Thola Injabulo Emsebenzini Wokwenza Abafundi
“Ngakho-ke, hambani niyokwenza . . . abafundi.”—MATH. 28:19.
1-3. (a) Abaningi bazizwa kanjani ngokuqhuba izifundo zeBhayibheli? (b) Imiphi imibuzo esizoxoxa ngayo?
UDADE othile okhonza neqembu elikhuluma isiHindi e-United States wabhala: “Sekungamasonto angu-11 ngifundela umkhaya ovela ePakistan futhi manje sesingabangane. Ngivele ngifikelwe izinyembezi uma ngicabanga ukuthi maduze nje lo mkhaya uzobuyela ePakistan. Izinyembezi zami akuzona nje ezobuhlungu bokulahlekelwa abangane, kodwa futhi ezenjabulo engiye ngayithola ngesikhathi ngibafundisa ngoJehova.”
2 Wake wayithola yini nawe injabulo efana neyalo dade etholakala ngokufundela othile iBhayibheli? UJesu nabafundi bakhe bangekhulu lokuqala bathola injabulo enkulu emsebenzini wokwenza abafundi. UJesu waqeqesha abafundi abangu-70 futhi lapho bebuya nombiko ojabulisayo, ‘wachichima injabulo ngomoya ongcwele.’ (Luka 10:17-21) Ngokufanayo, kunabaningi namuhla abathola injabulo enkulu ngokwenza abafundi. Empeleni, ngo-2007, abamemezeli abazikhandlayo nabajabulayo, ngokwesilinganiso, baqhuba izifundo zeBhayibheli eziyizigidi eziyisithupha nengxenye inyanga ngayinye!
3 Nokho, kunabamemezeli abangakayitholi injabulo yokuqhuba isifundo seBhayibheli. Kungenzeka ukuthi kunabathile abangazange baqhube isifundo kule minyaka edlule. Iziphi izinselele esingase sibhekane nazo njengoba sizama ukuqhuba izifundo zeBhayibheli? Singazinqoba kanjani lezo zinselele? Imiphi imivuzo esiyitholayo lapho senza konke esingakwenza ukuze silalele lo myalo kaJesu: “Ngakho-ke hambani niyokwenza . . . abafundi”?—Math. 28:19.
Izinselele Ezingasiphuca Injabulo
4, 5. (a) Abantu abaningi basabela kanjani kwezinye izingxenye zomhlaba? (b) Iziphi izinselele abamemezeli ababhekana nazo kwezinye izindawo?
4 Kwezinye izingxenye zomhlaba, abantu bazithanda kakhulu izincwadi zethu futhi bayakulangazelela ukufunda nathi iBhayibheli. Omunye umbhangqwana wase-Australia owawukhonza okwesikhashana eZambia wabhala: “Esasivame ukukuzwa ngensimu yaseZambia kuyiqiniso. Ayive ikhiqiza. Ubona isimanga lapho uhambisa omagazini emgwaqweni! Abantu bayazizela, abanye baze basho nokuthi bafuna muphi umagazini.” Muva nje, abazalwane nodade baseZambia baqhuba izifundo zeBhayibheli ezingaphezu kuka-200 000—okusho ukuthi, ngokwesilinganiso ummemezeli ngamunye unesifundo seBhayibheli esingaphezu kwesisodwa.
5 Nokho, kwezinye izindawo abamemezeli bangase bakuthole kunzima ukuhambisa izincwadi nokuba nezifundo zeBhayibheli eziqhutshwa njalo. Kubangelwa yini lokhu? Ngokuvamile abamemezeli ababatholi abantu emakhaya, kanti abasuke bekhona kungenzeka abanandaba nenkolo. Kungenzeka bakhula bengasonti noma kungenzeka banengwa ukuzenzisa okusobala enkolweni yamanga. Abantu abaningi baye balinyazwa, baphundlwa futhi bahlakazwa ngokomoya abelusi bamanga. (Math. 9:36) Kuyaqondakala ukuthi abantu abanjalo bangase bakuxwaye ukuhileleka ezingxoxweni zeBhayibheli.
