Yenza Izimpindelo Eziphumelelayo
1 Ukwenza izimpindelo kuyingxenye ebalulekile yenkonzo yethu ‘njengezisebenzi ezikanye noNkulunkulu.’ (1 Kor. 3:6-9) Asikho isidingo sokukhathazeka ngendlela umninikhaya azosabela ngayo, njengoba sihambela umuntu kakade oseye wabonisa isithakazelo eqinisweni. Ukulungiselela kahle esikwenzayo kuyobonisa isithakazelo esiqotho somuntu siqu kulowomuntu esimhambele njengoba sixoxa ngesihloko esikhangayo esiseBhayibhelini.
2 Yiba ongagwegwesi; buza imibuzo enobuhlakani.
Ngokwalokho owakuphawula ekuhambeleni kokuqala, ungase ubuze:
◼ “Ingabe uye wazicabangela ngokwengeziwe izithembiso zikaNkulunkulu zokubusa umhlaba ngokulunga?”
Omunye umbuzo ungase uthi:
◼ “Ingabe unomuzwa wokuthi umthandazo wakho wokuba uMbuso kaNkulunkulu ufike usunengqondo ngokwengeziwe kusukela sibe nengxoxo yeBhayibheli ngesonto eledlule?”
Isimo sobuso sobungane nephimbo lezwi kufeza lukhulu ekuboniseni isithakazelo sethu esiqotho lapho sibuza imibuzo enjalo.
3 Ungajahi; Lalela Lokho Umninikhaya Akushoyo. Uma sikulalela lokho umninikhaya akushoyo futhi sicabangisisa ngaphambi kokuphendula, uyobona ukuthi sinesithakazelo esiqotho kuye njengomuntu. Ngokusekelwe kulokho akushoyo, ungamnikeza umqondo ongokomBhalo ohlobene nokuhambela kwakho kokuqala. Lungiselela ukufundisa umninikhaya okuthile isikhathi ngasinye lapho umhambela. Uma kuphakama isihloko obungasilindele, sebenzisa lelothuba ukuba ukhiphe incwadi yakho Ukubonisana ukuze uthole ukwaziswa okudingekayo.
4 Uma uhambise “INqabayokulinda” kaMay 1, 1992, ungase uthi:
◼ “Esikhathini esedlule, saxoxa ngonyaka ka-1914. Impi eyaqala ngalowonyaka yaletha izinguquko kohulumeni abaningi. Kusukela ngalesosikhathi kuyaqhutshekwa kwenziwa izinguquko eziningi. Kodwa ingabe zonke lezinguquko noma ezinye zazo ziye zazenelisa ngempela izidingo zabantu, noma ingabe zingakuqinisekisa ukuthula okuhlala njalo? [Lindela impendulo.] Phawula indlela uJesu afundisa ngayo abalandeli bakhe ukuba bathandazele uhulumeni ongazixazulula ngempela izinkinga ezinkulu esibhekene nazo namuhla. [Funda uMathewu 6:9, 10.] Yini ocabanga ukuthi uMbuso kaNkulunkulu uyoyifeza? [Lindela impendulo.] Incazelo yeBhayibheli nayo ithakazelisa kakhulu.” Khona-ke funda uDaniyeli 2:44. Ungase uthande ukusebenzisa umfanekiso osemakhasini 12 no-13 encwadi ethi Ungaphila Phakade ukuze ubonise uhlobo lwezimo ezingase zilindelwe ngaphansi koMbuso kaNkulunkulu.
5 Uma wawuhambise i“Phaphama!” kaMay 8, 1992, ungase uthi:
◼ “Lapho ngikuvakashele esikhathini esedlule, saxoxa ngabantu abaye bashiya amazwe akubo ukuze babalekele ukungabi nabulungisa nokuhlupheka. Ingabe ucabanga ukuthi uNkulunkulu unendaba ngempela ngalokho abantu okumelwe bakukhuthazelele becindezelwa abantu abakanye nabo?” Ngokusekelwe empendulweni yakhe, ungase uhlanganyele nalowomuntu incwadi yomShumayeli 4:1 noma iHubo 72:12-14. Khona-ke ungavula emakhasini 14 no-15 encwajana ethi “Bheka!” bese ufunda noma ukhulumela kafushane izigaba 27 kuya ku-29 ezikulawomakhasi, ubuze imibuzo yesigaba ngasinye.
6 Masiqhubeke sibonise isithakazelo somuntu siqu futhi sikhumbule izindaba ezikhangayo eziseBhayibhelini esingaxoxa ngazo ukuze izimpindelo zethu zibe eziphumelelayo.