UJehova ‘UnguMenzi Wendlela Yethu Yokuphunyuka’
“UJehova uyobasiza abenzele indlela yokuphunyuka.”—IHU. 37:40.
1, 2. Iliphi iqiniso eliyisisekelo ngoJehova eliwumthombo wenduduzo namandla kithi?
ITHUNZI elenziwa ukukhanya kwelanga alimi ndawonye. Njengoba umhlaba uhamba, ithunzi liyahamba futhi lishintshe njalo. Nokho, uMdali womhlaba nelanga akashintshi. (Mal. 3:6) IBhayibheli lithi: “Kuye akukho ukushintshashintsha kokuphenduka kwethunzi.” (Jak. 1:17) Leli qiniso eliyisisekelo ngoJehova liwumthombo wangempela wenduduzo namandla kithi, ikakhulu lapho sibhekene nokuhlupheka nezinselele ezinzima. Ngani?
2 Njengoba siphawulile esihlokweni esandulele, uJehova waba ‘nguMenzi wendlela yokuphunyuka’ ezikhathini zeBhayibheli. (IHu. 70:5) Akashintshi futhi ulifeza njalo izwi lakhe; ngakho, abakhulekeli bakhe namuhla banezizathu ezizwakalayo zokuthembela kuye ukuba ‘abasize futhi abenzele indlela yokuphunyuka.’ (IHu. 37:40) UJehova uye wazenzela kanjani izinceku zakhe indlela yokuphunyuka ezikhathini zanamuhla? Angasenzela kanjani thina ngabanye?
Ukukhululwa Kubaphikisi
3. Kungani singaqiniseka ukuthi abaphikisi ngeke bakwazi ukuvimbela abantu bakaJehova ukuba bashumayele izindaba ezinhle?
3 Kungakhathaliseki ukuthi kungakanani, akukho ukuphikisa kukaSathane okuyoke kuvimbele oFakazi BakaJehova ukuba bakhulekele uJehova yedwa njengoba ekufanelekela. IZwi likaNkulunkulu liyasiqinisekisa: “Noma isiphi isikhali esiyokwakhiwa ngokumelene nawe ngeke siphumelele, nanoma yiluphi ulimi oluyokuvukela ekwahluleleni uyolulahla.” (Isaya 54:17) Abaphikisi baye bazama kodwa behluleka ukuvimbela abantu bakaNkulunkulu ukuba bafeze umyalo abawunikiwe wokushumayela. Cabangela izibonelo ezimbili.
4, 5. Abantu bakaJehova babhekana nakuphi ukuphikiswa ngo-1918, futhi kwaba namuphi umphumela?
4 Ngo-1918, abantu bakaJehova babhekana noshushiso olunzima olwalugqugquzelwa abefundisi ngenjongo yokumisa umsebenzi wabo wokushumayela. Ngo-May 7, uhulumeni wase-United States wakhipha amasamanisi okubopha u-J. F. Rutherford, owayengamele umsebenzi wokushumayela womhlaba wonke ngaleso sikhathi, kanye nabanye abayidlanzana ababesendlunkulu. Zingakapheli izinyanga ezimbili, uMfoweth’ uRutherford nabangane bakhe base belahlwe ngecala ngokungafanele lokubopha uzungu futhi bagwetshwa ukubhadla ejele. Ingabe abaphikisi babephumelele ekusebenziseni izinkantolo ukuba ziwukhinyabeze unomphela umsebenzi wokushumayela? Lutho neze!
5 Khumbula isithembiso sikaJehova: “Noma isiphi isikhali esiyokwakhiwa ngokumelene nawe ngeke siphumelele.” Kungazelelwe, ngo-March 26, 1919—ngemva kwezinyanga ezingu-9 uMfoweth’ uRutherford nabangane bakhe begwetshiwe—laba bazalwane ababeboshiwe bakhululwa ngebheyili. Ngonyaka olandelayo, ngo-May 5, 1920, amacala ababebekwe wona asulwa. Laba bazalwane basebenzisa inkululeko yabo ukuqhubekela phambili nomsebenzi woMbuso. Kwaba namuphi umphumela? Ukwanda okumangalisayo okwaba khona kusukela ngaleso sikhathi kuyazikhulumela! Lonke udumo ngalokhu luya ‘kuMenzi wendlela yokuphunyuka.’—1 Kor. 3:7.
