Ingabe Ungakwazi Ukuqonda IBhayibheli?

“Njalo ngeSonto ekhaya sasifunda iBhayibheli. Ngangingakujabuleli kangako lokho. Yiqiniso, ngangikholelwa ukuthi iBhayibheli liyiZwi likaNkulunkulu, kodwa izinto eziningi engangizifunda kwakunzima ukuziqonda.”—USteven, eBrithani.

“Lapho ngineminyaka engu-17 ubudala, ngazama ukufunda iBhayibheli kodwa ngakuthola kunzima ukuliqonda, ngakho ngavele ngayeka.” —UValvanera, eSpain.

“Ngake ngalifunda iBhayibheli ngoba ngicabanga ukuthi kufanele ngilifunde ngoba ngingumKatolika. Kwangithatha iminyaka emithathu ukuliqeda! Kodwa kuncane kakhulu engakuqonda.”—UJo-Anne, e-Australia.

IBhayibheli liyincwadi ethandwa kakhulu emhlabeni futhi litholakala ngezilimi ezihlukahlukene. Lithengiswa ukudlula zonke izincwadi futhi litholakala ngamakhasethi, ama-CD, ama-DVD nokunye. Yize kunjalo, abaningi abaneBhayibheli bakuthola kunzima ukuliqonda. Ingabe nawe unenkinga efanayo?

Ingabe UMlobi Walo Uyafuna Siliqonde?

IBhayibheli lithi: “Yonke imiBhalo iphefumulelwe uNkulunkulu.” (2 Thimothewu 3:16) Yebo, uJehova uNkulunkulu unguMlobi weBhayibheli. Ingabe uyafuna siliqonde iZwi lakhe noma wénza ngamabomu ukuba lingaqondwa yibo bonke abantu, liqondwe abambalwa kuphela, njengabefundisi nezazi zeBhayibheli?

Cabangela la mavesi alandelayo aseBhayibhelini:

“Lo myalo engikuyala ngawo namuhla awulukhuni neze kuwe, futhi awukude.”—Duteronomi 30:11.

“Ukwambulwa kwamazwi akho kunikeza ukukhanya, kwenza abangenalwazi baqonde.”—IHubo 119:130.

“Ngalo kanye lelo hora [uJesu] wachichima injabulo ngomoya ongcwele wathi: ‘Ngikudumisa obala, Baba, Nkosi yezulu nomhlaba, ngoba uzifihle ngokucophelela lezi zinto kwabahlakaniphileyo nakongqondongqondo, wazambulela izingane.’”—Luka 10:21.

Yebo, uMlobi weBhayibheli uyafuna ukuba uqonde iZwi lakhe! Nokho, iqiniso liwukuthi abantu abaningi abaqotho bakuthola kunzima ukuyiqonda le ncwadi. Yini engasiza? Izihloko ezilandelayo zinokusikisela okuthathu okungakusiza ukuba uliqonde.