Ukushumayela Izindaba Ezinhle—Ngokukholisa
1 Ingabe kufanelekile ngezikhonzi zezindaba ezinhle ukuba zikholise abantu ukuba bamukele iqiniso? Ngokuqinisekile kunjalo! (IzE. 18:4) Umphostoli uPawulu wakhumbuza uThimothewu ukuthi wakholiswa unina noninakhulu ukuze abe ikholwa. (2 Thim. 3:14) Ukukholisa umuntu kusho ukumshukumisa ngokuncenga, ukubonisana naye ngobuqotho ngokuqondene nenkolelo, isimo, noma isenzo.
2 Umphostoli uPawulu walisebenzisa kahle ikhono lokukholisa. Lapho eseAthene, “umoya wakhe wacunuka phakathi kwakhe ebona umuzi ugcwele izithombe.” (IzE. 17:16) Nokho, lapho ema phakathi neAreyophagu, uPawulu akazange abatshele emehlweni labo ababekhona ukuthi ukukhulekela kwabo izithombe kwakuyize. Egwema ngobuciko ukulwisana nabo ngokomzwelo, wadonsela ukunakekela kwabo ‘ealtare okwakulotshwe kulo ukuthi: ELIKANKULUNKULU ONGAZIWAYO.’ Ngemva kwalokho wanikeza ubufakazi obunamandla, kwaba nemiphumela emihle.—IzE. 17:23, 28, 29, 34.
YIBA NGOQONDAYO
3 UPawulu wabonisa ngokucacile ukuthi ukukholisa kudinga okungaphezulu kwenkulumo eshukumisa imizwelo noma inqwaba yamazwi. Kumelwe sibe abahlakaniphile nabayiqondayo imizwelo, izinkolelo, nezithakazelo zabantu esikhuluma nabo. Sidinga ukuqapha futhi sisheshe ukubona lapho imizwelo yomninikhaya ingaba isithiyo sangempela engxoxweni evulekile yezimfundiso zeBhayibheli.—IzAga 16:23.
4 Ngokwesibonelo, umuntu angase akholelwe ekungafini komphefumulo ngenxa yokunamathela ngemizwelo enkumbulweni yothandekayo ofile. Iyiphi indlela engaba ekholisayo ukuze simsize ngeqiniso? Esikhundleni sokumtshela ngokuqondile ukuthi inkolelo yakhe iyiphutha nokuthi umphefumulo uyafa, ngeke yini kube ngcono ukusebenzisa ukukholisa ukuze sisuse isithiyo esingokomzwelo okungenzeka ukuthi unaso bese sibonisana naye? Singase simtshele ukuthi siyayiqonda imizwa yakhe ngoba nathi siye salahlekelwa esibathandayo ekufeni. Siye sathola induduzo esithembisweni sovuko, isikhathi lapho siyophinde sihlangane nabathandekayo abasifela siphinde sijabulele ukuba nabo. Khona-ke kungafundwa imiBhalo efanelekayo futhi kuxoxwe ngayo. Uma singabaqondayo futhi siyolisa inkulumo yethu ngosawoti, singaba ngabakholisayo ekushumayeleni izindaba ezinhle.—IzAga 16:21; Kol. 4:6.
SEBENZISA IMIFANEKISO
5 Imifanekiso ingaba ephumelelayo ekukholiseni abantu ukuba balungise ukucabanga kwabo. Isibonelo esiphawulekayo indlela ehlakaniphile uNathani afinyelela ngayo inhliziyo yeNkosi uDavide. (2 Sam. 12:1-14) Imifanekiso ekhethwe kahle yenezela ithonya elingokomzwelo ekukhangeni okungokwengqondo. Yenza ukube lula ngabantu ukuba babambe imiqondo emisha. Ngokwesibonelo, umhlaba ungase ufaniswe nekhaya abantu bafaniswe neziqashi. Uma iziqashi zihluleka ukunakekela ikhaya, umninilo ngeke abhubhise ikhaya, kodwa uyoxosha iziqashi. Ngakho, uNkulunkulu ngeke awubhubhise umhlaba, kodwa uyosusa abantu ababi.—Isaya 45:18.
6 Ukukholisa kunemingcele yakho. Uma abantu bengafuni ukukholelwa noma ukwenza izinguquko ekuphileni kwabo, bayohlala benjalo. (Math. 13:14, 15) Nokho, basebaningi abantu abanhliziyo ziqotho ezweni abangase bafinyelelwe nesigijimi soMbuso. Ukuze sibasize, kufanele senze yonke imizamo enengqondo ukuze sithuthukise futhi sisebenzise ikhono lokukholisa enkonzweni yethu.