6, 7. (a) Yimuphi umkhankaso owenziwa eJalimane lamaNazi ngokumelene noFakazi BakaJehova, futhi kwaba namuphi umphumela? (b) Umlando wanamuhla wabantu bakaJehova ufakazela liphi iqiniso?
6 Manje cabanga ngesibonelo sesibili. Ngo-1934, uHitler wafunga wagomela ukuthi wayeyobaqothula oFakazi BakaJehova eJalimane. Lokhu kwakungelona usongo nje. Kwalandela ukuboshwa nokugqunywa emajele koFakazi ngapha nangapha. Izinkulungwane zabo zashushiswa; amakhulu abulawa emakamu okuhlushwa. Ingabe uHitler waphumelela emkhankasweni wakhe wokubaqothula? Ingabe wakumisa ngokuphelele ukushunyayelwa kwezindaba ezinhle eJalimane? Lutho neze! Ngesikhathi beshushiswa, abafowethu baqhubeka nomsebenzi wokushumayela ngomshoshaphansi. Ngemva kokuwa kombuso wamaNazi, basebenzisa inkululeko yabo, baqhubeka beshumayela. Namuhla kunabamemezeli boMbuso abangaphezu kuka-165 000 eJalimane. Nakulokhu, ‘uMenzi wendlela yokuphunyuka’ wasigcina isithembiso sakhe: “Noma isiphi isikhali esiyokwakhiwa ngokumelene nawe ngeke siphumelele.”
7 Umlando wanamuhla woFakazi BakaJehova unikeza ubufakazi bokuthi uJehova akasoze avumela ukuba abantu bakhe baqothulwe njengeqembu. (IHu. 116:15) Nokho, kuthiwani ngathi njengabantu ngabanye? UJehova usenzela kanjani thina indlela yokuphunyuka?
Ingabe UNkulunkulu Uyasivikela Ekufeni?
8, 9. (a) Sazi kanjani ukuthi asiqinisekiswa ngokuthi siyovikelwa ukuba singafi manje? (b) Yini okumelwe siyivume?
8 Siyazi ukuthi uJehova akasiqinisekisi ukuthi uyosivikela ukuba singafi njengabantu ngabanye. Senza njengamaHebheru amathathu athembekile enqaba ukukhothamela isithombe segolide seNkosi uNebukhadinezari. Lezo zinsizwa ezesaba uNkulunkulu azizange zicabange ukuthi uJehova wayezozivikela ngokuyisimangaliso ukuba zingafi. (Funda uDaniyeli 3:17, 18.) Njengoba sazi, uJehova wazivikela emalangabini esithando somlilo. (Dan. 3:21-27) Nokho, ngisho nangezikhathi zeBhayibheli, ukukhululwa ngokuyisimangaliso kwakungenzeki njalo. Izinceku eziningi zikaJehova ezithembekile zabulawa abaphikisi.—Heb. 11:35-37.
9 Kuthiwani namuhla? ‘NjengoMenzi wendlela yokuphunyuka,’ ngokuqinisekile uJehova angakwazi ukusindisa abantu ngabanye ezimweni eziyingozi. Ingabe singasho ngokuqondile ukuthi uJehova ungenelile yini noma cha ezimweni ezithile? Cha. Noma kunjalo, umuntu osinde engozini ethile angase abe nomuzwa wokuthi uJehova ungenelile. Kungaba okungafanele ngabanye ukuba bamphikise. Ngesikhathi esifanayo, kumelwe sivume ukuthi amaKristu amaningi athembekile aye afa ngenxa yoshushiso, njengoba kwenzeka ngenkathi yamaNazi. Abanye baye bafa ezingozini. (UmSh. 9:11) Singase sibuze, “Ingabe uJehova wehluleka ukuba ‘uMenzi wendlela yokuphunyuka’ yalabo bantu abathembekile abafa bengakazigcwalisi izinsuku zabo?” Cha akunjalo.
