Ngiwabonile Amandla Eqiniso LeBhayibheli

Njengoba ilandiswa uVito Fraese

CISHE awukaze uzwe ngendawo okuthiwa iTrentinara. Iyidolobhana elincane eliseningizimu yeNaples, e-Italy. Abazali bami nomfowethu omdala, u-Angelo bazalelwa lapho. Ngemva kokuzalwa kuka-Angelo, abazali bami bathuthela e-United States, bafike bazinza eRochester, eNew York, lapho ngazalelwa khona ngo-1926. Ubaba waqala ngo-1922 ukuhlangana nabaFundi beBhayibheli, njengoba oFakazi BakaJehova babaziwa kanjalo. Ngokushesha yena nomama baba abaFundi beBhayibheli.

Ubaba wayengumuntu onomoya ozolile, ocabangisisayo ngezinto, nokho kwakumcasula ukubona ukungabi nabulungisa. Wayengakwazi ukubekezelela indlela abefundisi ababegcina ngayo abantu bengazi, ngakho wayengaliyeki ithuba lokuhlanganyela nabanye amaqiniso eBhayibheli. Lapho ethatha umhlalaphansi, wangenela inkonzo yesikhathi esigcwele futhi wabambelela kuyo kwaze kwaba yilapho ukugula nobusika obubanda kakhulu bumphoqelela ukuba ayeke eseneminyaka engu-74. Ngisho nalapho eseyekile waqhubeka eshumayela amahora aphakathi kuka-40 kuya kwangu-60 ngenyanga waze waba neminyaka engaphezu kuka-90. Isibonelo sikababa sangithinta kakhulu. Wayengumuntu ongahlekahleki nje nakuba ayeke antele. Wayevame ukuthi, “Iqiniso kumelwe lithathwe ngokungathí sina.”

Ubaba nomama bazikhandla ukuze basifundise iZwi likaNkulunkulu sonke thina zingane zabo ezinhlanu. Ngabhapathizwa ngo-August 23, 1943, kwase kuthi ngo-June 1944, ngaba iphayona. Udadewethu uCarmela wayephayona noFern, udade owayehlale eneme, eGeneva, eNew York. Ngasheshe ngabona ukuthi wayeyintokazi engangingathanda ukuchitha ukuphila kwami konke nayo. Ngakho sashada ngo-August 1946.

Umsebenzi Wezithunywa Zevangeli

Izabelo zethu zokuqala ezimbili sindawonye zaba ukukhonza njengamaphayona akhethekile eGeneva naseNorwich, eNew York. Ngo-August 1948, sathola ilungelo lokuya ekilasini laseGileyadi le-12. Sabe sesithunyelwa eNaples, e-Italy nomunye umbhangqwana owawuyizithunywa zevangeli, uCarl noJoanne Ridgeway. Ngaleso sikhathi, iNaples yayisazama ukusimama encithakalweni eyayibangelwe yimpi. Kwakunzima ukuthola indlu, ngakho sake sathi ukuhlala izinyangana efulethini elalinamakamelo amancane amabili.

Ngakhula abazali bami bekhuluma ulimi lwaseNaples, ngakho isiNtaliyane sami—nakuba ngangisikhuluma ngendlela yaseMelika—sasizwakala. KuFern bandla kwakucisha izibani. Kodwa walufunda futhi mangisho ukuthi waze wangedlula.

Abantu bokuqala abathakazelayo esabathola eNaples kwakuwumkhaya onamalungu amane. Babedayisa ugwayi ongekho emthethweni. Njalo lapho eyodayisa, uTeresa, ongelinye lamalungu alo mkhaya, wayeshintsha ngendlela emangalisayo. Ekuseni wayeba isidudla ngoba wayegxisha ugwayi esiketini sakhe esasinamakhukhu amaningi. Kusihlwa wayebuya ezace ewukhahla. Iqiniso lawushintsha ngokuphelele lo mkhaya. Ekugcineni, amalungu angu-16 alo mkhaya kuhlanganisa nomndeni aba oFakazi. Manje sekunoFakazi abacishe babe ngu-3 700 edolobheni laseNaples.

