Ubunzima Basenza Sathembela KuJehova Ngokwengeziwe

Njengoba Ilandiswa U-Ada Dello Stritto

Ngisanda kuqeda ukukopishela itekisi losuku lanamuhla encwajaneni yami yamaphuzu. Ngineminyaka engu-36 ubudala, kodwa ukubhala leyo misho embalwa kungithathe amahora amabili. Kungani kungithathe isikhathi eside kangaka? Umama uzochaza.—UJoel

MINA nomyeni wami sabhapathizwa njengoFakazi BakaJehova ngo-1968. Ngemva kokubeletha amadodana amabili aphile saka, uDavid noMarc, sathola indodana yethu yesithathu, uJoel. Yazalwa ngaphambi kwesikhathi ngo-1973 esibhedlela esisedolobheni laseBinche eBelgium, engamakhilomitha angaba ngu-60 eningizimu yeBrussels. Yayinesisindo esingamakhilogremu angu-1,7 kuphela. Lapho ngiphuma esibhedlela, kwadingeka ukuba uJoel asale ukuze isisindo sakhe sithi ukuthuthuka.

Lapho kungabonakali zimpawu zokuthuthuka ngemva kwamasonto athile, mina nomyeni wami uLuigi sayisa indodana yethu kudokotela wezingane. Lapho eqeda ukuhlola uJoel, wathi: “Ngiyadabuka kakhulu. Kubonakala sengathi uJoel uthathe zonke izinkinga abafowabo abangenazo.” Kwathi cwaka isikhathi eside. Ngazi lapho ukuthi umfanyana wethu wayenenkinga enkulu yempilo. Udokotela wabe esebizela umyeni wami eceleni wamtshela: “Ingane yenu ine-trisomy 21,” ephinde yaziwe nangokuthi i-Down Syndrome.a

Sidunyazwe yilawo mazwi kadokotela, sanquma ukuya komunye udokotela owuqweqwe kwezokwelapha. Wathatha cishe ihora lonke emhlola ngokucophelela umfanyana wethu engathi vu. Lelo hora kwaba sengathi liyiminyaka kithi. Ekugcineni, udokotela wasibheka wathi, “Ingane yenu izodinga usizo lwenu kakhulu.” Wabe esenezela ngezwi elinomusa, “Kodwa uJoel uyajabula ngoba unabazali abamthandayo!” Ngigajwe usizi, ngamgona uJoel sagoduka. Ngaleso sikhathi wayenamasonto angu-8 ubudala.

Siqiniswa Imihlangano YobuKristu Nenkonzo

Okunye ukuhlola kwezokwelapha kwembula nokuthi inhliziyo kaJoel yayinenkinga engathi sina kanti wayenenkinga enkulu yamathambo. Ngenxa yokuthi inhliziyo yakhe yayinkulu kakhulu, yayicindezele amaphaphu akhe okwakumenza angenwe izifo kalula. Enezinyanga ezine nje kuphela, uJoel wangenwa inyumoniya futhi kwadingeka abuyiselwe esibhedlela lapho afike walaliswa yedwa khona. Kwakumunyu kithi ukumbona ehlupheka. Sasifisa sengathi singamgona, simphulule, kodwa kwaphela amasonto ayishumi anzima singavunyelwe nhlobo ukumthinta. Ukuphela kwento esasikwazi ukuyenza sinomyeni wami, kwakuwukumbukela nje, sibambane sithandaze.

Phakathi naleso sikhathi esinzima, saqhubeka siya emihlanganweni yebandla noDavid noMarc abasebeneminyaka eyisithupha, omunye enemithathu. Ukuba seHholo LoMbuso kwakusenza sizizwe sengathi sigonwe uJehova ngezandla ezikhathalelayo. Amahora esasiwachitha sizungezwe abafowethu nodadewethu abangokomoya ayesenza sizizwe sikwazi ukuphonsa imithwalo yethu phezu kukaJehova, futhi sasiba nokuzola okuthile ngaphakathi. (IHu. 55:22) Ngisho nabahlengikazi ababenakekela uJoel bathi babekuphawula ukuthi ukuya emihlanganweni kwakusisiza ukuba singeqiwa usizi.

