Vuselela Intshiseko Ngokusebenzisa Ukusikisela KweNqabayokulinda
1 UKristu Jesu uyisibonelo esiphelele somshumayeli oshisekayo wezindaba ezinhle. Isifiso sakhe esiqotho sokwenza intando kaYise nesithakazelo sakhe esijulile kubantu kwamshukumisela ukuba abonise ukukhathalela komuntu siqu ngabanye. Inkonzo yakhe yayingeyomdlandla, futhi wayithola imiphumela. Inkonzo yayimqabula. Wayibheka ‘njengokudla’ okwakumqinisa. (Joh. 4:34) Wadlulisela amazwi ensindiso kwabanye kuyilapho efeza umsebenzi uYise ayemthume ukuba awenze. Lokhu kwenza ukuphila kwakhe kwaba nenjongo.
2 Abaphostoli nabanye abalandeli bakaKristu Jesu bekhulu lokuqala leminyaka balingisa intshiseko yakhe ngenkonzo. Ngisho nakuba ngezinye izikhathi babeshushiswa kanzima, intshiseko yabo ayizange idambiswe. (IzE. 5:28-32; 8:1, 4) Lokhu kunjalo nanamuhla. Izindaba ezinhle zishunyayelwa cishe kuwo wonke amagumbi omhlaba ngabantu abalandela isibonelo sikaJesu Kristu. NjengoFakazi BakaJehova, bahlala ‘beshisekela imisebenzi emihle.’—Thithu 2:14.
3 Uma sintula intshiseko, umsebenzi wethu uba owokugcina icala, futhi ukuhileleka kwethu siqu kungaba okokuwanyazisa. Ngenxa yalokho, singase singabe sisayithola injabulo enkonzweni yethu. Uma sizithola sikulesimo, sidinga ukufuna izindlela zokuvuselela intshiseko yethu kanye nokwamukela izinselele ezilethwa inkonzo yasensimini. Isihloko seNqabayokulinda ka-July 15, 1988, esithi “Qaphela Ukufundisa Kwakho Njalo” saqokomisa ukusikisela okusebenzayo kokusisiza ukuba siqinise noma sivuselele intshiseko yethu enkonzweni yoMbuso.
IZINSELELE ESIBHEKANA NAZO
4 Ezingxenyeni eziningi zomhlaba, kunensimu encane kakhulu entsha noma engasetshenzwa njalo. Ezindaweni zasemadolobheni amakhulu, akukhona okungavamile ngamabandla ukuba asebenze insimu yawo kanye ngenyanga noma ngisho nakanye njalo ngesonto. Lokhu kungaba inselele njengoba abaninikhaya abaningi kakade sebazi ukuthi singobani futhi izikhathi eziningi bezama ukuvimba ingxoxo ngaphambi kokuba sinikeze intshumayelo. Mhlawumbe bakhononda ngokuthi ‘uFakazi ubelapha nje ngesonto elidlule.’ Abaningi bomakhelwane bethu abekho emakhaya, noma singase sithole ukuthi abantu abasensimini yethu abanaki. Zonke lezizinto zingadumaza. Kodwa ingabe uke wakusebenzisa ukusikisela okunikezwe ezigabeni 4-7 zesihloko seNqabayokulinda esishiwo ngenhla?
5 Kakade izigidi ziye zaqoqelwa ‘esixukwini esikhulu’ ‘sezinye izimvu,’ futhi izigidi ezengeziwe ziyaqhubeka zisabela ezindabeni ezinhle zoMbuso. (IsAm. 7:9; Joh. 10:16) Nokho, izintshumayelo ezaziphumelela esikhathini esidlule zingase zingabe zisasivusa isithakazelo emasimini ethu. Sidinga ukuqapha ngokuphathelene nohlobo, izinga, nokuphumelela kwezintshumayelo zethu futhi sikulungele ukwenza izinguquko ezidingekayo.
6 Ikhuluma ngalendaba, INqabayokulinda yanikeza ukusikisela okuthakazelisayo ngokuqondene nendlela yokuthuthukisa inkonzo yethu. Yasikisela izindlela zokunikeza ubufakazi obugcwele lapho sibhekene nokunganaki, nabantu abasensimini esetshenzwa njalo, kanye nabaninikhaya abakhonondayo. Ingabe siyakusebenzisa lokhu kusikisela, sifanelanisa izintshumayelo zethu nezidingo zensimu? Ingabe siwasebenzisa ngokunenzuzo amathuluzi esinawo okwenza lokhu? Ukulandela ukusikisela okunikezwayo kuyosisiza ukuba sihileleke ngokwengeziwe ngokomuntu siqu enkonzweni. Njengoba sikusebenzisa ngokucophelela lokho okuhleliwe, siyashukumiseleka ngokwengqondo futhi sigxile enkonzweni. Ngaleyondlela, intshiseko yethu iyavuseleleka futhi ijule.
7 Uma kubhekwa izimo zezwe ezikhona, kusobala ngempela ukuthi usizi olukhulu luyasondela. Lokhu kugcizelela ukuphuthuma kwesigijimi sethu nesidingo sokukhazimula ‘njengokukhanya kwezwe.’ (Math. 5:14, 16) Masibe abakhuthele ekusebenziseni ukusikisela esikutholile futhi kanjalo sandise intshiseko yethu ngenkonzo.