Ukuphikiswa Komsebenzi Wethu

Kwathi sisahlale izinyanga ezingu-9 nje eNaples, izikhulu zasiphoqa ukuba sobane sihambe kuleli dolobha. Saya eSwitzerland isikhathi esingangenyanga, sabe sesibuyela e-Italy singena nge-visa yokuba izivakashi. Mina noFern sabelwa ukuba siye eTurin. Ekuqaleni saqasha ikamelo elilodwa endlini yowesifazane othile, futhi sasisebenzisa ikhishi lakhe nendlu yakhe yokugezela. Lapho abakwaRidgeway befika eTurin, sakwazi ukuqasha ifulethi ngokuhlanganyela. Ngokuhamba kwesikhathi, imibhangqwana emihlanu eyizithunywa zevangeli yahlala endlini eyodwa.

Lapho iziphathimandla zisixosha eTurin ngo-1955, kwase kubekwe isisekelo samabandla amasha amane. Abazalwane bendawo abafanelekayo base bengakwazi ukuqhubeka nomsebenzi. Iziphathimandla zathi kithi, “Siyaqiniseka ukuthi uma sekuhambe nina maMelikana, kuzobhidlika konke enikusungulile.” Kodwa ukwanda okwalandela kwabonisa ukuthi impumelelo yomsebenzi wethu incike kuNkulunkulu. Namuhla kunoFakazi abangaphezu kuka-4 600 namabandla angaphezu kuka-56 eTurin.

IFlorence—Idolobha Elihle Ngokumangalisayo

Isabelo sethu esilandelayo saba seFlorence. Sasihlale sizwa ngaleli dolobha ngoba udadewethu uCarmela nomyeni wakhe uMerlin Hartzler babekhonza khona njengezithunywa zevangeli. Nokho, zicabange uhlala lapho. Izindawo ezinjengePiazza della Signoria, iPonte Vecchio, iPiazzale Michelangelo nePalazzo Pitti zazenza leli dolobha libe lihle ngokumangalisayo! Kwakujabulisa ukubona indlela abanye babantu baseFlorence abasabela ngayo ezindabeni ezinhle.

Safundela umkhaya othile futhi abazali babhapathizwa. Nokho, ubaba wakhona wayebhema. Ngo-1973, INqabayokulinda yabonisa ukuthi ukubhema kwakuwumkhuba ongcolile futhi yanxusa abafundi ukuba bakuyeke. Izingane zakhe ezindala zamncenga ukuba ayeke. Wathembisa ukuthi uzoyeka, kodwa akazange. Ngobunye ubusuku umkakhe watshela amadodana akhe angamawele ayeneminyaka engu-9 ukuba ayolala engathandazanga nawo. Kamuva, wazizwa kabi ngalokhu wabe eseya ekamelweni lawo. Wafika esezithandazele. Wawabuza, “Nithandaze nathini?” Athi, sithe: “Jehova, sicela usize ubaba ayeke ukubhema.” Wabiza umyeni wakhe, “Ake uzozwa ukuthi izingane zakho zithandaze zathini.” Lapho ezwa, waqhumuka wakhala wathi, “Ngeke ngiphinde ngibheme!” Wasigcina isithembiso sakhe futhi manje abangaphezu kuka-15 kulowo mndeni bangoFakazi.

Ukukhonza E-Afrika

Ngo-1959 sashintshelwa eMogadishu, eSomalia, nezinye izithunywa zevangeli ezimbili, u-Arturo Leveris nomfowethu u-Angelo. Lapho sifika isimo sezombusazwe sasishubile. IZizwe Ezihlangene zazijube uhulumeni wase-Italy ukuba usize iSomalia ithole uzibuse, kodwa isimo sasibonakala siwohloka. Abanye abantu abangamaNtaliyane esasibafundele balishiya izwe, futhi kwakunzima ukumisa ibandla lapho.

