Sinethuluzi Elisha Lokuqala Izifundo!
1 Owesifazane othile waseMelika wayengumRoma Katolika oshisekayo. Wayezivikela ngokwethembeka izimfundiso zesonto. Wazé wavakashela naseVatican. Nokho, lapho omunye woFakazi BakaJehova efika kwakhe, wavuma ukuba nesifundo seBhayibheli sasekhaya. Ngani? Ngoba wayefuna ukwazi okuqukethwe yiBhayibheli kanti isonto lakhe lalingabanikezi isifundo seBhayibheli sasekhaya. Sifundani kulokhu okuhlangenwe nakho? Ukuthi ngeke sazi ukuthi ubani okungenzeka avume isifundo seBhayibheli samahhala.—UmSh. 11:6.
2 Ingabe wake wazizwa ungabaza ukutshela abantu ukuthi sizimisele ukutadisha iBhayibheli nanoma ubani onesithakazelo? Ingabe wonke umuntu emphakathini wakini uyazi ukuthi sinikeza inkonzo enjalo yamahhala? Singaqiniseka kanjani ukuthi bayazi? Ngokusebenzisa ithuluzi elisha! Yipheshana elikhangayo, elinamakhasi ayisithupha elinesihloko esithi, Ungathanda Yini Ukwazi Okwengeziwe NgeBhayibheli? Ake sizijwayelanise naleli pheshana, ngokucabangela isihlokwana ngasinye.
3 “Kungani Kufanele Ufunde IBhayibheli?” Izizathu ezinikezwa yileli pheshana zihlabahlose ngempela. Lichaza ukuthi iBhayibheli liqukethe ‘isiyalo sothando esivela kuNkulunkulu,’ esibonisa indlela yokuya kuye ngomthandazo ukuze sithole usizo nokuthi singasithola kanjani isipho sakhe sokuphila okuphakade. (1 Thes. 2:13) Leli pheshana libhekisela ‘emaqinisweni akhanyiselayo’ eBhayibheli ahlukahlukene, njengokuthi kwenzekani kithi ngemva kokufa nokuthi kungani umhlaba ugcwele izinkathazo kangaka. Lichaza “izimiso zokwesaba uNkulunkulu eziseBhayibhelini” okungathi uma sizisebenzisa zisizuzise ngokoqobo futhi zithuthukise injabulo, ithemba nezinye izimfanelo ezifiselekayo. Leli pheshana libhekisela kwesinye futhi isizathu sokufunda iBhayibheli—iziprofetho ezimayelana nesikhathi esizayo ezibonisa lokho okusilindele ngaphambili.—IsAm. 21:3, 4.
4 “Usizo Lokuqonda IBhayibheli”: Leli pheshana lithi: “Sonke siyaludinga usizo ukuze siqonde iZwi likaNkulunkulu.” Libe selichaza indlela yethu yokutadisha iBhayibheli: “Ngokuvamile kungcono ukutadisha iBhayibheli ngokuthuthukayo, uqale ngezimfundiso eziyisisekelo.” Nakuba likwenza kucace ukuthi ‘yiBhayibheli eliwumthombo onegunya,’ leli pheshana likhulumela ngokukhethekile incwajana ethi Yini UNkulunkulu Ayifunayo? njengeyosiza umfundi ‘ukuba aqonde okushiwo yimiBhalo ngezihloko ezihlukahlukene.’ Isihlokwana esilandelayo siphakamisa umbuzo ongenakugwenywa.
5 “Ingabe Uzimisele Ukusebenzisa Isikhathi Isonto Ngalinye Ukuze Uqonde IBhayibheli?” Ipheshana liyachaza ukuthi kungahlelwa ukuba isifundo seBhayibheli sibe sendaweni futhi sibe ngesikhathi esiyovumelana nomfundi, kungaba sekhaya noma ngisho nangocingo. Obani abangahlanganyela engxoxweni? Ipheshana liyaphendula: “Umkhaya wakho wonke. Noma ibaphi abangane okhetha ukubamema nabo bangahlanganyela. Kanti kungaxoxwa nawe kuphela, uma ukhetha lokho.” Umuntu uyofunda isikhathi eside kangakanani? Liyachaza: “Abaningi babekela eceleni ihora elilodwa isonto ngalinye ukuze batadishe iBhayibheli. Uma ukwazi ukusebenzisa isikhathi esengeziwe noma uma unesikhathi esifushane isonto ngalinye, oFakazi bangafika ukuze bakusize.” Lilapho-ke iphuzu! Sizimisele ukuzivumelanisa nezimo zomfundi ngamunye.
6 “Isimemo Sokufunda”: Kunesigqebhezana lowo othola leli pheshana angacela ngaso incwajana ethi Yini UNkulunkulu Ayifunayo? noma acele ukuvakashelwa ukuze achazelwe ngesimiso sethu sesifundo seBhayibheli sasekhaya samahhala. Isembozo sencwajana ethi Yini UNkulunkulu Ayifunayo? sivezwe ngemibala egqamile. Awuboni yini ukuthi kungani leli pheshana liyokhuthaza abantu abanhliziyo ziqotho ukuba bamukele usizo lwethu? Manje-ke, iyiphi indlela engcono kakhulu esingalisebenzisa ngayo leli thuluzi elisha?
