Indlela Ongaliqonda Ngayo IBhayibheli

3. Yamukela Usizo Lwabanye

Lapho umhloli wamazwe u-Edward John Eyre ethatha uhambo olunqamula iHlane LaseNullarbor, aboMdabu bakhona bamfundisa indlela yokukha amanzi ezindundumeni zesihlabathi nasezihlahleni zikagamthilini. Ukwamukela usizo kubantu ababeyazi kahle indawo kwasindisa ukuphila kwakhe.

NJENGOBA lesi sibonelo sibonisa, ukuze umuntu akwazi ukuwufeza ngempumelelo umsebenzi oyinselele, ngokuvamile udinga usizo lomuntu owazi kahle lowo msebenzi. Kunjalo nalapho uqala ukufunda iBhayibheli.

UJesu akazange alindele abalandeli bakhe ukuba baqonde iBhayibheli ngaphandle kokusizwa abathile. Ngesinye isikhathi, “wavula izingqondo zabo ngokugcwele ukuze baqonde okushiwo imiBhalo.” (Luka 24:45) UJesu wayazi ukuthi abafundi beBhayibheli badinga usizo ukuze bakwazi ukuqonda izimfundiso zemiBhalo.

Usizo Lungatholakala Kobani?

UJesu wathuma abalandeli bakhe beqiniso ukuba banikeze lolu sizo. Ngaphambi kokunyukela ezulwini, wabayala: “Ngakho-ke hambani niyokwenza abantu bazo zonke izizwe babe abafundi, . . . nibafundise ukugcina konke enginiyale ngakho.” (Mathewu 28:19, 20) Umsebenzi wamaKristu oyinhloko uhlanganisa ukufundisa, okuhilela ukuchaza indlela izimiso zeBhayibheli ezingasetshenziswa ngayo ekuphileni kwansuku zonke. AmaKristu eqiniso asiza abanye ukuba baqonde iBhayibheli.

Ngemva kwesikhashana uJesu enikeze abalandeli bakhe lo msebenzi, kwenzeka okuthile okuthakazelisayo. IBhayibheli lisitshela ngesikhulu esithile sasebukhosini esasivela eTopiya esasifunda ingxenye ethile yesiprofetho sika-Isaya. Njengoba sifunda, safika endimeni ethile esingazange siyiqonde. Ngokulandisa kweBhayibheli, lawo mavesi adidayo athi: “Njengemvu walethwa ekuhlatshweni, nanjengewundlu elingenazwi phambi komgundi walo, kanjalo akawuvuli umlomo wakhe. Phakathi nokuthotshiswa kwakhe, isahlulelo sasuswa kuye. Ngubani oyolandisa imininingwane yesizukulwane sakhe? Ngoba ukuphila kwakhe kuyasuswa emhlabeni.”—IzEnzo 8:32, 33; Isaya 53:7, 8.

Leso sikhulu sabuza uFiliphu owayesenesikhathi eside engumKristu futhi enolwazi oluhle lwemiBhalo: “Lo mprofethi ukusho mayelana nobani lokhu? Ngaye ngokwakhe noma ngomunye umuntu othile?” (IzEnzo 8:34) Lo mTopiya oqotho wayebuya eJerusalema ukuyokhulekela, futhi mhlawumbe wayethandazele ukuthola isiqondiso. Kusobala ukuthi wayefunda ngokulangazela futhi enesimo sengqondo sokuthobeka. Yize kunjalo, wayengawuqondi umBhalo ayewufunda. Ngokuthobeka, wacela usizo kuFiliphu. Incazelo kaFiliphu yamjabulisa kakhulu kangangokuthi washukumiseleka ukuba abe umKristu.—IzEnzo 8:35-39.

OFakazi BakaJehova baqhubeka nomsebenzi owawenziwa uFiliphu namanye amaKristu ekhulu lokuqala. Ngokuzithandela, basiza abantu emazweni angaphezu kwangu-235 ukuba baqonde lokho ngempela okufundiswa yiBhayibheli. Lokhu bakwenza ngokuxoxa nabantu ngezinto ezenzeka namuhla bese besebenzisa iBhayibheli. Le ndlela yokutadisha iBhayibheli ngokuqhubekayo ihlanganisa nokuhlaziya lokho elikushoyo ngezindaba ezithile.a—Bheka ibhokisi elithi “Izimpendulo Ezanelisayo Zemibuzo YeBhayibheli.”

‘Yonke Imibuzo Yami Yaphenduleka’

USteven, uValvanera noJo-Anne, abacashunwe esihlokweni sokuqala, baqala ukutadisha iBhayibheli noFakazi BakaJehova. USteven uthi: “Kwangimangaza kabi ukuthi lapho uqhathanisa izimiso noma izindaba eziningana eziseBhayibhelini, impendulo ivele ihlale obala. Ngaphambi kokuqala ukutadisha iBhayibheli, akekho owayeke wangibonisa indlela yokulifunda. Kwangikhulula ukwazi ukuthi iBhayibheli aliyona incwadi egcwele izindaba eziningi ezinganikezi izimpendulo ezanelisayo noma incwadi enemibono engqubuzanayo.”

UValvanera uvumelana nalokhu. “Yonke into yayizwakala futhi inengqondo. Ngafunda ukuthi asikho isidingo sokukholelwa ezintweni ezithile ngoba nje zifundiswa ‘eSontweni,’ kunalokho yonke into eseBhayibhelini inencazelo enengqondo.” UJo-Anne uyalandisa: “Iqiniso lokuthi yonke imibuzo yami yayiphendulwa ngeBhayibheli langenza ngamhlonipha kakhulu uMlobi walo—ngoba wabona kusengaphambili ukuthi abantu babeyoba nemibuzo ababeyofuna ukuphendulelwa yona.”

Ukhona yini uFakazi kaJehova omaziyo? Mcele ukuba akubonise ukuthi siqhutshwa kanjani isifundo seBhayibheli. Uma engekho uFakazi kaJehova omaziyo, sicela ubhalele kwelinye lamakheli asekhasini 4 lalo magazini. Ngosizo lomoya ongcwele kaNkulunkulu, ukuba nomqondo ovulekile nokuthola usizo kumfundisi weBhayibheli onolwazi, iZwi likaNkulunkulu ngeke libe incwadi eyinkiyankiya. Yebo, ungakwazi ukuqonda iBhayibheli!

[Umbhalo waphansi]

[Ibhokisi/Isithombe ekhasini 8]

Izimpendulo Ezanelisayo Zemibuzo YeBhayibheli

Lena eminye yemibuzo ephendulwa oFakazi BakaJehova lapho beqhuba izifundo zeBhayibheli:

• Iyini injongo kaNkulunkulu ngomhlaba?

• Bakuphi abafileyo?

• Ingabe siphila “ezinsukwini zokugcina”?

• Kungani uNkulunkulu evumela ukuhlupheka?

• Ngingakwenza kanjani ukuphila komkhaya wami kujabulise?

[Izithombe ekhasini 7]

Ukuze uqonde iBhayibheli . . . thandazela umoya kaNkulunkulu, lifunde ngomqondo ovulekile futhi wamukele usizo lwabanye