Phakathi naleso sikhathi, umbonisi wamagatsha wasikisela ukuthi ngibe umsizi wakhe. Ngakho saqala ngokuhambela izindawo ezaziseduze. Abanye esasibafundela bathuthuka kodwa kwadingeka ukuba bashiye amazwe enkaba yabo ngenxa yokuphikiswa. Abanye bahlala nakuba kwakudingeka bakhuthazelele ukuhlushwa okukhulu.a Ukucabanga ngothando lwabo ngoJehova nangalokho abakukhuthazelela ukuze bahlale bethembekile kusasenza sigcwale izinyembezi.

Kwakuvame ukushisa kube nesivuvu ngendlela engabekezeleleki eSomalia nase-Eritrea. Okunye ukudla kwakhona kwakusenza sizwe ukushisa nakakhulu. Mhla siqala ukudla okunye kwako emzini womunye esasimfundela, umkami wantela wathi izindlebe zakhe zivele zaba bomvu kuhle kwezibani zerobhothi ezibomvu!

Lapho u-Angelo no-Arturo bethola esinye isabelo, sasala sodwa. Kwakungelula ukungabi namuntu osikhuthazayo. Nokho, lesi simo sasisiza ukuba sisondele kakhudlwana kuJehova futhi sithembele kuye ngokugcwele. Empeleni ukuhambela amazwe lapho umsebenzi wethu wawuvinjelwe khona kwakuwumthombo wesikhuthazo kithi.

ESomalia, sabhekana nobunzima obuhlukahlukene. Sasingenaso isiqandisi, ngakho sasithenga ukudla esasizokuqeda ngosuku, noma ngabe inyama kashaka obizwa ngokuthi i-hammerhead noma izithelo zendawo njengomango, uphopho, opapamusi, ukhukhunathi noma obhanana. Sasihlale siphunga izinambuzane ezindizayo. Ngezinye izikhathi sasithi sisaqhuba izifundo zeBhayibheli zize zifike zihlale entanyeni. Into eyayingcono nje kulesi sabelo ukuthi sasinesithuthuthu, ngakho sasingahambi isikhathi eside elangeni elikhipha umkhovu etsheni.

Sibuyela E-Italy

Umoya wokupha wabafowethu wenza sakwazi ukugibela isikebhe esithwala ubhanana saya e-Italy emhlanganweni wezizwe owawuseTurin ngo-1961. Satshelwa ukuthi sasizonikwa esinye isabelo. Ngo-September 1962, sabuyela e-Italy, lapho ngaqala khona ukukhonza njengombonisi wesifunda. Sathenga imotshwana, esayisebenzisa iminyaka emihlanu sihambela izifunda ezimbili.

Ngemva kokuhlala e-Afrika eshisayo manje kwase kudingeka sibekezelele amakhaza. Ebusika bokuqala lapho sihambele ibandla elaliphansi kwentaba i-Alps, salala ekamelweni elaliphezu kotshani obomile elalingenakho okokubasa. Ngendlela okwakubanda ngayo, salala sigqoke amajazi. Savuka kufe izikhukhukazi ezine nezinja ezimbili budebuduze zibulawa amakhaza!

Ngokuhamba kwesikhathi, ngakhonza nanjengombonisi wesigodi. Ngaleyo minyaka, salihamba lonke elase-Italy. Sahambela izindawo ezinjengeCalabria neSicily izikhathi eziningi. Sakhuthaza intsha ukuba ikhule ngokomoya futhi izibekele imigomo yokuba ababonisi bebandla, izikhonzi ezijikelezayo noma iyokhonza eBethel.

Sifunde okuningi kakhulu kubafowethu abathembekile abaye bakhonza uJehova ngenhliziyo yonke. Siye sazazisa izimfanelo zabo ezinjengobuqotho obuphelele kuJehova, umoya wokupha, uthando lwabo ngabafowabo nesimo sengqondo sokuzivumelanisa nezimo kanye nokuzidela kwabo. Kuye kwasijabulisa nokuya emishadweni emaHholo OMbuso ebhaliswa oFakazi abaqashelwa ngokomthetho njengezikhonzi ezingokwenkolo, into esasingacabangi ukuthi iyoke yenzeke kuleli zwe eminyakeni edlule. Amabandla awasayiqhubeli emakhishini abazalwane imihlangano noma bahlale phezu kwamapulangwe njengoba kwakunjalo eTurin. Kunalokho, amabandla amaningi asenamaHholo OMbuso amahle adumisa uJehova. Imihlangano emikhulu asisayiqhubeli ezindaweni zemidlalo yaseshashalazini zezinga eliphansi, sesinamaHholo EMihlangano amakhulu. Akuve kwasijabulisa nokubona inani labamemezeli lidlula ku-243 000. Ngesikhathi sifika e-Italy, kwakunabamemezeli abangu-490 kuphela.