6. Iziphi izinselele abanye abangase babhekane nazo?
6 Abanye abamemezeli abathembekile babhekene nenselele ehlukile engabaphuca injabulo. Ekuqaleni babeshiseka emsebenzini wokwenza abafundi, kodwa manje sebehlushwa impilo noma izinkinga ezihlobene nokuguga. Cabanga futhi nangokulinganiselwa okuthile esingase sizibekele khona. Ngokwesibonelo, ingabe uzizwa ungenawo amakhono adingekayo okuqhuba isifundo seBhayibheli? Ungase uzizwe njengoMose lapho uJehova emthuma ukuba ayokhuluma noFaro. UMose wathi: “Uxolo, Jehova, kodwa angilona iqaphuqaphu, kusukela izolo noma ngaphambi kwalokho.” (Eks. 4:10) Ukwesaba ukuthi imizamo yakho ngeke iphumelele kuhlobene eduze nemizwa yokungafaneleki. Singase sikhathazeke ngokuthi umuntu esimfundelayo ngeke abe umfundi ngoba asinalo ikhono elihle lokufundisa. Ngenxa yalokho, singase sinqume ukungasiqhubi isifundo seBhayibheli. Singazinqoba kanjani izinselele okusanda kukhulunywa ngazo?
Lungisa Inhliziyo Yakho
7. Yini eyayishukumisa uJesu enkonzweni yakhe?
7 Isinyathelo sokuqala siwukulungisa izinhliziyo zethu. UJesu wathi: “Umlomo . . . ukhuluma ngokuchichima kwenhliziyo.” (Luka 6:45) Ukukhathalela inhlalakahle yabantu ngokujulile yikona okwakushukumisa uJesu enkonzweni yakhe. Ngokwesibonelo, lapho ebona isimo esingokomoya esidabukisayo samanye amaJuda, ‘wafikelwa isihawu ngawo.’ Watshela abafundi bakhe: “Ukuvuna kukhulu . . . Ncengani iNkosi yokuvuna ukuba ithumele izisebenzi ekuvuneni kwayo.”—Math. 9:36-38.
8. (a) Yini esenza kahle ngokuyicabanga? (b) Yini esingayifunda emazwini owesifazane othile ofundelwa iBhayibheli?
8 Njengoba sihlanganyela emsebenzini wokwenza abafundi, senza kahle ngokucabanga ngokujulile ngendlela esiye sazuza ngayo ngoba othile wazinika isikhathi wasifundela. Kumelwe sicabange nangabantu esihlangana nabo enkonzweni nangendlela abayozuza ngayo ngokuzwa isigijimi esisishumayelayo. Owesifazane othile wabhalela ihhovisi legatsha elisezweni lakubo: “Ngifuna ukunitshela ukuthi ngiwazisa kangakanani umsebenzi owenziwa oFakazi abeza kwami bezongifundisa. Ngiyazi ukuthi kumelwe ukuba ngezinye izikhathi ngiyabakhungathekisa ngoba nginemibuzo eminingi kakhulu futhi ngiyababambezela njalo. Kodwa banesineke futhi bayakulangazelela ukungifundisa lokho abakufundile. Ngibonga uJehova noJesu ngokungilethela laba bantu.”
9. Yini uJesu agxila kuyo, futhi singamlingisa kanjani?
9 Yiqiniso, akubona bonke abayazisa imizamo kaJesu yokubasiza. (Math. 23:37) Abanye bamlandela isikhashana kodwa ngenxa yemfundiso yakhe ababengavumelani nayo “ababange besahamba naye.” (Joh. 6:66) Kodwa uJesu akazange avumele ukungasabeli kahle kwabathile ukuba kumenze abe nomuzwa wokuthi isigijimi sakhe sasingenanzuzo. Nakuba imbewu eningi ayihlwanyela ingazange ithele, wagxila emsebenzini omuhle ayewenza. Wabona ukuthi amasimu ayemhlophe nokuthi ayelungele ukuvunwa futhi wathola injabulo enkulu ngokusiza kulokho kuvuna. (Funda uJohane 4:35, 36.) Kunokuba sidunyazwe abantu abangasamukeli kahle isigijimi sethu, singenza yini okufanayo ensimini yethu sigxile ekuvuneni? Ake sihlole indlela esingalondoloza ngayo isimo sengqondo esihle.