10, 11. Kungani umuntu engenakukwazi ukuzivikela ekufeni, kodwa yini uJehova angayenza ngalokhu?
10 Cabanga ngalokhu: Umuntu akakwazi ukuzivikela ekufeni, ngoba akekho ‘ongenzela umphefumulo wakhe indlela yokuphunyuka esandleni seShiyoli,’ noma seHayidesi, ithuna lesintu sonke. (IHu. 89:48) Nokho, kuthiwani ngoJehova? Omunye udade owasinda enkathini yoshushiso olunzima lwamaNazi, ukhumbula lokho unina onguFakazi akusho kuye emduduza ngokufa kwabathandekayo babo emakamu okuhlushwa: “Ukube ukufa bekungeke kuphele, bekuyosho ukuthi kunamandla kunoNkulunkulu, akunjalo?” Ngokuqinisekile, ukufa akulutho kulowo onguMthombo wokuphila onguMninimandla onke! (IHu. 36:9) Bonke abaseShiyoli, noma eHayidesi, basenkumbulweni kaJehova futhi uyokwenzela lowo nalowo kubo indlela yokuphunyuka.—Luka 20:37, 38; IsAm. 20:11-14.
11 Njengoba leso sikhathi singakafiki, uJehova uhileleke ngokuqondile ekuphileni kwabakhulekeli bakhe abathembekile namuhla. Manje ake sixoxe ngezindlela ezintathu azibonakalisa ngazo ngokuqinisekile ‘enguMenzi wendlela yethu yokuphunyuka.’
Ukuvikelwa Ngokomoya
12, 13. Kungani isivikelo esingokomoya sibaluleke ngaphezu kwakho konke, futhi uJehova usinikeza sona kanjani?
12 UJehova uthembisa ukusivikela ngokomoya, okuyinto ebaluleke kunazo zonke. NjengamaKristu eqiniso, siyaqonda ukuthi kunokuthile okubaluleke ngaphezu kokuphila kwethu kwamanje. Ubuhlobo bethu noJehova yibo obuyigugu ngaphezu kwanoma yini esinayo. (IHu. 25:14; 63:3) Ngaphandle kwabo, ukuphila kwethu kwamanje bekungeke kube nenjongo kangako futhi besingeke sibe namathemba okuphila esikhathi esizayo.
13 Siyabonga ngokuthi uJehova usinika lonke usizo esiludingayo ukuze silondoloze ubuhlobo obuseduze naye. Ukuze asisize usinike iZwi lakhe, umoya wakhe ongcwele nebandla lakhe lomhlaba wonke. Singawasebenzisa kanjani ngokugcwele la malungiselelo? Ngokulitadisha njalo nangenkuthalo iZwi lakhe, ukholo lwethu luyoqina nethemba lethu likhanye bhá. (Roma 15:4) Ngokuthandazela umoya wakhe ngobuqotho, siyothola usizo lokumelana nezilingo zokuhileleka ekuziphatheni okungabazekayo. (Luka 11:13) Ngokuhambisana nesiqondiso esisinikezwa isigaba senceku ngezincwadi ezisekelwe eBhayibhelini nangemihlangano yebandla, yesifunda neyesigodi, siyokondliwa ‘ngokudla’ okungokomoya “ngesikhathi esifanele.” (Math. 24:45) Amalungiselelo anjalo ayasivikela ngokomoya futhi asisiza ukuba sihlale siseduze noNkulunkulu.—Jak. 4:8.
