Ukuthola Injabulo Ngokuhambisa Omagazini Abengeziwe
1 Inhlangano kaJehova enkulu yendawo yonke iphawuleka ngokukhiqiza kwayo. NgoJesu Kristu, uJehova uye wamisa inhlangano yasemhlabeni nayo ephawulwa ngezisebenzi ezinezinhliziyo ezivumayo, nezikhiqizayo. (IHu. 110:3; Math. 9:37, 38) Lapho sinakekela izinga nobungako benkonzo yethu, ngokuqinisekile kuyophumela enjabulweni eyengeziwe. (Luka 10:17) Lokhu kuyiqiniso ngokukhethekile njengoba izingqondo zethu sizilolongela ukwandisa ukuhambisa kwethu omagazini beNqabayokulinda nePhaphama!
2 Ukuhanjiswa komagazini kungenye yezindlela eziyinhloko isigijimi soMbuso esisakazwa ngayo kuyo yonke indawo. Nakuba lokhu kuqhubeka kuba yiqiniso njengoba umsebenzi wokushumayela wanda, kuye kwaphawulwa ukuthi kwezinye izindawo ukuhanjiswa komagazini kuyehla. Singelashwa kanjani lesimo? Yiziphi ezinye izinto eziyisisekelo esingazigcina engqondweni eziyosenza ukuba sikwazi ukuhambisa omagazini abengeziwe?
ISIMO SENGQONDO ESIQONDILE
3 Isinyathelo sokuqala sokuhambisa omagazini abengeziwe yilesi: BAHAMBISE NGAWO WONKE AMATHUBA. Lomgomo ufinyelelwa kalula kakhulu uma thina ngokwethu singabafundi basikhathi sonke beNqabayokulinda, nePhaphama! Lapho sesijwayelene nabakuqukethe, sifuna ukusebenzisa zonke izikhathi ezifanelekile ukuze sibahambise emphakathini. Ngabaningi bethu, iMigqibelo yonke isinikeza ithuba elihle lokuhlanganyela ekusakazeni omagazini endlini ngendlu. Amabandla amaningi abekela eceleni isikhathi somsebenzi kamagazini owenziwa phakathi nesonto ukuze kusizakale abamemezeli abangakwazi ukusebenza inkonzo yasensimini ngoMgqibelo. Abanye bangase bathole ukuthi ukufakaza kwakusihlwa kubanikeza amathuba amahle kakhulu okuhambisa omagazini endlini ngendlu. Umsebenzi wasemgwaqweni, umsebenzi wasezitolo, ukufakaza ngokwethukela, nemizila kamagazini konke kuyizindlela ezinhle esingahlanganyela ngazo ekusakazeni omagazini. Emsebenzini wendlu ngendlu wasikhathi sonke, kungahanjiswa omagazini bamuva lapho isipho senyanga senqatshwa. Ukuphaphamela ukwenza kanjalo kungasilethela injabulo.
4 Ukusikisela kwesibili kokuhambisa omagazini abengeziwe kuwukuthi: KUGCINE KULULA. Ngokusobala abanye abamemezeli baye benza ukuba omagazini bangathathwa ngokunikeza izintshumayelo ezinde. Abanye abamemezeli baye basebenzisa iSihloko Sengxoxo lapho behileleke emsebenzini kamagazini. Nokho, lokhu akutuswa. Lapho ikhuthaza ukusakazwa kukamagazini okwandisiwe, INqabayokulinda yesiNgisi kaDecember 1, 1957, yathi: “Intshumayelo emfushane, eshaya emhloleni ingcono kakhulu lapho kuhanjiswa omagazini. Injongo iwukuhambisa omagazini abaningi. ‘Bazozikhulumela’ bona ngokwabo. INhlangano isikisela ukuhanjiswa kukamagazini okuthatha ingxenye yomzuzu kuya emzuzwini, inkulumo enamazwi abekwe kahle yephuzu elilodwa okuxoxwa ngalo kumagazini ohanjiswayo.”
5 Okulandelayo: VUMELANA NEZIMO. Lungiselela izindlela zokuhambisa ezingaphezu kweyodwa. Khona-ke njengoba uhlangabezana nezimo ezingefani, uyokwazi ukukhuluma nabantu balo lonke uhlobo futhi uvumelanise intshumayelo yakho nezithakazelo zabo. Lokhu kulungiselela kusengaphambili ngokuvamile kuholela ekuhanjisweni komagazini abaningi nasenjabulweni eyengeziwe.
6 Okunye ukusikisela kokugcina: ZIBEKELE UMGOMO WOMUNTU SIQU. Ungase ukhumbule ukuthi lokhu kwagcizelelwa esenezelweni esithi “Omagazini Babonisa Indlela Eya Ekuphileni,” esaphuma kuNkonzo Yethu YoMbuso kaMay 1984. Ungase ufise ukulwela isilinganiso sikamagazini owodwa ngehora ngalinye oba senkonzweni ngalo ngenyanga. Umgomo wakho siqu kumelwe ube onengqondo, ucabangele izimo zakho nesikhathi okwazi ukusisebenzisa enkonzweni yasensimini.
7 Ngenhlangano yakhe ebonakalayo, uJehova uyaqhubeka elungiselela lokho esikudingayo ukuze sandise ukuhlanganyela kwethu enkonzweni. Sinomagazini abathakazelisayo, abanemibala emihle bokubasebenzisa. Manje umzamo wethu siqu wokubambisana namalungiselelo ebandla okusakaza omagazini uyathinteka kulendaba. Njengoba lowomsebenzi udumisa uJehova, siyoba nenjabulo ejulile eza ngokuba nengxenye eyandisiwe enkonzweni kamagazini.—Joh. 15:8.