Hlwanyela Unomgomo Wokuvuna
10, 11. Yini ongayenza ukuze ulondoloze injabulo yakho?
10 Umlimi uhlwanyela imbewu enomgomo wokuvuna. Ngokufanayo, kudingeka sishumayele sinomgomo wokuqala izifundo zeBhayibheli. Nokho, kumelwe wenzenjani uma uya njalo enkonzweni yasensimini kodwa uthola abantu abambalwa emakhaya noma kubonakala ungabatholi lapho wenza izimpindelo? Lokhu kungakukhungathekisa. Ingabe kufanele uyiyeke inkonzo yendlu ngendlu? Lutho neze! Abantu abaningi basatholakala ngokusebenzisa le ndlela ephumelelayo osekuyisikhathi eside isetshenziswa.
11 Nokho, ukuze ulondoloze injabulo yakho, ungakwazi yini ukwandisa izindlela oshumayela ngazo, mhlawumbe usebenzise nezinye izindlela zokufinyelela abantu? Ngokwesibonelo, uke wazama yini ukushumayeza abantu emgwaqweni noma lapho besebenza khona? Ungakwazi yini ukushumayela ngocingo noma ukucela abantu oye waxoxa nabo ngesigijimi soMbuso ukuba bakunike izinombolo zabo zocingo ukuze ukwazi ukulokhu uxhumana nabo? Ngokuphikelela nangokuzivumelanisa nezimo enkonzweni yakho, uyothola injabulo yokuthola abantu abayokwamukela isigijimi soMbuso.
Ukubhekana Ngokuphumelelayo Nokunganakwa
12. Yini esingayenza uma abantu abaningi ensimini yethu bengasinaki?
12 Kufanele wenzenjani uma abantu abaningi ensimini yenu bengenandaba nenkolo? Ungakwazi yini ukuqala ingxoxo ngokukhuluma ngezinto ezibakhangayo? Umphostoli uPawulu wabhalela amakholwa akanye nawo eKorinte: “KumaJuda ngaba njengomJuda . . . Kulabo abangenawo umthetho ngaba njengongenawo umthetho, nakuba ngingeyena ongenawo umthetho ngakuNkulunkulu.” Wayenasiphi isisusa? Wathi: “Ngiye ngaba yizinto zonke kubantu bazo zonke izinhlobo, ukuze ngazo zonke izindlela ngisindise abathile.” (1 Kor. 9:20-22) Ingabe nathi singathola esivumelana ngakho nabantu abasensimini yethu? Abantu abaningi abangasonti bafuna ukuthuthukisa ukuphila kwemikhaya yabo. Kungenzeka nokuthi bafuna injongo yokuphila. Singakwazi yini ukwethula isigijimi soMbuso ngendlela eyobakhanga?
13, 14. Singayandisa kanjani injabulo esiyithola emsebenzini wokwenza abafundi?
13 Inani elandayo labamemezeli liye landisa injabulo eliyithola emsebenzini wokwenza abafundi ngisho nasezindaweni lapho iningi labantu libonakala lingenandaba nathi. Kanjani? Ngokufunda olunye ulimi. Omunye umbhangqwana oweve eminyakeni engu-60 wathola ukuthi kunezinkulungwane zabafundi abangamaShayina nemikhaya yabo eyayihlala ensimini yebandla. Umyeni uthi: “Lokhu kwasikhuthaza ukuba sifunde isiShayina.” Uyaqhubeka: “Nakuba lokhu kwakudinga sisebenzise isikhathi esithile usuku ngalunye sifunda ulimi, saba nezifundo zeBhayibheli eziningi nabantu abakhuluma isiShayina abasensimini yethu.”
