imininingwane esingayazi ngokuqondene nesikhathi esedlule. Kuyobe kuno-Enoke esichazela indlela aba nesibindi ngayo sokumemezela isigijimi sikaJehova kubantu abangamhloniphi uNkulunkulu. (Jude 14, 15) Ngokuqinisekile uNowa uyosilandisa ukuthi kwakunjani ukwakha umkhumbi. U-Abrahama noSara bayokwazi ukusichazela ukuthi bazizwa kanjani ngokushiya ukuphila okuntofontofo kwase-Uri bayohlala ematendeni. Cabanga nje ngo-Esteri esesitshela ukuthi wabamelela kanjani abantu bakubo futhi wabhuntshisa icebo likaHamani elalimelene nabo. (Esteri 7:1-6) Mbone ngeso lengqondo uJona esixoxela ngezinsuku ezintathu azichitha esiswini senhlanzi enkulu, noma uJohane uMbhapathizi esichazela indlela azizwa ngayo lapho ebhapathiza uJesu. (Luka 3:21, 22; 7:28) Yeka izinto ezithakazelisayo esiyozizwa!
22 Phakathi nokuBusa KukaKristu Kweminyaka Eyinkulungwane, kungenzeka ube nelungelo lokusiza abavusiwe bathole “ulwazi ngoNkulunkulu.” (IzAga 2:1-6) Namuhla, yeka ukuthi kujabulisa kanjani ukubona abantu bemukela ulwazi ngoJehova uNkulunkulu futhi belusebenzisa! Kodwa cabanga ngentokozo oyoba nayo ngaleso sikhathi lapho uJehova ebusisa imizamo yakho yokufundisa abantu bamandulo futhi besabela ngokwazisa!
23. Yini okufanele sizimisele ukuyenza?
23 Izinzuzo esizithola manje njengabantu bakaJehova zingaphezu kwethu thina bantu abangaphelele ukuba sizibale noma sizichaze. (IHubo 40:5) Siwabonga ngokukhethekile amalungiselelo kaNkulunkulu angokomoya. (Isaya 48:17, 18) Kungakhathaliseki ukuthi izimo zethu zinjani, masinikele inkonzo engcwele ngayo yonke inhliziyo yethu njengoba silindele usuku olukhulu lukaJehova.
Ungaphendula Kanjani?
• Luyini “usuku lukaJehova”?
• Ungazibonakalisa kanjani ululungele usuku lukaJehova?
• Njengoba usuku olukhulu lukaNkulunkulu luseduze kangaka, yiziphi izinguquko okungase kudingeke sizenze?
• Yini wena obheke phambili kuyo lapho usuku lukaJehova seludlulile?
[Isithombe ekhasini 12]
UJesu wazibonakalisa elulungele uvivinyo
[Isithombe ekhasini 15]
Yeka ilungelo okuyoba yilo ukusiza abavusiwe bathole ulwazi ngoJehova!