Phakathi naleso sikhathi, nganxusa uJehova ukuba angisize ngiye nasenkonzweni yasensimini. Esikhundleni sokuhlala ekhaya ngikhale, ngangifuna ukuxoxela abanye ukuthi kungani ukuthembela kwami esithembisweni sikaNkulunkulu sezwe elingenakho ukugula kwakunginika amandla. Njalo lapho ngikwazile ukuya ensimini, ngangiba nomuzwa wokuthi uJehova uyiphendulile imithandazo yami.

“Yisimanga!”

Yeka ukuthi kwaba usuku olujabulisa kanjani lapho ekugcineni uJoel ededelwa esibhedlela! Kodwa ngakusasa injabulo yethu yaphenduka usizi. Impilo kaJoel yashintsha masinyane, kwadingeka simphuthumise esibhedlela futhi. Ngemva kokumhlola, odokotela basitshela: “UJoel usalelwe cishe izinyanga eziyisithupha kuphela.” Ngemva kwezinyanga ezimbili, lapho esenezinyanga ezingu-8 ubudala, kwabonakala lawo mazwi odokotela ehlonzeka ngoba uJoel waqhubeka ewohloka. Omunye udokotela wahlala phansi nathi wathi: “Ngiyanizwela. Akusekho lutho esingamenzela lona.” Wabe esenezela: “Kuleli qophelo, uJehova kuphela ongamsiza.”

Ngaphindela egunjini likaJoel. Nakuba usizi lwaludla lubi kimi futhi ngicobekile, ngazimisela ukungasuki eceleni kombhede wakhe. Odade abaningana bashintshana ngokungihlalisa njengoba uLuigi kwakudingeka anakekele abafanyana bethu abadadlana. Kwaphela isonto. Kungazelelwe, uJoel wamelwa inhliziyo. Abahlengikazi baphuthuma egunjini kodwa abakwazanga ukumsiza. Ngemva kwemizuzwana ethile, omunye wabo washo ngezwi eliphansi, “Kuphelile . . . ” Ngingenamandla, ngaqhumuka ngakhala, ngaphuma kulelo gumbi. Ngazama ukuthandaza kuJehova, kodwa awafikanga amazwi ayengazwakalisa ubuhlungu engangibuzwa. Ngemva kwemizuzu engu-15, omunye umhlengikazi wangimemeza, “UJoel useyaphefumula futhi!” Wangibamba ngengalo wathi, “Woza, usungambona manje.” Nembala, ngafica inhliziyo yakhe isishaya futhi! Izindaba zalokhu kusinda kwakhe zasakazeka masinyane. Odokotela nabahlengikazi beza bezombona futhi abaningi bababaza, “Yisimanga!”

Wacathuza Singalindele Lapho Eneminyaka Emine

Phakathi neminyaka yokuqala yokuphila kukaJoel, udokotela wezingane wakuphindaphinda njalo kithi ukuthi, “UJoel udinga nimthande kakhulu.” Njengoba uLuigi nami sasikubone ngokukhethekile ukusikhathalela ngothando kukaJehova ngemva kokuzalwa kukaJoel, safisa ukunikeza indodana yethu lokho kukhathalela kothando kakhulu ngangokunokwenzeka. Sasinamathuba amaningi okwenza kanjalo ngoba yayidinga usizo lwethu cishe kunoma yini eyayiyenza.