14 Ngisho noma ungenakukwazi ukufunda olunye ulimi, ungayisebenzisa ngokuphumelelayo incwajana ethi Good News for People of All Nations lapho uhlangana nabantu abakhuluma olunye ulimi. Ungazijwayeza nokuphatha izincwadi zezilimi zabantu ohlangana nabo. Yiqiniso, kudinga isikhathi esiningi nokuzikhandla ukuze sikwazi ukukhuluma nalabo abakhuluma olunye ulimi nabanamasiko ahlukile. Kodwa ungasikhohlwa isimiso esiseZwini likaNkulunkulu: “Lowo ohlwanyela kakhulu uyovuna kakhulu futhi.”—2 Kor. 9:6.
Lonke Ibandla Lihilelekile
15, 16. (a) Kungani ibandla lonke lihilelekile emsebenzini wokwenza abafundi? (b) Iyiphi indima efezwa asebekhulile?
15 Nokho, ukwenza umfundi akuxhomekile emizamweni yomuntu oyedwa kuphela. Kunalokho, lonke ibandla lihilelekile. Ngani? UJesu wathi: “Bonke bayokwazi ngalokho ukuthi ningabafundi bami, uma ninothando phakathi kwenu.” (Joh. 13:35) Yebo, lapho abantu abafundelwa iBhayibheli beza emihlanganweni yethu, uthando abalubona emibuthanweni yethu luvame ukubahlaba umxhwele. Omunye ofundelwayo wabhala: “Angive ngikujabulela ukuba semihlanganweni. Ngizizwa ngamukelekile!” UJesu wathi labo ababa abalandeli bakhe bangase baphikiswe imindeni yabo. (Funda uMathewu 10:35-37.) Nokho, wathembisa ukuthi babeyothola “abafowabo nodadewabo nonina nabantwana” abaningi abangokomoya ebandleni.—Marku 10:30.
16 Abazalwane nodadewethu asebekhulile ikakhulu banendima ebalulekile ekusizeni abafundi beBhayibheli ukuba bathuthuke. Ngayiphi indlela? Ngisho noma abanye asebekhulile bengasakwazi ukuqhuba izifundo zeBhayibheli, izimpendulo zabo ezakhayo emihlanganweni yebandla ziqinisa ukholo lwabo bonke abalalele. Umlando wabo wokuhamba “endleleni yokulunga” uhlobisa ibandla futhi ukhange abantu abanhliziyo-ziqotho ukuba beze enhlanganweni kaNkulunkulu.—IzAga 16:31.
Ukunqoba Ukwesaba
17. Yini esingayenza ukuze sinqobe imizwa yokungafaneleki?
17 Yini okumelwe uyenze uma ulwa nemizwa yokungafaneleki? Khumbula ukuthi uJehova wasiza uMose ngokumnika umoya ongcwele nangokumnika u-Aroni umfowabo ukuba abe umsizi wakhe. (Eks. 4:10-17) UJesu wathembisa ukuthi umoya kaNkulunkulu wawuyosisiza emsebenzini wethu wokushumayela. (IzE. 1:8) Ngaphezu kwalokho, wathumela izisebenzi ukuba zishumayele ngambili. (Luka 10:1) Ngakho-ke, uma ukuthola kuyinselele ukuqhuba isifundo seBhayibheli, thandazela umoya kaNkulunkulu ukuba ukunike ukuhlakanipha bese uthola umuntu ozoshumayela naye ongakunika isibindi nokuhlangenwe nakho okungakusiza. Kuqinisa ukholo ukukhumbula ukuthi uJehova wakhetha ukusebenzisa abantu abavamile—“izinto ezibuthakathaka zezwe”—ukuba bafeze lo msebenzi oyingqayizivele.—1 Kor. 1:26-29.