Sikhethe Kahle

Siye sabhekana nobunzima obuhlanganisa ukukhumbula ekhaya nokugula. UFern wayevame ukukhumbula ekhaya njalo lapho ebona ulwandle. Kuye kwadingeka nokuthi enziwe ukuhlinzwa okukhulu kathathu. Ngesinye isikhathi, eyoqhuba isifundo sakhe seBhayibheli, wahlaselwa umphikisi ngemfologo yasengadini. Ngenxa yalokho kwadingeka aphuthunyiswe esibhedlela futhi.

Nakuba ngezinye izikhathi sibhekana nokudumazeka, siye ‘salinda uJehova’ njengoba incwadi yesiLilo 3:24 ibonisa. UnguNkulunkulu wenduduzo. Ngesinye isikhathi sidumele, uFern wathola incwadi emnandi eyayivela kuMfoweth’ uNathan Knorr. Wayebhale ukuthi njengoba ayezalelwe eduze kwaseBethlehem, ePennsylvania, lapho uFern ayeqale khona ukuphayona, wayazi kahle ukuthi abesifazane basePennsylvania Dutch, njengaye uFern, baqinile futhi bayaphikelela. Wayeshaye emhloleni. Njengoba iminyaka iqhubeka, ziningi izikhuthazo esiye sazithola kubantu abaningi.

Naphezu kobunzima, siye sazama ukugcina intshiseko yethu ngenkonzo ivutha. Uma entela, uFern uvame ukufanisa umoya wentshiseko neLambrusco, iwayini lase-Italy elimnandi elizoyizayo, athi, “Kumelwe singawuvumeli umoya wethu wentshiseko uphelelwe ukuzoyiza kwawo.” Ngemva kweminyaka engaphezu kuka-40 sihambela amabandla nezifunda, siye sathola ilungelo elisha lokuhambela nelokuhlela amaqembu namabandla ezilimi ezingezona ezesiNtaliyane. Lawo maqembu ashumayeza abantu abavela eBangladesh, e-Eritrea, eGhana, eNdiya, eNigeria, ePhilippines, eShayina, eSri Lanka, eTopiya nakwamanye amazwe. Singabhala imiqulu silandisa ngazo zonke izindlela ezimangalisayo esiye sabona amandla eZwi likaNkulunkulu eshintsha ngazo ukuphila kwalabo abaye banambitha isihe sikaJehova.—Mika 7:18, 19.

Sithandaza nsuku zonke kuJehova ukuba aqhubeke esipha amandla angokomzwelo nangokomzimba esiwadingayo ukuze sifeze inkonzo yethu. Injabulo yeNkosi ingamandla ethu. Yenza amehlo ethu akhanye futhi isenza siqiniseke ukuthi sikhethe kahle ekuphileni njengoba sisakaza iqiniso leBhayibheli.—Efe. 3:7; Kol. 1:29.

[Umbhalo waphansi]

[Ishadi/Izithombe ekhasini 27-29]

(Ukuze ubone ukuthi indaba ihlelwe kanjani, bheka encwadini)

Abazali bami eRochester, eNew York

1948

ENingizimu yeLansing ngesikhathi sisekilasini laseGileyadi le-12

1949

NginoFern ngaphambi nje kokuba siye e-Italy

ECapri, e-Italy

1952

SiseTurin naseNaples nezinye izithunywa zevangeli

1963

UFern nabanye abafundela iBhayibheli

“Kumelwe singawuvumeli umoya wethu wentshiseko uphelelwe ukuzoyiza kwawo”