Minyaka yonke phakathi neminyaka yakhe yokuqala eyisikhombisa sasibhekana nezimo ezifanayo. Phakathi kuka-October no-March, izifo zazishintshana ngaye, futhi kwakudingeka aphume engena esibhedlela. Ngesikhathi esifanayo, ngangizama ukuba nesikhathi esiningi ngangokunokwenzeka namadodana ethu uDavid noMarc. Ayewusizo kakhulu ekusizeni uJoel ukuba athuthuke—futhi kwaba nemiphumela emangalisayo. Ngokwesibonelo, odokotela abaningana babesitshele ukuthi uJoel akasoze akwazi ukuhamba. Kodwa ngolunye usuku lapho uJoel eneminyaka emine, uMarc wathi, “Cathu, Joel, bonisa umama ukuthi usuyakwazi!” Nembala, ngamangala ukubona uJoel ecathuza! Sajabula safa, futhi sathandaza ndawonye njengomkhaya simbonga uJehova ngokusuka ezinhliziyweni zethu. Sasimncoma kakhulu nangezinye izikhathi, ngisho nalapho incane kakhulu intuthuko ayeyenzile entweni ethile.

Ukumqeqesha Ngendlela KaNkulunkulu Esewusana Kuba Nezithelo

Sasiya noJoel emihlanganweni eHholo LoMbuso kaningi ngangokunokwenzeka. Ukuze avikeleke emagciwaneni ayengamgulisa kalula, sasimfaka enqodlaneni ekhethekile eyayinesembozo sepulastiki ebonisa ngale. Nokho, nakuba ayehlala kuleyo nqodlana yakhe, wayekujabulela ukuba sebandleni.

Abafowethu nodadewethu babesiqinisa, besibonisa uthando kakhulu futhi besisekela nangezindlela ezingokoqobo. Omunye umzalwane wayevame ukusikhumbuza amazwi aku-Isaya 59:1: “Bheka! Isandla sikaJehova asizange sibe sifushane kangangokuba singakwazi ukusindisa, futhi indlebe yakhe ayibanga ngethuntubezeke kangangokuba ingakwazi ukuzwa.” Lawo mazwi aduduzayo asisiza ukuba sithembele kuJehova.

Njengoba uJoel ayekhula, sazama ukwenza ukuba ukukhonza uJehova kube into ebalulekile ekuphileni kwakhe. Sasisebenzisa wonke amathuba ukuze sixoxe naye ngoJehova ngendlela eyayizomenza azakhele ubuhlobo bothando noYise osezulwini. Sanxusa uJehova ukuba abusise imizamo yethu ukuze ukumqeqesha kwethu ngendlela yaKhe kube nezithelo.

Lapho eva eminyakeni eyishumi nambili, kwasijabulisa ukumbona exoxa nabantu ayehlangana nabo ngamaqiniso eBhayibheli. Ngesikhathi esalulama ekuhlinzweni okukhulu ayebe nakho lapho eneminyaka engu-14, ngajabula kakhulu lapho engibuza, “Mama, nginganika udokotela obengihlinza incwadi ethi Ungaphila Phakade?” Ngemva kweminyaka engemingaki kwadingeka aphinde ahlinzwe. Sasazi kahle ukuthi ayemancane amathuba okuba asinde kulokho kuhlinzwa. Ngaphambi kokuba ahlinzwe, wanikeza odokotela bakhe incwadi esasiyibhale naye. Yayichaza ukuma kwakhe ngokusetshenziswa kwegazi. Udokotela ohlinzayo wambuza, “Uyavumelana nayo?” Wavuma ngokungangabazi, “Yebo, Dokotela.” Safikelwa umuzwa wokuziqhenya ngokwethembela kwendodana yethu kuMdali wayo nangokuzimisela kwayo ukumthokozisa. Izisebenzi zasesibhedlela zazisisekela kakhulu, into esayazisa ngokujulile.

Intuthuko KaJoel Ngokomoya

Lapho eneminyaka engu-17, uJoel wabonakalisa ukuzinikezela kwakhe kuNkulunkulu ngokubhapathizwa emanzini. Asisoze salulibala lolo suku! Ukumbona ethuthuka ngokomoya kusilethela injabulo ejulile. Kusukela lapho, uthando lwakhe ngoJehova nentshiseko yakhe ngeqiniso bekulokhu kukhule njalo. Eqinisweni, uJoel uthanda ukuthi kuwo wonke umuntu ahlangana naye, “Iqiniso liwukuphila kwami!”

