Amagugu Echibi Elikhulu LaseMelika Ephakathi
NAKUBA iNicaragua iyizwe elincane, inechibi elikhulukazi eMelika Ephakathi—iChibi LaseNicaragua. Kuyathakazelisa ukuthi iChibi LaseNicaragua cishe liwukuphela kwechibi elinamanzi ahlanzekile elinezinhlanzi ezinjengoshaka, i-swordfish (inhlanzi enkulu enekhala elifana nenkemba) ne-tarpon (inhlanzi engaba amamitha amabili ubude). Ososayensi bakholelwa ukuthi leli chibikazi lake laba yingxenye yolwandle iPacific, kodwa lapho kuba nentaba-mlilo le ngxenye yahlukana nolwandle. Njengoba usawoti wawulokhu uncipha emanzini, izinhlanzi zaya ngokuya zilijwayela ikhaya lazo elisha.
Leli chibi elingamakhilomitha angaba ngu-160 ubude nangu-70 ububanzi, liphezulu kolwandle ngamamitha angu-30. Kuneziqhingi ezingaphezu kuka-40 kuleli Chibi LaseNicaragua futhi ezingu-300 zikake iNhlonhlo Yase-Asese, ngasedolobheni laseGranada, enyakatho yaleli chibi futhi zibizwa ngokuthi iziQhingana ZaseGranada.
Isiqhingi esikhulu kunazo zonke kuleli chibi yi-Ometepe ephakathi nendawo. Singamakhilomitha angaba ngu-25 ubude nangu-13 ububanzi, futhi sinezintaba-mlilo ezimbili ezixhunywe isiqeshana sezwe. IConcepción iyintaba-mlilo ebulungene futhi ingaphezulu kwechibi ngamamitha angu-1 610. Le ntaba-mlilo esaqhuma ibonakala ngokuphawulekayo enyakatho yesiqhingi. Enye intaba-mlilo ibizwa ngokuthi iMadera futhi ingamamitha angu-1 394 ubude kodwa yona ayisaqhumi. Sekwaba nohlaza oluningi kule ntaba futhi emgodini wayo sekwakheka ichitshana elihlala linezinkungu.
IChibi LaseNicaragua lithandwa kakhulu izivakashi zakwamanye amazwe. Ziza kule ndawo ukuzobuka ubuhle bemvelo, amanxiwa nezinto zakudala ezavubukulwa. Kodwa kunesinye isici esibalulekile seChibi LaseNicaragua okusadingeka saziwe.
Umphakathi Ohlala Ogwini
IziQhingana ZaseGranada zenile futhi zinezilwane eziningi zasendle. Kunezimbali ezinhle ngendlela eyisimanga ezimile emahlathini acinene atholakala cishe kuzo zonke lezi ziqhingi ezinezintaba-mlilo. Izinyoni ezinhle ezihlala ngasemanzini zihlala zizichanasela ngasogwini. Kulolu gu ungabona izindwandwe ezincane, amalanda odumo, uhlobo lwezinyoni ezifana nezinkwazi, izinyoni ezinezintamo ezinde ezidla izinhlanzi kanye neziphishamanzi. Ngasemaphethelweni amahlathi, ubona izidleke ezakhiwa izinyoni ezinkulu ezinombala onsundu ngokubomvu ezibizwa ngokuthi ama-Montezuma oropendolas, futhi umoya ovela echibini ushwiba lezi zidleke uze ucabange ukuthi zizoqathakela phansi.
Bakhona abantu abahlala kwezinye zalezi ziqhingana. Kukhona abadobi kanye nezindlu zokuvakasha zezinkinsela. Kukhona nezikole, amathuna, izitolo zokudlela nezindawo zokuphuza. Idlanzana leziqhingana ezilapho ungafunga ukuthi ziwumuzi ohlala abantu.
Njalo ekuseni ubona umkhumbi onombala omhlophe noluhlaza okwesibhakabhaka usuka kwesinye isiqhingi uya kwesinye uthutha izingane zesikole. Kunesinye futhi isikebhe esiya kulezi ziqhingana siyodayisela abantu izithelo nemifino. Nsuku zonke ubona amadoda edoba nabesifazane behlanza izingubo echibini.
OFakazi BakaJehova nabo bamatasa kulezi ziqhingi. Bahamba ngezikebhe bayoshumayela izindaba ezinhle zoMbuso kaNkulunkulu. (Mathewu 24:14) Ukuma kwale ndawo kwake kwaba yinkinga: Imihlangano yokutadisha iZwi likaNkulunkulu, iBhayibheli, yayingaqhutshelwa kuphi? Belalela umyalo weBhayibheli othi ‘bangakuyeki ukuhlangana ndawonye,’ oFakazi beza neqhinga lamaqhinga—iHholo LoMbuso lokuqala eNicaragua elintantayo!—Hebheru 10:25.
IHholo LoMbuso Elintantayo
Abashadikazi abayizikhonzi zesikhathi esigcwele abangoFakazi BakaJehova bathuthela eziqhinganeni zaseGranada ngo-November 2005. Ngemva kwezinyanga ezimbalwa befikile, bamemela abantu bendawo eSikhumbuzweni sokufa kukaKristu; bamangala kabi lapho kufika abangu-76. Lokhu kwabenza baqiniseka ngokuthi kumelwe kutholakale indawo yokuqhuba imihlangano. Ngenxa yokuthi kwakunzima ukuthola indawo efanelekayo, la maphayona azama elinye iqhinga. Anquma ukwakha iHholo LoMbuso elintantayo elidonswa liyiswe ezindaweni abantu abangazifinyelela.