18. Singakunqoba kanjani ukwesaba ukwehluleka?
18 Singakunqoba kanjani ukwesaba ukuthi singase singaphumeleli? Senza kahle ngokukhumbula ukuthi ukwenza abafundi akufani nokupheka okuxhomeke kumuntu oyedwa—umpheki. Kunalokho, ukwenza umfundi kuhilela abantu abathathu. UJehova wenza ingxenye ebaluleke kakhulu yokudonsela kuye umuntu ofundelwayo. (Joh. 6:44) Thina nabanye ebandleni senza konke okusemandleni ukusebenzisa ikhono lokufundisa ukuze sisize umfundi athuthuke. (Funda eyesi-2 Thimothewu 2:15.) Umfundi yena kudingeka asebenzise lokho akufundayo. (Math. 7:24-27) Singase sidumale uma umuntu enqamula isifundo sakhe seBhayibheli. Sifisa ukubona abantu esibafundelayo benza isinqumo esihle, kodwa umuntu ngamunye kumelwe ‘azilandisele kuNkulunkulu.’—Roma 14:12.
Iyini Imivuzo?
19-21. (a) Iziphi izinzuzo esizithola ngokuqhuba izifundo zeBhayibheli? (b) UJehova ubabheka kanjani bonke abahlanganyela emsebenzini wokushumayela?
19 Ukuqhuba izifundo zeBhayibheli kusigcina sigxile ekufuneni uMbuso kuqala. Kugxilisa namaqiniso eZwi likaNkulunkulu ezingqondweni nasezinhliziyweni zethu. Kanjani? Iphayona okuthiwa uBarak liyachaza: “Ukuqhuba izifundo zeBhayibheli kuyakuphoqa ukuba ube umfundi weZwi likaNkulunkulu okhuthele. Ngiye ngithole ukuthi kumelwe ngiziqinisekise ngezinkolelo zami ukuze ngikwazi ukumfundisa kahle omunye umuntu.”
20 Uma ungenaso isifundo seBhayibheli manje, ingabe lokho kusho ukuthi inkonzo yakho ayisho lutho kuNkulunkulu? Lutho neze! UJehova uyazisa ngokujulile imizamo yethu yokumdumisa. Bonke abahlanganyela emsebenzini wokushumayela ‘bayizisebenzi ezikanye noNkulunkulu.’ Nokho, ukuqhuba isifundo seBhayibheli kuletha injabulo eyengeziwe lapho sibona indlela uNkulunkulu ayikhulisa ngayo imbewu esiyitshalayo. (1 Kor. 3:6, 9) Elinye iphayona okuthiwa u-Amy lithi: “Njengoba ubona umuntu omfundelayo ethuthuka, ushukumiseleka ukuba ubonge uJehova ngokukusebenzisa ukuba uphe lowo muntu isipho esimangalisayo—ithuba lokwazi ngaYe nelokuthola ukuphila okuphakade.”
21 Ukwenza konke esingakwenza ukuze siqale futhi siqhube izifundo zeBhayibheli kuyosisiza ukuba sihlale sigxile ekukhonzeni uNkulunkulu futhi kuyoqinisa ithemba lethu lokusindela ezweni elisha. Ngosizo lukaJehova, nathi singakwazi ukusiza abasilalelayo ukuba basindiswe. (Funda eyoku-1 Thimothewu 4:16.) Yeka ukuthi kuyosijabulisa kanjani lokho!
Uyakhumbula?
• Iziphi izinselele ezingase zithiye abanye ekuqhubeni izifundo zeBhayibheli?
• Yini esingayenza uma abaningi ensimini yethu bebonakala bengasinaki?
• Imiphi imivuzo esiyithola ngokuqhuba isifundo seBhayibheli?
[Izithombe ekhasini 9]
Uyazandisa yini izindlela oshumayela ngazo ukuze uthole abantu abanhliziyo-ziqotho?