Ukushumayela Izindaba Ezinhle—
Ngezindlela Ezihlukahlukene Emsebenzini Wendlu Ngendlu
1 Ingabe indalo kaJehova ayigcwalisiwe yini izinhlobonhlobo zezinto? Umhubi wathi: “Jehova, yeka ubuningi bemisebenzi yakho; yonke uyenzile ngokuhlakanipha; umhlaba ugcwele izidalwa zakho.” (IHu. 104:24) Kunezici eziningi futhi zezindaba ezinhle aye asiyala ukuba sizishumayele. Ingabe usebenzisa izindlela ezihlukahlukene enkonzweni yakho yendlu ngendlu ukuze ufinyelele abantu abaningi ngangokunokwenzeka?
NGOSUKU LUKAMAGAZIN!
2 INhlangano iyasikhuthaza sonke ukuba sihlanganyele ekusakazweni kukamagazini ngayo yonke iMigqibelo. Kunokuba usebenzise iSihloko Sengxoxo, kuyafaneleka ukuba uwuhambise ngemizuzwana engama-30 kuya kwengama-60 uqokomisa isihloko esisodwa nje kuphela bese ubahambisa bobabili omagazini ngo-R1,00. Uma umninikhaya ebuza imibuzo noma ebonisa isithakazelo esingaphezu kwesivamile, asikho isidingo sokuba sibe nomuzwa wokuthi kumelwe siphuthume endlini elandelayo.
3 Kunezindlela ezihlukahlukene lapho kuziwa kuNqabayokulinda nePhaphama! Ngokuvamile, umzalwane osingatha ingxenye yokuqala eMhlanganweni Wenkonzo uyonikeza amaphuzu okukhulunyelwa avela komagazini bamuva. Lalelisisa; bhala phansi ukusikisela ongase ukusebenzise. Uma uMhlangano Wenkonzo uhlanganisa umboniso, qaphela indlela owenziwa ngayo, zijwayeze wona, bese uwusebenzisa ensimini ngoMgqibelo. Uma ungakutholi ukusabela okuhle, khetha esinye isihloko ozosiqokomisa. Umagazini ngamunye uba nezihloko eziningana eziklanyelwe ukukhanga abantu abanezithakazelo ezihlukahlukene. Ngokujwayelana nezihloko ezikomagazini bobabili, kuyoba lula ukuvumelanisa intshumayelo yakho nesithakazelo somninikhaya.
SHINTSHASHINTSHA ISETHULO SAKHO
4 Ngezinye izikhathi iSihloko Sengxoxo kumelwe sisetshenziswe nesipho senyanga. INkonzo Yethu YoMbuso isikisela iSihloko Sengxoxo esihlukile isikhathi ngasinye. Lapho siqeqesha abamemezeli abasha, kungcono kakhulu ukusebenzisa isihloko samuva entshumayelweni elula. Nokho, ngezinye izikhathi kungase kube kuhle ukushintshashintsha isingeniso sakho. Ingabe wake wakuzama ukuqalisa intshumayelo yakho ngokuhambisa elinye lamapheshana noma isimemo njengesethulo sengxoxo?
5 Ngokungangabazeki kunezinye izethulo ezisencwadini Ukubonisana ongakazizami. Ngokwesibonelo, amakhasi 10-11 asikisela izethulo ezisekelwe ezehlakalweni zamuva. Zigcine unolwazi, futhi yiba nemibhalo engqondweni ehlobene nezindaba zamuva. Ingabe insimu yenu isetshenzwa njalo? Uma kunjalo, ungase wenze kahle ngokuba ushintshashintshe izethulo zakho, usebenzisa lezo ezisekhasini 15 lencwadi Ukubonisana. Futhi ungakhohlwa ukusikisela okuhle okukuNqabayokulinda kaJuly 15, 1988, amakhasi 15-20. Zama eminye yemibuzo ecatshangelwe kahle esekhasini 19, isigaba 16, uqikelela ukuba uvumele umninikhaya aveze umbono wakhe.
6 Abantu abasensimini yethu bavela ezizindeni nasezimweni eziningi ezingafani. Sidinga ukushintshashintsha indlela yethu yokukhuluma ukuze sikhange bonke abalalelayo, sikwenza lokho ngenxa yokukhathalela inhlalakahle yabanye. (1 Kor. 9:19-23) Ukusebenzisa izindlela ezihlukahlukene enkonzweni yethu yendlu ngendlu kuyosisiza ukuba ‘sizisindise thina nabasizwayo.’—1 Thim. 4:16.