Lapho esezohlanganisa iminyaka engamashumi amabili, uJoel wafunda ukufunda nokubhala. Kwakungelula neze. Iganyana ngalinye ayekwazi ukulibhala laliba into enkulu kithi. Kusukela ngaleso sikhathi, uqala usuku ngalunye ngokufunda itekisi losuku encwajaneni ethi Ukuhlola ImiBhalo Nsuku Zonke. Ngemva kwalokho ube esezikhandla ekopisha umbhalo itekisi elisekelwe kuwo kwenye yezincwajana zakhe abhala kuzo amaphuzu, eseziyinqwaba manje!

Ngezinsuku zemihlangano, uJoel uqinisekisa ukuthi sifika kusenesikhathi eHholo LoMbuso ngoba ufuna ukuba nesikhathi sokubamukela ngokufudumele bonke abangenayo. Uyakujabulela ukuphendula emihlanganweni nokuba nengxenye emibonisweni. Uyasiza nasekunakekeleni imibhobho nasekwenzeni eminye imisebenzi edingekayo. Uma impilo yakhe imvumela uhlanganyela nathi emsebenzini wokushumayela masonto onke. Ngo-2007 kwamenyezelwa ebandleni ukuthi usemiswe njengenceku ekhonzayo. Samane sakhala izinyembezi zenjabulo. Yeka isibusiso somusa kaJehova!

Sibona Isandla SikaJehova

Ngo-1999 sabhekana nobunye ubunzima. Umuntu othile owayeshayela budedengu washayisa imoto yethu, futhi uLuigi walimala kabi. Kwadingeka ukuba omunye umlenze wakhe unqanyulwe futhi usehlinzwe kaningi emgogodleni. Nakulokhu, ukuthembela kuJehova kwasenza sabona amandla awanika izinceku zakhe eziwadingayo. (Fil. 4:13) Nakuba uLuigi esakhubazekile namanje, sizama ukubheka okuhle kulesi simo. Njengoba engasakwazi ukusebenza, usenesikhathi esengeziwe sokunakekela uJoel. Lokhu kwenza ngikwazi ukuba nesikhathi esengeziwe sezinto ezingokomoya. ULuigi uyakwazi nokunakekela izidingo ezingokomoya zomkhaya wethu nezebandla, njengoba eqhubeka ekhonza njengomxhumanisi wendikimba yabadala.

Izimo zethu ezingavamile zenza sikwazi ukuchitha isikhathi esiningi ndawonye. Ngokuhamba kwesikhathi siye safunda ukuba abacabangelayo nokungalindeli okungaphezu kwamandla. Ngezinsuku esizizwa sidangele ngazo, sithululela imizwa yethu kuJehova ngomthandazo. Kuyadabukisa nokho ukusho ukuthi lapho amadodana ethu amabili uDavid noMarc ekhula, aphuma ekhaya futhi kancane kancane ayeka ukukhonza uJehova. Siyethemba ukuthi asazobuyela kuYe.—Luka 15:17-24.

Kuyo yonke le minyaka siye sambona uJehova esisekela futhi sifunde ukuthembela kuye lapho sibhekana nanoma iyiphi inselele. Asive siwathanda amazwi aku-Isaya 41:13: “Mina, Jehova uNkulunkulu wakho, ngibambé isandla sakho sokunene, Mina engithi kuwe, ‘Ungesabi. Ngizokusiza mina mathupha.’” Kuyasiduduza ukwazi ukuthi uJehova usibambe wasiqinisa isandla sethu. Ngempela, singasho kugcwale umlomo ukuthi ukubhekana nobunzima kwasenza sathembela ngokwengeziwe kuBaba wethu osezulwini, uJehova.

[Umbhalo waphansi]

[Izithombe ekhasini 16, 17]

UJoel nonina, u-Ada

[Isithombe ekhasini 18]

U-Ada, uJoel noLuigi

[Isithombe ekhasini 19]

UJoel uyakujabulela ukwamukela abafowethu nodadewethu eHholo LoMbuso