Laba bashadikazi abangesabi ukuzama izinto ezintsha kodwa ababengakaze bakhe isakhiwo esintantayo, baqala umsebenzi wokwakha. Bona nabanye abayisithupha benza lo msebenzi inyanga yonke. Banquma ukwakha isihlenga esasizoba yindawo entsha ababengahlanganyela kuyo. Lesi sihlenga basakha ngamapayipi ensimbi ashiselelwe emigqonyeni engu-12 engamalitha angu-150 afakwe umoya abe asevalwa ukuze antante. Iphansi balakha nge-plywood bafulela ngotapolo. Lezi zisebenzi zazithandaza njalo kusihlwa ngoba zazingaqiniseki ukuthi leli hholo lalizokwazi yini ukuntanta. Nembala lantanta!
Leli Hholo LoMbuso elisha lasetshenziswa okokuqala eMhlanganweni Weningi ngo-June 10, 2006. Ngosuku olulandelayo, ladonswa layiswa kwelinye idlanzana leziqhingi ukuze abantu abahlala lapho bathole umhlangano ofanayo. Yomibili le mihlangano yaba nabantu abangu-48 nakuba kunabathile okwakudingeka bahambe ngaphezu kwesigamu sehora benqamula ehlathini. Bonke bajabula ngokuthi base benendawo yabo yokukhulekela!
Uma ungaphakathi kuleli Hholo LoMbuso, uzwa imisindo evame ukuzwakala kule ndawo. Lapho isikhulumi sinikeza inkulumo, izilaleli zingase zizwe umsindo wamanzi ashaya amadwala noma imfene iklewula kude le. Izakhamuzi zasheshe zalijwayela leli hholo. Zazivayiza lapho zilibona lidonswa liyiswa kwenye indawo. Masonto onke, kuza abantu abangaphezu kuka-20 bezothola imfundo yeBhayibheli, bajabulele nobudlelwane namanye amaKristu. Yeka indlela leli Hholo LoMbuso eliyigugu ngayo!
EsiQhingini Sase-Ometepe
I-Ometepe iqhele ngamakhilomitha angaba ngu-50 ukusuka eningizimu yeGranada. Abantu bathuthela kule ndawo ngenxa yobuhle bayo bemvelo nenhlabathi evundile. Empeleni, yiyo le ndawo eyatshela abaningi ukuthi iNicaragua iyindawo ekahle yokulima. Namuhla, i-Ometepe yondla abantu abangaba ngu-42 000 abangabadobi nabalimi bombila, ubhanana, ikhofi nezinye izilimo. Le ndawo ibuye ibe ikhaya lezilwane zasendle njengopholi abahlale betshiyoza, izinyoni ezinomsila omude ezibukisa ngezimpaphe zazo ezinombala omhlophe noluhlaza okwesibhakabhaka kanye nezimfene ezinobuso obumhlophe, eziyintandokazi kubantu abaningi abahlala lapha.
Bakhona abamemezeli boMbuso kaNkulunkulu nalapha e-Ometepe. Ngo-1966 kwabhapathizwa abangu-8 futhi lelo nani liye landa ngoba manje kunabamemezeli abangu-183 abakhonza emabandleni amane akhulayo. Ibandla ngalinye lineHholo LoMbuso lalo elakhiwe endaweni engafinyelelwa yibo bonke abantu. Namuhla, uFakazi oyedwa kufanele ashumayeze abantu abangu-230 abakulesi siqhingi.
OFakazi BakaJehova e-Ometepe baye babhekana nobunzima eminyakeni edlule. Ngokwesibonelo, ngo-1980, abaphikisi bashisa iHholo LoMbuso laseMérida kodwa kwakhiwa elinye ngo-1984. Lelo Hholo lasetshenziswa kwaze kwaba ngu-2003, kwabe sekwakhiwa elinye elihle futhi amalungu ebandla angu-60 alijabulela kakhulu.
EMoyogalpa, kwakhiwa iHholo LoMbuso elingahlalisa abantu abaningi lapho kudingeka. Ngemuva kwehholo kwaxhunywa uphahla oluya emuva futhi emaphethelweni alo kwakhiwa ipulatifomu. Kunezihlalo eziningi abantu abangahlala kuzo. OFakazi bendawo nabangane babo abahlala ngasechibini bavame ukuhlangana lapha ngemihlangano emikhulu futhi kusetshenziswa iChibi LaseNicaragua ukuze kubhapathizwe abafundi abasha bakaJesu Kristu.—Mathewu 28:19.
Ingabe La Magugu Ayohlala Ekhona?
Bekulokhu kubonakala sengathi iChibi LaseNicaragua liyohlala likhona, mhlawumbe ngenxa yobukhulu balo. Kodwa namuhla lidinga ukuvikelwa ngoba lingcoliswa ukungcola okuvela ezimbonini zolimo, emafektri nasemahlathini agawulwayo.
Akwaziwa ukuthi imizamo yabantu bendawo nekahulumeni izosilungisa yini lesi simo. Esikwaziyo ukuthi uMdali uzoqiniseka ukuthi wonke amagugu omhlaba, ahlanganisa amachibi amahle, iziqhingi ezihlobe ngobuhle kanye nezilwane zasendle ezimangalisayo, ayolondolozeka ukuze isintu esilalelayo siwajabulele. IBhayibheli liyasitshela: “Abalungile bayokudla ifa lomhlaba, futhi bayohlala kuwo kuze kube phakade.”—IHubo 37:29.
[Isithombe ekhasini 26]
IHholo LoMbuso elintantayo okuqhutshelwa kulo imihlangano yeBhayibheli