Kungani Kufanele Ube Nesithakazelo Ezimangalisweni?
“Uma zichazwa, izimangaliso zingqubuzana nemithetho yesayensi.”—URICHARD DAWKINS, OWAYENGUPROFESA WENDLELA UMPHAKATHI OQONDA NGAYO ISAYENSI.
“Kunengqondo ukukholelwa ezimangalisweni. Izimangaliso azingqubuzani nenkolo, ziyizimpawu zothando lukaNkulunkulu ngendalo yakhe nokuqhubeka ehileleke kuyo.”—UROBERT A. LARMER, UPROFESA WEFILOSOFI.
“INGABE uyakholelwa ezimangalisweni?” Njengoba sibonile ezingcaphunweni ezingenhla, kunemibono ehlukene kakhulu. Kodwa wena ubungawuphendula kanjani lo mbuzo?
Ungase ungabaze ukuphendula ngokuthi, “Yebo, ngiyakholelwa.” Mhlawumbe unomuzwa wokuthi lokho kungase kukwenze ubukeke njengomuntu okholelwa ezintweni ezingekho noma ongafundile. Abaningi bazizwa ngaleyo ndlela.
Ngakolunye uhlangothi ungase uqiniseke ukuthi izimangaliso ziyenzeka ngempela. Kungenzeka ukholelwe ezimangalisweni ezilotshwe eBhayibhelini, njengalapho uMose ehlukanisa phakathi uLwandle Olubomvu. Ungase ukholelwe nokuthi izimangaliso ziyenzeka esikhathini sethu. Eqinisweni, umbiko osanda kukhishwa ubonise ukuthi “inani elikhulu lomphakathi waseNtshonalanga—ngokwesibonelo cishe izingxenye ezintathu kwezine e-United States namaphesenti angu-38 eBrithani—liyaqhubeka likholelwa ezimangalisweni.” (I-Cambridge Companion to Miracles, ehlelwe uGraham H. Twelftree) Ngaphezu kwalokho, akuwona amaKristu kuphela akholelwa ezimangalisweni. Ngokwe-Britannica Encyclopedia of World Religions, ukukholelwa ezimangalisweni “cishe kuyisici sazo zonke izinkolo.”
Kungenzeka ukuthi useqenjini lesithathu, eliphendula ngokuthi: “Angazi futhi anginandaba! Izimangaliso azenzeki ekuphileni kwami!” Kungani ngempela kufanele ube nesithakazelo ezimangalisweni?
Cabanga ngalesi simo: Ake sithi unesifo esingelapheki. Uma ungase ufunde umbiko encwadini yezokwelapha ehlonishwayo ngomuthi omusha ongase welaphe ukugula kwakho, bekungeke yini kube ukuhlakanipha ukuchitha isikhashana namandla uhlola ukuthi uyiqiniso yini lowo mbiko? Ngokufanayo, iBhayibheli lithembisa ukuthi maduze kuzokwenzeka izimangaliso ezinkulu. Ziyothinta ukuphila kwabo bonke abantu emhlabeni. Ngeke yini kwaba ukuhlakanipha ukuchitha isikhashana namandla akho uhlola ukuthi sithembekile yini lesi sithembiso?
Nokho, ngaphambi kokuba sihlole ukuthi ziyini lezo zimangaliso ezithenjisiwe, ake sixoxe ngezizathu ezintathu ezenza abantu baziphikise izimangaliso.
[Ibhokisi ekhasini 3]
SIYINI ISIMANGALISO?
Siyisenzakalo esingaphezu kwamandla omuntu nawemvelo futhi sihlotshaniswa namandla athile angaphezu kwavamile.