14. Landisa okuhlangenwe nakho okugcizelela ukubaluleka kwesivikelo esingokomoya?
14 Isibonelo esigcizelela indlela uJehova asivikela ngayo ngokomoya esabazali okukhulunywe ngabo ekuqaleni kwesihloko esandulele. Ngemva nje kwezinsukwana kubikwe ukuthi uTheresa, indodakazi yabo, unyamalele, bathola izindaba ezibuhlungu: Wayebulewe.a Uyise uyakhumbula: “Ngangithandazele ukuba uJehova amvikele. Lapho etholakala eshonile, kumelwe ngivume ukuthi ekuqaleni ngazibuza ukuthi kungani imithandazo yami ingaphendulwanga. Yiqiniso, ngiyazi ukuthi uJehova akaqinisekisi ukuthi abantu bakhe ngabanye uzobavikela ngokuyisimangaliso. Ngaqhubeka ngithandazela ukuqonda. Ngiye ngaduduzeka ngokwazi ukuthi uJehova uvikela abantu bakhe ngokomoya—okungukuthi, usinika lokho esikudingayo ukuze sivikele ubuhlobo bethu naye. Lolo hlobo lwesivikelo lubaluleke kakhulu, ngoba lungathinta ikusasa lethu laphakade. UJehova wamvikela ngalowo mqondo uTheresa; wayemkhonza ngokwethembeka ngesikhathi eshona. Ngiye ngathola ukuthula ngokwazi ukuthi ukuphila kwakhe kwesikhathi esizayo kusezandleni zaKhe ezinothando.”
Ukusekelwa Lapho Sigula
15. UJehova angasisiza ngaziphi izindlela lapho sigula kakhulu?
15 UJehova angasisekela lapho ‘sisokhukhweni lokugula,’ njengoba asekela uDavide. (IHu. 41:3) Nakuba osukwini lwethu uJehova engayenzi indlela yokuphunyuka ngokuselapha ngokuyisimangaliso, usasisiza. Kanjani? Izimiso ezitholakala eZwini lakhe zingasisiza ekwenzeni izinqumo ezihlakaniphile mayelana nokwelashwa nezinye izindaba. (IzAga 2:6) Singathola ukwaziswa okuwusizo nokusikisela okusebenzayo ezihlokweni ezinyatheliswe kuyi-Nqabayokulinda ne-Phaphama! ezixoxa ngesifo esithile esisiphethe. Ngomoya wakhe, uJehova angasinika “amandla angaphezu kwavamile” ukuze sibhekane nesimo futhi silondoloze ubuqotho bethu, kungakhathaliseki ukuthi kungase kwenzekeni. (2 Kor. 4:7) Sinalolu sizo, singagwema ukuba ukugula kwethu kusikhungathekise size sintengantenge ngokomoya.
16. Omunye umzalwane uye wakwazi kanjani ukubhekana ngokuphumelelayo nokugula?
16 Cabanga ngomzalwane osemusha okukhulunywe ngaye ekuqaleni kwesihloko esandulele. Ngo-1998, kwatholakala ukuthi unesifo sokuwohloka kwezinzwa nemisipha, (i-amyotrophic lateral sclerosis noma i-ALS), esagcina simgoge ngokuphelele.b Uye wakwazi kanjani ukubhekana nokugula kwakhe? Uyachaza: “Kunezikhathi lapho ngangiba sezinhlungwini, ngikhungatheke ngize ngifikelwe umuzwa wokuthi mhlawumbe kungcono ngife ukuze ngiphumule. Njalo lapho ngizizwa ngicindezeleke kakhulu, ngithandaza kuJehova ukuba anginike izinto ezintathu: inhliziyo ezolile, ukubekezela nokukhuthazela. Nginomuzwa wokuthi uJehova uyiphendulile leyo mithandazo. Ukuba nenhliziyo ezolile kungenza ngizindle ngezinto ezingiduduzayo, njengokuthi kuyoba njani ezweni elisha lapho sengikwazi ukuhamba, ukujabulela ukudla okwehla esiphundu nokuxoxa nomkhaya wami futhi. Ukubekezela kungisiza ukuba ngikwazi ukubhekana ngokuphumelelayo nokulinganiselwa nezinselele zokugogeka. Ukukhuthazela kungisiza ukuba ngihlale ngithembekile futhi ngingantengantengi ngokomoya. Ngempela ngizizwa njengomhubi uDavide, ngoba uJehova uye wangisekela okhukhweni lami lokugula.”—Isaya 35:5, 6.
