Fundiswa YiZwi LikaNkulunkulu

Kungani UNkulunkulu Enenhlangano?

Lesi sihloko sizodingida imibuzo okungenzeka ukuthi uke wazibuza yona futhi sikubonise ukuthi ungazitholaphi izimpendulo eBhayibhelini lakho. OFakazi BakaJehova bazokujabulela ukuxoxa nawe ngalezi zimpendulo.

1. Kungani uNkulunkulu ahlela ama-Israyeli aba iqembu?

UNkulunkulu wahlela inzalo yenzalamizi u-Abrahama yaba isizwe futhi wayinikeza uhlu lwemithetho. Wabiza leso sizwe ngokuthi u-Israyeli futhi wasinikeza umthwalo wemfanelo wokuvikela ukukhulekela kweqiniso neZwi laKhe, imiBhalo Engcwele. (IHubo 147:19, 20) Ngaleyo ndlela, abantu bazo zonke izizwe baye bazuza.—Funda uGenesise 22:18.

UNkulunkulu wakhetha ama-Israyeli ukuba abe ofakazi bakhe. Uma ayelalela ayezuza emithethweni kaNkulunkulu. (Duteronomi 4:6) Ngokufunda umlando wama-Israyeli, singazi okuningi ngoNkulunkulu weqiniso.—Funda u-Isaya 43:10, 12.

2. Kungani amaKristu eqiniso ehlelekile?

Ngokuhamba kwesikhathi, uJehova akabange esawamukela ama-Israyeli, esikhundleni sawo wamisa ibandla lobuKristu. (Mathewu 21:43; 23:37, 38) Ngaphambili, ama-Israyeli ayengofakazi bakaNkulunkulu. Manje amaKristu eqiniso yiwona angoFakazi BakaJehova.—Funda IzEnzo 15:14, 17.

UJesu wahlela abafundi bakhe ukuba bafakaze ngoJehova futhi benze abafundi kuzo zonke izizwe. (Mathewu 10:7, 11; 24:14; 28:19, 20) Lo msebenzi usufinyelela umvuthwandaba wawo. Kuyaqala ngqá ukuba uJehova ahlanganise izigidi zabantu ezivela kuzo zonke izizwe ekukhulekeleni kweqiniso. (IsAmbulo 7:9, 10) AmaKristu eqiniso ahlelwe nangendlela yokuba akwazi ukukhuthazana nokusizana. Anesimiso esifanayo emhlabeni wonke sokufunda iBhayibheli emihlanganweni yawo.—Funda amaHebheru 10:24, 25.

3. Baqale kanjani oFakazi BakaJehova ezikhathini zanamuhla?

Inhlangano yoFakazi BakaJehova yosuku lwanamuhla iqale ngawo-1870. Iqembu elincane labafundi beBhayibheli laqala ukuthola amaqiniso eBhayibheli ayengasaziwa. Lalazi ukuthi uJesu wayehlele ukuba ibandla lobuKristu lishumayele. Ngakho laqala umkhankaso wokushumayela ngoMbuso emhlabeni wonke. Ngo-1931 leli qembu lamukela igama elithi oFakazi BakaJehova.—Funda IzEnzo 1:8; 2:1, 4; 5:42.

4. OFakazi BakaJehova bahleleke kanjani namuhla?

Ekhulwini lokuqala, amabandla obuKristu emazweni amaningi azuza endikimbeni ebusayo yokuqala eyayiqaphela uJesu njengeNhloko yebandla. (IzEnzo 16:4, 5) Ngokufanayo nanamuhla, oFakazi BakaJehova babheka uJesu njengoMholi wabo. (Mathewu 23:9, 10) Bayazuza nasesiqondisweni seNdikimba Ebusayo yabadala abangomakad’ ebona abanikeza isikhuthazo esingokomBhalo nesiqondiso emabandleni angaphezu kuka-100 000. Ebandleni ngalinye, amadoda afanelekayo akhonza njengabadala noma ababonisi. La madoda awunakekela ngothando umhlambi kaNkulunkulu.—Funda eyoku-1 Petru 5:2, 3.

OFakazi BakaJehova bahlelwe ngendlela ebenza bakwazi ukushumayela izindaba ezinhle nokwenza abafundi. Ukuze basize abantu kuyo yonke indawo, bayahumusha, banyathelise futhi basakaze izincwadi zeBhayibheli ngezilimi ezingaphezu kuka-500. Njengabaphostoli, bashumayela endlini ngendlu. (IzEnzo 20:20) Bacela ukufunda iBhayibheli nabantu abalithanda ngobuqotho iqiniso. Njengoba abantu bakaJehova begxile ekujabuliseni uNkulunkulu nasekusizeni abanye, bayinhlangano yabantu abajabulayo.—Funda iHubo 33:12; IzEnzo 20:35.

Ukuze uthole ukwaziswa okwengeziwe, bheka isahluko 19 sencwadi, Lifundisani Ngempela IBhayibheli? enyatheliswa oFakazi BakaJehova.