7 Singalihambisa Kobani Leli Pheshana? Leli pheshana linganikezwa abantu esandleni noma lishiywe emakhaya esingatholanga muntu kuwo. Lingahanjiswa endlini ngendlu, emgwaqweni nasendaweni yezamabhizinisi. Linikeze abantu kungakhathaliseki ukuthi bayazithatha izincwadi zethu noma bayazenqaba. Lifake komagazini noma kwezinye izincwadi ezihanjiswayo. Lifake lapho ubhala izincwadi. Labo othintana nabo ngocingo bacele ukuba ubathumelele lona. Hlale unamakhophi ongawahambisa lapho uyothenga, lapho uhamba ngezinto zomphakathi nalapho ufakaza ngokwethukela. Linikeze wonke umuntu ofika kwakho. Linikeze izihlobo zakho, omakhelwane, osebenza nabo, ofunda nabo nabanye ojwayelene nabo. Lwela ukuba leli pheshana lisale ezandleni zawo wonke umuntu ohlangana naye! Bese kulandelani-ke?
8 Uma Umuntu Esabela Ngokushesha: Abanye abantu bayosabela ngokushesha basho ukuthi bangathanda ukuba nesifundo seBhayibheli. Ngakho-ke noma nini lapho usenkonzweni yasensimini, qiniseka ukuhlale unamakhophi amabili encwajana ethi Yini UNkulunkulu Ayifunayo?—enye kube ngeyomfundi enye kube ngeyakho. Uma umuntu ethanda, siqale ngaso leso sikhathi isifundo. Vula isembozo ngaphakathi, ufunde ingxenye ethi, “Indlela Yokusebenzisa Lencwajana.” Ungapholisi maseko, qonda esifundweni 1, ubonise indlela isifundo esiqhutshwa ngayo. Kulula, akunjalo?
9 Uma Oxoxa Naye Edinga Isikhathi Sokucabanga Ngakho: Zama ukuthintana naye kungakadluli isikhathi eside. Lapho wenza kanjalo, qiniseka ukuthi uyiphethe incwajana ethi Yini UNkulunkulu Ayifunayo? Mbonise uhlu lokuphakathi esembozweni ngaphakathi. Makakhethe isihloko esibonakala sithakazelisa kakhulu kuye. Sivuleni niqale ukuxoxa ngesifundo asikhethile.
10 Ukulandelela Lapho Uhambise Khona Omagazini: Uma uye washiya ipheshana kanye nomagazini, nakhu ongase ukusho lapho uphindela: “Ngakwazisa kakhulu ukuthatha kwakho umagazini INqabayokulinda ngenkathi ngikuvakashele. Mhlawumbe uye waqaphela ukuthi igama eliphelele lalo magazini lithi, INqabayokulinda Ememezela UMbuso KaJehova. Namuhla ngithanda ukukuchazela ukuthi uyini lo Mbuso nokuthi uyosho ukuthini kuwe nomkhaya wakho.” Yibe usuvula incwajana ethi Yini UNkulunkulu Ayifunayo? esifundweni 6. Uqala ngesigaba sokuqala, funda futhi uchaze okuningi kangangalokho ongakwenza ngesikhathi umninikhaya anaso. Yibe usuhlela ukuphinde ubuye ngolunye usuku nizosiqedela isifundo.
11 Ungaphelelwa Ngamapheshana: Umbonisi wenkonzo nabazalwane abaphatha izincwadi bayolwela ukuba kuhlale kunesitokwe esanele sepheshana elithi Yazi IBhayibheli ngaso sonke isikhathi ebandleni. Amanye mawabe sekhukhwini noma esikhwameni osiphatha njalo, emotweni, emsebenzini, esikoleni, ngasemnyango endlini yakho—nomaphi lapho engatholakala kalula khona. Akubuzwa ukuthi kumelwe ube namanye esikhwameni sakho sasensimini ukuze uwasebenzise lapho uthola umuntu ongaxoxa naye ngeBhayibheli.
12 Kwangathi UJehova Angabusisa Imizamo Yethu: Umgomo oyisifiso sawo wonke amaKristu ungukufundisa othile iqiniso. (Math. 28:19, 20) Kumanje-nje, ingabe sikhona isifundo seBhayibheli sasekhaya osiqhubayo? Uma sikhona, ungakwazi yini ukuthola isikhathi sesinye isifundo esimisweni sakho samasonto onke? Uma kuwukuthi okwamanje asikho isifundo osiqhubayo, akungabazeki ukuthi ufisa ukuba naso. Thandaza kuJehova ukuba abusise imizamo yakho yokuthola othile ongamqhubela isifundo. Yibe ususebenza ngokuvumelana naleyo mithandazo.—1 Joh. 5:14, 15.
13 Sinethuluzi elisha lokuqala izifundo! Zijwayelanise nalo. Lihambise ngokukhululekile. Yenza konke okusemandleni akho ‘ukuba usebenzele kokuhle, ucebe emisebenzini emihle, ube nesandla esivulekile, ulungele ukwabelana . . . nabanye’ lokho okufunde eZwini likaNkulunkulu.—1 Thim. 6:18.
[Ibhokisi ekhasini 4]
AMATHUBA OKUHAMBISA IPHESHANA
◼ Ezingxoxweni zansuku zonke
◼ Lapho othile amukela izincwadi zethu
◼ Lapho kungekho muntu ekhaya
◼ Lapho senza izimpindelo
◼ Lapho sihlangana nothile uma sifakaza emgwaqweni
◼ Lapho sifakaza ensimini yezamabhizinisi
◼ Lapho sifakaza ngokwethukela
◼ Lapho sibhala izincwadi
◼ Lapho sigibele izinto zokuhamba zomphakathi
◼ Lapho kufika othile ekhaya
◼ Lapho sikhuluma nezihlobo, omakhelwane, esisebenza nabo, esifunda nabo nabanye esijwayelene nabo