Ukusekelwa Ngezidingo Ezingokwenyama
17. UJehova uthembise ukusenzelani, futhi sisho ukuthini lesi sithembiso?
17 UJehova uthembisa ukusinakekela ngokwenyama. (Funda uMathewu 6:33, 34 namaHebheru 13:5, 6.) Lokho akusho ukuthi kufanele silindele ukuba izidingo zethu ezingokwenyama zaneliswe ngokuyisimangaliso noma ukuthi senqabe ukusebenza. (2 Thes. 3:10) Lesi sithembiso sisho lokhu: Uma sifuna uMbuso kaNkulunkulu kuqala ekuphileni kwethu futhi sizimisele ukusebenza, singaqiniseka ukuthi uJehova uyosisiza sithole izidingo zokuphila. (1 Thes. 4:11, 12; 1 Thim. 5:8) Angasinikeza esikudingayo ngezindlela esingazilindele, mhlawumbe asebenzise umkhulekeli esikanye naye ukuba asisize noma asinike umsebenzi.
18. Landisa okuhlangenwe nakho okubonisa ukuthi uNkulunkulu angasinikeza usizo lapho siswele.
18 Khumbula umama ongayedwa okukhulunywe ngaye ekuqaleni kwesihloko esandulele. Lapho yena nendodakazi yakhe bethuthela endaweni entsha, kwaba nzima ukuthola umsebenzi. Uyachaza: “Ekuseni ngangiya ensimini, ntambama ngiyofuna umsebenzi. Ngikhumbula ngolunye usuku ngiya esitolo ngiyothenga ubisi. Ngathi ukuma ngibheke imifino, kodwa ngangingenayo imali eyanele yokuyithenga. Ngangiqala ukuzizwa ngicindezeleke kangako ekuphileni kwami. Lapho ngibuyela ekhaya ngalolo suku, ngathola kunamasaka agcwele zonke izinhlobo zemifino ebekwe kuvulandi ongemuva. Kwakunokudla okwakuyosiqhuba izinyanga eziningana. Ngamane ngakhala, ngabonga uJehova.” Lo dade wathola ngokushesha ukuthi la masaka ayelethwe umzalwane wasebandleni onesivande semifino. Kamuva lo dade wambhalela: “Nakuba ngakubonga kakhulu ngaloluya suku, ngambonga noJehova ngokusebenzisa umusa wakho ukungikhumbuza ukuthi Yena uyangithanda.”—IzAga 19:17.
19. Ngesikhathi sosizi olukhulu, izinceku zikaJehova zingaqiniseka ngani, futhi yini okufanele sizimisele ukuyenza manje?
19 Ngokusobala, lokho uJehova aye wakwenza ezikhathini zeBhayibheli nasosukwini lwethu kusinika isizathu sokumethemba njengoMsizi wethu. Maduzane, lapho usizi olukhulu lugadla ezweni likaSathane, sizodinga usizo lukaJehova kunanini ngaphambili. Noma kunjalo, izinceku zikaJehova zizokwazi ukuphendukela kuye ngokuqiniseka okugcwele. Zizokwazi ukuphakamisa amakhanda azo zijabule, zazi ukuthi ukukhululwa kwazo kuseduze. (Luka 21:28) Sisalindele leso sikhathi, masizimisele ukuthembela kuJehova kungakhathaliseki ukuthi iluphi uvivinyo olungasehlela, siqiniseka ngokugcwele ukuthi uNkulunkulu wethu ongashintshi ‘unguMenzi wendlela yethu yokuphunyuka’ ngempela.
[Imibhalo yaphansi]
a Bheka isihloko esithi “Ukubhekana Nenhlekelele Engachazeki,” kuyi-Phaphama! ka-July 22, 2001, amakhasi 19-23.
b Bheka isihloko esithi “Ngasekelwa Ukholo Lwami—Ukuphila Ne-ALS,” kuyi-Phaphama! ka-January 2006, amakhasi 25-29.
Uyakhumbula?
• UJehova angabenzela kanjani indlela yokuphunyuka labo abaye bafa bengakazigcwalisi izinsuku zabo?
• Kungani ukuvikelwa ngokomoya kubaluleke ngaphezu kwanoma yini enye?
• Sisho ukuthini isithembiso sikaJehova sokuthi uyosinakekela ngokwenyama?
[Isithombe ekhasini 8]
UMfoweth’ uRutherford nabangane bakhe baboshwa ngo-1918, futhi kamuva badedelwa, amacala ababebekwe wona asulwa
[Isithombe ekhasini 10]
UJehova angasisekela “okhukhweni lokugula”